يا مصرى ليه دنياك لخابيط .. سيد حجاب

[الجندى المجهول 37]

القصيده دى شعر سيد حجاب علشانك ياعاشق الصداقه

يا مصرى ليه دنياك لخابيط...والغلب محيط

والعنكبوت عشش عل الحيط...وسرح عل الغيط

يا مصرى قوم هش الوطاويط...كفاياك تبليط

صعبه الحياه والحل بسيط...حبة تخطيط

 

فتحت باب إستيرادك

وصرفت فوق ضعف إيرادك

حلى للخواجه إستكرادك

سابك بتقرا فى أورادك

وده أشطك ونزل تشفيط

 

ومهولاتى تحب تزيط

ساعة الفرح زغاريط تنطيط

وفى المياتم هات يا صويت

وفى المظاهرات سخن تشيط

وفى الانتخاب تنسى التصويت

 

وليه بترشى وتتساهل

وتبيع حقوقك بالساهل

تستاهل النار تستاهل

ياغويط ويحسبك الجاهل

ساهل وساهى وغبى وعبيط

 

يا مصرى يا اللى الغلا عصرك

والنهب فى عصرك حاصدك

قوم للحياه وأسبق عصرك

ولا حاجه هاترجع مصرك

إلا أن تكون شغال ونشيط

 

يا مصرى ليه دنياك لخابيط...والغلب محيط

والعنكبوت عشش عل الحيط...وسرح عل الغيط

يا مصرى قوم...هش الوطاويط...كفاياك تبليط

صعبه الحياه والحل بسيط...بس حبة تخطيط

[بنت مصرية 65]

شكرا كتير يا جندي علي القصيدة الجميله جدا

بالغم انها مهداه لعاشق الصداقة لكن لم استطع منع نفسي من الرد

يا مصرى ليه دنياك لخابيط...والغلب محيط

والعنكبوت عشش عل الحيط...وسرح عل الغيط

يا مصرى قوم...هش الوطاويط...كفاياك تبليط

صعبه الحياه والحل بسيط...بس حبة تخطيط

كفيت ووفيت ياسيد حجاب

جزاك الله خير ياجندي وتقبل مروري

[عاشق الصداقه 525]

بارك الله فيك يا حبيب قلبى

بس انت كده هتودينى فى داهيه

لا بجد قصيده رائعه وانا بحب الشعر بالعاميه وان شاء الله هتابع دايماً كتابات الشاعر الجميل ده

وربنا يخليك لينا وتجيبلنا دايماً موضوعات متميزه

بعد إزنك بس أنا غيرت عنوان الموضوع علشان يصف المحتوى بتاعه

وعلشان الناس تعرف ان ده شعر ، وكفايه إهدائك داخل الموضوع وبارك الله فيك يا حبى

تحيتى ليك ولشاعرنا المميز

[الجندى المجهول 37]

انا اسف مكنش قصدى والله الى جه فى باللك وشكرا للمرورك

ويا بنت مصريه مدام نزلت القصيده على المندى تبقى لكل اناس

[عاشق الصداقه 525]

انا اسف مكنش قصدى والله الى جه فى باللك

ومين قال ان جه فى بالى حاجه !!

انا بهزر يا غالى ، هو انت افتكرتنى بتكلم جد !!!!

ما عاش ولا كان اللى يودينى فى داهيه

 

شكراً مره تانيه على القصيده وعلى الإهداء يا جميل

[NADA 34]

...كفاياك تبليط....

صعبه الحياه والحل بسيط...حبة تخطيط

[الجندى المجهول 37]

شكرا اختى ندى

[محب الحبيب 0]

وصف تفصيلي لحاله كتير من الشباب اليومين دول

 

الله عليك يا شاعرنا يا كبير

 

وتسلم يا جندي علي نقلك لهذه القصيده

[الجندى المجهول 37]

الله يسلمك ويحفظك

[ali desoky 391]

وليه بترشى وتتساهل

وتبيع حقوقك بالساهل

تستاهل النار تستاهل

ياغويط ويحسبك الجاهل

ساهل وساهى وغبى وعبيط

 

 

لا بصراحه كلمات جات في الصميم

وكمان في قلب الاحداث

 

شكرا لك جندينا المجهول

جزاك الله خيرا

ان شاء الله

[الجندى المجهول 37]

لا عيب عليك اخوك جامد

جزاك الله خيرا يا حبيبى

[مصطفى بهجت 2]

يا جندي يا بطل يا صديقي ... أوعي تكون فاكر نفسك مجهول

 

كل ليلة حبايبك الشعرا في طريقي ... جيابلنا منهم كلام جميل معدول

 

يا مصري ليه بتزعل م الكلام الحقيقي ... ولا خلاص ودانك أخدت ع الكلام المعسول

[الجندى المجهول 37]

ربنا يكرمك يا حبيبى

دايما بتقول كلام معرفش ارد عليه

يارب كده ينولك كل اللى فى بالك ويجعلك الخير اينما كنت