حكايات الواد اللى مدوخ البنات .... متجدد باذن الله

[ابن تيميــــة 158]

السلام عليكم ورحمة الله وبركاته

ازيكم ياشباب بارك الله فيكم

 

اخواني واخواتي

 

النهاردة هنتكلم مع بعض بس بشرط ...

مافيش زعل

هتكلم عن موضوع زل ووقع فية الكتير الا من رحم الله

شباب وقع فى غرام بنات

وبنات وقعت فى غرام شباب

والاثنين عادى

ولكن

ان تجد واحد بيقول انه ملتزم وملتحى (( اعذرونى شويه )) وبيقولوا انه

ماسك الدعوة كمان واقع وهيمان

فى غرام بنت ومش كدة وبس وهى كمان ملتزمة وبتحضر دروس ومحاضرات

لخالتو ......فى الدار وشكلها منتقبة وماسكة الاخوات فى الدعوة

ايه دة ؟؟

ايه اللى بيحصل دة ؟؟

هما دول بجد يبقوا ملتزمين ولا ممكن اصلا يكونوا ملتزمين

هتقول

هو دة ينفع بين الملتزمين

اقول لك

ماينفعش لكن هو ده اللى بيحصل

واحنا فى موضوعنا دة (( حكايات الواد اللى مدوخ البنات ))

هنحكى قصص وغراميات بتحصل فى الواقع

بس احنا او الكتير مننا بيحاول يبعد عن المشاكل

وانا زى ماقلت شوفت كتير من المشاكل بين اخ واخت

وقعين فى بعض وفيه مشاكل للركب

فحبيت ان اعالج تلك المشاكل باسلوب مرح عن طريق قصص وغراميات

-------------------

حكايات الواد اللى مدوخ البنات .... متجدد ان شاء الله

 

______________________

واليوم

نبدأ مع اول الحكايات وهى بعنوان :

(( حكاية موحة طربوش مع فتحية بلاطة ))

أول النار. ..شراره

 

 

 

 

فى حفله...أو فرح...أو فى الكليه...أو فى الشارع....لأ دى من

 

العيله...يعنى بنت عمى....أو بنت خالى..

 

 

 

 

كان موحة طربوش ... ..فى نفس المكان.....

 

 

شافته..أو شافها.....لمحه واحده بس...((أول نظره))

 

 

والله ملتزم.. ..حتى هى محجبه.. ...ومابصتش تانى....

 

 

غضت بصرها...وغض بصره......بس هو الاختلاط

 

 

أمال ايه الحكايه

 

 

الله...انتوا ما تعرفوش انه كان مستنى اللحظه دى!!وقاعد من

 

زمااااااااااااااااان يترقبها!

 

 

هو مين!!.؟؟؟؟؟؟؟ حا تعرفوه لوحدكوا

 

 

طبعها بالكربون...لأ...حلاها أكتر و أكتر....

 

 

واستخدم مؤثرات صوتيه

 

 

وكمان صورها فيلم ((فيديو كليب....))

 

 

لأ....حتى نجوم الليل و القمر...والهوا اللطيف اللى بيسلم علينا

 

كل ليله...ويلمس خدودنا علشان نحس بنعمة ربنا

 

علينا.....خلاه يحس انه من عندها!!

 

 

 

 

 

وبعدين

 

 

ورسم على الشجره قلبه و قلبها

وغنى لعيونها و هو ما يعرفش حتى ايه شكلها

وسرح مع موج البحر رسم على الرمله قلبه و قلبها

وحول حياته لمقبره أيوه. ...مقبره....بس مقبره شكلها من بره حلو قوى

 

 

مدفون فيها وقت...وعمر.....وعمل....وقلب مجروح و بينزف ....واحتمال فى أى لحظه

 

 

 

يموت

 

 

 

 

 

غسيل مخ

 

 

عمله غسيل مخ.. ...خلاه ينام...يحلم بيها...وعمل له مونتاج.

 

..وركب صورة وشها على جسم ((فتحيه بلاطه)) و هى بتغنى

 

فى أغنيتها الاخيره. ..

 

وصورته على وش الموبيل اللى كان معاها. .....فبقى كل يوم بيعيش أغنيه

 

((كذابه ))

 

...وحلم ((كذاب)). ...

 

 

خلاة يحس ان هو اللى بيغنى... ..وانها بتسمع كلام الاغنيه منه. ..وكان فرحان قوى....وهيمان.....وفجأه تحول موحة الى انسان كسول .. مجروح....حزين...

وكل ده اخراج.....المخرج..

 

 

((شيطان ناجح جدا ))

 

عرفتوه بقى

 

 

 

طب...طب....ليه عمل فيه كده؟؟ وايه الفايده. ..؟؟وليه بقى

 

حزين...وما فضلش سعيد ليه؟؟

 

تعالوا معاى...علشان تعرفوا ليه بقى فى الاخر حزين

 

 

 

 

الاول

 

 

 

ما اسمهوش الحب الاول .. ...سيبكم من كلام الاغانى و المفسديون .....

 

منهم لله.....حسبنا الله و نعم الوكيل

 

دى يا ولاد اسمها ((الفتنه الاولى)) ....يعنى بيبقى قلبك زى

 

الفل..ولأنك كبرت..واتغيرت...ومشاعرك نضجت....بتحس ان

 

فيه حاجه جديده

 

الدنيا بقت حلوه . ..وردى...وردى...وردى..وردى.... وردى

 

وبقت القلوب فى كل مكان....على

 

الكشاكيل ...وميداليات....وعلى الكروت...وسلاسل.

 

.وأساتيك.....وشنط...وهناو هناك . ...

 

 

واديله بقى ((أغانى أم .. ...وعب.......))

