حبيتك لإلتزامك ... حبيتك لاحترامك

[يارب الجنة 7]

الشعر ده جميل جدا بس طويل شويتين اقرأوه بس وهيعجبكم كتير ان شاء الله

 

 

 

حبيتك لإلتزامك . . . . . . . . . . . . حبيتك لاحترامك

حبيت فيكي التواضع . . . . . . . . . . . . والعزة اللي ف كلامك

مبسوط منك لأنك . . . . . . . . . . . . إسلامك كل همك

أنا fصلي قابلت بابا . . . . . . . . . . . . واداني فكرة عنك

وسألته عن طباعك . . . . . . . . . . . . إن كانت يعني هادية

فحكالي عن سماعك . . . . . . . . . . . . لكلامه وانت راضية

وازاي بتسلي نفسك . . . . . . . . . . . . بذكرك وانت فاضية

وحلاوة صوت تلاوتك . ... ....... . . وازاي بتكوني شادية

 

 

 

وسألته إن كنتي فاهمة . . . . . . . . . . . . معنى كلمة زوجين

قالي هتكونوا ورقة . . . . . . . . . . . . مطبوعة نسختين

غني كنت أو فقير . . . . . . . . . . . . ليك عند بنتي دين

سرك هيكون في بير . . . . . . . . . . . . معرفش مكانه فين

تفضل دايماً كبير . . . . . . . . . . . . في نظرها حبتين

لو جيت بفلوس كتير . . . . . . . . . . . . تطمن جت منين

 

 

 

هتكون دايماً معاها . . . . . . . . . . . . سيرتك هتكون هواها

والشوق اللي ف خيالك . . . . . . . . . . . . تلقاه لحظة لقاها

لو جيت زعلان ف مرة . . . . . . . . . . . . إرمي همومك وراها

ومهما شوفت بره . . . . . . . . . . . . مش هتشوف مستواها

واطمن يابني خالص . . . . . . . . . . . . عقلها مافيهوش تفاهة

وزي ما هي بنتي . . .. . . . . . . . . . بنت حماتها وحماها

 

 

وسألته عن ولادي . . . . . . . . . . . . منك هيكونوا إيه؟

قاللي هيكونوا عادي . . . . . . . . . . . . فسألته يعني إيه؟!

قاللي العادي إللي كان . . . . . . . . . . . . عند الناس من زمان

العادي بتاع سراقة . . . . . . . . . . . . وحذيفة بن اليمان

العادي بتاع أسامة . . . . . . . . . . . . وابن الحكيم لقمان

ده العادي بتاعنا إحنا . . . . . . . . . . . . بنربي عليه عشان

لو جينا ولا رحنا . . . . . . . . . . . . هنقابل الرحمن

عمرك ما تخاف عليهم . . . . . . . . . . . . ولادك في الأمان

أنا بنتي هتربيهم . . . . . . . . . . . . ع السنة والقرآن

هتشوف ابنك بيصحى . . . . . . . . . . . . مادام سمع الأذان

ينزل في الفجر يقرا . . . . . . . . . . . . بالسجدة والانسان

هتشوف في حجاب بناتك . . . . . . . . . . . . العفة والإحسان

هتشوف إزاي مراتك . . . . . . . . . . . . هتعينك إنت كمان

 

 

 

 

وسألته عن حياتك . . . . . . . . . . . . من قبل الالتزام

قال أتذكر في ليلة . . . . . . . . . . . . مش فاكر أنهي عام

أذان الفجر أذن . . . . . . . . . . . . وقالتلي سيبني أنام

فدخلت الأوضه جوه . . . . . . . . . . . . أجيب منها الحزام

وعبال ما رجعت تاني . . . . . . . . . . . . كات رجعت ف الكلام

الله يجازي الشيطان . . . . . . . . . . . . خلاها تقول أنام

بس اطمن خلاص . . . . . . . . . . . . دلوقتي بقت تمام!

