ده كلام يا احمد ؟؟؟؟؟؟؟؟

[تويتي 10]

ده كلام يا احمد ؟؟؟؟؟؟؟؟

إستووا.. إعتدلوا.. إستقيموا يرحمكم الله

 

الله أكبر

الله أكبر

 

أحمد ركز بأه في الصلاة وبلاش تسرح طيب خلاص، إمممم.. هو الراجل اللي جنبي ده صوابع رجليه عاملة كده ليه؟ صباعه الكبير ده كبير أوي، آه بمناسبة الصوابع هي صوابع زينب دي اللي هيا إيه؟ بيتهيألي دي اللي عاملة زي الزلابية، زلابية؟؟ زلابية إيه بس وبتاع إيه

 

الله أكبر

أحمد ركز ياأحمد، طيب ماأنا مركز أهوه، مركز إيه طيب إنت قريت سورة إيه؟ أنا قريت سورة اللهب شفت بأه أنا مركز إزاي؟ لألأ دي كانت سورة الفيل

 

سمع الله لمن حمده

ربنا ولك الحمد، أنا جعت، بس مش عارف أفطر إيه النهاردة؟ آه المطعم الجديد اللي كانوا بيتكلموا عنه إمبارح، بيقولوا عليه أكله حلو، بس هو في شارع إيه؟ لما أخلّص الصلاة أتصل بالتليفون أعرف العنوان

 

الله أكبر

هيا الساعة كام دلوقتي؟ زمانها أربعة وخمسة، على فكرة هيا الساعة التانية الجلد كنت حطيتها فين؟ آه.. ياإما في الدرج ياإما في الدولاب، دولاب ايه بس ياأحمد ركز ياأحمد إنت بتصلي،أستغفر الله

 

الله اكبر

أهوه أنا مركز أهوه، إنظر لمكان السجود وركز في الأيات اللي بيقولها الإمام

 

الله أكبر

الشيطان ده أعوذ بالله بيخلي الواحد يسرح، مش هو الشيطان بيتسلسل في رمضان، يعني بيتسلسل تلاتين يوم، أيوه بس هو رمضان ده تسعة وعشرين ولا تلاتين؟ هو إبتدى إمتى؟ تعالى نحسبها كده.. هو كان يوم السبت في السعودية وفي مصر الأحد غريبة أوي الحكاية؟ طيب لو واحد على الحدود ورجل بره ورجل جوه يصوم ولامايصومش؟ أحمد.. شفت أهوه إنت رجعت تسرح تاني

 

الله أكبر

هو إحنا في الركعة الكام؟ يعني هانقوم ولا هانقرأ التشهد؟ لا دي التانية، طيب أقولك إتأخر شوية وشوف الي جنبك هايقوم يقف ولا يقعد يقرأ التشهد

 

الله أكبر

أيوه دي الركعة التانية، شفت بأه عشان سعادتك عمال تسرح، لأ خلاص أعوذ بالله من الشيطان الرجيم

 

الله أكبر

السجادة دي مريحة ولونها حلو، هيا سجادة ولا موكيت، لاموكيت بنسيج السجاد، آه على فكرة إبقى إفتكر تكنس السجادة اللي في البيت بالمكنسة، بس لازم أنضف كيس المكنسة عشان بقالي فتره مانضفتوش

 

الله أكبر

الراجل اللي جنبي ده، رجليه بتزق في رجلي، طيب أحرك رجلي شوية، الله ده بيلزقها فيا تاني، أستغفر الله

 

الله أكبر

فيه صوت موبايل، الناس دي ليه مش بتقفل الموبايل ساعة الصلاة.. مش عارفين ان ممكن ده يخلي الواحد مايركزش في الصلاة مع إن فيه يافطة محطوطة على الباب مكتوب عليها إغلق الجوال من فضلك وعليها صورة موبايل عليه علامة إكس.. بس هو الموبايل ده كان نوعه إيه؟

بيتهيألي سيمنس.. هيا إيه الرنة دي؟ آه أنا عايز أبقى أغير الرنة، فاكر الموضوع اللي كتبته عن رنات الموبايل

.

.

.

.

الله أكبر

الراجل اللي جنبي ده عمال يتحرك كتير، أستغفر الله مافيش خشوع خالص، أنا أهوه مش باتحرك

السلام عليكم ورحمة الله

السلام عليكم ورحمة الله

إيه هيا الصلاة خلصت ؟

 

السلام عليكم ورحمة الله

السلام عليكم ورحمة الله

أستغفر الله العظيم

!!!!!

.

.

.