 

أصلها بتيجى على الجرح. ..وبتساعد فى اقناع العقل بوجود

 

الحلم....مع انه فى الاصل حلم

 

حد يعذب نفسه بنفسه!!

 

حد يفضل يشم فى الاكل اللى ريحته واصله من عند

 

الجيران...وهو عارف انه صايم ...ومش حا يأكل الا لما المغرب

 

يأذن!!وكمان ما يقدرش يسرق أكل من حد!!

 

 

ما هو أصل الموضوع كده

 

انت صايم. ..وانت صايمه .. .وماينفعش تشموا ريحه أكل حد

 

اصبروا على الصيام شويه.....لحد ما أذان المغرب

 

يؤذن...ويأذن الله تعالى

 

ساعتها حا تفطروا...والاكل...((الحب)) حا يكون طعمه حلو

 

قوى....لأنه

 

 

((حلال))....وفى مكانه... .

 

 

 

 

 

 

 

 

فكر شويه

 

 

يعنى ايه الكلام ده.. . ..

 

هو انت يا ابوأحميد يا أبو العيال ما بتسمعش ان الحب بعد الجواز مش موجود

 

وان الخطوبه أجمل فتره فى الحياه

 

وان...وان...وان

 

 

مين اللى قال.....برده...كلام المفسديون. ..فى الحوارات العجيبه.....

 

هو الحب ورده. ..وقلب. ..وغنوه. ...ونيل و هوا و ميه!!!

 

لأ....الحب بيتترجم لأفعال ايجابيه....يمكن مش

 

بتشوفوها....البسوا معاى نضارة أبو العيال... . ..بالاشعه

 

الفوق المعنويه ...واتفرجوا معايه

 

 

 

 

نظره جديده

 

طب قولوا انتم...بلاش أنا

 

بابا و ماما

 

طول النهار قدامكم...صح؟؟....فاكرين يوم ما بابا اتأخر...لما

 

كان مسافر ....ماما وقفت ازاى تستناه...رايحه جايه. ...بصيتوا

 

لوشها....شفتوا الخوف. ..والقلق...والفزع...سمعتوا دقات

 

قلبها و هى خايفه.....

 

ما هو ده الحب....انك تخاف على حبيبك من الخطر..

 

 

شفتوا بابا و هو شايل شنطة سفر...ومعاد الطياره بعد ساعه..

 

.وقلبه بيتقطع و هو بيبوس راس ماما.....وبيمشى و دموعه

 

بتجرى على خده (أول مره تشوف بابا بيعيط)

 

ما هو ده الحب......انك تكره فراق حبيبك

 

 

 

فاكر لما ماما كانت عيانه....وحرارتها عاليه. ...وبابا واقف فى

 

المطبخ بيعمل الاكل بدالها...وهو راسم على وشه

 

بسمه....بسمة حنان و عطف عليكم...بس مخنوقه...مخنوقه

 

بألم...

 

ما هو ده الحب برده...انك تتألم لألم الحبيب

 

 

شفتى بابا لما مر بظروف صعبه...أد ايه كانت ماما واقفه

 

معاه....واستحملت حاجات كتير...ما هو ده الحب برده...على

 

الحلوه و المره

 

فاكر لما ماما فضلت واقفه تصحى بابا علشان صلاة الفجر.

 

...وراسها كانت بتقع....وفضلت لحد ما قام و صلى ....ما هو

 

ده برده الحب.....انك تخاف على حبيبك من نار جهنم((مش

 

تكون سبب فى دخوله نار جهنم... ..))

 

 

يبقى الحب...حنان...وموده...ورحمه....موجود جوانا

 

فعلا...مش محتاج أغانى و هباب و فيديو كلاب...حا يطلع حا

 

يطلع. ..

 

بس لما نسمع كلنا الاأذان

 

 

 

النور

 

يا سلام....حاجه حلوه انك تعمل حاجه فى النور.

...قدام كل الناس...من غير ما تستخبى

أصلك عارف انك صح...وانت عارفه انك مش بتعملى حاجه غلط.....

أمال مين بيستخبى..((الحرامى ))اللى بيسرق حاجه مش من حقه....

وخايف لأنه غلط فى غلط....حتى أحلامه غلط.....فبيخجل يحكيها

طب....ربنا يعلم ما فى الصدور.......

يا ترى جوه صدرك....ظلام... .واللا نور؟؟

يا رب يبقى نور فى نور

ألا بذكر الله تطمئن القلوب

 

 

 

 

يعنى أحبس نفسى و أعيش فى تلاجه!!

 

ما هو الظروف معروفه....ولسه مشوارى طويييييل.

 

...ولسه على ما أكون نفسى..طب أعمل ايه فى نفسى.....يعنى

 

أعيش فى تلاجه!!

 

حتى لو حاولت....مش حا أقدر أبقى على طول فى التلاجه

 

أيوه...عارف ان المشوار طويل...ويمكن لو عجبتك ((ستوته ))

 

تتخطب و تتجوز و تخلف و انت لسه بتكون نفسك..

 

يبقى انت فى الحاله دى خسرتها....وخسرت أحلى سنين عمرك

 

لأنك ضيعتها فى أحلام سلبيه...ولا بتودى و لا بتجيب...