 

 

 

قلتله طيب ياعمي . . . . . . . . . . . . يسعدني أقولك إني

بطلب بنتك ونفسي . . . . . . . . . . . . تناسبني وترضى عني

راح شادد فجأه لبسي . . . . . . . . . . . . وقلب وشه وسألني

 

 

حافظ كم جزء يابني . . . . . . . . . . . . وقاري كم كتاب

احكيلي كده عن مؤتة . . . . . . . . . . . . أوغزوة الأحزاب

وسمع كم حديث . . . . . . . . . . . . في الأخذ بالأسباب

وكمان سمعلي آيه . . . . . . . . . . . . ذكرت فيها الدواب

ولو شايفها صعبة . . . . . . . . . . . . قللي بتاعة الذباب

واحكيلي حلم يوسف . . . . . . . . . . . . وبراءة الذئاب

واخواته لما جولوه . . . . . . . . . . . . دخلوا من أنهي باب

واديني فكرة برضه . . . . . . . . . . . . بتقبض كم ثواب

وناوي ازاي تحسن. . . . . . . . . . . أنا شايفك لسه شاب

 

 

وسأل نفسه وسألني . . . . . . . . . . . . هيعوز إيه يعني مني؟

لو عندي كل حاجه . . . . . . . . . . . . وديني مش شاغلني

أحسن لك تنسى بنتي . . . . . . . . . . . . ومهرك مش لازمني

قلتله صبرك ياعمي . . . . . . . . . . . . وبراحتك امتحني

يبقى اما أسأل تجاوب . . . . . . . . . . . . خليك دايماً فاهمني

سألتك وانت ساكت . . . . . . . . . . . . خليتني أظن ظني

وفضل يسأل واجاوب . . . . . . . . . . . . وعشان خاطرك عصرني

وظهرت النتيجة .. . . . . . . . . . . . وبفضل الله قبلني

 

 

قاللي مقبول في نظري . . . . . . . . . . . . مبروك عليك ياسيدي

لكن في نظرها هي . . . . . . . . . . . . نجاحك مش بإيدي

وهي زمانها راجعة . . . . . . . . . . . . من تمرين السويدي

خليك قاعد شوية . . . . . . . . . . . . استنا لما تيجي

هعملك من إيديا . . . . . . . . . . . . كباية شاي صعيدي

 

 

سابني وقعدت أفكر . . . . . . . . . . . . هل ممكن ترفضيني

طاب قولي حتى أفكر . . . . . . . . . . . . مش يمكن تفهميني

وفضل مخي يلاعبني . . . . . . . . . . . . يجيبني ويوديني

وخايف من المقابلة . . . . . . . . . . . . مرعوب بينك وبيني

ودق الباب في ثانية . . . . . . . . . . . . وشوفتك مرة تانية

مش قادر أنسى يومها . . . . . . . . . . . . وفاكر كل ثانية

 

 

ونده والدك عليكي . . . . . . . . . . . . عشان أول لقاء

دخلتي وشوفت وشك . . . . . . . . . . . . عليه نور الحياء

نور والله فعلاً . . . . . . . . . . . . مش نور بودرة وزواء

كان أول مرة أخاف . . . . . . . . . . . . من فتنة النساء

أخلاقك مش عادية . . . . . . . . . . . . وجمالك كان شفاء

 

 

قعدتي جنب والدك . . . . . . . . . . . . وسألتيني وجاوبتك

وفكل مرة أجاوب . . . . . . . . . . . . كنت باشوف ابتسامتك

ف أقول من جوه نفسي . . . . . . . . . . . . يارب أكون عجبتك

وبعد شوية قمتي . . . . . . . . . . . . ندهت عليكي مامتك

ورحتي دخلتي جوه . . . . . . . . . . . . وراح وراكي والدك

وانا قلت مش مروح . . . . . . . . . . . . غير لما أكون خطبتك

 

 

وابوكي جاني تاني . . . . . . . . . . . . وقرب من وداني

لابس كرفته سوده . . . . . . . . . . . . وبدله لون فراني

المنظر يعني كله . . . . . . . . . . . . ميدلش على التهاني

قلتله مالك ياعمي . . . . . . . . . . . . من فضلك قول عشاني

عرقي غرقلي كمي . . . . . . . . . . . . سايبني ليه أعاني

قاللي مستني إيه . . . . . . . . . . . . فين إيدك إديهاني

البنت مش موافقة . . . . . . . . . . . . تتجوز حد تاني

 

 

كان أول مرة أعرف . . . . . . . . . . . . إزاي الناس بتفرح

سعادتي كات غريبة . . . . . . . . . . . . مش ممكن هقدر أشرح

من كتر حبي ليكي . . . . . . . . . . . . نويت أضحي وادبح

رحت اشتريت خروف . . . . . . . . . . . . وكان خروف بينطح

ده أخيراً هبقى جوزك . . . . . . . . . . . . وشجرة صبري تطرح

 

 

خطوبتنا كات بسيطة . . . . . . . . . . . . مكانش فيها زيطة

وفرحنا كان في جامع . . . . . . . . . . . . يعني مش خلطبيطة

ومامتك جت في يومها . . . . . . . . . . . . ورقعت كام سويطة

هاتولي بنتي منه . . . . . . . . . . . . دي مش فاهمة العبيطة

إنه هيخطفها مني . . . . . . . . . . . . وهتوحشني الغتيتة

 

