بابا - انتظرنى بعد 9 شهور " فيس بوك"

[دعوه للجنه]

حامل ؟؟

 

.... قديمه

 

طيب ايه الجديد تعالى شوفى معايا

طبعا يا بنات أحلى خبر بالنسبه لكل الستات هو خبر الحمل .

 

ويوم ما بتعرف انها حامل ده بيكون اسعد يوم فى حياتها وخصوصا لو كانت حامل لأول مره (عروسه جديده)أو تكون أتأخرت فى حملها لأى سبب(الحمل العزيز).

 

وطبعا مش هى اللى بتكون مستنيه البشرى دى لوحدها ولكن الزوج ايضا بيكون مستنى الخبر السعيد ومستنى اليوم اللى تيجى فيه وتبلغه بالبشرى السعيده .

 

 

 

بس السؤال هنا حتبلغى جوزك بالخبر السعيد ده ازاى؟؟؟؟

 

الطريقه التقليديه المتبعه فى الموضوع ده ان الست تروح وهى بتطنطط من الفرحه وتقول لجوزها انا حامل

 

طيب ايه رأيككم لو جددنا شويه وخليناه خبر سعيد بذكرى سعيده وموقف لا ينسى ابدا طيب أزاى؟

 

خدى منى شوية افكار جديده بس مبدأياً أوعى تبلغى جوزك بحملك عن طريق التليفون ابدا وضيعى على نفسك انك تشوفى أحلى رد فعل وأحلى فرحه فى عنييه .

وإليكى بعض الطرق أختارى منها ما يناسبك وما يناسب جوزك وظروفه وطباعه :-

*ممكن تبلغيه عن طريق رسالة موبيل أشترى خط جديد برقم ما يعرفوش وابعتيله رساله أكتبيله فيها(بابا حبيبى ده رقمى الجديد سجله عندك كنت عاوز أكلمك بس الشبكه فى بطن ماما لسه ضعيفه جدا أنا جيى ان شاء الله بعد 9 شهور استنانى عند الدكتور ).

بس لازم تبعتيها وانتى قاعده معاه علشان تشوفى رد الفعل.

**ممكن تجيبى بالونه من البالونات الهيليوم وتحطيها جب السرير وهو نايم بحيث انه أول ما يفتح عينيه من النوم يشوفها وتعلقى عليها ورقه وتكتبى فيها(صباح الخير يا أحلى بابا متعملش دوشه وانت قايم لأنى لسه نايم صحينى كمان 9شهور).

***ممكن لما يجيي من الشغل تحضرى الغدا وتحطى طبق فاضى زياده وادوات أكل كامله(شوكه وسكينه ومعلقه)وتحطى ورقه فى الطبق مطبقه بعد ما تكتبى فيها(انا مش طبق فاضى انا ضيف مش عادى حزوركم بعد 9شهور واقعد معاكم على طول).

 

*****أو تملى البانيو مايه وتحطى فيه ورد مجفف وتحطى فى الميه شمع من اللى بيعوم على وش الميه (3 شمعات) وتجيبى الخله الخشب بتاعة السنان وتعلقى فيها ورقه مكتوب فيها اسم جوزك وترشقى الخله فى الشمعه ونوريها وواحده تانيه بنفس الطريقه وعليها اسمك ونوريها والشمعه التالته عليها ورقه مكتوب فيها(انا شمعه مطفييه حنور بعد 9شهور تحب تسمينى ايه؟).

******ممكن تيجيبى اى ورقه ماليه وتدبيسى فيها ورقه بيضاء وتكتبى عليها (بابا حبيبى متصرفش الفلوس ديه انا جى كمان 9شهور وفى طلبات كتيره ليه) وحطى الفلوس فى المحفظه واطلبى منه اى حاجه علشان يفتح المحفظه قدامك

 

يارب اقتراحتى تكون عجبتكم .

ويارب كل اللى مستنيه الخبر السعيد ده ربنا يناولهولها ويرزقكم جميعا الذريه الصالحه.

واللى عندها أفكار ياريت تقولهالنا وادينا كلنا بنستفيد

[ali desoky]

انا عن نفسي افضل الطريقه المباشره وهي تبليغ الخبر بكل يسر وبساطه لانه خبر ميل ينتظره الجميع بفارغ الصبر

ومجرد سماع الخبر يجعل السعاده تغمر الجميع ولا تحتاج الي مفاجات او اي افكار خاصه

[لامار]

مستر علي دة من وجهة نظرك اما الام دايما الها اقتراحات و افكار ثانية

اكيد بنحترم رايك و شعور الابوة و الامومة من اقدس المشاعر و اعظمها

دعوة الحلوة تم التقييم

تم تعديل October 12, 2011 بواسطه لامار

[Asya]

والله افكار حلوه جدااااا

وكمان جديدة

منك نستفيد

تسلمى حبيبتى على موضوعك الرائع

ربنا يفرح جميع المسلمين

[دعوه للجنه]

 

 

انا عن نفسي افضل الطريقه المباشره وهي تبليغ الخبر بكل يسر وبساطه لانه خبر ميل ينتظره الجميع بفارغ الصبر

ومجرد سماع الخبر يجعل السعاده تغمر الجميع ولا تحتاج الي مفاجات او اي افكار خاصه

 

 

ده اللي تم بالفعل يا مستر

ولا ايه؟؟؟

 

الصراحه الصراحه المباشره افضل طريقه؟

 

ربنا يرزقني واياك الزريه الصالحه

[حورية الجنة]

برافو دعوة احنا كده شاطرين :)

 

ربنا يرزقكم الذرية الصالحة يارب

[نـــــــــــور]

انا عجبتنى اوى فكرة الموبيل

 

 

 

*ممكن تبلغيه عن طريق رسالة موبيل أشترى خط جديد برقم ما يعرفوش وابعتيله رساله أكتبيله فيها(بابا حبيبى ده رقمى الجديد سجله عندك كنت عاوز أكلمك بس الشبكه فى بطن ماما لسه ضعيفه جدا أنا جيى ان شاء الله بعد 9 شهور استنانى عند الدكتور ).

 

 

 

 

تم التقيم