رسالتى لكل مصرى ,,, احتكم لصوت العقل

[Dr.A7MD 130]

 

 

رسالتى لكل مصرى ,,, احتكم لصوت العقل

 

 

 

 

محدش فينا يقدر ينكر أن اللى بتمر بيه مصر دلوقتى يعتبر فتنة من أكبر الفتن اللى ممكن تشوفها البلاد

 

بس للفتنة دى أصول وتاريخ ,,, وعشان تقدر تحكم يبقى لازم تكون قادر تفكر كويس جداً وتشوف بعقلك قبل عينيك

 

هكلمك بموضوعية شديدة وأنت تقرر هتبقى مع أو ضد

 

مش هكدب عليك وأقولك أنا حيادى وكل الكلام الفارغ ده ,,, محدش فينا حيادى بنسبة 100 % ,,, كل واحد فينا بتكون له قناعة ومرجعية وبيكون عنده مدى فى الحوار مع الآخر سواء مداه ده واسع أو ضيق

 

ومش هلعب على وتر العاطفة الحساس عندك لأن اللعب بالعاطفة بيخلق حالة تغييب عقلى على كافة المستويات تخليك تصدق مثلا أن الإنسان هو اللى عض الكلب وليس العكس !!!

 

كلامى هيكون عبارة عن نقاط وهسيبلك الحكم فيها بعقلك ودماغك وأنت تقرر ,,, هبعتلك إشارات معينة تفتحلك موضوعات كتير وأنت بعقلك تكمل بقية الصورة

 

رسالتى لكل مصرى ,,, [ رسالة للنظام - رسالة للثورة والمعارضة - رسالة للشعب المصرى ]

 

 

رسالة للنظام

 

- 30 سنة حكم ,,, شوف الإمارات والسعودية وتركيا والصين وأندونيسيا وماليزيا وبقية الدول التى لا تمتلك ربع اللى تمتلكه بلادك و اللى بدأت مسيرة التنمية معاك ,,, هى وصلت فين وأنت وصلت فين !!!

 

- افرض معايا كدا ومعلش فى اللفظ أن دماغ كل الشعب المصرى تفكيرها سىء والشعب كله عنده سوء نية وأنت الوحيد الطاهر النقى العفيف الشريف ,,, معينتش ليه نائب للرئيس من زمان وقطعت حبل أفكار الشعب فى قضية التوريث وحسمت الأمر ده من زمان ,,, لو كانت نيتك صافية !!!

 

- أيام حادثة القديسين ,,, طلعت بعدها بساعات ... المرة دى والشعب كله كله كله مولع طالعلى بعد 4 أيام وكمان هتقولى أنا شلت الوزارة !!! ,,, هو الشعب ده ايه بالظبط ,,, بنى آدمين ولا حيوانات !!!

 

- تخيل معاى كده ,,, الداخلية كلها ماسكة الحكاية من يوم 25 يناير وعددها وعتادها يخليها تتمركز فى أى مكان لأى فترة زمينة ممكنة وحصل فى حركات احتجاجية كتير جداً ,,, هل تقدر الداخلية كلها تنسحب بقرار حبيب العادلى بس !!! ... هو مجنون عشان يدى قرار انتحارى بالشكل ده لوحده بدون ما تكون حاجة جايه من فوق !!!

 

- أحمد عز كاتم على نفس الشعب كله من زمن طويل ,,, وياما الناس قالت وكتبت وصرخت ,,, مال وسلطة وأمانة حزب وطنى وبجاحه قدام الوزارء فى المجلس ,,, لو قلنا بحسن نية إنك متعرفش كل ده فده فى حد ذاته مصيبة عشان بصفتك رئيس حزب حتى مش رئيس جمهورية ,,, أما بقى لو كنت عارف وشايف وساكت ومطنش فدى جريمة كافية أن الشعب يحاكمك ,,, معاى ولا لا !!!