منقوووول

[elmansy designe 1]

شكرا على الموضوع يا تويتى

 

اللهم انا نسألك الخشوع فى الصلاة .... آمين يا رب العالمين

[زمردة 2]

الموضوع حلوة ياتويتي

[تويتي 10]

العفو يا منسي علي ايه بس

ميرسي لمرورك انت وزمرده

 

 

امانه لكل الل يقرا يدعيلي بالهدايه اميــــــــــــــــــــــــــــــــــــــــن

تم تعديل October 28, 2008 بواسطه تويتي

[eng_alaa 114]

ربنا يهدي احمد ويركز ويهدينا معاه .. كالعاده روعه يا تويتي

[تويتي 10]

اخجلتم تواضعنا

ربنا يهدينا جميعا وميرسي لمرورك الغالي يا باشمهندس

[عاشق الصداقه 525]

على فكره الموضوع عجبنى جدا جدا جدا جدا جدا جدا جدا جدا الى أبعد حد

طريقى عرض الموضوع وهدفه فوق الممتازين

 

الراجل اللي جنبي ده عمال يتحرك كتير، أستغفر الله مافيش خشوع خالص، أنا أهوه مش باتحرك

لا احمد معاه حق ،

 

اللهم ارزقنا الخشوع يا رب العالمين

 

بارك الله فيكى وأعزك أختنا تويتى على الموضوع المتميز جداً جداً

 

الموضوع مثبت لفتره

 

تحيتى

[تويتي 10]

ميرسي لمرورك الرائع يا كرينكل وتثبيت الموضوع

ربنا يكرمنا جميعا يا رب

[بنت مصرية 66]

موضووع جميل جدا ياتويتي وعجبني اوي اوي

وزي ماقال عاشق الصداقة طريقة العرض جميلة جدا

وعلي فكرة دي مشكلة بتواجه ناس كتير

وده من وجهة نظري بيحصل لان الناس بتاخد الصلاة علي انها عادة مش عبادة

انا علشان ما اسرحش في الصلاة ة وشيطان الصلاة ماينتصرش عليا

بطبق نظريةى حلوة اوي وعجبتني جدا والحمد لله في الصلاة طبعا بتخيل ان ربنا يببصلي واني انا دلوقتي

واقفة امامه ولازم اكون في قمة ادبي وخشوعي... كمان بتخيل ان ملك الموت واقف جنبي وان دي اخرصلاة هصليها

ده بسعدني علي طمانينه الصلاة والخشوع فيها

دعائي ايضا كما دعاه المنسي اللهم ارزقنا الخشوع في الصلاة

[تويتي 10]

اللهم امين يا بنت مصريه

وشكرا لمرورك

[ممدوح 5]

رائع رائع رائع

موضوع جميل جدا يا تويتى

بس احمد ده طلع مشكله بجد

ربنا يهديه ويهدينا جميعا ويجعلنا من اهل الجنه

ان شاء الله

وشكرا على مواضيعك الشيقه ياتويتى

وننتظر منك المزيد

[EL3aref 5]

موضوع جميل يا تويتى ..

 

اللهم امين

[المتحدية 1]

ربنا يهديكي يا تويتي انا تهت في الموضوع

 

 

 

و ربنا يهدي احمد و جميع المسلمين يا رب و يرزقنا الخشوع آمين

[sawsana_almotaim 0]

السلام عليكم

 

القصة فعلا جميلة جدا

 

و طريقة عرضها حلوة جدااااااااااااااااااااااااااااااااااااااااااااااااا

 

 

انا اندمجت فيها و انا بقراها بجد مش عارفة اوصفها ازاى

 

بس استحالة استحالة ده كان بيصلى يعنى

 

 

 

ربنا يرزقنا كلنا الخشوع ف الصلاه

آمين يا رب

[سماء الكون 0]

يسلمو تويتي

انا برأيي لازم الواحد يلغي كل المواضيع قبل ما يدخل في الصلاة

وشكرا

[sraj-monee 0]

شكرا على الموضوع الواقعي

وربنا يهدي الجميع

[تويتي 10]

ممدوح وعارف والمتحديه وسوسن وسماء الكون و سراج ميرسي جدا جدا جدا لمروركم الرائع دا

ونورتوا التوبيك يا شباب

وربنا يهدينا جميعا يا رب

[أبو الهيثم 71]

موضوع جمييل جدا جدا

 

اللهم ارزقنا الخشوع في الصلاه

 

مشكلة بتواجه العديد من المصليين

[تويتي 10]

ثانكس كاتو نورت التوبيك

[بنت مصر 3]

ميرسى اختى تويتى

فعلا انا اتبسط جدا من الموضوع بتاعك وطريقة عرضك لية

ياريت كل الناس تعرف تطبق النظرية بتاعتك يا بنت مصرية

 

 

موضووع جميل جدا ياتويتي وعجبني اوي اوي

طريقة العرض جميلة جدا

مع تحياتى

[تويتي 10]

ميرسي جدا جدا لمرورك يا بنت مصر

بس كده بنات مصر كتروا اوي عندنا ولا ايه يا بنت مصريه

[alyfargly 0]

السلام عليكم ورحمة الله وبركاته

اللهم اعنا على ذكرك وشكرك وحسن عبادتك

[hanyalily 0]

موضوع رائع تسلم ايدك بجد

[تويتي 10]

alyfargly

 

 

hanyalily

 

ميرسي جدا لمروركم يا شباب ويشرفني تكون اول مشاركه ليكم فالتوبيك بتاعي

[غريبة الاطوار 3]

الله اكبر والله الموضوع رائع جدا ياتويتي ربنا يقويك ودايما بمواضيعك الجميله تسعدينا