ماذا تعرف عن حياة الديزاينر!؟، بعض الخواطر

[dr_mido 53]

حياة المصمم

السلام عليكم ورحمة الله وبركاتة ، كيف حالكم ، النهاردة حكلمكم شوية عن حياة الديزاينر او المصمم ... اكيد هتكلم عن المصمم الى بيحب التصميم مش الى واخدها "سبوبة " او الشباب ال ... ما علينا ، هحاول اختصر عشان وقتكم !ـ

اولاً ...

 

 

انواعة

 

المصمم الخطى ( المصمم الكرسى !)

المصمم الكرسى هو شخص نمطى قليل الابداع يتطلب اخراج عمل جيد منة ان يجلس بجوارة شخص ما على "كرسى " يطلب منة الاشياء بصور معينة و يرى ما يفعلة المصمم، حتى ينتهى المصمم ويقول "كده ؟" وهكذا حتى ينتهى التصميم وهناك اصدار سىء جداً من هذا النوع يسمى بالـ مصمم الماوس ( المشيرة ) هو المصمم الذى يتحول الى ماوس فى الحاسوب وعلى العميل ان يقول كل كبيرة وصغيرة لاتمام التصميم حتى ان العميل ينبة المصمم الى المسافات بين العناصر بنفسة ! ( وده طبعاً مش هنتكلم علية فى البوست ده )

 

 

المصمم الديناميكى (بولى-ديزاينر) .

هذا النوع الاكثر فاعلية واكثر ابداعية،,وغالبا وصل لهذه المرحلة من "كتر المرمطة" فهو من نفسة يطور نفسة و يتعلم مهارات جديدة وعندة احلام كثيرة، لا يحب القيود فى اغلب الامر ويحترم رغبة العميل، لكنة عنده نظرة موضوعية، وله قوة تأثيرية فى تصميماتة سواء على الجانب القياسي او التقنى او الابداعى عموماً

 

 

شخصيتة

من كل المصممين الى شفتهم والى اقلهم مكانة "انا" واعوذ بالله من كلمة أنا، لقيت ان حياة المصمم متقلبة جداً، فهو مودى الى درجة عالية جداً ومع ذلك فإن اغلب المصممين المحترفين او الى بجد بيحبوا المجال بتبقى شخصيتهم مرحة الى حد كبير، يبتسم كتير، يهزر كتير، يرى الامور بصور مختلفة غير اغلب الناس، وده مش معناه انة تافة بالعكس بس دية افضل شخصية هو بيحب يعرض نفسة بيها وبتنم عن جمال داخلى، أكيد غير جمال الى نعرفة ! فهو عنفوانى روحانى رومانسى منطقى متقلب !

 

 

بصمتة

زى كل فنان، المصمم الناجح لية موتيفا او طريقة شبة معروف بيها او هية معروفة بية، حاجة مرتبطة بشخصيتة فى تكوينة للعناصر، رؤيتة للاشياء، حبة للالوان معينة، تكوينة و افكارة ومعتقاداتة، كل مصمم بيبقالوا "حتة بتاعتة هوة" ، المصممين الناجحين بيعرفوا "يشموا ريحة بعض" – تعبير "كلابى" بس الى حد كبير صحيح، يعنى ليا صديق بيقلى انا بعرف موسيقى عمرو خيرت من قبل ما اشوف اسم المؤلف، وده طبعاً من ريتم معين يمكن الموسيقار ده بيتبعة، بنفس الاسلوب المصمم لية بعض الحاجات المعروفة و المحبوبة بالنسبالة الى بيحب يستخدمها والى ليها طابع مؤثر و جيد فى نفس الوقت .

 

 

هدف

اغلب الى شفتهم من المصممين الناجحين والى ليهم بصمة زى مقلنا بيبقى ليها اهداف واضحة واهداف غير واضحة، والاهداف على الجانبين بيكونوا الهدفين ايجابيين الى حد كبير ، اغلب المصممين شفت منهم من يقوم بأعمال خيرية كتير عن طريق التصميم و منهم من لة اهداف وطنية كتير ده بجانب طبعاً التقدم و التطور فى المجال ويمكن مساعدة السائلين فى اى شىء فى المجال .

