شخصيات مفلولة.. اللاعب " توتو كورنر"

[دعوه للجنه 457]

 

 

شخصيات مفلولة.. اللاعب

 

أطلق الكابتن عجب أوفسايد صفارته باستياء شديد لإيقاف تمرين الفريق الكبير بعد التراخي الواضح في أداء اللاعبين؛ خاصة مع اعتراض الكثير من اللاعبين على عدم صرف مستحقاتهم رغم عروضهم القوية والفوز في ثلاثة مباريات من أصل ثلاثين مباراة:

 

 

عجب أوفسايد: مش هو ده فريقي العظيم اللي فزت معاه بسبع بطولات إفريقية وآسيوية ورمضانية، فين روح الفانيلة؟؟

 

 

توتو كورنر: فانيلة إيه يا كابتن، أنت بتدرب منتخب سوق الجمعة؟

 

 

عجب أوفسايد: يا توتو يا ابني أنتم مش فاكرين لما كسبنا بطولة صفط اللبن الأخيرة والريس بنفسه كرمنا رغم أحزانه على المصريين اللي ماتوا في ميدان مصطفى محمود.

 

 

توتو كورنر: ما هو من كتر حزنه عالمصريين جاله ارتجاف أذيني وارتشاح بطيني وانسداد طنيني.

عجب أوفسايد: اوعى تفهمني صح!! يا عم أنا أقصد رئيس النادي.

 

 

توتو كورنر: رئيس النادي برضه؟؟؟ يعني خلاص راحت أيام الرئيس القديم.

 

 

عجب أوفسايد: ولا عمري كنت بأحبه ده "كفاية" لما كان بيطلع عين أبونا في الماتشات حتى لو كنا بنلاعب مركز شباب طرة الحيط ونسافر لآخر الدنيا عشان نلعب ونكسب وبعدها يطلعوا يقولوا إننا كسبنا عشان توجيهات السيد الرئيس، ده احنا حتى لما اتغلبنا من ريال بني عبيد سبعة واحد طلعوا في الجرايد وقالوا إن الجون الوحيد اللي جبناه كان بناء على توجيهات السيد رئيس الجمهورية طبقًا لما هو موجود بالبرنامج الانتخابي للسيد الرئيس، وطبعًا الجرايد ما شافتش إن الجون اللي جبناه كان عن طريق لاعب الفريق المنافس لما صعبنا عليه وحط جون في نفسه ووصانا ندعي لأبوه اللي مرمي في البيت ومش لاقي حد يوديه مستشفى شرم الشيخ.

 

 

توتو كورنر: طب لما أنت مخنوق من الريس نزلت مصطفى محمود ليه وقت ما كان التحرير مولع؟؟؟

 

 

عجب أوفسايد: مش غلطتي دي غلطة سواق الليموزين اللي كان القصر الجمهوري باعتهولي عشان أروح بيه التحرير لكن لقى التحرير زحمة ومش هيلاقي ركنة فاضطر يركن في مصطفى محمود.

توتو كورنر: طب سلم لي على عم فرغلي بتاع العصير.

 

 

عجب أوفسايد: الله يسلمك أجيب لك فخفخينا؟

 

توتو كورنر: لأ، شكرًا عندي بطانيات كفاية.

 

 

عجب أوفسايد: أنت مش عاجبني يا كورنر النهاردة في التمرين.

 

 

توتو كورنر: يا باشا لقد أوشك رصيدكم على النفاذ برجاء إعادة شحن البطاقة.

 

 

عجب أوفسايد: إيه يا عم النوكيا؟ ما أنت لسه واخد نص أرنب الأسبوع اللي فات فوق الثلاثة مليون اللي أنت ماضي عقدك عليهم.

 

 

توتو كورنر: يا باشا، أولاً: النص أرنب ده كان عشان عيد ميلادي زي النهاردة من 30 سنة سعادتي تخرج من بطن أمي للدنيا الواسعة وسمّعني هابي بيرث داي تو يو. ثانيًا: يا باشا، المليون يعمل إيه في الأيام اللي احنا فيها دي؟ يا دوب شقة في التجمع السابع وعربية مرسيدس محندقة على قد العيال وأمهم.

 

 

عجب أوفسايد: فلوس فلوس كله عشان الفلوس فين حمية الفانيلة والانتماء، احنا بنلعب عشان نسعد ملايين المصريين مصر يا توتو هي اللي ربتنا هي اللي عشنا فيها وهنموت فيها وعمرنا ما هنسيبها حتى لو خلعونا.

 

 

توتو كورنر: هو أنت هتتخلع برضه؟

 

 

عجب أوفسايد: أكيد كلنا هنتخلع لكن كل واحد ليه وقت وأوان.

 

 

توتو كورنر: ولما أنت سيادتك بتحب مصر كده ليه رفضت تخفيض مرتبك ولو ربع جنيه.

 

 

عجب أوفسايد: يا ابني مصر هي أمي وأديها من دمي لكن مرتبي رايح على علاج الضغط والقلب والسكر وكمان بأكفل ولاد أخويا الأيتام لغاية ما أبوهم يرجع من كولومبيا بالسلامة.

 

 

توتو كورنر: تصدق يا باشا كده هأعيط عشان فكرتني بالغالية مصر وسمّعني: "والله وعملوها الرجالة"، بس يا باشا أنا معاك بقلبي لكن مش معاك بمحفظتي، كلمتين الوطنية ما بيأكلوش عيش، نادي شركة النداغة عارض عليَّ ضعف المرتب وعليهم عربية وكرتونتين نداغة بالبندق للعيال.

 

 

عجب أوفسايد: طب والفريق بتاعنا اللي بيعتبرك النجم الأول رغم إنك ما جبتش ولا بطولة للنادي.

 

 

توتو كورنر: المصلحة أولاً يا باشا.

 

 

عجب أوفسايد: طب عشان حبيبك الريس عجب أوفسايد اللي بيحبك وعمل كل حاجة عشان تبقى لاعب كويس مالوش أي خاطر عندك.

 

 

توتو كورنر: احنا آسفين يا ريس!!!!!!!

 

 

 

 

 

 

 

 

 

 

 

 

 

 

 

 

 

 

[ohabo raby 87]

احنا آسفين يا ريس!!!!!!!

 

 

 

تسلم ايديك يا دعوة

[دعوه للجنه 457]

تسلم ايديك يا دعوة

يسلملى مرورك أختى