 

قصدى بتجيب سيئات بس ...وبتدبح القلب لما تحس انك

 

خسرت المعركه اللى كنت شايف انها معركة حياه أو موت لقلبك

 

الرقيق.....وبيفضل قلبك مجروح.. .ولو مريت فى حياتك مع

 

زوجتك فى المستقبل بأى مشاكل حا تلاقى شماعه كبيره

 

انتاج مصانع ((وساويس الشيطان)) ...تعلق عليها كل حاجه

 

أصلها مش فتاة أحلامى

 

أصلها مش حبى الاول

 

وبالمفتاح الكبير بتاع شيطون بيفتح لك الباب الاسود

 

(((((لو))))))) لو كنت اتجوزت ستوته كنت حا أبقى أسعد

 

كانت حا تفهمنى

 

كانت حا تسعدنى

 

أصله شاف الزواق اللى من بره بس....واللا صحيح...ممكن

 

يكون ما اتكلمش معاها أصلا..ولا عرف شخصيتها.....((معلش أصلى نسيت ان المخرج شيطون طبع الصوره و كمل باقى مسلسل الوهم من عنده))

ودى النهايه يا أصدقائى

 

 

 

بقى حزين... .بعد ما كانت بداية الرحله...قلب بيرقص....ودنيا

 

ايه....فاكرين

 

وردى...وردى...وردى...

 

 

قصدى

 

بمبى..بمبى..بمبى بمبى

 

عارف ان ستوته فيها مميزات كانت عاجباه. ...لكن كل انسان فيه مميزات. ..وعيوب. ...والحب هو نجاح التفاعل الكيميائى بين مكونات الزوج و مكونات الزوجه...مهما كانت المكونات دى....مش شرط تركيبه معينه....

 

لأن الموده و الرحمه...هى السبب الاساسى فى نجاح التفاعل

 

خلى عندك بعد نظر

 

حافظ على قلبك

 

حافظى على قلبك

 

ده ما فيش زيه...اوعى حد يكسره...واوعى انت تكون اللى

 

كسرته ...((الله يسامحك))

 

رفقا..رفقا....حاول تساعده علشان يفضل خام ...وجميل

 

بطل تشم روائح كذابه...غض بصرك ....وافتكر دايما شكل

 

الحور العين((يا ترى قريت عنهم. .))

 

وطول ما انت صايم عن المعاصى. ...حا يفضل قلبك سليم...ولما يأذن الله بالحب حا يكون طعمه جميل

 

وساعتها حا نقول كلنا((صوما مقبولا وافطارا شهيا ))

 

فكرفى بكره....هنا....وفى الاخره

 

ما تخليش منظارك أعمى....بيشوف بس تحت رجليه

 

اللهم آتنا فى الدنيا حسنه و فى الاخرة حسنه

 

وقنا عذاب النـــــــار

 

 

 

يتبع بكرة أو بعد بكرة أو بعد بعدة

ان قدر الله لنا البقاء

والحكايات كتيييييييييييييييييير

مستنى رايكم

 

تم تعديل June 19, 2011 بواسطه ابن تيميــــة

[ابن تيميــــة 158]

تعالوا بينا مع بعض نعرف حكاية (( الباشمهندس عتريس مع فؤادة ))

 

عتريس ولد مؤدب خالص وملتزم ومن عيلة كويسة

 

وفؤادة بنت ملتزمة ومن عيلة كويسة خالص

 

عتريس مخلص هندسة وبدأ يشتغل فى مهنته وقبل ماانسى ملتزم وبيخطب فى المساجد

 

يعنى يعرف ربنا ويعرف ان قلوب بنات الناس مش لعبة

 

المهم

 

من 8 شهور تقريبا مكانش يعرف فؤادة لانه بيغض بصرة ولكن تأتى الرياح بما لاتشتهى السفن

 

الباشمهندس قاعد على الكمبيوتر علشان بيدعوا الى الله من على النت

 

وعامل كمان حملة دينية على الفيس بوك

 

وفجأة دخلت على الحملة فؤادة هانم

 

وضفها صديقة

 

وهى كمان قبلت صداقته

 

وهنا

 

جالهم الاثنين وقالهم : انتم كدة بتدعوا الى الله لازم تعرفوا بعض اتصل بيها

 

اكيد عرفتوا مين دة .....

 

 

فتح صفحة فؤادة وشاف الحائط بتاعها

 

ماشاااااااااااااااااااااااااااااااء الله

 

حملات اسلاميه وردود دينيه

 

وكمان صورتها واحدة منتقبة

 

ايه الالتزام دة ؟؟؟

 

بجد ماتعرفش حصل ايه فى قلبة

 

وهى كمان

 

شافت صفحته ووجدت دروس دعوية ماشااااااااااااااااء الله

 

ايه دة دة شيخ كبير

 

وشافت صورة

 

وهو حاططها جمال ايه ورشاقة ايه وعيون ايه

 

يخطف القلب ويخليه يضيع

 

وبعدين على الشات بعتلها :

 

السلام عليكم

 

ردت

 

وعليكم السلام

 

وفضلوا الاثنين مستنين حد يتكلم

 

عارفين سكتوا ليه ؟؟

 

علشان هما عارفين ان دة حرام يكلمها بصفتوا ايه ؟؟

 

وهى ازاى تكلم شاب

 

المهم

 

بعد فترة قالها : ماشاااااااااااااااااااااااااااااااء الله

 

ايه الالتزام دة ؟؟

دة انتى داعيه وعالمة كبيرة شفت الحائط بتاعك ممتاز

 

ردت : جزاك الله خيرا

 

ودية كانت البداية

 

وفضلوا يتكلموا ونسوا انهم ملتزمين

 

طبعا كان مضطر يتكلم

 

وحصل اللى حصل وأعجب بيها

 

عتريس فعلا ولد متدين وبيعرف ربنا في البداية فضل يقاوم إحساسه ازاي أنا اعجب ببنت وفعلا بيغض بصره لانه مش شايفها وهوه بيكلمها لكن الأرواح جنود مجندة ما تعارف منها ائتلف

 

وكمان فؤادة بتلوم نفسها ازاي ممكن يكون عندها الاحساس ده

 

والاتنين مكنش قدامهم ملجأ غير الله عز وجل

 

عتريس في قيام الليل بيدعي يارب يسر لي الخير

يارب لو كنت في زمن رسول الله كنت اتقدمت وكملت نص ديني

 

لكن انا لو عتبت باب بيتهم أهلها

...