 

صعبت عليا مامتك . . . . . . . . . . . . الموقف كان شديد

لكن فعلاً خطفتك . . . . . . . . . . . . ورحنا مكان بعيد

فاكرة ولا انتي ناسية . . . . . . . . . . . . أكيد فاكرة أكيد

من يوم ما بقيتي زوجتي . . . . . . . . . . وانا متهني وسعيد

معايا ف كل يوم . . .. . . . . . . . . . ويوم لؤاكي عيد

عمرك ما دقتي نوم . . . . . . . . . . . . وانا تعبان أو مريض

فلوسي كات بتكتر . . . . . . . . . . . . والخير عندك يزيد

وعامله ليه دفتر . . . . . . . . . . . . ومرتبه المواعيد

وبفضل الله قدرتي . . . . . . . . . . . . وجبتيلي الوليد

وبعديها بشوية .. . . . . . . . . . . . جبتيلنا عليه يزيد

وبعديه جت سمية . . . . . . . . . . . . وآخرهم كان حميد

 

 

بدعيلك كل يوم . . . . . . . . . . . . وأفضل أعيد وازيد

ربيتي عيالي دول . . . . . . . . . . . . ع القرآن المجيد

طول عمرك وانتي صافية . . . . . . . . . . . . قلبك لون الجليد

أخلاقهم مش عادية . . . . . . . . . . . . طلعنلك مش بعيد

وليد دلوقتي ضابط . . . . . . . . . . . . ومعاه رتبة عقيد

ودعوة قلبي صابت . . . . . . . . . . . . ويزيد أهو مات شهيد

وبنتك صيدلية . . . .. . . . . . . . . وحميد أصبح معيد

الله برحم أبوكي . . . . . . . . . . . . راجل من نوع فريد

كل اللي قاله فيكي . . . . . . . . . . . . أنا عشته بالتحديد

 

 

عشت معاكي فى حكاية . . . . . . . . . . . . أحلى وأجمل رواية

حكايتي كات معاك . . . . . . . . . . . . وحكايتك كات معايا

اديتك كل عمري . . . . . . . . . . . . وهمك كان رضايا

وعمرك خدته منك . . . . . . . . . . . . وقربك كان دوايا

وخلاص العمر راح . . . . . . . . . . . . راحت أيام صبايا

ومسافر رحله صعبة . . . . . . . . . . . . وزادي مش كفايه

مش عاوز أشوف دموعك . . . . . . . . . . بالذات ف يوم عزايا

أنا عارف إنتي عارفة . . . . . . . . . . . . إن الموت مش نهاية

دي لسة الرحلة طالعة . . . . . . . . . . . . والموت خط البداية

إدعيلي يمكن أوصل . . . . . . . . . . . . وأشوف هناك حمايا

أنا عارف إنه فيها . . . . . . . . . . . . محجوزله هناك سرير

وسلامي في النهاية . . . . . . . . . . . . أنا خلصت الحكاية

لو يوم فكرتي فيه . . . . . . . . . . . . إقري شعري وغنايا

وأمانه ف كل مرة . . . . . . . . . . . . تدعي لي بالهداية

عسى ربي بدعائك . . . . . . . . . . . . يغفر ليا الخطايا

 

يارب يعجبكم عايزة التقييم

[عاشق الصداقه 525]

يا خبر أبيض

بسم الله ما شاء الله ولا قوة إلا بالله

إللى كتب الكلمات دى رااااااااااااااااااااااااااااااائع بجد

 

والله من أجمل وأحلى ما قرأت وأعجبنى جداً جداً جداً

بجد بجد - جزاكِ الله كل الخير أختى الفاضله - وتم طبعاً تقييم الموضوع

ويااااااااااااااارب يرزقنى وشباب المسلمين بزوجه صالحه زى كده

 

حافظ كم جزء يابني . . . . . . . . . . . . وقاري كم كتاب

احكيلي كده عن مؤتة . . . . . . . . . . . . أوغزوة الأحزاب

وسمع كم حديث . . . . . . . . . . . . في الأخذ بالأسباب

وكمان سمعلي آيه . . . . . . . . . . . . ذكرت فيها الدواب

ولو شايفها صعبة . . . . . . . . . . . . قللي بتاعة الذباب

واحكيلي حلم يوسف . . . . . . . . . . . . وبراءة الذئاب

واخواته لما جولوه . . . . . . . . . . . . دخلوا من أنهي باب

واديني فكرة برضه . . . . . . . . . . . . بتقبض كم ثواب

وناوي ازاي تحسن. . . . . . . . . . . أنا شايفك لسه شاب

 

هى الإمتحانات دى اللى لو الواحد دخلها يطلع منها على قسم الشرطة مش بس بـ ض ج

 

ربنا يستر

وبجد بجد جزاكِ الله كل الخير وفى إنتظار موضوعاتك الرائعه فلا تحرمينا ..

