أب وأم بالتقسيط المريييييييح؟؟!!

[بنت مصرية]

بابا مضايقك؟

ماما مزعلاكي؟

خلاص من النهارده كل الكلام ده هيتغير،

عرض خاص جداً ولمدة محدودة من شركة (فاميلكو) دلوقتي تقدر تختار أهلك علي مزاجك،

إيه مش مصدق؟ لأ بجد لازم تصدق،

دلوقتي تقدر تبعت لنا كل المواصفات اللي نفسك تشوفها في والدك أو والدتك وبعد أسبوع يتم التبديل،

ولو طلبت تغيير الإتنين هتاخد عليهم أخ أو أخت هدية من اختيارك، يللا مستني إيه قوم بسرعة

اتصل على .....0900".

هااااه... إيه رأيك؟ أ

كيد بكره هنلاقي كتير واقفين في طوابير مستنيين دورهم عشان يحجزوا، تفتكر العرض ده لو كان بجد كنت قدمت؟

أنا متأكد إن ناس كتير قوي ممكن يجاوبوا بلأ بس لو كان قدامهم الفرصة دي كانوا هيقدموا وهيحاولوا على قد ما يقدروا إنهم يغيروا أهلهم.

طيب إيه رأيك بقي إن العرض ده فعلاً موجود، ومش بس موجود ده موجود من غير حجز ولا غيره، والشركة مقرها الرئيسي عنوانه هو عقلك.

لأ ما تفهمنيش غلط إحنا هنا مش هنناقش ولا هنحكى في كلام سمعته قبل كده كتير، الموضوع إني جاى أبيع لك منتج ومش عاوز منك غير خمس دقايق... بس قبل ما أبتدى أحكي لك عن المنتج، لازم الأول نتفق إنك هتدينى فرصة وتجرب المنتج بتاعي وما تحكمش عليه من غير ما تجربه، موافق؟

السكوت علامة الرضا....

الموضوع بكل بساطة بيتقسم لـ 3 أجزاء:

الجزء الأول، وهو تحب أهلك الجداد يبقوا عاملين أزاي؟

الجزء التاني، طريقة التبديل

الجزء التالت و الأخير، هو ميعاد الاستلام و الصيانة.

نبتدي بالجزء الأول وهو إجابة للسؤال؛ إيه هي المواصفات اللي نفسك تبقى موجودة في باباك و مامتك؟ دي يا سيدي قايمة بالمواصفات اللي ممكن تتوفر فيهم :

 

1.يكونوا بيحبوك

2.لما تحتاجهم دايماً تلاقيهم

3.لا يقولوا لك رايح فين و لا جاى منين

4.يعملوا لك كل اللي إنت نفسك فيه

5.يبقوا بيخافوا عليك

6.ما يتدخلوش في حياتك و لا قراراتك

7.يدولك حرية كاملة في المواضيع اللي تتكلم فيها معاهم أو قدامهم

8.يحترموا وجودك و ما يستهتروش بأفكارك

أعتقد دول أهم الحاجات اللي تحب تكون في باباك ومامتك.

يلا نبدأ عملية التبديل....

طيب الجزء التاني وهو إزاي إحنا هنبدل أهلك ونديلك عيلة جديدة علي مزاجك. الموضوع سهل وبسيط جداً، دلوقتي لو بصينا علي الحاجات اللي نفسك تبقى موجودة في باباك ومامتك هنلاقي مثلا:

إن موضوع إنهم يكونوا بيحبوك دي سهلة جداً لأنها أصلاً كانت موجودة عند باباك ومامتك القدام.

سيبك من دي لو شفنا حكاية إنك لو احتجت لهم هتلاقيهم، طيب ما برده دي موجودة عند القدام، لأ.... صدقني موجودة، طيب إزاي إنت قاعد دلوقتي على النت عارف تقرا المكتوب، لما احتجت إنهم يأكلوك ويشربوك ويعلموك ويفهموك ويدولك حاجة تخليك قادر تعرف عن أي حاجة في أي حتة،

طيب مش ممكن تكون إنت السبب إنهم في الحاجات التانية الصغيرة دي مش واقفين جانبك؟ رحت حكيت لهم عن مشكلتك؟ طيب وأنت رايح تحكى بصيت ولو ثانية هو أو هي كانوا عاملين إزاي؟ متضايقين ولا متعصبين؟ أو يمكن عندهم شغل كتير فعشان كده ما ردوش عليك؟ جربت تروح لهم مرة تانية؟

وحكاية إنك عاوزهم يخافوا عليك وفي نفس الوقت ما يسألوش فيك، طب دي نعملها إزاي دي؟ ما هو معنى إنهم يخافوا عليك إنهم لو إتأخرت يكلموك يطمنوا عليك، مش لازم يعنى يكون معناه تصغيرك قدام صحابك.

