اتكلموا

[الجندى المجهول]

اتكلمــــــــــــــــــــــوا

 

اتكلموا .. اتكلموا .. اتكلموا ...

محلا الكلام ، ما ألزمه و ما أًعظمه ...

فى البدء كانت كلمة الرب الاله ،

خلقت حياه ، و الخلق منها اتعلموا ...

 

فاتكلموا

 

فى البدء كانت كلمة الرب الاله

روح بجناحين شطار ، و صار للكون مداه .

آخر مطافها ، جت و حطت ع الشفاه ،

لما البشر ملكوا الوجود ، و استحكموا ...

 

فاتكلموا

 

الكلمة ايد ، الكلمة رجل ، الكلمة بــاب ،

الكلمة نجمه كهربيه فى الضباب

الكلمة كوبرى صلب فوق بحر العباب ،

الجن يا أًحباب من ما يقدر يهدمه ...

 

فاتكلموا

 

الرمل مرمى تحت قبة السما ،

مشتاق لقطره من المطر فيها النما ،

ملايين سنين عمره ما داقها ، انما

فيه كلمة تقدر فى المراوى تِعَوَّمه ..

 

فاتكلموا

 

فيه كلمة تقدر تزرع البور حور ضليل ،

و كلمة تقدر تجعل الكوخ بيت جميل ،

و ابو العيال و الجلابية الهلاهيل ،

فيه كلمه تعطيه مال ، و كلمة تِهندمه ..

 

فاتكلموا

 

لكم السلام ، يا ملفوفين حول اللهب ،

يا غواصين فى القلب ع الكلنه العجب ،

فى البدء كانت كلمة الرحمن سبب

و ما عادش غير الحق كلمة تِتَمَّه

 

فاتكلموا

قصيده لصلاح جاهين

[عاشق الصداقه]

راااااااااااااااااااااااااااااااااااااااااائعه بجد

 

تسلم يا قمر على القصيده الممتازه

 

ربنا يخليك لينا وتجيبلنا دايما كل حاجه حلوه

[الجندى المجهول]

ربنا يخليك يا عاشق الصداقه

 

ده بعض ماعندكم

[NADA]

جميلة جداااا

 

 

فى البدء كانت كلمة الرب الاله

روح بجناحين شطار ، و صار للكون مداه .

آخر مطافها ، جت و حطت ع الشفاه ،

لما البشر ملكوا الوجود ، و استحكموا ...

 

 

شكرا ليك أيها الجندى المجهول

[eng_alaa]

قصيدة رائعة لشاعرنا الكبير صلاح جاهين .. شكراً لك أخي الجندي المجهول علي القصائد الجميلة التي تأتينا بها ..

[Shetos]

أيواه كده..

 

والله رائع فعلاً..

 

شكراً الجندى المجهول..

[الجندى المجهول]

لا شكر على واجب يا جماعه