 

 

دقة المصمم

المصمم الجيد بعد فترة بيجد صعوبة فى التصميم لسبب بسيط، انة بقى معروف و ان بقى صعب "يعك" اى حاجة و يرميها ! بالعكس، بقت الانظار تبص " هو فلان عمل دا " فبقى يركز و يززوم إن و أوت كذا مره عشان السمعة و عشان الضمير وعشان الاسم وعشان كل حاجة .

 

 

التطور من اجل التطور

المصمم الى بيحب التصميم بيميل لاى شىء فية تصميم، حتى ولو مش مجالة، يعنى مصمم ويب ممكن تلاقية بيتعلم تصميم انتريور و تصميمات ثلاثية الابعاد او بيتعلم الرسم او الكتابة بالخط العربى او تصميم البوسترات او عمل مونتاج او مؤثرات، مش من اجل شىء سوى تحسين قدراتة من اجل التحسين والابداع

 

 

أصدقائة وعلاقاتة و شبكاتة

المصمم الجيد عملة نادرة فى بلدنا ( مش عارف لية الصراحة ) لكن الموضوع بدا يتحسن مع سهولة برامج التصميم !، لكن مكنش اغلب اصدقاء المصمم زمان مصممين بالعكس كان ممكن يبقى الوحيد فى عيلتة و يمكن فى منطقتة الى بيعرف يصمم شىء، لكن المصمم عندة مجموعة مختلفة من الاصدقاء الى فى الغالب بيكون عددهم اكتر من الطبيعى وده لعدة اسباب ذكرت منها شوية ذى شخصيتة و اهدافة و اشياء اخرى .

 

 

من اصدقاء المصمم، الناس الكبيرة !

ممكن يبقى فى ناس شغالة فى الشركة بقالها سنين ويجى مصمم يقعد سنة و يعرف كل الناس دية و يبقى صديقهم الصدوق حتى ما فيهم اعلى ناس فى الشركة شئناً بطريقة غريبة ! مش كده وبس ده علاقاتة بتمتد برغم كل القيود لتجتاز حدود الشركة للعملاء برضا او رغم انف الشركة طبعاً، اغلب العملاء ( بيحبوا ) يعرفوا المصمم ويقعدوا معاه او يكلموه فى التعديل مباشرة بعد ما الوسيط الى فى الاغلب ما بيكنش بينقل الصورة بشكل واضح يفشل فى اول كام محاولة من التعديلات المنقولة عن العميل ... بكده المصمم بيلاقى نفسه قاعد فى شركة تانية كبيرة و بيتكلم مع ناس تانيين و تبتدى تتبادل الاتصالات لحد ما تكون صداقات اللى فى المستقبل بتنفع و تتحول لاعمال تانية و صداقات اكتر و اكبر وهكذا .

 

 

شبكة من المعارف

فى وقت معين يصبح المصمم على معرفة بشبكة كبيييييرة من الناس كلها وأماكنها و تحديثاتها حتى ان يمكن اغلب الشركات عارفة المصمم بأسمة وهو عارفها بأسمها و أسماء المسئولين الكبار فيها، بل يمكن يكون اتعامل معاها بشكل او بأخر سواء مباشر او غير وبكده بيفاجأ كل يوم بشىء غريب وان فلان الى يعرفة يعرف اصلا فلان و فلان ده كان صاحبة الى هو اصلا عرفة فى شركة فلان و ... ويرجع يقول صحيح " الدنيا ديقة ! "ـ

 

 

المصمم "عسول" الشركة !.

المصمم بكل الصفات السابقة بيتحول لعسول الشركة "مش زى السكرتيرة طبعاً " لكن الى اقصدة ان اغلب الشركات حتى شركات التصميمات بيبقى المصمم الجيد فيها "ديك البرابر" و بما ان هوه ده افضل شخص، فبتلاقى الانظار رايحة الية كده بطريقة غريبة، او زى فيلم "البيضة و الحجر" بتيجى الناس تقصدة بالاسم انة هوه بذاتة يعملهم التصميم خصوصاً المبرمجين، بما ان شغل المصمم شغل اساسى فى تصميم واجهات البرامج والخلفيات و بما ان المصممين فى شركات البرمجيات بيقى عددهم اقل بكتير من المطورين بيكون ده الوضع، وبما ان بعض المبرمجين مبيبقاش عندهم "حتة" التصميم دية فى الحسبان يعنى ممكن يعملك تصميم واجهة لو شفتة "تـ ...." فبالنسبالهم المصمم ده "الماجيستك !" والى هو بيحول ال ...

