جرافيك نيوز - Graphic News

[Dr.A7MD 130]

 

 

جرافيك نيوز - Graphic News

 

 

 

 

 

برنامج جرافيك مختص بكل حاجة خاصة بالتصميم والجرافيك

 

الهدف من البرنامج ده إطلاع المصمم العربى على كل حاجة تخصه وكل حاجة جديدة فى المجال ده

 

وفى هدف كمان هو إننا إزاى نوصلك لمرحلة إنك تبقى على وعى تام بكل حاجة بتحصل حواليك عشان متبقاش الدنيا كلها بتجرى وإنت واقف محلك سر

 

لا هنجيب برامج ولا لينكات تحميل ولا نعمل مواضيع ولا استنى يا عم على ما ينزلوه فى المنتدى ,,, بطلنا كل ده خالص ,,, إنتهى عصر البزازات والرضعات فى العالم كله من زمان

 

الهدف اللى باصيين له ,,, إزاى تجيب حاجتك بنفسك بدون ما تمد إيدك لحد ولا تحط إيدك على خدك فى انتظار مين يحنن عليك

 

هنساعدك بس ونمسكك أول الخيط وإنت مع نفسك بقى تطلع تجيب آخره

 

بعد كدا حابب تفيد غيرك باللى جبته ,,, اعمل موضوع وظبط نفسك واللى حواليك عشان ربنا يكرمك ويزيدك من فضله وعلمه

 

حابب تكنز وترقد عليه ,,, فوالله يا ولدى مفيش حاجة بتستخبى ولا فى حاجة دايمة

 

بس فى الأول والآخر اسمك اتعلمت تظبط نفسك بنفسك ,,, صح ولا لأ ؟؟؟

 

إن شاء الله البرنامج ملوش معاد محدد

 

وبعون الله كمان هنبقى منفتحين على العالم وهنشوف الدنيا ماشيه إزاى بره ومش هنقعد مكتفين نفسنا وملزمينها بشىء واحد وخلاص

 

هيبقى البرنامج متنوع الأساليب ( نقل أخبار - نقد فنى - رؤى شخصية - ... إلخ ) ,,, وكل ده فى سطور معدودة قليلة ,,, بس الناصح دايماً يفهم ما بين السطور

 

بكدا يبقى خلصنا الزفة الأولانية ,,, ونشوفكم على خير فى أول حلقة

 

تم تعديل May 9, 2011 بواسطه Dr.A7MD

[Dr.A7MD 130]

جرافيك نيوز - الحلقة 1

 

 

 

أخبار جرافيك

 

- شركة أدوبى نزلت يا جماعة مجموعتها CS5.5 ،،، صحيح مفيش جديد فيها يعنى عن الإصدار CS5 وكله عبارة عن تحديثات بسيطة كدا ؛ لكن أجمل حاجة أن Adobe audition CS5.5 البرنامج الرائع فى الهندسة الصوتية نزل وبقى كمان معتمد من شركة أدوبى بشكل أكبر من adobe soundbooth وكمان بقى متفاعل مع برامج تحرير ومونتاج الفيديوهات زى Adobe Premiere ،،، فكل واحد دلوقتى مهتم بمجال الهندسة الصوتية يقدر يحمل البرنامج ولو صعب عليه تفعيله يجى ويقولنا

 

 

رؤية شخصية

- كل حاجة مرتبطة بالتاريخ والحضارة ،،، زمان كانوا بيقسموا مراحل تطور الخط العربى على حسب ظروف الحضارة الإسلامية كان شكلها ايه

 

زمان كان أغلب الفكر الإبداعى التصميمى مُوجه للإنشاء المعمارى والتفنن فى كتابة المصحف الشريف وتزيينه وإخراجه فى أحلى صورة

 

وكان دايماً التصميم العربى يتميز باستخدامه للأشكال الهندسية فى أغلب إن مكنش كل حالات التصميم

 

حتى دلوقتى فى الوقت المعاصر ،،، الحضارة والهوية الإسلامية تطغى بشكل كبير على عقول المصممين العرب

 

على عكس التصميم الغربى ،،، زمان من قبل ما ينبهر بفكر التصميم العربى وأشكاله وأنواعه ،،، كنت تلاقى التصميم الغربى ملوش مرجعية واضحة تقدر من خلاله تعرف مصادر إلهامه ايه

 

لكن دايماً تلاقى التصميم الغربى يعبر بالحالة الرسومية أكتر من الحالة الكتابية ،،، وتلاقى أن أغلب التصاميم الغربية فارغة إلا من شىء بسيط يعبر عن فكرة التصميم بشكل عام

 

دلوقتى أغلب المصممين العرب الناجحين وأغلب المواقع والمنتديات المتخصصة فى عالم التصميم العربى بتحاول تعمل مزيج بين المدرستين

 

هل يا ترى هيجى اليوم اللى ممكن من خلاله عالم التصميم العربى يقدر ينافس نظيره الغربى !!!!