 

- زمان كنت بتقول أن المادة 76 كدا زى الفل عشان لازم رئيس الجمهورية اللى يجى لازم يكون تقيل مش أى حد شبيح يطلع يمسك الحكم ,,, طيب دلوقتى بتعرض تعديل المادة دى ليه مدام أنت مقتنع أن شكلها حلو اوى كدا !!! ,,, هتقولى مطالب شعب ,,, طيب الشعب طلب الحاجة دى من يوم بس !!! ,,, ولا هى السياسية لا تحتكم لا للأخلاقيات ولا لمبادىء عشان كدا قررت تغير !!!

 

- زمان كنت رافض الحوار مع الإخوان المسلمين وبتعتبرها جماعة محظورة وهى سبب كل البلاوى [ مع إنى لا مقتنع لا بسياسات الإخوان ولا بكل تحركاتهم بالمرة ] ,,, دلوقتى بتتحايل عليهم إنهم يدخلوا فى حوار معاك ليه !!! ,,, سبحان الله بجد عليك يا شيخ

 

- طالع كل شوية تتنازل قطرة قطرة !!! ,,, منت لو حاسس أن كل اللى عملته وكل سياساتك كويسة والشعب هيكون معاك واللى فى الميدان دول اللى انت لسه مصر على إنهم فئة مندسة ومغرر بيهم ما هم إلا أقلية وبقية الشعب معاك طالع ليه تغير كل حاجة عملتها !!!

 

- فين رجالتك من أول يوم تظاهرات !!! ,,, لا حكومة ولا رئيس مجلس شورى أو شعب ولا بتوع حزب وطنى أو أى حد ولا حتى أنصارك من الشعب ,,, كنت واقف بطولك والكل تخلى عنك ليه ساعتها !!!

 

- خلينى معاك فرضاً أن دى مؤامرة خارجية سواءً إسرائيل أو أمريكا أو إيران أو اى دولة ,,, هل تعتقد أن لو ليك رصيد عند الشعب أو الشعب واثق فيك كانت المؤامرات دى هتؤثر فيه !!!

 

- ياما مرت علينا ظروف اقتصادية كتير أيام بناء السد أو النسكة أو حرب أكتوبر ,,, وكان سهل جداً جداً أن مصر تقع ساعتها لو دخل عليها أى مخطط خارجى ,,, اشمعنى دلوقتى !!!

 

- قولى صحيح ,,, الناس اللى بره باعتك فجأة كدا ليه !!!!

 

- اه صحيح ,,, رمز مصر ميصحش أنه يتهان أبداً ,,, بس الأولى أن رمز مصر يحترم مصر والمصريين قبل كل شىء ,,, صح ولا لا !!!

 

- بتقول إنك مستعد للحوار بقلب مفتوح ,,, هل تقبل إنى أحاورك وأناقشك على مرأى ومسمع من الشعب كله !!!

 

 

 

 

رسالة للثورة والمعارضة

 

- فى كل ثورة بتطلع ناس شبيحة ,,, كل واحد بمصلحته بقى ,,, ناس جعانة - ناس عاوزه الخراب - ناس متسلقة على أكتاف غيرها ,,, كل ده مش بيعيب الثورة فى حاجة ,,, بالمعنى البلدى كدا عمرك ما هتكسب بدون خساير ,,, بس شوف نسبة مكاسبك لنسبة خسايرك

 

- ثورة شبابية عفوية طاهرة نقية ,,, حلو اوى اوى ,,, يوم - اتنين - تلاتة ,,, بعد كدا لازم تبقى ليها قيادة ولازم تبقى كل الشعارات موحدة ,,, وفى فرق كبير بين المطالب والشعارات ,,, الشعارات تتضمن المطالب وليس العكس ,,, وحد الشعارات كلها حتى لو اختلفت المطالب عشان الرسالة تبقى واحدة ومتخليش حد يقولك أهو أنا لبيت المطلب الفلانى على أساس الشعار الفلانى

 

