بالفيديو - الأحزاب كانت تريد حذف الماده الثانيه من الدستور !! وإلغاء الاستفتاء

[عاشق الصداقه 525]

بسم الله الرحمن الرحيم

 

فى البدايه أحب أوضح إنى أحترم جميع فئات الشعب المصرى - بس وبصراحه شديده الموضوع ده مكتوب كتنويه هام جداً لكل من قال (لا) فى الاستفتاء على التعديلات الدستوريه

 

طبعاً كل واحد شايف من وجهة نظره إن الخير لمصر فى (نعم) أو فى (لا) - واحنا مش بنعيب فى أى طرف منهم - ودى وجهات نظر والحمد لله بقى فيه حريه كبيره فى الرأى

 

طيب أمال كاتب موضوعى ليه !!

 

أولاً شوفوا الفيديو ده للضروره (وشهد شاهد من أهلها) - وبعد كده تعالوا نسأل شوية أسئله صغيره

 

http://www.youtube.com/watch?v=LzPbGcs8iDE

 

شفنا الفيديو !!

 

طيب إسمعونى بقى ..

 

لما كل رجال الدين الثقات وبكل التوجهات الاسلاميه يقولوا نعم للتعديلات الدستوريه - مش يبقى ده ليه دعوه بالدين !! ومصلحة الاسلام فى مصر !! - ولا انت ده ميهمكش ؟؟

 

انا عارف ان ناس كتير من اللى قالوا (لأ) - مش علمانيين ولا مسيسين ولا اى حاجه من اللى بيتقال ده وانا ضده تماماً ..

 

لكن كلنا عارفين ان كان فيه شبه اجماع من العلمانيين فى مصر على (لأ) ،، وكان فيه اجماع من النصارى فى مصر على (لأ) !!

 

اللى يعتقد ان الموضوع مش عقائدى يبقى سامحونى (بيشتغل نفسه) - النصارى عاوزين الغاء الماده التانيه من الدستور اللى بتقول ان الاسلام هو دين الدوله

 

والمسلمين (اللى يهمهم الاسلام) رافضين ده ،، والحمد لله النتيجه طلعت بنعم بشكل ساحق وده من فضل ربنا علينا وحفظه لدينه فى الأرض

 

طيب أمال برضه بتتكلم ليه تانى !!

 

علشان ناخد بالنا فى المرحله اللى جايه - انت مع مين وعاوز ايه !!

 

الفيديو اللى شفناه وحاجات كتير غيره بتؤكد بنسبة 100% إن العلمانيين والليبراليين وغيرهم وغيرهم بيعملوا بكل جهدهم لطمس الدين الاسلامى فى مصر

 

والاسلاميين بيعملوا بكل مجهودهم بفضل الله للحفاظ على هوية مصر الاسلاميه

 

منجيش بقى باسم الحريه والديمقراطيه والمدنيه والمهلبيه نركن الدين على جنب وكل واحد يتفزلك ويطلع لستة أسباب تخليه مييوقفش مع الاسلاميين !!

 

وتخليه يمشى مع العلمانيين وغيرهم ضد قيام دولة الدين حتى لو مكانش موافق على سياساتهم دى لكن هو شايف ان رأيه كده !!

 

لأ يا إخواننا - الفيديو بيأكد انهم حتى مش عاوزين صوت الشعب هيقول ايه !! - لأنهم عارفين ان الشعب هيختار الدين

 

فاللى بيتكلموا عن الديمقراطيه دول - اول ناس مش بتطبقها لو كانت الديمقراطيه دى مش هتيجى على هواهم - فكفايه مجاراه لنفاقهم بالله عليكم

 

وقول نعم لدولة الدين - قولوا اسلاميه اسلاميه

 

ولكل مسلم - احفظ كويس لايه دى من القرآن الكريم اللى انت مؤمن بيه :

 

قال تعالى ( ومن لم يحكم بما أنزل الله فأولئك هم الكافرون ) المائده 44

 

 

 

حلمنا لتحرير فلسطين مش هييجى غير بده ،، ولا احنا بقالنا سنين عمالين نطلع فى مظاهرات علشان فلسطين وكل واحد عامل نفسه 800 وطنى فى بعض وانه مش راضى باللى بيحصل فى فلسطين وعاوز الريس يتحرك وبتاع - واول ما تجيلنا الفرصه لده هنعمل فيران فجأه !!