 

في الوقت ده فؤادة كان بيتقدملها ناس عشان تخطبها وأهلها كانوا بيضغطوا عليها

 

لا فؤادة تعرف ان عتريس بيتمناها زوجة ليه

ولا عتريس يعرف ان فؤادة بتتمناه زوج ليه

 

ياترى ايه اللي هيحصل؟؟؟

 

على فكرة دي قصة حقيقية لكن بتصرف واختلاف للأسماء فقط

 

المهم

 

قرر عتريس انه يبلغ فؤادة بمشاعره

 

وفعلا بلغها

 

وبدأ سلسلة من الايميلات عادية للاطمئنان عليها

شوية يقولها متستننيش

شوية

استني

....

 

الفترة دي زاد الضغط جدا من أهل فؤادة علشان توافق على عريس من اللي متقدمين ليها

سبحان الله الأول كانوا بيلحوا انما مش بالطريقة الزيادة دي زي ما يكون ربنا مش راضي عن اللي بيحصل ودي رسايل منه

 

وقدرت فؤادة ترفض عريس ورا التاني

 

و..........

 

 

وهنقف النهاردة على كدة

 

ونشوف بكرة ايه اللى هيحصل مع فؤادة

 

والباشمهندس عتريس هيسكت ولا ايه ؟؟

 

فتابعونا

 

غدا ان شاء الله

[بسمة الاقصى 78]

ربنا يهدى الباشمهندس ويهدى أختنا فؤادة

 

للأسف تلبيس إبليس

 

سمعت مؤخراً من الشيخ قصة شاب ابتكر حيلة شيطانية للإيقاع بالبنات فى حبائل الشيطان إنه قام بعمل منتدى ادعى انه إسلامى

 

وكان يقوم بلصق وقص الموتضيع الإسلامية من منتديات أخرى وكلما كتبت أخت مشاركة أمطرها بجزاكِ الله خيراً وبارك فيكِ ثم يتم التواصل

 

بينهما بعد ذلك

 

ثـــــم تعرف على 200 فتاة بهذه الطريـــــــــقة و حول ولا قوة إلا باللـــــــــه

 

 

نسأل الله العفو والعــــــافيـــــة

 

اللهم ارزقنا الهدى والتقى والعفاف والغنـــــــى

 

جزاكم الله خيراً ونفع بكم وبورك فيكم

[ابن تيميــــة 158]

جزيتي الفردوس اختي لتعقيبك علي الموضوع

 

والله اسال ان يهدي شباب وفتيات المسلمين

[لامار 94]

اللهم استرنا فوق الارض و تحت الارض و يوم العرض عليك

بارك الله فيك

[ابن تيميــــة 158]

ايه اللى حصل مع عتريس وفؤادة؟؟؟؟

 

تعالوا نشووووووووووووووووف

 

(( وقدرت فؤادة ترفض عريس ورا التاني

لحد ما خلصت الجامعة

واتقدم عريس ممتاز لفؤادة ، وهنا ما عرفتش ترفض

هاتقول ايه ؟؟؟

دة هريدى ملتزم وكمان جاهز

وقعدت تفكر شويه وتقارن بين عتريس وهريدى ، دة عتريس كان بيحبنى

بس كان بيقول كلام فى الايميل ميسحش يتقال

وهريدى لسه مش عرفة بيحبنى ولا لاء ؟؟

وهنا لم عرف عتريس باللى حصل ، راح مكلم ستوته اللى هيه الانتيمة بتاعت

فؤادة ، وشوفوا الواد اللى مدوخ البنات قال ايه :

احكيلى فؤادة عامله ايه ؟

دة انا مابنامش الليل من همى وبفكر فيها

فقالت ستوته : خلاص ياعتريس نام بالنهار ، الموضوع انتهى هيه خلاص

وفقت على هريدى

فعيط عتريس لما سمع الخبر

وقال لستوته قولى لها : انت مش شيفة التضحيات اللى ضحتها علشانك

انا وقفت قدام اهلى وقعدت 5 أو 6 شهمور رافض اتقدم لاى واحدة

وضحيت علشان خاطرك وما كنتش باكل غير طقتين بس فى اليوم

 

فقالت ستوته : انت بطلت تاكل علشان تخس شويه مش علشان فؤادة

فقال عتريس : بلغيها انت نسيتى عتريس اللى كنتى بتكلميه وبتفرحى بيه

انتى نسيتى عتريس اللى كنتى بتسأليه فى الدين وبتعيطى لما تسمعية (( ليه كنت الشيخ المطنطن ))

انتى نسيتى عتريس اللى كان بتسمعى قصصه مع بتوع المانيا وتركيا وفرنسا واسبانيا

(( ليه هو كل تعاملك يوروا بس ))

 

انتى نسيتى عتريس اللى كان بيحكيلك قصة اسلام النصارى على ايديه (( ليه كنت ديدات واحنا مش عارفين ))

 

انتى نسيتى عتريس اللى كان السبب فى ثورة 25 يناير وانا كنت اللى عاملها على الفيس بوك (( ليه انت كنت خالد سعيد واحنا مانعرفش ))

يافؤادة عتريس هو التارخ وحياتك بتبدأ من عند عتريس

****** شوفتوا ياشباب فضل عتريس يستعطف وعاوز يضحك عليها مع العلم

انه كان فى وسط زمايلة بيحكى مغامراته معاها وبيقول اهو احنا بنتسلى

فى الحر دة وهى احس من ربع جنيه لب ******

بس انتم واخدين بالكم من كثرة الكذب بتاعه

فدائما العتريس الذى يفعل ما هو حرام يكثر من الكذب

بس هى دة حيل الشباب ليوقعوا بيها البنات

بس تأتى الرياح بما لاتشتهى السفن

وفؤادة ينطلى عليها كلام هذا العتريس وتفركش

خطوبتها من هريدى

وهنا تقعد فؤادة مسـ.........

