في حب مصر

[بحر الذكريات]

مفيش ف الأغاني /

 

 

مفيش في الأغاني كدة ومش كدة

تفرقنا عن بعض بالشكل ده

يا مصر اللي جايبة الشجر من زمان

وشايلة الضفاير علي البرتقان

وقبل الأوان اللي قبل الأوان

بتحييني أنفاسك المسعدة

 

 

***

 

 

يا حلوة كلامك تحبه الودان

يشمسني في الدروة زي الميدان

يمشيني بين الحيطان الغيطان

عروسة وحصان في القمر والعدا

مفيش في الأغاني كدة ومش كدة

تفرقنا عن بعض بالشكل ده

 

 

***

 

 

عنيكي تغمض وتفتح بيبان

سطوح الليالي عليه الأمان

وبحر الدرة من ورق الامتحان

بتغني موّالي يا مولّدة

مفيش في الأغاني كدة ومش كدة

تفرقنا عن بعض بالشكل ده

 

 

***

 

 

بحبك كأني طليق العنان

و زى العجوز اللي دق البيبان

وزي الكتاب اللي كان ياما كان

وزي الرصيف اللي في السيدة

مفيش في الأغاني كدة ومش كدة

تفرقنا عن بعض بالشكل ده

 

 

***

 

 

أنا اللي زرعت البيوت والعيدان

ما يمنعش عقلي شوية جنان

حيرجع لإسمك رنين الحنان

قتيل المحبة يموت ف الندا

مفيش ف الاغاني كدة ومش كدة

[الجندى المجهول]

بجد الله اكبر على الكلام

تسلم ايدك يا بحر

والله العظيم الناس دى كانت بتحب مصر