طبق اسلامك.....تنعم بحيلتك

[ابوعمار]

 

بســم الله الـرحمــن الرحيــم

 

موضوعنا النهارده عملي شويه ومحتاج تنفيذ في مشهد بيتكرركل يوم وكلنا بنشوفه وبنكبر وعادي جدا زي مثلا واحده كبيره في السن شايله اكياس او شنط تقيله جدا ومش قادره تكمل او انسان مريض ومش قادر يمشي او واحده حامل وواقفه في الاتوبيس وكل شويه الاتوبيس يفرمل وتتشقلب قدامك وانت قاعد مش في الدماغ او حد راكب ميكروباص بلاش اتوبيس دي وتسيب راجل كبير يقعد علي الكرسي اللي بيتفتح والراجل اتهري تمارين نازل طالع عشان قاعد في السكه وانت قاعد مروق علي كرسيك

 

بجد دي مش شهامه ومش بنكلم الشباب بس لاء البنات كمان لو حد محتاج لازم نساعده وخليكم واثقين ان المساعده دي حتترد ليك في الدنيا قبل الاخره لان الخير مبيروحش ابدا ومش جايز دعوه حد من اللي انته ساعدته تتحقق وتدخل بسبب دعوته الجنه وجايز عملك الطيب يفضل لحد انته بتحبه وربنا يردهالك فيه امك او ابوك حد يساعدهم زي القصه اللي في سوره الكهف بتاعه الخضر لما بني السور اللي تحته كنز الايتام وكان ابوهما صالحا ربنا حفظلهم حقهم بعمل ابوهم الطيب

 

وتعالوا بقي نتعاهد اننا حندور علي اللي محتاج مساعده ونعرض عليه بقلب ويارب يوافق كمان يدينا الثواب ده ويكون اتفاق مابينا نتقابل بيه يوم القيامه ويارب نتقابل في الجنه