وبكرة نشوف ايه اللى هيحصل معاها

فتابعونا

تم تعديل June 21, 2011 بواسطه ابن تيميــــة

[ابن تيميــــة 158]

يلا بينا نكمل قصة عتريس وفؤادة ومع المشهد الاخير

 

 

 

وفؤادة ينطلى عليها كلام هذا العتريس وتفركش

 

 

خطوبتها من هريدى

 

وهنا تقعد فؤادة مستنيه حبيب القلب عتريس

وعتريس لما لقاها بالشكل دة قال خليها شويه لما تستوى خالص

مش بردوا هى سابتنى وراحت لهريدى

ولازالت فؤادة مستنيه وفى الاخر راحت على الايميل

وبتحاول تكلمه وقالت :

عتريس -- عترس -- عتريسى -- عتروستى -- عترتس

وفييييييييييييين

راح فى الاخر رد عليها

وقالت له : هتيجى امتى بابا مستنى حضورك

قالها : بكرة بعد العصر هاجى اشرب الشاى

وفرحت فؤادة انه هيتلم الشمل وهتروح لحبيب القلب

المهم اتقدم لها وكانت ظروفه على اد حاله اوى بس هى كانت بتحبه وطبعا هى زى حالات كتير من البنات المكاسيف دول

اللى بيحبوا على نفسهم وميقولوش لحد ولا حتى يعبروا عن حاجه

والمفاجأة والدها رفض

وفى وسط اعده عائليه كدا (( والدتها واخواتها ومش فاكر كان عمامها ولا لا ووالدها ))

وبيتناقشوا فى الموضوع

برضو والدها عمال يرفض

رافض ...

رافض....

رافض...

رافض

اذا هى تقوم واقفه

وتقووووووووووووول

 

 

>>بحبه يا بابا<<

طبعا باباها انزهل

بس فطس من الضحك عليها

لان اسلوبها كان غير متوقع وكوميدى جدا وهى اصلا

كانت

مش البنت الدلوعه خالص

فالكلمه طلعت منها زى ماتقول كانت فى جرة وطلعت لبره

وباباها وافق بسبب الكلمه دى وقالها :هتستحمليه

قالت : له مدام بحبه هستحمل

والحمد لله تمت الخطوبة

أكيد كل الناس دلوقتي بتقول كويس ان عتريس خطب فؤادة

بصراحة اللي حصل بعد كده كتيييييير

خلاصته ان الخطوبة اتفركشت

ولا حول ولا قوة الا بالله

من شهر 8 اللي فات

وتعليق فؤادة :

الحمد لله انها جت على قد كده

 

 

انتهت القصة

 

 

ولكن ليه حصل كدة

لا إله إلا الله

 

لو كان همنا من الزواج رضا الرحمن .... لما حصل ما حصل..

نعم لما حصل ما حصل

عتريس شاب كويس

لكنه سمح لنفسه بتتبع خطوات الشيطان

والأولى بينا نحن الشباب ... أن نذكر قوله تعالى:

وَلَقَدْ خَلَقْنَا الْإِنسَانَ وَنَعْلَمُ مَا تُوَسْوِسُ بِهِ نَفْسُهُ وَنَحْنُ

أَقْرَبُ إِلَيْهِ مِنْ حَبْلِ الْوَرِيد [ق:16]

وأن لا نرضى أن يرانا الله ونحن نفكر بغيره....علينا مجاهدة أنفسنا حتى لا يشغلنا غيره

نبضنا النابض...رضاك يا رب...وأنت أعلم بحاجتي

لساننا الناطق: فيا ليتك تحلو والحياة مريرة وليتك ترضى والأنام غضاب

إذا صح منك الود فالكل هين وكل ما على التراب تراب

قلبنا المتألم: إنما أشكو بثي وحزني إلى الله

ثم يا أيها الملتزم

يا من يدعي أنه يريد ستر نفسه بالزواج والتقوي على طاعة الله...

 

ما الذي يضمن لك أنك إذا تزوجت رجعت القهقرى؟

هذا شاب كان يداوم على صلاة ركعتين كلما أوى إلى فراشه

فلما تزوج....

ذهبت الركعتان

بل وذهبت صلاة الجماعة

وآخر كان يختم القرآن كل شهر

فلما تزوج....

صار يختم القرآن مرة في العام...

فهل مثل هذا الزواج يقربك إلى الله؟

بل لو تأملت إلى حال أولئك...لوجدت مشاكل الدنيا كلها ..يحملها على ظهره...