 

والسلام هو خير الختاااااااااااااااااااام

 

تم تعديل May 9, 2011 بواسطه Dr.A7MD

[Dr.A7MD 130]

جرافيك نيوز - الحلقة 2

 

 

أخبار جرافيك

 

طــــــــــــــه حسين

 

 

لا يا جماعة ،،، مش هو الدكتور طه حسين الأديب المعروف

 

معانا شخص عربى ( احتمال كبير يكون مصرى ) ،،، مصمم محترف ،،، مُدرب معتمد من شركة أدوبى وأبل

 

شخص أنا شخصياً أعتبره إضافة كبيرة لعالم التصميم والجرافيك العربى

 

المهندس طه حسين بيشتغل فى الرياض فى أول معهد فى المملكة مختص بأمور الجرافيك والمونتاج والميديا

 

المهندس طه حسين له دورات جميلة جداً ( أدوبى انديزاين - أدوبى اليستريتور - فوتوشوب - آفتر إيفيكت - فينال كت برو - وبرامج تانية كتير )

 

طبعاً المهندس طه حسين له موقع خاص بيه تقدر تدور عليه وتلاقيه

 

وده جزء من لقاء كان معاه فى قناة الراية

 

 

http://www.youtube.com/watch?v=Auk2nk60s0E

 

حبيت إنى أتكلم عن المهندس طه كنوع من الشكر لكل حاجة استفدتها منه ولأنى بعتبره أستاذ من أساتذتى فى مجال التصميم والجرافيك

 

 

إيديال ديزينر - Ideladesigner

 

 

المتابع لموقع إيديال ديزينر هيشوف الإختلاف الواضح والكبير بين ما كان عليه الموقع زمان واللى وصله دلوقتى

 

بعيداً عن الشكل الجميل والتطوير والتحديث ،،، فمحتوى الموقع شهد نقلة كبيرة كانت بالنسباله دفعة كبيرة اوى وسط المواقع المختصة بالتصميم والجرافيك

 

الفضل الكبير فى كله ده هو فريق عمل الموقع ( Team Work ) ،،، والحاجة الأجمل فيه أن مدير الموقع هو الأستاذ المهندس على عبد العظيم

 

الأستاذ المهندس على عبد العظيم صاحب شركة تصميم وجرافيك خاصة فى ساوباولو ( عاصمة البرازيل ) وهو مصرى طبعاً

 

ممكن بزيارة الموقع تعرف معلومات أكتر عن المهندس على عبد العظيم

 

الجديد والجميل فى إيديال ديزينر ،،، هو أنه بدأ ينافس بجدية عن طريق كورسات متلاقيش زيها فى كتير من المواقع

 

زمان كان الموقع بيعرض دروس مجانية ،،، لكل بعد التطوير افتتحوا موقع جديد تحت اسم فنون

 

موقع فنون فيه حالياً كورسات ( غير مجانية ) ،،، كورسات فى غالية الجمال

 

 

كورس التصميم التجارى photoshopix ( مجرب تجربة شخصية ) - كورس ملوش حل بيعلمك شغل الدعاية والإعلان بشكل احترافى

 

 

كورس تصميم اللوجوهات

 

 

كورس الموجراف والموديناميك

 

 

وطبعاً الموقع ( سواءً إيديال ديزينر أو فنون ) بيقدم خدمات كتير جداً لكل من له هواية أو يطمح فى عمل فى مجال التصميم والجرافيك والمونتاج

 

 

دى كانت أمثلة بسيطة لبعض الشخصيات العربية اللى كتير من الناس متعرفش عنها حاجة

 

لنهضة الأمة عاوزين زى الأمثلة دى فى كل مجالات العمل عشان نحس بقيمتنا ونحس إن لينا مكان فى الدنيا الواسعة دى

 

عمرنا ما نقصنا حاجة ولا ناقصين ولا هننقص ،،، الحاجة الوحيدة اللى نقصانا هى الهمة والإخلاص فى العمل

 

حاول تفكر وتسرح بخيالك ،،، الناس دى كانت ايه وبقت ايه وبعون الله هتبقى ايه

 

عاوز تركب القطر ؛ اركب من دلوقتى ،،، مش حابب فخليك من ورا تشوف القافلة وهى بتمشى من بعيد

 

والسلام هو خير الختام

 

تم تعديل May 14, 2011 بواسطه Dr.A7MD