(عزيزى المغفل - إسمعنى للضرورة)

[حياتى من اجل ربى 22]

عزيـــــــــزى المغفل....

 

, تحية طيبة و بعد

 

 

 

 

 

اذا كانت احد أهدافك لوقف المظاهرات هيه

 

فرصة تانية .. البلد هتخرب .. الامان .. دول أجنبية

 

يبقى يا ريت تقرا لحد الاخر

 

 

 

 

 

عزيزي المغفل .. أنا برضه مغفل .. كنت زمان بقول اني

 

انسان .. مسلم .. مصري .. عربي

 

اكتشفت اني لو حبيت أمارس شعائر الاسلام و أصلي الفجر و أربي دقني هيعتقلوني

 

و لو حبيت أعمل فيها مصري و خايف على الوطن و أحارب الفساد برضه هيعتقلوني

 

و لو العرق العربي نفر و قلت فلسطين أو تونس برضه لازم يعتقلوني

 

و لو طالبت بأبسط حقوقي الاّدمية : هواء نضيف .. ميه نضيفة .. أكل نضيف .. مسكن و جواز

 

مش بلاقيها .. و لو اعترضت عشانها برضه هيعتقلوني

 

 

 

 

 

عزيزي المغفل .. تسمح تقولي احنا ايه ؟؟؟؟؟؟؟؟

 

ايه هيه هويتنا ؟ لازمتنا ايه ؟ عايشين ليه ؟

 

 

 

 

 

عزيزي المغفل .. ياللي فرحان بخطاب الرئيس و شايف انه كفاية

 

يعني - بفرض انه هينفذه - مش غرييييييييب شوية يعني اننا لازم نموّت مننا ييجي 500 واحد

 

عشان البيه يبدأ ينطق و يحس ان فيه - لا سمح الله - شوية فساد

 

و بتقول نديله فرصة تانية !!!!

 

اه صحيح .. عندك حق .. ما الراجل - - ماباقالوش غير 30 سنة بس في السلطة

 

يعني كان هيلحق يعمل ايه ؟؟ ده الواحد على ما يفطر و يشرب الشاي بياخدله 5 سنين

 

 

 

 

 

 

 

عزيزي المغفل .. ياللي بتقول كده البلد هتخرب .. و السرقة و النهب و عدم الامان

 

ده أنت مغفل جدا

 

حادثة واحدة من حوادث الفساد زي حادثة العبارة مات فيها اكتر من 3 أضعاف اللي ماتوا في الاسبوع ده

 

و السبب في موتهم سافر بره و همه سابوه عشان تبعهم

 

 

 

 

 

عزيزي المغفل .. هوه انت فعلا كنت عايش في امان ؟؟

 

انت كل اللي كنت بتعمله انك بتطبق قاعدة " يحدث للاخرين فقط

 

يعني انت بس مش متخيل

 

ان اخوك يموت في عبّارة

 

او اختك تولع في القطار

 

او امك و ابوك يتهانوا و يتبهدلوا من أي امين شرطة مايسواش 3 مليم

 

او جوازتك تتفركش عشان عز بيه محتكر الحديد

 

او حد قريبك ينتحر لانه لا لاقي شغل ولا عارف يتجوز

 

او يمكن مش مدرك ان موقفك من القضية الفلسطينية ممكن يتغير عن كوننا ولاد عم اليهود

 

و اللي ينكسف من بنت عمه مايخدش منها ريال

 

او يمكن باصص للحظة دي بس يعني مش مفترض انك هيجيلك

 

سرطان من المبيدات المسرطنة

 

او فشل كلوي من الميه الملوثة

 

او على المدى القريب ممكن تنضم لضحايا وباء اسفكاسيا الخنق - افتكاس يا - و ده لو حصل

 

سوء تفاهم مع المخبرين اياهم

 

او لو حظك وحش شوية ممكن يضطروا يعزبوك لحد ماتموت

 

 

 

 

 

انت ليه مستبعد انك يحصلك اي حاجة من دول ؟

 

همه اللي حصلهم كده ماكانوش مصريين زيك ؟ ماكانوش بني ادمين زيك

 

اراهنك كمان انهم كانوا مستبعدين الافكار السوداوية دي زيك تمام

 

عرفت انت ليه مستبعد الحاجات دي ؟؟ معرفتش ؟ عشان مغفل

 

 

 

 

 

 

 

عزيزي المغفل .. ياللي شايف ان فيه ديموقراطية و حرية رأي

 

فيه فرق بين حرية الرأي و تسفيه الرأي

 