ولو حضرتك تعرفى إسم كاتب الشعر ده ياريت أعرفه

تحيتى وتقديرى

[ali desoky 391]

خطوبتنا كات بسيطة . . . . . . . . . . . . مكانش فيها زيطة

وفرحنا كان في جامع . . . . . . . . . . . . يعني مش خلطبيطة

ومامتك جت في يومها . . . . . . . . . . . . ورقعت كام سويطة

هاتولي بنتي منه . . . . . . . . . . . . دي مش فاهمة العبيطة

إنه هيخطفها مني . . . . . . . . . . . . وهتوحشني الغتيتة

 

 

 

جزاك الله خيرا

ان شاء الله

[dr_mido 53]

بجد جزاكي الله كل خير أختنا الكريمة ع نقلك لمثل هذا الشعر

 

وإنه لمن أجمل ما قرآت في الشعر بسم الله ما شاء الله

 

أدعو الله أن لا تحرمينا من مواضيعك المميزه بارك الله فيكي

 

أخوكي ف الله

dr_mido

[يارب الجنة 7]

شكرا لكم على الرد والتشجيع  جميعا  ا

 

 

لشاعر ده مدوخ مصر كلها محدش عارف اسمه خالص لو عرفته أكيد هعرف حضرتك

 

 

 

  انتظروا باقي المواضيع وجزاكم الله خيرا

تم تعديل January 2, 2011 بواسطه يارب الجنة

[عاشقة الفردوس 161]

اللـــــــــــــــــــه ....اللــــــــــــــــــه...اللـــــــــــــــــــــه ... بسم الله ماشاء الله كلمات ممتازة فعلا انا بصراحة عشت كل الحالات النفسية وانا اقرأ هذه القصيدة

 

بدايه شعرت بالسعادة ثم اعجبت ثم ضحكت ثم حزنت .... ممتــــــــــــــــــــــــــــاز باتم معنى الكلمة جزاكي الله كل الخير على هذا النقل وجازى الكاتب كل الخير على

 

هذا الإبداع في ميزان حسناتكم جميعا

[بسمة الاقصى 78]

رائعة وجميلة الكلمات وبسيطة ومعبرة

 

يارب يرزق بنات المسلمين الهدى والتقى والعفاف والغنى

 

جزاكِ الله خيراً أختنا يارب الجنة وكذلك صاحب الكلمات الرائعة

 

منورانا وبداية قوية ما شاء الله ونتمنى المزيد والاستمراريارب يرزقنا الفردوس الأعلى

[يارب الجنة 7]

أشكركم شكرا جزيلاعلى المرور الجميل

 

 

اللهم ارزق شبابنا بزوجات صالحات

[«۞۩ أبو سليمان ۩۞» 179]

أختي الكريمة يارب الجنة

 

بارك الله فيك و اعزك و اكرمك

 

 

كلمات رائعة ... جعله الله في ميزان حسناتك

 

 

اللهم ارزق كل شباب المسلمين الزوجات الصالحات و كل بنات المسلمين الازواج الصالحين

 

اللهم امين

 

تم تقييم الموضوع

 

جزاك الله خيرا

 

[الحياه 20]

جميله.... شهيه ... طعمها رائع

 

أنا بإذن الله مهري سيكون سورة البقره

[يارب الجنة 7]

جزاكم الله خيرا جميعا 

 

 

 

الحمد لله أنه عجبكم

[يارب الجنة 7]

جزاكم الله خيرا جميعا 

 

 

 

الحمد لله أنه عجبكم

[dr.tamema 0]

• السلام عليكم ورحمةالله وبركاته

  
  ربنا يرزقك الجنة
  اكثر من رائعة تسلمى

[mercy 2]

جزاك الله كل خير

بجد ...كلمات رائعه ....بسيطه لكن عميقه.... وليها مخزى

حقيقى رغم انه طويل بس كنت مستمتعه بقراءته جدا .

[نونا19 28]

تسلمي يا حبيبتي

موضوع رائع جدا

جزاكي الله كل خير

[فخورة بنقابي 30]

موضوع أكثر من رائع

جزاك الله خيرا أختي يارب الجنه