امال فاضل ايه؟؟....

فاضل حكاية إنهم ما يتدخلوش في حياتك ولا قراراتك، وفي نفس الوقت يسمعوك ويحترموا كلامك وأفكارك، لما إنت عاوزهم يا أخي يسمعوك ويحترموا أفكارك، طيب ما تقول لهم إنت بتفكر أزاي في حياتك ومستقبلك. مرة إنت تقنعهم ومرة هما يقنعوك، وفي نفس الوقت هما كمان ثقتهم فيك هتزيد قوى والمواضيع اللي ممكن تتكلموا فيها هتزيد جداً فتبقوا أهل وكمان أصحاب وحبايب.

أما موضوع يعملوا لك كل اللي نفسك فيه أكيد من حقك إنك يبقى ليك طلبات وواجب عليهم إنهم يعملوها لك بس برضه ما تنساش وأنت بتطلب النهارده أحسن جزمة وأحسن موبايل إنك بتاخد من رصيد بكره اللي هتطلب بيه أحسن عربية وأحلى شقة، وما تنساش والدك ووالدتك جت لهم الفلوس إزاي، هي تقريباً بالظبط شبه إزاي إنت بتنجح في الامتحانات، أيام و ليالي طويلة كلها مذاكرة و تعب، تحس بإيه إنت لما تعبك ده تلاقيه مرمى في الزبالة ولا مُهمل كده في أي حتة ولا حد مقدر إنت تعبت قد إيه.

اوعي تفهمني غلط....

لى فكرة ، أنا مش عاوزك تفتكر إني معاهم ضدك... لأ ... أنا لا معاهم ضدك ولا أنا معاك ضدهم، أصلها مش حرب، أكيد برضه هما فيهم عيوب.

بص إحنا بنتكلم بصراحة برا بقى موضوع المنتج بتاعي ده، إنت عارف ليه أنا مش عارف أقول لهم عيوبهم؟ عشان أنا ما عنديش حتة أكتب لهم فيها، مممم... طب إيه رأيك بدل ما تقعد تستني لحد لما حد يقول لهم على لسانك إيه العيوب اللي بسببها عاوز تغيرهم روح إنت إعمل كده، وورينا بقى يا عم مهارتك في الإقناع وإزاي هتعرف تقول رأيك بصراحة من غير ما يبقى كلامك بيضايقهم أو يستفزهم.

بلاش إعمل إعلان زى بتاعي ده ليهم وقول لهم لو كان في عرض إنكم تغيروني هتشتروا العرض ده؟ وقول لهم إنك اشتريت من عندي أوعى توديهم لشركة تانية.

خدمات مابعد البيع....

جينا بقى يا سيدي لآخر جزء، بتاع ميعاد التسليم والصيانة، الميعاد ده هيبقى في نفس اللحظة اللي إنت رحت تكلمهم فيها و تفتح معاهم صفحة جديدة وتبتدى تبيع لهم العرض زي ما اتفقنا، أما الصيانة بقى فا دي عكس أي جهاز تانى، الصيانة في أول شهرين مهمة جداً،

يعنى لازم تروح تكلمهم في أي حاجة في الفترة الأولانية دي، كلم والدك في الكورة، كلمي والدتك في الموضة، أقعدي مع والدك ساعة في اليوم واكلموا عن الدين وحاولو تفتحوا مواضيع ثقافية وشبايبة وتلاقوا نقطة حوار أقعد مع والدتك ساعة في اليوم تقول لها إزاي إن كل الستات الوقت بيكبرهم وهى الوقت بيصغرها، وصدقني كل ما تقلل الحواجز اللي بينك وبينهم من ناحيتك هيحصل نفس الموضوع من ناحيتهم.

على فكرة "البضاعة المباعة لا ترد ولا تستبدل"...

للفاشل صفتان، لا يسمع سوى نفسه، ولا يسمعه أحداً سواه

م ن ق و و و و و و ل

*****

علي فكرة ياجماعة انا فعلا طبقت المضوع ده مش معني كلامي ان علاقتي وحشة مع اهلي لاسمح الله

بس سعات بيكون بينا خلافات علي حجات معينة واختلافات بالراي وطبعا حاولت اني اطبق طريقة جديدة علشان يسمعوني ويفهموا وجهة نظري ومش هتصدقوا انا وماما كل يوم علاقتي بيها بتبقي احسن من الاول وكمان بقينا اكتر من الصحاب حتب بابا كمان يااااه مش عارفة اوصفلكم اد ايه هو رغم ضغوط العمل والحياة الا انوا دايما حواري معاه حوار جميييييل اوي

وعارفين ان اعلاقة دي ساعدتني ان حتي قرارتي مابقتش متهورة... وقوعي في الاخطاء بقي اقل بكتيير بتعلم كل يوم معاهم حاجة جديدة وحاسة ان ربنا راضي عني

الموضوع ش صعب ولا حاجة جرب وتعالي علي نفسك شوية وانت الكسبان في الاخر دنيا واخرة

ما اجمل الحياة وامي واويا راضين عني ....

