Dr.A7MD 130 قام بنشر March 24, 2011 (تعديل) رسالة إلى العقلاء مخبيش عليكم ,,, كنت هسمى الحلقة دى " رسالة إلى الفكر المتعفن " لكن فى آخر لحظة غيرت تفكيرى ومحتوى الرسالة ككل عشان تطلع بعنوان " رسالة إلى العقلاء " لأنى مؤمن بأن النقاش مع الجاهل هيضرك ويتعبك ويقرفك وياريت بفايدة ,,, فبلاش منه أحسن وعلى فكرة الجهل مش عيب ولا هو شتيمة زى ما البعض معتقد ,,, زيها زى لما حد يقولك ( تفكيرك متخلف ) ,,, لا بيشتمك ولا بيعيب فيك ,,, إنما بيقولك أن تفكيرك متأخر عن الوضع الحالى ,,, لكنها للأسف هى ثقافة الناس كدا طبعاً يا جماعة ملناش سيرة اليومين دول إلا التعديلات الدستورية واللى حصل فيها وقلنا وعدنا وزدنا لغاية لما لسانا وجعنا " هنحترم الرأى الآخر وإرادة الشعب المصرى " المهم كان عرس جميل جداً وعيد لحرية الشعب المصرى ككل فى ناس سمتها انتصار غزوة الصناديق !!! ,,, بس أنا مصّر على أنه كان عيد لكل المصريين حصل بعد كدا أن بعض اللى قالوا نعم اتهموا اللى قالوا لا بأنهم علمانين وأنهم أخدوا فلوس من أمريكا طبعاً الناس دى مقعدتش ساكتة كدا ,,, طلعوا على بتوع نعم وبعضهم قال أن بتوع نعم كانت عليهم وصاية دينية والكلام اللى عارفينه كلكم أكيد وأنا مش هخبى وأقول أنا اخترت ايه ,,, أنا يا جماعة اخترت لا عشان كيت وكيت وكيت وعن قناعة شخصية على حد علمى وآخر ما ورد إلى مسامعى أنى الحمد لله مسلم موحد بربى مؤدى لصلواتى وشعائرى الدينية وبتمنى من ربنا أنه يتقبلها منى وبحب بلدى وبعشقها ومش عميل على فكرة لا لأمريكا ولا لإسرائيل ومش قبضت ولا دولار من أمريكا على فكرة وعلى فكرة مش أنا لوحدى اللى كدا على فكرة ,,,, فى ناس كتير بالشكل ده فرضاً أن عندنا واحد كافر يا جماعة ,,, وفكر تفكير منطقى سليم فى حاجة ما ,,, وتصادف تفكيره مع تفكيرى ,,, مين فينا الغلطان ؟؟؟ هل لمجرد التشابه فى التفكير ,,, يتشاور عليا ويتقال " الواد ده ايه ظروفه ؟؟ " ,,, ولا أقول عشان فلان الكافر قال كذا فى الحاجة الفلانية يبقى المفروض أنا أعمل العكس لمجرد إنى لازم أختلف معاه ؟؟؟ على فكرة ,,, أنا دايماً أسلوبى فى كل نقاشاتى يبقى أسلوب تحليلى استنباطى تساؤلى استفهامى استغرابى ( إلا فيما يخص الشرع والأحكام الدينية ) عشان توصل الفكرة بطريقة مش توجيهية أنا كنت عاوز أكتب كتيـــــــــــر وكلام كتير كتير كتير لكن ,,, بعد ما حضرت آخر حلقتين للشيخ محمد حسان " حلقة التعديلات الدستورية " و " لقاء خاص بعد التعديلات الدستورية " قررت إنى مش هكتب خالص ,,, لأن الشيخ الحبيب الله يكرمه قال كل حاجة كنت عاوز أقولها لو أطول أبوس راسه هروح أبوسها والله ,,, شيخى الحبيب محمد حسان بقيت بحبه بشكل غير طبيعى وخاصة بعد الأحداث الأخيرة فى مصر كل اللى عملته إنى عملت مونتاج للحلقة الأخيرة " لقاء خاص بعد التعديلات الدستورية " بكل حاجة كنت ناوى أقولها واتكلم فيها لا هكون أبلغ من الشيخ الحبيب ولا أفصح منه ولا أقدر على توصيل المعلومة منه الفيديو 36 دقيقة ,,, فيه من الكلام والعبر والحكم اللى يخليك تفكر ألف ألف ألف مرة قبل ما تقول أو تنشر كلمة http://vimeo.com/21429724 ( لو مسجل فى