فأي راحة في زواج كهذا

 

حبيبى الغالى

ياللى لسة هيمان وواقع فى الغرام

بص لحياتك ومستقبلك

حياتك هناك ومستقبلك هناك

فى الجنة

راجع نفسك من تانى

قوم دلوقتى حالا وبص لنفسك فى المرايا

وقول لنفسك

هو أنا دة بتاع قيام الليل وقراءة القرأن فى أول الالتزام

وشوف ردك على نفسك

هو دة يرضى ربنا

 

 

 

 

استنوني في حكاية جديدة ان شاء الله

 

وهـــــــــــــــــــــــــــــــــــــــــــــــــــى

 

 

( علي بكاكا وحكايته مع سها مواعيد )

 

 

ملحوظه مهمه:-

 

يعلم الله عز وجل انه ليس احد مقصود ابدا ابدا بهذه الحكايات والله

 

ولا بالاسماء كمان لكن ده بجد اللي بيحصل وبنسمع عنه

 

نسأل الله لنا ولكم الهداية والثبات عليها

 

 

تم تعديل June 22, 2011 بواسطه ابن تيميــــة

[نـــــــــــور 199]

جزاك الله كل خير اخى ابن تيمية واسكنك الفردوس الاعلا ان شاء الله

[ابن تيميــــة 158]

جزانا واياكم خير الجزاء اختي الفاضله

[ابن تيميــــة 158]

السلام عليكم ورحمة الله وبركاتة

 

(( على باكاكا وحكايتة مع سها مواعيد ))

 

قصتنا الجديده هنتكلم بيها مع الضيوف على المنتدى أكتر ما بنكلم الاعضاء ....

 

كمان إني بكلم البنات اكتر ما بوجة قصتي للشباب.....

 

كمان اني لسه بتكلم عن الحب .....

- طيب ما تيجوا نسأل البنات كده يعني إية حب في الاول ؟؟

 

- طبعا انا مش بقصد الحب في الله .....

لأننا اتكلمنا عنه كتير قبل كده و عرفناه ....

انا بتكلم عن الحب اللي بيجمع بين ولد و بنت في مجتمعنا دلوقتي ...

انا عارف ان كل البنات والشباب عرفوا معنى الحب الحقيقي و مكوناته ....

سواء كان ثقة او تعاون او مشاركة او عطاء و تفاهم .....

قصتنا الجديدة بقا هنقول بيها لكل بنت مكونات الحب في قصتك يا ترى كامله و لا ناقصة ؟؟؟؟؟

هو مش انتي بتقولي ان اللي بينك و بين حبيبك ده اسمه حب ؟؟؟؟

و المفروض انك عارفه ان الحب مش بيتجزأ ,, لأنه مفيش حب نصنص و حب اوي اوي , و حب تفاريحي يعني .....

الحب في الاسلام و المجتمع و في عاداتنا و تقاليدنا عامل زي الهرم بالظبط ...

الهرم بيتبني من طوب فوق بعضه و لو شلنا طوبه من وسط الهرم هيقع ...

كمان الحب لو فقد جزء من معانيه و مكوناتة هيتهد و يفشل ....

أكيد بنضحك على بعض لو قلنا ان الحب غير كده , صدقوني ....

على العموم كل فصل من فصول قصتنا الجديدة هيناقش موقف و قاعدة اساسية من قواعد الحب .......

كل بنت بتقرأ فصل من فصول قصتنا يا ريت تسأل نفسها في نهاية كل فصل جديد سؤال مهم جدا ....

يا ترى انا ممكن اكون بطلة فصل انهاردة و يكون اللي بيني و بين اللي بحبة وهم انا بس اللي عايشاة ؟؟؟؟

يا ترى فعلا لو حكم المجتمع عليا و كمان حكم الدين عليا كان كده يبقى انا استحق فعلا الحكم ده ؟؟؟؟

يا ترى انا فعلا بنت عايشة حياتي و ببنيها على مجموعة اوهام انا عايشاها ؟

- انا عن نفسي هعرض بالدليل الواقعي من حياتنا في مجتمعنا الحاضر صور من حياة الشباب في قصص حب هما عايشنها , علشان نحكم على بعض و نشوف يا ترى إية الفرق بين كل قصة و التانيه ...

انا هعرض ان شاء الله كل عوامل الحب و مكوناته و انتم عليكم المقياس بيه ...

مكونات الحب مش بس عرفناها من عادات و تقاليد مجتمعنا ...

لأ كمان عرفناها من الاسلام و القرآن و السنة النبوية الشريفة ...

كل فصل من فصول قصتنا هيعرض عامل واحد بس من الحب و احنا في نهاية القصة هنقدر نشوف فعلا الحب من وجهة نظرنا .......

 

- قصتنا الجديده هتكون عن جملة ....:-

( انا و انتي يا حبيبتي غير كل الناس اللي عرفوا الحب قبلينا )

( انا و انتي عمرنا ما نكون زي غيرنا )

قصتنا هتكون مناقشه لكل بنت عن فئران التجارب في الحب ....

قصتنا هتناقش الفرق الكبير و الفجوة اللي احنا عاملينها بين مجتمعنا الاسلامي و بين احكام الاسلام .......

لو عاوزه تشوفي الفرق يا اختي بينك و بين نفسك اقري القصه دي بقلبك قبل عنيكي .......

 

لو فعلا شايفه انك غير كل البشر اللي حبوا قبلك و متأكده انك مش هتغلطي زي غلطة كل البنات قبلك ....( تعالي شوفي بعينك اللي قبلك عمل ايه )

 

لو عاوزه تعرفي اللي بتحبيه على حقيقته ادخلي شوفي ....

لو شايفاه ملاك في عنيكي يا ترى هوه يستحق كل ده ...؟

لو بتحسي معاه بكل الحب و الحنان يا ترى هوه يستحقه ؟؟؟

طيب ما تيجي كده تشوفي معانا في قصتنا كل الحاجات دي و انتي اللي تحكمي بنفسك على نفسك و عليه ............

مستعده ؟؟؟؟؟؟

- هاتي ورقه و قلم و اكتبي من اول الفصل ما هى مكونات الحب في المجتمع و الدين ...