- بتعجب اوى اوى من المعارضة ,,, طووووووووووول عمرها منقسمة ومختلفة بين بعضها ,,, اه أنا أقبل كذا ,,, التانى لا أنا مش قابل كذا ,,, دى فرصة ذهبية يا جماعة ,,, متخلوش النظام يستغل الحتة دى

 

- كل الناس بتاعه المعارضة حرقت نفسها ,,, بس هل يا جماعة حد شاف عمرو موسى وسط الزحمة دى كلها !!!! ,,, الراجل قاعد هااااااااااااادى جداً وبيقول كلام قوى جدا وتقيل جدا جدا جدا ,,, هل رخص نفسه فى وسط كل فوضى المعارضة !!!! ,,, كل الكروت اتحرقت بصراحة ولو جات الإنتخابات الجاية موقف عمرو موسى ممكن يحسم الحكاية بشكل شبه مطلق ,,, خلى بالك من الحتة دى كويس

 

- كل اللى حاصل دلوقتى ,,, إزاى تضرب شرعية الناس اللى فى التحرير دول ,,, هتلاقى لعب سياسى من أوسخ وأقذر ما يمكن عشان تحول النظرة للناس دى من أنها ثورة شعب بجد لثورة ناس خاينة مش عاوزه مصلحة البلد

 

- مفيش تغيير بالساهل يا جماعة ,,, على قد طول المدة [ 30 سنة ] على قد التمن اللى هيندفع على قد المكسب اللى هتكسبه بعد كده ,,, دلوقتى احنا بنربى جيل جديد بتكلفة زمنية بسيطة جداً مادية كبيرة جداً بس قادر على القفز بمصر بعد كدا لمستويات بعيدة جداً

 

 

 

 

رسالة للشعب المصرى

 

- الطيبة والتسامح والحنية اللى فيك متنفعش فى كل الأوقات ,,, فى أوقات بتحدد فيها مسيرة أجيال مش جيل واحد ,,, ومش أى حاجة تتنازل عنها ولا فى أى وقت

 

- النظام دارس نفسية الشعب المصرى كويس بكل طوائفه بكل أعماره وعلى الأساس ده بيعامله بسياسة التجويع والخوف والترهيب عشان يسلم بكل سهولة

 

- النظام نجح بأسلوب شيطانى فى أنه يضرب مصر بحتة مش مجرباها أبدا ,,, حتة الأمن والأمان ,,, شعب مصر طول عمره حاسس بالأمن والأمان ,,, لما تضربه فى الحتة دى اللى مش متعود على غيابها لازم هتحصله صدمة أكيد ,,, النظام بيقول للشعب [ شفتوا من غيرى حصلكم ايه !! ]

 

- كفاية يا شعب أنك تدور على مصلحتك فى الأكل والشرب وتفكر هنجيب رغيف العيش بكره بكام ومنين ,,, ده ربك اللى بيرزق مش حسنى مبارك

 

- أغلبية الشعب المصرى اللى ساكت مغلوب على أمره ,,, بيقول دايماً [ طيب لو وقع هنعمل ايه !!! ,,, لو قعد هنعمل ايه !!! ,,,, لازم نمسك العصاية من النص عشان نعرف نعيش ] ,,, يا شعب أقسم بالله الحكاية مش حكاية سنة ولا اتنين ,,, دى ثقافة سياسية لأجيال بعد كدا ولازم نحددها من دلوقتى

 

- بتعجب وبأسف والله العظيم لما أشوف شباب مغيب تماماً يقولك [ يا عم انا مع اللى يوظفنى ويشغلنى ويجوزنى ... مليش دعوة بأى حاجة تانية ] حرااااااااااااام والله بجد

 

- ليه مصر يا شعب على أن اللى خلق حسنى مبارك مخلقش حد غيره استغفر الله العظيم ,,, ليه قاصر تفكيرك أن محدش شايف صالح مصر غير حسنى ولا حد فى بر مصر كلها بيحب مصر قده !!! ,,, ليه التفكير الغبى ده