 

واللى خايف من تحرير فلسطين والحرب وبتاع لو قامت دولة دينيه - ميقلقش .. الرجاله بس هما اللى هيطلعوا

 

انا دمى محروق جداً للى بشوفه من بعض الناس بجد ،، يمكن لغيرتى على الدين وان نفسى كل الناس تكون مرجعيتها دينيه من الدرجه الأولى

 

سامحونى ان أخطئت - أقسم بالله - أقسم بالله - أقسم بالله أنا بحب الشعب المصرى والشعوب العربيه جدا جدا جدا جدا جدا جدا جدا

 

بس بحب دينى أكتر - ومرجعيتى دينيه - وانا متكلمتش من بعد التعديلات الدستوريه اللى ربنا ستر فيها والحمد لله

 

لكن اتكلمت دلوقتى لما شفت الحرب (ايوه والله حرب) اللى معموله على الفيس بوك وفى الفضائيات لتغييب الدين وتخويف الناس منه ،، والشباب اللى بيدعوا علناً للعلمانيه

 

والشباب اللى بيشتموا فى مشايخنا لدرجه انهم بيتهموهم بالعماله للأمريكان

 

وحاجات كتيييييييييييير - تخلى أقل واجب علينا دلوقتى ( الجهاد ولو بالكلمه )

 

وجزاكم الله كل الخير

[ziad tarek 11]

طبعا اكبر حلم لينا كلنا اننا نحرر فلسطين وان شاء الله هنحط علم فلسطين جنب علم مصر وتونس وليبيا بس ان شاء الله هيكون بالحرب

 

ومعظمنا بييحب دينه اكتر

[عاشق الصداقه 525]

ان شاء الله يا رب

 

بارك الله فيك يا زياد يا غالى - وربنا يكتر من أمثالك ويحقق حلمنا ده يااااااااااااااارب

[ziad tarek 11]

اللهم امين

[Dr.A7MD 130]

السلام عليكم

 

أولاً :- أنا بحييك أخى الغالى أحمد على غيرتك على دينك حتى ولو فى بعض الحالات طريقة كلامك وبعض ألفاظك تُؤخد عليك ,,, بس مدام من دافع الغيرة عن الدين فلا حرج إطلاقاً والله أعلى وأعلم

 

لكن ومتزعلش منى فى بعض الأحيان اللى متكونش ليها علاقة بالدين ولا الشرع ,,, بتكون عصبى بشكل ملفت للنظر وده عن تجربة شخصية معاك مش كلام وبس

 

ثانياً :-

 

كلامك كله على العين والراس وكله نابع عن وعى دينى وطنى ومحدش يقدر يشكك فى كدا خالص

 

انا عارف ان ناس كتير من اللى قالوا (لأ) - مش علمانيين ولا مسيسين ولا اى حاجه من اللى بيتقال ده وانا ضده تماماً ..

 

الحمد لله ,,, أول نقاط الإتفاق أهى ,,, ودى بعتبرها جوهر النقاش فى كل حاجة بعد كدا

 

والشباب اللى بيشتموا فى مشايخنا لدرجه انهم بيتهموهم بالعماله للأمريكان

 

ولا الكلام ده مقبول وكل مسلم ضده تماماً والشباب دول مش حكاية أنهم مع الاسلاميين ولا لا ,,, دول متربوش أساساً على فكرة الإختلاف فى الرأى يكون إزاى

 

اللى يعتقد ان الموضوع مش عقائدى يبقى سامحونى (بيشتغل نفسه) - النصارى عاوزين الغاء الماده التانيه من الدستور اللى بتقول ان الاسلام هو دين الدوله

 

شوف يا كبير ,,, وياريت يتسع صدرك لكلامى وتدينى ابتسامة من ابتساماتك الغلبانة دى اللى بتظهر فى الصور

 

أنت كنت مراهن على مين فى الإستفتاء الأخير ؟؟؟

 

مراهن على النخبة ولا مراهن على المثقفين ولا مراهن على مين بالظبط ؟؟؟

 

أنا لو حد سألنى السؤال ده هقوله مراهن على الشعب المصرى

 

كام يا ترى نسبة المسيحين فى البلد ؟؟؟ عددهم كام ؟؟؟؟

 

ضيف عليهم نسبة العلمانيين والليبراليين واللى غالبيتهم من النخبة مش عامة الشعب المصرى ؟؟؟

 

مين اللى حسم نتيجة الإستفتاء يا ترى ؟؟؟ الشعب ولا النصارى ولا الليبراليين ؟؟؟

 

أقسم بعزة جلال الله أنى أنا عايز مصر دولة إسلامية تطبق الشريعة بحذافيرها ,,, لأنى عارف وواثق أن الشريعة والدين الإسلامى يحترم ويحفظ حقوق أهل الذمة حفظ تاااااااااام