- اكتبي معايا كيف تحكمي على علاقاتك بالنجاح او الفشل .......؟

- اكتبي معايا قصتك بنفسك و شوفي النهاية ....؟

 

 

ممكن الان واحد من شبابنا الكرام يقول :

 

ليه بتوجة كلامك للبنات اكتر من الشباب ؟

لية دائما بتنصح البنت اكتر من الولد ؟

يا ترى السبب إن البنات عددهم اكتر من الشباب على المنتدى ؟

- من وجهة نظري كعضو على المنتدى, إن على الغالب فعلا الغلطة غلطة البنت في مجتمعنا , مش غلطة الولد , اصل البنت لو قوية من الصعب و يكاد يكون من المستحيل إن الشاب ينحرف اخلاقيا و يقدر يخدع بناتنا ....

 

مش بس كده !!

الاسلام و الرسول صلى الله عليه و سلم قال ( ما تركت على الرجال فتنة اشد من النساء ) فيما معناه ....

و كمان الرسول صلى الله علية و سلم قال ( اوصيكم النساء , اوصيكم النساء , اوصيكم النساء ) فيما معناه

و بعدين تعالوا هنا, مش انا زيي زي اي شاب محتاج يشوف بنته و اخته و والدته مثال و قدوة في الاخلاق و الالتزام علشان اعيش مستريح في المجتمع ...

و كمان انا حاسس ان فساد المجتمع من اقوى و اشد اسبابه هو فساد الفتيات ..

لأن الفتاة هيا الام و الزوجه في مستقبلي ...

 

ابني او بنتي مين هيربيهم معايا

و يمكن اكتر من إن انا اللي اربي

فزوجتي هيا اللي بتربي , لأنها هيا الرقيب في البيت اكتر مني انا كزوج ....

 

يبقى لو شفت مجتمعي البنات فية مؤمنات ملتزمات , مش هخاف على زوجتي او بنتي او ابني و هقول ليهم بعد ربنا زوجه صالحه في بيتي امينة عليا و على اولادي .....

 

و كمان الشاب مهما كان فاسد اخلاقيا و عاش في مجتمع كل البنات فيه صالحات مش هيلاقي بنت تعصي ربنا معاه ....

 

من الآخر كده

 

لو شاب من إياهم صحي من النوم مسك التليفون و كل ما يطلب بنت يلاقي الطريق و السكة مقفولين ,, قعد على النت و مش لاقي بنت يهرج معاها او يصاحبها , دخل كليتة مش لاقي بنت تبصلة او تضحكله , راح النادي او نزل الشارع مع اصحابة و لسة مش لاقي بنت يكلمها او يقف معاها ,,,

هيعمل ايه بعد كدة ؟؟؟

 

اعتقد كده مش هيلاقي غير الزواج وسيلة علشان يوصل بيها للجنس الآخر , و ممكن ده يكون سبيل في هدايته و انا متأكد من كده ان شاء الله .....

الجيل القادم مش هيكون قوى لو خرج وسط جيلنا و احنا بالمنظر ده ...

- بنتي و ابني مش هحس انهم نعمة من ربنا عليا بقوة ايمانهم و انا مش لاقي زوجة صالحه تربي معايا .....

 

- يبقى لما كل كلامي بخاطب فيه البنات اكتر من الولاد تعذروني ...صح ؟

 

- تعالوا كدة نتعرف على بطلة قصتنا :-

- الاسم :- سها مواعيد ,, السن :- من 16 ل 21 او 22 سنة تقريبا .....

- بابا و ماما و اخواتها مش هيفرق معانا نعرف عنهم حاجة من اساسة ...

- اصحابها مين و دورهم إية في القصة ؟؟ اعتقد هنعرف من الاحداث ...

- متدينة او لأ هنشوف سوا احسن .....

- حياتها العاطفية ممكن نقول عنها كتير و كتير مع كل فصل جديد .....

- طيب دي سها مواعيد ...

 

تعالوا نشوف بطلنا .....

- الاسم :- على باكاكا ,, السن :- من 18 ل 28 كده على السريع ...

- اعتقد نفس بيانات البطلة هتكون مناسبة للبطل مع اختلاف الاذواق مش اكتر ....

- طيب يللا بينا نبدأ سوا احداث الفصل الاول من قصتنا :-

 

( الصراحه )

 

- سها وعلى باكاكا في التليفون :-

- سها :- كنت فين كل ده , انا كلمتك و لا مليون مرة و مامتك بتقوللي لسة مرجعش من على القهوة ...؟

 

وتابعونا بكرة مع بقية الحكاية

[ابن تيميــــة 158]

السلام عليكم ورحمة الله وبركاتة

 

متابعين معايا (( على باكاكا وحكايته مع سها مواعيد ))

 

 

ونقول :

 

( الصراحه )

 

- سها و على باكاكا في التليفون :-

- سها :- كنت فين كل ده , انا كلمتك و لا مليون مرة و مامتك بتقوللي لسة مرجعش من على القهوة ...؟

- على باكاكا :- ابدا , بس سرحت في الوقت و انا قاعد مع العيال ... و بعدين ما انا جيت اهو , نتكلم ساعتين زيادة مش مشكلة يعني ....

 

- سها :- و اصحابك بقى اهم مني يا كاكا ؟

- على باكاكا :- لأ طبعا يا سوسو , مكنتش اول ما رجعت طلبتك من غير ما حد يقوللي انك اتصلتي بيا ....

- سها :- كنت مع مين على القهوة و قعدت من إمتى يا كاكا ؟

- على باكاكا :- تقريبا من تسعه تسعه و نص كده , مع محمود و خالد و هيثم ...

- سها :- طيب ممكن اعرف بتكدب ليه عليا ؟

- على باكاكا :- و اكدب ليه بس يا سها , ليه القلبة دي في الكلام بقى ؟

- سها :- اصلي عديت من قدام القهوة الساعه عشرة و ربع ومكنش حد قاعد غير محمود و هيثم , و بس ...