 

 

أينبوت "فسيخ" اوتبوت "شربات"

وأكتر شىء بيعقد المصمم فى حياتة هو قلة وضوح المطلوب وقلة المصادر، العميل بصحى الصبح وقرر انة يعمل تصميم لشركتة، لكن العميل عندة شعار الشركة بس على الكارت الشخصى بتاعة، والشعار ده من سنة 80 ق.م وكان رسمة جدة قبل ما يتوفاه الله وهو بيحتضر على ورقة جرنال وبعد كده خدوها وكبروها عند مصور وعملوها شعار و المفروض ان الراجل المصمم المحترم ياخد الكارت ده و يعمل منة "بوابة " على الانترنت ! هو مش مطلوب منة حاجة غير انة يعمل كل شىء ممكن او مش ممكن يتخيلة العميل ويتخيل شغلة اية و يفهم المجال ده اية المهم فية عشان يعرف يعملة التصميم "العالمى السحلمى " الى يليق بالعميل الى مش "عارف هو عايز اية" فى الاغلب .

 

مش كده وبس !...

 

العميل بعد ما بيشوف بتبتدى "عينة تبربش" وده معناه حاجتين ! اولا ان العميل فهم، ثانياً ان فية وابل من التعديلات " انت هتضحك عليا بقة عشان تبيع التصميم ! " و تبتدى دورة التعديلات حتى يحصل حاجة من اتنين يا العميل يتوهم من شغلك وقدرتك فعلاً ، يا يمل من كتر ما زهقك من كتر التعديلات !

 

 

المصمم بنى أدم برضة !

الناس بتفتكر ان المصمم ده "مكنة صور جى بى جى " و السؤال الدائم "فين التصميم" ... على اساس ان التصميم ده واحد+واحد بيساوى اتنين ! يعنى انت مبتفكرش و مبتدورش ، ده حساب مثلثات ... انا مش عارف لية الشعور ده عند المديرين الى فعلا مش بيفهموا كويس وده متوقع طبعاً لان فى ناس فعلاً واخدة التصميم ده "شغلانة " و "بوظوا" سمعة المصمم المحترم

 

 

 

المصمم نظرتة معقدة !

المصمم لما بيجيد اشياء كتيرة فى التصميم "عنية بتتحول " الى عين دجيتال كده زى افلام الخيار العلمى أو الماتريكس ، بمعنى ادق، ان المصمم لما بيشوف اعلان مثلا فى التلفزيون او فى الشارع مش بيشوفة زى الناس كإعلان والسلام، لاء ! ده بيفضل "يزووم اين" ويقرب كده من كل حتة فى التصميم ويركز ويقعد "يحلل" ده اية وبتاع اية و الفكرة كويسة والا لاء و التصميم والاخراج و الاضاءة و طريقة ال .. ووضع ال ... والفجوالز و البرامج وال .... حتى بيفضل "يشمشم" مين الشركة الى عملا اخراج و يبتدى يديلة "ريت" او تقييم بأه و اية ...يخزنة فى قاعدة بياناتوه المتحركة – ده كلة وهو سايق عربيتة رايح الشغل او وهو متشعبط فى الميكرو"باظ" ـ

 

 

نفسة فى اية

نفسة تبقى الدنيا كلها جميلة، تصميماتها افضل من كده، نفسة يغير كل شىء شكلة وحش لشىء جميل او على الاقل كويس، اعتقاداً بان التصميم الجيد هو اكثرهم سهولة فى الاستخدام واعطاء الرسالة بدون تكلف فى الرسوم و مستوى ابهار الجرافيكس وفى جميل المجالات و انماط الحياة، تصميم الشوارع البيوت الهدوم العربيات الافتات الاشارات السندوتشات الموبايلات والانتيكات واى حاجة اخرها "ات "ـ