 

كلنا متفقين فى التوجه الرئيسى ( أنا بتكلم عن الناس المسلمة اللى يهمها الإسلام والوطن بعد كدا ) ,,, متفقين فى التوجه الرئيسى ,,, إنما الإختلاف فى إزاى هتوصل للحاجة الرئيسية اللى انت عاوزها

 

كل الكلام اللى اتقال أيام قبل التعديلات الدستورية وأثناءها وبعدها ,,, كل الكلام متعلق بالمادة التانية من الدستور

 

حابب أقولك ببساطة شديدة جداً ,,,, مين الأهبل اللى يقدر يعدل المادة التانية من الدستور ؟؟؟

 

معلش خليك معايا للآخر ,,, مين هيقدر ومين هيقبل ؟؟؟؟

 

أنت بتتكلم عن شعب أغلبه مسلمين ولا نصارى ولا علمانيين ؟؟؟؟

 

أنت بتتعامل مع شعب فاهم ولا شعب عبيط وأهبل وكل ما تعرض عليه حاجة يقولك زى العيال أيوه أيوه بهبل مع الاحترام لكل العيال ؟؟؟

 

أنا هديك مثال بسيط و أهبل بس اقبله منى

 

فرضا يا سيدى والعياذ بالله أنا شخص منحل ,,, وجيت فى فرحك ربنا يكرمك عن قريب يا رب ,,, جيت فى فرحك وقلتلك هظبطلك الفرح برقاصة

 

وأنت طبعاً راجل ملتزم إن شاء الله والفرح إسلامى والدنيا زى الفل تمام التمام

 

هتتهمنى بحاجة من اتنين ,,, يا مجنون يا محشش ,,, وأقدر أقولك أنى ممكن أكون مجنون لأنى مش بحشش أبداً الحمد لله

 

هيكون نفسك ساعتها تضربنى باللى فى رجلك ,,, بس الشكل قدام الناس مش هينفع ,,, بس المهم فى كل ده ,,, هقدر أجيب الرقاصة للفرح ؟؟؟

 

حتى ولو كانت زفتك وسط عماير كلها ناس اللهم احفظنا ولما سمعونى وأنا بقول كدا قعدوا يزيطوا ويهيصوا " رقاصة ,,, رقاصة "

 

والحمد لله أصحاب الفرح واللى جايين الفرح كلهم ناس ملتزمة وزى الفل

 

حتى ولو فرضاً بقيت أهبل أكتر وقلتلك دى بس هتدخل لقاعة النسوان جوا مش هنا " كمبدأ للتحايل الأهبل مثلا "

 

مين اللى هيرضى ومين اللى كلمته هتمشى ؟؟؟؟

 

دى رؤوس الأزهر ذات نفسها ( مع أن بعض الناس ليها تحفظ شديد على آداء الناس دى ) ,,, الناس دى قالت ايه عن المادة التانية من الدستور ؟؟؟

 

كان نفسى حد أى حد ولو من وجه الإنصاف كان يجيب تصريح الشيخ أحمد الطيب والمفتى على جمعة ,,, ولا الناس دى كخة وكلامهم ملوش مدلول ولا يتبصله أصلا ؟

 

http://www.youtube.com/watch?v=YcEyFHAAZ4M

 

http://www.youtube.com/watch?v=r_H-yKEouEE

 

أهو حسنى مبارك وكل النظام مشى ,,, هينافقوا مين الناس دى لما يقولوا أن المادة التانية حاجة من الثوابت ولا يمكن المساس بها ؟؟؟

 

وأنت فى الأول والاخر بتحتكم لمين فى التعديلات الدستورية ؟؟؟

 

أيام التزوير وظلم النظام السابق كانت التعديلات الدستورية ( 76 و 77 ) نزلت للإستفتاء ,,, بعيداً عن التزوير والهبل اللى كان بيحصل كله ده ,,, تقدر تمرر تعديل أى مادة فى الدستور دلوقتى بدون ما تعرضها على الشعب ؟؟؟

 

وخلينى معاك للآخر ,,, فرضا فرضا فرضا يعنى حصل خلاف بعدين على حكاية المادة التانية للدستور

 

وكمان زيد فى الفرض كمان وقول أن نسبة المسيحين والعلمانيين فى البلد حوالى 30 %

 

العلمانيين ليهم شعبيه فى الشارع ؟؟؟؟ جاوبنى

 

هيتبقى مين معانا فى الليلة دى ؟؟؟ ايووووووووووا النصارى عليك نور

 