 

- مهما يحصل ومهما أعارض ومهما أقول ,,, مينفعش أشتم وأقول سافل وكلب وأطلع أجيب صور وأحط جزم عليها ,,, مهما يكن الإنسان حتى ولو كافر مينفعش أهين خلقة الله بالشكل ده ,,, مفيش شيخ أو داعى مهما كان معارض شتم أو سب أو قال كلمة ميسمحش بيها لا الإسلام ولا الشرع ,,, قول زى منت عاوز ,,, ظالم - مستبد - ديكتاتور ...... إلخ ,,, كله إلا السب والشتم والاستهزاء بخلقة الله ,,, خليك متمسك بدينك وخليك حضارى

 

- لو كان فى تخطيط ومؤامرة على مصر من الخارج ,,, محدش ليه كشف المخطط وتمت إذاعته إلا بعد خطاب حسنى الأخير !!!!

 

- هل تعقلها بدماغك كده ,,, واحدة تطلع تقول أن اتعلمت فى مكان كذا وكذا وكذا إزاى يتم إسقاط الحكم وهى عارفه ومتأكدة أن دى تعتبر خيانة للوطن وهتتعدم فيها ويكون مبررها الوحيد أنها سمعت حسنى بيقول 30 سنة خدمت البلد وهعيش وأموت هنا وهىء هىء واااااااااااء وااااااااااااء وكل الهبل ده !!!!

 

- اشمعنى يا شعب يا صامت طلعت مظاهرات تؤيد حسنى بعد خطابه الأخير المدغدغ لعواطف الشعب ,,, الناس دى مطلعتش ليه من يوم 25 يناير أو جمعة الغضب يوم 28 أو حتى بعد كدا !!! ,,, فكر بعقلك

 

- كلام واحد من جوا الحزب الوطنى ذات نفسه بيقول [ عندنا دلوقتى 3 معضلات : معضلة سياسية - معضلة أمنية - معضلة دستورية ] ,,, هل يقدر حسنى يعمل كل حاجة معملهاش فى الـ 30 سنة اللى فاتوا فى ظل وجود كل المعضلات دى اللى ممكن لأى حد أو جهة أنه ينقض أى قرار يتم اتخاذه فى الفترة دى لوجود المعضلات دى وندخل فى دوامة ملهاش آخر !!! ,,, ومين السبب فى المعضلات دى ,,, الشعب هو السبب !!!!

 

- يطلع واحد ومش عاوز أوسخ لسانى وأتلفظ ألفاظ مترضيش الناس ,,, يطلع واحد فى التلفزيون الرسمى الموجه توجيه أعمى لحماية النظام ويقول [ جزمة مبارك فوق راسى وفوق مصر ] !!!!

 

- فى استراتيجيات الحروب بيقولك [ لما تكسب أرض إياك تتزحزح من عليها ,,, تقدر تناور بقواتك ,,, ترجع تتقدم ,,, تعمل مهما تعمل بس عينيك دايماً أن الأرض دى متروحش من تحت رجليك ] ,,, حاول تفهم ما بين السطور هتلاقى المعنى بوضوح

 

- بعد كل ده هقولك كلمة واحدة بس ,,,, أنت العامل المؤثر الوحيد فى بقاء النظام أو زواله ,,, التاريخ هيكتب عليك ,,, نجحت أم فشلت ,,, فاقت الأمة أم ماتت

 

 

 

 

أحب أختم بكلمة سمعتها لأردوغان

 

[ محدش واخد منها حاجة ,,, كلها مترين فى متر وكفن هنتلف فيه ]

 

حدد يا شعب مصيرك بإيدك

كتبه فى يوم 3/2/2011

 

طبيب مواطن مصرى حر

 

ط / أحمد حافظ أبو الحمد

تم تعديل February 3, 2011 بواسطه Dr.A7MD