 

اه نسيت، ممكن يبقى نفسة فى تابلت او اى-فون احياناً ! مش عارف لية !ـ

حاجة تانية، الحرية، انة ممكن ياخد "لابتوبة" و يشتغل من قدام البحر عشان يبدع، التغييرلازم !ـ

 

 

اكتر شىء بيكرهة

الاستغلال، عدم الفهم، معاملتة كمكنة زيروكس بالالوان، تحول الجزء الابداعى والفنى عندة لمهنة روتينية، حضور وانصراف، عدم التطوير، تجويعة وتعنيفة ووضعة فى "اوضة الفيران"!!! اعتقاد انة مغرور احياناً على "عكس" الحقيقة أو فى "بعض" الاوقات و اخيراً التعديلات الغير منطقية والغير معدودة و اتباعة فى بعض المواقف للحكمة " اربط الديزاين مطرح ميقول الـ ...."ـ

 

هذا واترككم بعد هذه الخواطر واسف على الاطالة مع العلم ان هناك بعض الاختلافات النسبية حسب شخصية كل مصمم بس هذه الحاجات الى شبة مشتركة والله اعلم .

 

 

 

 

للامانة منقول لأنه عجبني جداً وحبيت أنكم تقروه إن شاء الله

 

أخو كم ومحبكم ف الله

dr_mido

[El-Saher Fantasy 21]

اكتر حاجة عجباني ف الموضوع ده انه عامل زي لما تفتح صفحة الأبراج وتقرى مواصفات برجك وتقعد "تمصمص" وتقول "آه والله صح"

وكمان أنه حسسني اني مصمم من أساسه

تعالوا بقى نفكر بالعكس

ياريت اللي حابب التصميم ومش عارف يظبط نفسه أومش عنده المهارات والخصائص دي يتصنعها

يعمل نفسه فاهم يعني لحد ما يتعود عليها ويبقى فعلاً يقدر يعملها وتبقى جزء من شخصيته

خصوصاً الأجزاء دي

شخصيتهم مرحة الى حد كبير، يبتسم كتير، يهزر كتير، يرى الامور بصور مختلفة غير اغلب الناس، وده مش معناه انة تافة

ده هيساعده ف تكوين العلاقات، كسب الخبرات، وممكن تكون سبب ف زيادة شغله وبالتالي مرتبه

 

المصمم الناجح لية موتيفا او طريقة شبة معروف بيها

مع التأكيد ان ده مايبقاش طاغي على كل شغله

لمصمم الى بيحب التصميم بيميل لاى شىء فية تصميم، حتى ولو مش مجالة

العلام حلو وده بيفيد لو كنت جزء في سلسلة عمل، يعني التصميم يعتبر مرحلة من مراحل الانتاج

زي مثلاً اللي بيشتغل في الويب تصميمه لسه هيشتغل عليه المبرمج، وزي شركات انتاج البرامج التعليميمة اللي بتستعمل الفلاش وزي ... وزي ...

هو لو عرف الناس اللي قبله واللي بعده بتشتغل ازاي، هيعرف يقلل من نسبة التعديلات على شغله، غير انه هيبقى فاهم هو بيعمل ايه وليه

 

يفضل "يزووم اين" ويقرب كده من كل حتة فى التصميم ويركز ويقعد "يحلل" ده اية وبتاع اية و الفكرة كويسة والا لاء و التصميم والاخراج و الاضاءة و طريقة ال .. ووضع ال ... والفجوالز و البرامج وال .... حتى بيفضل "يشمشم" مين الشركة الى عملا اخراج

مش عيب اني اتعلم من غيري وكمان ده هيساعد بعد كده ف انه يبقاله أسلوبه المستقل

 

اسف للإطالة بس الموضوع مفيد جدا وكان لازم أوضح الحاجات دي

جزا الله كاتب الموضوع الأصلي خيراً

وجزا ناقله خيراً كثيراً

 

تم تعديل December 15, 2010 بواسطه El-Saher Fantasy