الموضوع ببساطة ان رأيك مالوش وزن طالما همه المتحكمين في كل حاجة

 

خلاص يا حبيبي اتكلم و ألطم و اشتم و عض في الارض

 

هل ده هيقلل من فلوسهم ؟ هل ده هيقلل من نفوذهم ؟

 

يبقى هيتعبوا نفسهم و يمنعوك ليه ؟

 

هيه المشرحة ناقصة قتله ؟

 

 

 

 

 

 

 

عزيزي المغفل

 

لما يكون نظام فاسد و متخلف

 

و تعمّد اثارة الفوضى عشان الناس تقول خلاص رضينا بيه

 

و يمسكوا امناء شرطة بيحاولوا يسرقوا

 

و ظباط بيحاولوا يقتلوا و يحرقوا في زي مدني

 

و بلطجية و هتيفة مأجورين من الحزب الوطني و مجلس الشعب بهدف قتل و ضرب المتظاهرين

 

حتى بعد الخطاب العظيم للرئيس و ده يدل على مصداقيته الشديدة

 

و بعد كل ده نقول نديله فرصة تانية 6 شهور

 

و نسيبه يعدل اللي هوه عايزه من الدستور حسب رؤيته العظيمة

 

يبقى تقدر تقول و بكل فخر : أنا مغفل جدا جدا جدا

 

و تكون دي هيه هويتك .. و من حقك تموت في سبيل افكارك

 

 

 

 

 

 

 

و ختاما

 

يقول الامام عليّ ابن ابي طالب

 

الناس من خوف الذل في الذل .. و الناس من خوف الفقر في الفقر

 

 

 

 

 

تم تعديل February 3, 2011 بواسطه حياتى من اجل ربى

[ابن تيميــــة 158]

بسم الله الرحمن الرحيم

 

اختي الكريمة / حياتي من اجل ربي

 

 

بجد موضوع جميل هيبين حاجات كتير جدا لناس كانوا غافلين عنها

 

 

 

اسال الله ان يولي علينا خيارنا اللهم امين

 

جزاكِ الله خيرا

تم تعديل February 3, 2011 بواسطه ابن تيميــــة

[«۞۩ أبو سليمان ۩۞» 179]

جزاك الله خيرا أختي حياتي من اجل ربي

 

موضوع رااااااائع

 

فليعتبر اولوا الالباب

 

 

 

 

[عاشق الصداقه 525]

جزاكِ الله الجنة أختى الفاضلة (حياتى من أجل ربى)

 

والله والله والله - انا صعبان عليا شبابنا جدا جدا جدا جدا

 

زى ما صعبان عليا شبابنا فى ميدان التحرير - صعبان عليا شبابنا المخدوع بأفكار ما - تخزنت على فترات كبيره ،، علشان كده صعب تغييرها فجأه

 

لكن ندعو الله بالخير أولاً ،، وأن تخرج مصر والأمة كلها من هذه الازمة بما فيه الخير للبلاد والعباد ،، وبعدها هنسعى لمصر أفضل - وشباب أفضل - وفكر أفضل - ونحاول على قد ما نقدر بكل ما أوتينا من قوة

 

نبنى فكر أبناء بلدنا ،، لأن سلوك أبناء بلدنا الحمد لله مشرف ،، ووعيهم أصبح بفضل الله مشرف - لكن فيه ثغور خطيره جدا جدا لازم يتم ترميمها - ودى هتكون مهمه صعبه طويلة المدى ربنا يقدرنا عليها

 

منه لله حسنى - قسم الشعب نصين ،، وقسم شباب الفكر الواحد نصين ،، وخلى البلد كلها تطيح فى بعضها - حرب فى الشارع وحرب ع النت وحرب فى البيوت والله ما بين مؤيد ومعارض بعد خبث ومكر فى خطابه وتصرفاته واعلامنا الرسمى المنحل

 

حسبنا الله ونعم الوكيل - لكنى متفائل خير

 

جزاكِ الله كل الخير

[حياتى من اجل ربى 22]

حسبنا الله ونعم الوكيل - لكنى متفائل خير

 

 

 

ياااااااااااااااااااااااااااارب يا عاشق الصداقه ياااااااااااااارب

 

 

دكتور المنتدى

 

جزاك الله خيرا - ويارب ينصر كل المظلومين

 

شكرا ابن تيميه ويارب يصلح الاحوال

يارب يكرم الجميع

تم تعديل February 4, 2011 بواسطه حياتى من اجل ربى