النصارى لو كاكو ,,,, عارف لو كاكو دى ,,, زى الكتكوت لما يكاكى ,,, لو كاكو مش هيجيبوا الاغلبية لو نزلت المادة دى فى استفتاء عليها لما يتعمل دستور جديد

 

انت قدام شعب مصرى ذكى وزكى وألمعى وعبقرى زى ما قال الشيخ الحبيب محمد حسان

 

شعب مش بريالة يا أحمد ,,, ده الشعب اللى وقع حسنى مبارك فى مدة أكتر الناس المتفائلين مكنش متوقعها

 

فما بالك والدنيا بقت فيها حرية وعدل نأمل أنه يكتمل ,,, هل هتقدر تمشى عليه حاجة مش عاوزها هو ؟؟؟

 

من المنطلق ده أقدر أقولك أن كل المسلمين واللى يهمهم الإسلام قالوا لا ومن مبدأ كمان أننا عاوزين دستور جديد عشان دى ثورة مش هوجة على رأى عمرو موسى

 

بعد كدا النقاش الدائر حوالين الجيش وهيطول فى المدة وحدود مصر والاستقرار وكل الكلام ده مش هتكلم فيه كلمة لأن الخبراء والقانونين قعدوا قالوا فيه كلام كتير وممكن ترجع للكلام ده كله فى أى وقت وتسمع الرأى والرأى الآخر فيه

 

صدقنى ,,, أقسم بالله العظيم أغلب المسلمين متفقين فى الرأى بس طريقة التنفيذ تختلف

 

أنت هتمشى فى سكة كلها طوب وزلط من الأول وأنت هتمشى فى سكة مرصوفة ونضيفة

 

ومش هقول مين سكته سالكة ومين سكته اللى فيها مشاكل ,,, بس فى النهاية الكل هيوصل للهدف الأساسى

 

أنا سمعت لقاء عصام سلطان وكل اللى قاله بالحرف الواحد ,,, ياريت بس يا أحمد تركز على الكلام من الدقيقة 2:50 لحد الدقيقة 3:16 ومن الدقيقة 9:03 للدقيقة 9:25

 

وأظن برضو أنك سمعت كلام الدكتور عصام العريان فى اتصال ببرنامج القاهرة اليوم والكلام اللى قاله كله

 

ومظنش الراجل ده بيقول أى كلام أو كلام تلفزيونات وخلاص عشان يبرد نار الناس ويهدى الموقف

 

http://www.youtube.com/watch?v=bbDbgb37wOE

 

========================================

 

بعد كدا حكاية تحرير الأقصى وتحرير فلسطين

 

ربنا كاتب ده عنده وكاتب مين الناس اللى هتحرر الأقصى وأمتى وفين

 

محدش عالم جيلى وجيلك ولا جيل عيالى وعيالك ولا أحفادى وأحفادك

 

كل اللى علينا بس العمل من أجل ذلك ,,, تعدل حال الأمة الإسلامية الأول على مستوى الشعوب والمجتمعات وبعدين يبقى لينا الحق نتكلم ونقول تحرير الأقصى

 

منكرش أن تعديل حال الأمة على مستوى قيادتها وحكاميها ده البداية ,,, لالالا أبدا ,,, بس ده البداية ,,, لكن الجوهر فى تعديل حال الشعوب والمجتمعات الإسلامية

 

ده هو الفيصل

 

=======================================

 

يا جماعة ,,, أقسم بالله احنا متفقين بس الإختلاف بس فى طريقة الوصول

 

المهم بس أننا نوصل ,,, والله العظيم لا هى نعم ولا لأ اللى حددت مصير مصر

 

الجاى هو اللى هيحدد مصير مصر ,,, لسه احنا مشفناش حاجة

 

وياريت لو فى تدبر وتفكر فى كام حاجة مهمة

 

مين اللى ولع حكاية أطفيح وخلى المسيحين يتظاهروا قدام ماسبيرو وسمعنا الكلام بتاع المادة التانية للدستور بشكل قوى

 

مين اللى مصلحته أنه يفرق بين مسلمى مصر ويخلى الناس ضعاف النفوس تترحم على أيام حسنى مبارك والنظام السابق

 

ياريت لو نفكر يا جماعة فى الحاجات دى كلها

 

ده كان آخر رد ليا كتعقيب فى موضوع التعديلات الدستورية دى ,,, وأظن أن الرد كافى ووافى وحالة النقاش الجميل دى أفرزت كل ما فى العقول من توجهات واعتقادات وأفكار

 

شكراً لسعة الصدر لتقبل النقاش بصدر رحب

 

تحياتى للشعب المصرى

 

تم تعديل March 26, 2011 بواسطه Dr.A7MD