تم تعديل October 22, 2008 بواسطه بنت مصرية

[سبرتو]

الصراحة مواضيعك اكثر من رائعة

بتجيدى فيها موضوع انك تجذبى اللى بيقرالك موضوع لاخر حرف فيهم

بجد لازم غصب عنك تكمل

اسلوب السرد مشوق جدا جدا

 

 

شكرا ليكى عل الموضوع الاكثر من رائع دة

[بنت مصرية]

شكرا علي مرورك ياسبرتوا الذي اسعدني كثيرا

ولكن حاجة مهمة جدا مش انا اللي كاتبة الموضوع ده موضوع ناس زمايلي هما كاتبينوا

وانا بس نقلاه ... عموما شكرا علي ردك الجميل

[AMR DAWAM]

سلمتى يا بنت مصرية

فعلا الموضوع دا جه فى وقته

لانى والحمد لله طبقت كل دا فعلا والحمد لله كما ذكرتى علاقتى بهم اصبحت جميلة جدا وحواراتنا كلها اصبحت فى مستوى موحد عالى جدا

ودا بفضل ربنا وانى اتعلمت انى ابدأ بنفسى انى المخطا

ولولا حبهم لى ما كنت وفقت فى هذه الخطوة

 

اتمنى ان يقوم الجميع بتنفيذ هذا الكلام

 

************************

[eng_alaa]

الموضوع مش صعب ولا حاجة جرب وتعالي علي نفسك شوية وانت الكسبان في الاخر دنيا واخرة

ما اجمل الحياة وامي وابويا راضين عني

 

بداية الموضوع مس شيء بداخلنا جميعا لكن بجد من يتحمل له الأجر والثواب وأذكر الحديث الشريف الذي يقول

( جاء رجل إلى النبي صلى الله عليه وسلم يستأذنه في الجهاد فقال أحي والداك قال نعم قال ففيهما فجاهد). رواه مسلم

من هذا الحديث نعرف قدر الوالدين جيدا فهما مقدمان علي الجهاد أحيانا ...

وطبعا ليس غريبا على رائدة من رواد التنمية البشرية في منتدانا هذا الموضوع وربنا يباركلنا فيكي

[ABOTASNEEM]

بصراحة بضم صوتى لصوت اخى eg alaa

 

وطبعا ليس غريبا على رائدة من رواد التنمية البشرية في منتدانا هذا الموضوع وربنا يباركلنا فيكي

 

بجد رائعة ..و موضوع اكثر من رائع

 

والحمد لله .. بجد اللى هيجرب الكلام ده هيحس بالفرق الكبير

 

---------------------------

 

احترامى وتقديرى

[تويتي]

الموضوع رااااااااااااااااااااااااااائع ومفيد جدا جدا وطريقه سرده جذابه جداااااااااا

مشكوره علي النقل المهم دا بجد

حتي نقلك للمواضيع بيكون مميز زيك

[القلب النابض]

بصراحه اسم الموضوع شدنى

 

ولما قريته حسيت بقيمته

 

بجد موضوع رائع

 

تسلم الايادى

[NADA]

ده أيه الجمال ده . . . .

 

حقيقى رااااااائعة بمعنى الفعل والكلمه

 

موضوع كتيييييير حلو ومليح زين

 

كما تعودنا منك داااااائما

 

هو انا مش عايزة أغير أنا بموت فيهم التلاته

 

ربنا يخليهم ليا ويفضلو معايا دايما . . . . . .

[بنت مصرية]

عمر دوام شكرا علي مروك وربنا يكرمك برضاهم يارب والحمد لله علي التجربه الناجحة

*****

البشمهندس علاء شكرا كتير علي الكلام الرائع يابشمهدس ربنا يكرمك برضا والديك ورضي الله

*****

ابو تسنيم اشكرك ستاذي علي المرور والتاكيد ربنا اكرمك برضاهم ورضي الله

*****

تويتي ربنا يخليك ياتويتي علي الشهادة الجميلة دي منك

****

القلب النابض سعيدة بمرورك ماتطوليش الغيبة

*****

ندا ربنا يخليهوملك بس هما 2 ياندا علي فكره

****