برنامج يجعله عــــامر (في شارعنا مدرس)

[ali desoky 391]

برنامج يجعله عــــامر

(في شارعنا مدرس)

 

 

 

 

 

 

 

 

في شارعنا مدرس

 

 

زمان واحنا صغيرين بنلعب في الشارع حافيين جمب الترعه شفنا الاستاذ عبد العاطي (مدرس الحساب في المدرسه عندينا) ... ومره واحده لقيت العيال بيهربوا .. اللي بيجري ناحية بيتهم واللي استخبي في القصب واللي دخل دكان عم حناوي .... حتي الواد محمد ولد الحاج حسنين نط في الترعه من الخوف ... وكل ده ليه علشان الاستاذ عبد العاطي ميشوفش حد منينا يا ولداه لان اللي هيشوفه هيكون يا ويله وسواد ليله بكره الصبح في الطابور......

 

 

وكبرنا انا والعيال وخلصنا تعليم واتوظفنا ولسه فاكرين الاستاذ عبد العاطي والعصايه بتاعته اللي كان مسميها الحاجه عزيزه واللي كان بيضرب بيها اللي مش حافظ جدول الضرب...

 

 

مره ابويا راح المدرسه علشان يوصي عليا المدرسين ..

 

وانا طبعا كنت فرحان ورافع راسي لفوق وسط العيال وكاني ابويا ده المحافظ بجلالة قدره...

 

دخل ابويا علينا الفصل في حصة الاستاذ عبد العاطي وكلنا وقفنا...

 

 

ابويا : السلام عليكم يا استاذ .

 

الاستاذ عبد العاطي: وعليكم السلام يا حاج

 

ابويا: عامل ايه معاك الواد علي؟؟

 

الاستاذ عبد العاطي: علي كويس ومخه نضيف ماشاء الله عليه

 

ابويا: بس عاوزك تضربه وتكسر فيه براحتك يا استاذ .. انت تكسر وانا أجبس.

 

الاستاذ عبد العاطي( مستغرب) : ليه بس الضرب يا حاج؟؟ الواد شاطر وكويس.

 

ابويا: ايوه منا عارف بس عاوزك بردو تضربه عشان ميتغرش ويفتكر نفسه خلاص جاب الديب من ديله..

 

عاوزه يشد حيله اكتر....

 

 

الاستاذ عبد العاطي: حاضر يا حاج انت تؤمر..

 

 

انا سمعت الحوار ده وقلت يا مراري يا ولاد يا خراب بيتك يا علي ابوك جاي يوصي عليك ولا جاي يقلبها علي راسك ربنا يستر ... كده الاستاذ ما هيصدق يسمع الكلام ده وهيشتغل فيا ضرب حسب الوصيه...

 

 

وفعلا الاستاذ عبد العاطي مكدبش خبر وقفني بعد ما ابويا مشي وفضل يسمعلي كل جداول الضرب وطبعا من كتر الاسئله غلطت ولاول مره اتعاقب بالحاجه عزيزه ...!!!

 

 

ولغاية دلوقتي فاكر اليوم ده ..................

 

 

فجأه صحيت من احلام اليقظه دي ولقيت نفسي قاعد في الفصل وتلاميذي قدامي قاعدين والحاج سعداوي ولي امر الواد حاتم التلميذ الفاشل واقف يزعقلي علشان ضربت ولده اللي مكتبش الواجب وبيقولي محدش يضرب ولدي انا ولدي عمره ما ينضرب ابدا....

 

اقوله يا حاج ولدك ضعيف ومهمل وكمان قليل الادب ...

 

يقولي بردو ملكش دعوه بيه ومتمدش ايدك عليه تاني ... يا اما مش هيحصل طيب معاك يا ناظر ....

 

 

لقيت نفسي بقول الله يرحم ايامك يا استاذ عبد العاطي....!!

 

 

ويجعله عامر

 

 

 

تابع معنا حلقات البرنامج

 

يجعله عامر

 

[ohabo raby 87]

ابويا: بس عاوزك تضربه وتكسر فيه براحتك يا استاذ .. انت تكسر وانا أجبس.

 

الاستاذ عبد العاطي( مستغرب) : ليه بس الضرب يا حاج؟؟ الواد شاطر وكويس.

 

ابويا: ايوه منا عارف بس عاوزك بردو تضربه عشان ميتغرش ويفتكر نفسه خلاص جاب الديب من ديله..

 

عاوزه يشد حيله اكتر....

 

 

ربنا يكرمك ويبارك فيك يا عم دسوقى وفي الاستاذ عبد العاطى

 

يااااااااه التعليم زمان كان حاجه ودلوقتى حاجه تانية

 

بس زمان العيال مكنتش بتيجى غير بالضرب

 

اما دلوقتى لا نافع ضرب ولا حاجه

 

لأ وقال ايه عايزين يطلعوا قرار بمنع الضرب

 

ده لو مكنتش غلطانة انه فعلا صدر

 

اذا كان فيه ضرب والعيال مش نافعة

 

امال لما يمنعوه هيعملوا ايه

 

تم تعديل August 13, 2011 بواسطه ohabo raby

[دعوه للجنه 457]

جميله جدا الحلقه وفيها معاني كتير

 

بارك الله فيك يا مستر علي

[لامار 94]

نعيب زماننا و العيب فينا و ما لزماننا عيب سوانا

سقا الله تلك الايام