الموقع هتقدر تحمل الفيديو مباشرة أو تستعمل برنامج IDM ) على فكرة اللى عاوز يحمل الحلقة كاملة فممكن يحملها من الرابط ده نرجع شوية لورا لحلقة الشيخ الحبيب محمد حسان قبل الإستفتاء " حلقة التعديلات الدستورية " الحلقة دى اتكلم فيها الشيخ الحبيب عن المظاهرات الفوضوية اللى بتحصل فى السعودية ومظاهرات الشيعة فى البحرين ورد فيها على الناس اللى خايفة من المنهج السلفى وايه الفرق بين المنهج السلفى والوهابية وقبل كدا رد فيها عن الدكتور يحيى الجمل وتطاوله على الله سبحانه وتعالى وختام الحلقة كان يتكلم عن التعديلات الدستورية وليه نقول نعم وكل الكلام ده للناس اللى شافت الجزء الخاص بالتعديلات الدستورية بس ,,, أنصحها بمشاهدة الحلقة كاملة حتى يزيد وعيها بقضايا الأمة ده فيديو من اليوتيوب - فيديو واحد " الحلقة كاملة " http://www.youtube.com/watch?v=KxtF_-4pcAw ده تلخيص بسيط لأهم النقاط التى قالها الشيخ الحبيب الجليل والتى يهمنى التركيز عليها - لا ينبغى أن يحتكر إنسان رأياً ولا ينبغى أن نحتكر قولاً وأن نسفه طرحاً - قال على بن ابى طالب رضى الله عنه " اعرف الحق تعرف أهله فإن الحق لا يُعرف بالرجال ولكن الرجال هم الذين يُعرفون بالحق " - كنت ولا زلت وسأظل أكن للأزهر كل إجلال وكل إحترام وكل حب وتقدير - السلفية ليست حزباً وليست جماعة ,,, هذا تأصيل فى غاية الأهمية ,,, السلفية ليست حزباً وليست جماعة وليس من حق أى أحد لا محمد حسان ولا غيره ولا أى مخلوق يُنسب إلى هذا المنهج السلفى الربانى النبوى ,,, ليس من حقه أن يجعل من نفسه حارساً على بوابة السلفية ليدخل من شاء وليغلق الباب فى وجه من شاء أبـــــــــــــــــــــــداً ,,, قلت ذلك مراراً وتكراراً وأؤكد عليه الآن - المنهج السلفى منهج ربانى منهج نبوى لا ينبغى على الإطلاق أن نحكم على هذا المنهج الربانى والنبوى من خلال أخطاء بعض المنتسبين إليه - أقر وأعترف وقد أكون من أول من أخطأ فى حق هذا المنهج الربانى والنبوى ,,, قد أكون أول أو من أول من أخطأ فى حق هذا المنهج الربانى والنبوى ,,, ربما بغلظة منى أو بفظاظة أو بقسوة أو بسوء أدب فى طرح أو بسوء تصرف أو بسوء معاملة ,,, أكون بذلك قد أسأت إلى هذا المنهج الذى يحسبنى الناس عليه واستغفر الله عز وجل من أى خلل ,,, لكن لا ينبغى أن نحاكم هذا المنهج الربانى والنبوى من خلال تصرفات خاطئة لبعض المنتسبين إلى هذا المنهج وأنا أقرها وأعترف بوجودها ولا أنكر وجودها على الإطلاق ,,, بل أقر بها - الدعوة السلفية لا تُنسب إلى الوهابية على الإطلاق ,,, إطلاقاً - أرجو العدل والإنصاف فى مرحلة الكلمة فيها تُعمل عملها ,,, فالكلمة خطيرة وأسأل الله أن يرزقنا العدل والإنصاف ,,, إنه ولى ذلك والقادر عليه - احترم احترم إخواننا الأفاضل الذين يقولون لا ,,, لا ينبغى أن نقع فيما نحذر منه ,,, لا ينبغى أن يتصور كل واحد أن رأيه صواب لا يحتمل الخطأ هذا خلل ,,, هذا خلل أن يتصور كل واحد فينا أن رأيه وأن قوله صواب لا يحتمل الخطأ هذا كلام لا يقول به عاقل فضلاً عن عالم ,,, هذا كِبر وعجرفة لا أساس لها لا فى الدين ولا فى الشرع ولا فى العقل ولا على أرض الواقع - نقول نعم للتعديلات الدستورية من باب " تحقيق المصالح وتكميلها وتعطيل المفاسد وتقليلها " ,,, يعنى مش هو ده الأنسب أو الأكمل أو الأفضل ,,, لا ويمكنك متابعة المزيد والمزيد مما قاله الشيخ الحبيب عندما تشاهد الحلقة كاملة وهذه دعوة الشيخ محمد حسان قبل الإستفتاء ,,, انظر ماذا قال الشيخ الحبيب http://www.youtube.com/watch?v=af4tugrglwo وأخيراً أختم بـــ " وشهد شاهد من أهلها " اتصال هاتفى للدكتور عصام العريان المتحدث الرسمى لجماعة الإخوان المسلمين فى برنامج القاهرة اليوم اسمع جيداً لما قاله هذا الشخص المحترم وستعرف أين الحقيقة فى كل ما قيل ويقال وسوف يقال http://www.youtube.com/watch?v=bbDbgb37wOE الشيخ الحبيب محمد حسان قرأ مواد الدستور كاملاً كما قال ,,, فهل أنت فعلت ذلك ؟؟؟ الشيخ الحبيب قال نقول نعم عشان كذا وكذا ولم يقل كما قال إمام المسجد اللى حضرت فيه الجمعة اللى فاتت ,,, قال بالنص وأشهد الله على قولى الصدق ,,, قال " أعداء الإسلام بيقولوا لا ,,, احنا بقى هنقول اه " الدكتور عصام العريان نفى ما قد نُسب إلى الإخوان المسلمين من أنهم قد اتهموا من قالوا لا بالعمالة وتلقى الأموال من أمريكا وأدان كل من قال بهذه الأشياء ,,, فما رأيك أنت ؟؟؟ الدكتور عصام العريان ينفى استخدام المادة الثانية من الدستور للضغط على الشعب ويقول لا احنا ولا السلفيين قلنا كدا ,,, والعلمانيين هو اللى قالوا الحكاية دى وأصلا مكنتش مطروحة للنقاش ,,, فما رأيك أنت ؟؟؟ العلمانية فى نظر الدكتور عصام العريان ,,, ما رأيك فيما يقول هذا الرجل ؟؟؟ ما رأيك فى كل ما قاله الدكتور عصام خلال الإتصال الهاتفى ؟؟؟ قال رسول الله صلى الله عليه وسلم " أرأيت الشمس !!!! .... فعلى مثلها فاشهد " لو كل واحد فكر بس فى الحديث ده قبل ما يقول أو يكتب أو ينشر كلمة ,,, هيراجع نفسه فى حاجات كتير اوى وصل بينا التشدد والتعصب فى الرأى إننا نقول " لو شنودة قال اه ,,, انا هقول لا بالعند فيه " .... " المسيحين بيقولوا لا ,,, يبقى لازم احنا نقول اه " إلى كل متشدد متعصب تعصى أعمى ,,, إقرأ وشاهد واسمع كل ما سبق حتى يتضح كل شىء بالنسبة إليك جاء الإسلام لإنارة العقل وإنتشاله من ظلمات الجهل والتخلف والتعصب الأعمى فكر ولو لدقيقة واحدة ,,, من له المصلحة فى التفرقة بين مسلمى مصر ؟؟؟ الناس دى حاولت تفرق أكتر من مرة بين المسلمين والمسيحين والحمد لله ربنا أطفأ الفتنة مرتين ورا بعض مظنش الناس دى هتحاول نفس الكرّة فى نفس الموضوع ده بالذات بس وجدت التربة صالحة جداً للتفرقة بين المسلمين وبعضهم البعض اعرف العلمانين حق المعرفة ولا ترمى بالإتهامات هكذا بدون دليل وأخيراً أقول أقسم بالله ,,, أقسم بالله ,,, وأنا عمرى ما أقسم ولا أحلف كدب أبدا هفضل بعون الله وقوته شوكة فى حلق كل تعصب وتشدد أعمى مخالف للدين الإسلامى ,,, وهقول الحق لوجه الله فقط حتى ولو خسرت كل الناس " أرأيت الشمس !!! ... فعلى مثلها فاشهد " نقطة ومن أول السطر تم تعديل March 27, 2011 بواسطه Dr.A7MD 1 شارك هذه المشاركه رابط المشاركه شار ك علي موقع اخر
.thumb.jpeg.ee94c38bec01c27eaba8369689bb14ec.jpeg)