- على باكاكا :- عادي ممكن اكون في الحمام او بشتري سجاير , و بعدين كنتي لحد عشرة و ربع برة البيت بتعملي إية ؟؟ مش احنا متفقين مفيش خروج بعد تسعه .....

- سها وعلى باكاكا دخلوا في حوار تاني خالص غير موضوع الكدب .......

- ..............................................

 

 

 

- تعالوا كدة نشوف سها و على باكاكا من وجهة نظر اخرى.:-

 

- سها و على باكاكا في كافيتيريا الجامعة :-

- سها :- كنت واقف مع عبير لية ؟

- على باكاكا :- ابدا ً , كانت بتسألني على مريم اذا كنت شوفتها ...

- سها :- مش احنا قلنا و اتفقنا ان بلاش وقفة مع عبير , علشان انت عارف انها معجبة بيك و هتموت و ترتبط بيك ...

 

- على باكاكا :- اية بس اعمل اية يعني لما توقفني , اختفي ؟

- سها :- و انت واقف معاها اكتر من نص ساعه بتسألك على مريم ؟

- على باكاكا :- حصل خير يا سها , مش هقف معاها تاني خلاص , متزعليش اوي كده ...

- .......................................

 

 

- تعالوا نشوف وجهة نظر تانية ....:-

 

- سها وعلى باكاكا على الانترنت مقضيين الليل شاتينج :-

 

- سها :- بتكلمي حد يا ميادة ؟

- ميادة :- بكلم تلاتة صحابي , وعلى باكاكا كان معايا و لسة قافل , كان بيسألني على خطيبي و الاخبار , و بعدين سألني على اخويا و قفل , هوه مش بيكلمك و لا إية ؟

- سها :- لأ معايا طبعا , طيب اوك انا معاه مشغولة شوية , و لو حنان دخلت قوليلها تكملني ....

 

 

- على باكاكا :- الوووووووووو . مشغولة مع حد ؟

- سها :- ايوة معاك , لأ مش مشغولة , و انت ؟

- على باكاكا :- ابدا كنت بكلم حامد و قفل خلاص , مفيش معايا غيرك .

- سها :- يعني مكنتش بترد عليا من شوية علشان حامد ؟

-على باكاكا :- آه و الله ,, خير في حاجه ؟

- سها :- لأ مفيش عادي بسأل بس .. كنا بنقول إية بقى يا كاكا ....

- .................................................

- دي مواقف كتير بتحصل بين على باكاكا و سها ...

- تعالوا كده نشوف التعليق سوا .....

 

هنحلل الحوار اللى دار بينهم ونكتشف الكدب

 

 

- دي مواقف مكررة كتير في علاقات كتير بين كل اتنين .....

- مواقف من واقع حياتنا اللي احنا بنعيشها

 

يا ترى لية على باكاكا بيكدب على سها ؟؟؟؟

 

و ليه سها بعد كل المواقف دي بتقول انها بتحب باكاكا ؟

 

ما تيجوا كده نتكلم عن قيمة الصراحة في العلاقة بين الاتنين اللى بيحبوا بعض (بس في الحلال طبعا).

 

 

اولا : الكدب بيخلق في مجتمعنا بصفة عامة نوع من الشعور بعدم الثقة و الاطمئنان

 

اصل الصراحة مرتبطة بالثقة , و الاتنين من اساسيات الحب

واصل لو في كدب يبقى في عدم ثقة يبقى في غلط كبير في العلاقة اساسا

 

اذن يبقى بلاش منه الحب اللي جايبنا ورا ده

 

- الاسلام و الدين الاسلامي قالوا إية عن الكدب ؟

- انه من الكبائر , و انه من صفات المنافقين

 

- وكمان امتى الانسان بيلجأ للكدب ؟

وقت الضعف , او الهروب من مشكلة , او عدم ثقة في النفس , او وسيلة للهروب من حساب , او عدم شعور بالمسئولية , و نفاق و انحلال اخلاقي , وووووو

 

 

- كل ده في شخصية الانسان الكداب بصفة عامة

 

والسؤال الان :

 

- يا ترى انتي موافقه تتجوزي و ترتبطي بإنسان يحمل كل

الصفات دي ؟

 

كل ده لمجرد انك بتحبية , ما هو الحب كده غلطة فيكي , لو تغاضيتي عن كل الصفات دي , و نظرتي لصفات تانيه حببتك فية

 

- وإية اللي يجبرك تصدقية و هوه بيقول بحبك , و هوه اساسا بيكدب في حاجات تانيه كتير ؟؟؟

 

هتقوليلي ممكن يكون بيكدب بس دي غلطة و انا مش هحاسبة على كل غلطة و انا كمان بغلط , و هوه بيسامحني

 

 

- هقولك على باكاكا مكنش على القهوة , و كدب , اسالي نفسك كده كان فين و ليه كدب ؟؟

 

 

- على باكاكا اختار وقت انتي مستحيل تكوني بره البيت علشان تعرفي انه كداب

 

- وباكاكا كدب و قال انه بيكلم عبير على حاجه تافهة , مع إنة وقف معاها اكتر من نص ساعة ....

 

- لية كل ده , و لية الكدب ده كله ؟

 

- يا أختي الكدب خيبة و الصراحة راحة .

 

- خديني على قد عقلي و قوليلي لو انتي كدبتي زيه كده بالظبط , هيكون تصرفة ازاي معاكي ؟

 

 

- عاوزه الرد ؟؟؟؟؟

 

 

 

 

 

 

- تابعي كده الحلقة اللى جاية معانا ....

 

واحنا هنعرف الاجابة

وكمان نعرف بقية الحكاية