اعمل نفسك ميت

[ali desoky]

اعمل نفسك ميت

 

 

 

 

اعمل ميت ..ماهي مش حاجه جديده عليك

دور الميت فعلا دور متفصل ليك

عندك بدل العين اتنين ..وبتستعمي

عندك بدل الودن اتنين ..ومبتسمعش

حتي اما بتتكلم خايف...صوتك م الخوف ميسمعش

عندك مخ..لكن دايما ضاربو السلك مبيجمعش

 

 

 

خليك ميت..وافضل دايما هز دماغك..حاضر طيب هز دماغك

افضل هز لحد الهز ما هيجيب داغك

خليك ميت واوعي تفكر ولا تحسبها

حد يشيل هم الدنيادي وهو سايبها؟

ما انت سايبها

كل شويه تقول خربوها

وانت اللي بـ موتك دا خاربها

 

 

خليك ساكت ..وان حبيت تتكلم مره

قول وانا مالي

قول واتداري فـ ضل الحيطه

علق خوفك علي شماعتك

قول انا عايز اربي عيالي

 

خليك ميت ولا ليك لازمه

متداس فوق راسك بالجذمه

سايب خيرك

فـ ايدين غيرك

يتهنا به

اه وجنابه

بيشيلك من ازمه لـ ازمه

عملك رعب من العصافير

بعدين جيه دور الخنازير

والازمات اهي جايه كتير

وانت مع اخواتك بتقابلو

الازمات لابسين طراطير

 

تعرف نفسي تقوم من موتك

وتقول لأ بعزم ما فيك

قولها وربك هيقويك

خايف ليه؟

خايف لما تقولها تموت؟

يعني هتفرق؟

ما اديك ميت

 

 

 

منقول

[رجل من الصحراء]

راائع

كل عام وانت بخير