الأرض

[عاشق الصداقه]

الأرض

 

لا نملك إلا جتتنا

خدوها ان كنتوا عاوزنها

بعوها فى بورصة الاعضاء

وهاتو السبيه نوزنها

هتنفعكوا ... ويمكن تشفى اطماعكوا

خصوصى الكبد والكليه

خدوا ايدينا تهوى لكم

وحطوا القلب فى مادليه

خدوا ودّنا على صدر القميص حليه

على استعداد نقطعها

ونحرم راسنا من عينها

خدوا حتى الهدوم لخره

ونحلف ماحنا مانعنها

وطين الارض ما تمسوه

ولا عود النخيل تطولوه

دى هى المأوى والمرعى

ونوعى أد ما نوعى

نلاقى جدودنا زارعنها

*******************

خطوطها عاشقه خطاوينا

وعارفه شكل رجلينا

وحافضه حتى أسامينا

ما هو احنا فى هوا ترابها

شربنا الذل وقسينا

ودسنا الوحل والطينَ

وياما بدرنا وسقينا .... بعرقنا

والمساقى جفاف

تعالوا واسألوا الصفصاف

ماهو عايش معانا وشاف

ما دام داء العمى صابكوا

وموت العدل نصبكوا

على رقاب العبيد أشراف

وشجعكوا وطمعكوا

تقاسمونا رغفنا الحاف

هنا على الارض دى عشنا

ونبشنا وعششنا

وياما البرد لسوعنا

وياما الحر خربشنا

وجدرنا وفرعنا

على جبينها وكبشنا

لا ارهابكوا يزحزحنا

ولا رصاصكوا يطفشنا

هنا على الارض دى دارنا ودوارنا

واحبابنا وسمارنا

وحوادتنا وأسرارنا

ما هو احنا وهى شىء واحد

لا فى الغربه بنتفارق

ولا فى الموت بنتباعد

ومهما نعانى ونكابد

نسيم ازهارها ينعشنا

*****************

هنا ع الارض دى سمعنا

مثل شعبى قديم بيقول

يا واخد من عيالى القوت

وناوى ع الخراب والموت

ما ينفع لكش غير نبوت

يطفى فى صدرك الأطماع

ويملى جتتك أوجاع

ومهما تمتلك من باع

نلقح جتتك فى تابوت

يا ناوى فى غفله تسرقنا

وناوى تسف أرزاقنا

إذا خطيت تفرقنا

هتلقى فى كل غيط نبوت

هتلقى فى كل غيط نبوت

 

***************************************

للشاعر : محمد لاشين

 

 

يمكنك تحميل الموضوع من هنا :

ALARD.rtf

[عميد كلية الحب]

فعلا الارض اغلى شيئ في هذه الدنيا

شكرا لك عاشق الصداقة

 

فعلا الارض اغلى شيئ في هذه الدنيا

شكرا لك عاشق الصداقة

[عاشق الصداقه]

الشكر لك حبيبى وشكرا لمرورك

[love you]

عن جد عاشق إنتي كتير موهوب عشان مش كل إنسان بيطلع معو هالحكي الله يوفقك

[عاشق الصداقه]

عن جد عاشق إنتي كتير موهوب عشان مش كل إنسان بيطلع معو هالحكي الله يوفقك

أشكرك كثيراً العضو الكريم ..

ولقد انرت المنمتدى بوجودك ومرحباً بك بين أسرتك الجديده ياللا يا شباب

.. ولحفظ الحقوق انا بحب اوضح بس ان الكلمات للشاعر محمد لاشين .. وانا نقلتها لكم فقط لتستمتعوا بقرائتها

وجزاك الله خيراً .. ومرحباً بك مره اخرى ... ونرجو منك المشاركه الفعاله ..

[بنت مصرية]

رائع طبعا جدا

شعر مميز واسلبوه جميل ويشد

ما هو احنا وهى شىء واحد

لا فى الغربه بنتفارق

ولا فى الموت بنتباعد

ومهما نعانى ونكابد

نسيم ازهارها ينعشنا

رائع فعلا ولاجد ماقول

بوركت علي النقل الموفق عاشق الصداقة

ربنا يكرمك بكل خير

[dr_mido]

بسم الله ما شاء الله عليك أخي في الله (عاشق الصداقة) علي كلماتك الجميلة

وهذه الكلمات يعجز لساني عن شده الأعجاب بها

 

ونتمني لك المزيد إن شاء الله

ووفقنا الله وإياك إلي ما يحبه ويرضاة إن شاء الله

 

أخوك في الله

dr_mido

[Dr.A7MD]

أكيد الأرض أغلى حاجة طبعاً

 

بشكرك يا أحمد على النقل الجميل

 

تحياتى ليك