سلسلة خطط لحياتك في 2012 ...... 1- العام عامك

[المدرب حسام الدين محمد 20]

سلسلة خطط لحياتك في 2012

1- العام عامك

كل ما يصنعه المرء هو نتيجة مباشرة لما يدور في فكره ، فكما أن المرء ينهض على قدميه ، وينشط بدافع من أفكاره ، كذلك يمرض ويشقى بدافع من أفكاره أيضا ....

إبراهيم الفقي

كل يوم بتصحى من نومك عادى جدا ! بتفتح عنيك بتشوف الشمس طالعه والدنيا منورة

بتقول لنفسك صباح الخير عادى جدا ...

بس النهار ده مش عادى لأنك حتصحى حتلاقى نفسك صحيت على سنة جديدة

مش مجرد يوم عادى يعنى انت بتبدأ عهد جديد فى حياتك !!

ايوة سنة جديدة يعنى 12 شهر ، يعنى 48 أسبوع ، يعنى 365 يوم ، يعنى 8760 ساعه ، يعنى 525600دقيقة ، يعنى 31536000 ثانية !!! فهمت بقىىىىىى

وبما انها سنة جديدة كل اللى حيدور فى عقلك وذهنك هو يا اما انك تعيش بفكر جديد وانك تصنع حاجة جديدة لذاتك وبلدك او اما تقول عادى يعنى سنة زيها زى غيرها وساعتها هتكون واحد عادى جدااااااااا

وبما ان السنة هى معيار الخط التشغيلية لاى مؤسسة او منظمة واى شركة بتبنى خط نجاحها على المدار السنوى أحنا كمان كاشخاص عاوزين نخطط لحياتنا الشخصية فى 2012

ايوة نخطط متستغربش ؟ العالم كله بيتغير ومحتجين شباب قادة يقدروا يغيروا العالم العربى للاحسن علشان كده ده سلسلة مقالية حتساعدك فى كده من خلال انها تحل كل المشاكل اللى بيعانى منها الشباب او اصناف الناس الستة فى الحياة وهم :

الصنف الاول :

هو انسان يعيش في الدنيا ولا يعرف ما الذى يريده ، ولا يعرف اهداف يحققها؟

وطبعا ده مشكلته حنحلها من خلال اننا حنساعده فى اكتشاف مجال حياته ؟ وايه اهم القيم اللى ممكن يعيش من اجلها ؟ وايه هى رسالته فى الحياة ؟

الصنف الثانى :

انسان يعرف ما الذى يريده ؟ ولكن لا يعرف كيف يصل اليه ؟ وده صنف اكثر شقاء من الاول

وطبعا ده مشكلته حنحلها من خلال أننا هنسهله الخطوات وحنوضح له رؤيته .

الصنف الثالث :

انسان يعرف ما الذى يريده ويعرف كيف يصل اليه ، ولكنه لايثق فى قدراته

علشان كده حنساعده فى اننا نعمله نموذج swot وانه يقدر يحلل نفسه

الصنف الرابع :

انسان يعرف ما الذى يريده ، وكيف يصل اليه ، ويثق فى نفسه ، ولكنه يتاثر بالاخرين

علشان كده هندعمه بانه يكون عارف خطواته كويس من خلال الخطة الزمنية الشهرية

الصنف الرابع :

انسان يعرف ما الذى يريده ، ويعرف كيف يصل اليه ، ويثق فى قدراته ولا يتاثر بكلام الاخرين ولكنه يهمل التفكير الابداعى فى العمل .

وده حله فى مقالة التفكير الابداعى والابتكارى التجديدى فى عمل وانتاجك من خلال فكرة موهبتى .

الصنف السادس والاخير :

هو الى نبحث عنه الذى شمل كل صفات الخمس اصناف من البشر ولكنه يتم ذاته بالتقويم الذتى دائما .

الطريق الى معرفة ماذا تريد ؟

ماذا تريد ؟

ايوة أنت !! صاحب الصنف الاول من الناس ؟

انت عاوز ايه بالضبط ؟ عايش ليه ؟ تفتكر انت فين وممكن توصل لفين ؟

قصتك قصة غريبة شبيها لنكته كنا بنسمعها زمان

كان فى اتنين ساكنين فى الدور الاربعين ، ولما راحوا يسكنوا لقوا الاسانسير عطلان

راحو طلعوا على السلم ولما وصلوا للدور الاخير ، واحد منهم قال للتانى عندى ليك خبرين واحد حلو والتانى مش حلو !!

قالوا ابدا بالحلو ! قالوا : احنا وصلنا للدور الاربعين

قالوا : طب والوحش ؟

قال : دى مش العمارة اللى أحنا ساكنين فيها

اهوة أنت عايش كده دلوقتى ؟ ماشى وخلاص

علشان كده حيدور مقالتنا النهاردة على حل المشكلة الاول وهى اسمها :

1- التشخيص : ودى بتجاوب على سؤال ( أين انا الان ؟ )

ومن خلالها بنحدد مجال وقيم ورسالة الانسان

اولا : تحديد المجال :

هو يعنى ايه مجال ؟ المجال هو التخصص اللى بيميزك أنت على غيرك

الشى اللى أنت بتجمع فيه ( المعرفة + القدرة على تطبيق المعرفة دى )

وخاصة لو كانت مجال دراستك

وبما أن أكثر من 80 % يعملون بغير تخصصهم ومجالهم تعالى نحاول نحدد مجالك .

أول حاجة : يوجد 3 معايير رئيسية تساعدك على اختيار مجال حياتك :

وتتمثل هذه المعايير فى كلمة ( رفق )

ر ــــ رغبة : هل لديك رغبة أن يكون مجال تخصصك الدراسي أن يكون مجال حياتك

ف ـــ فرصة : هل أذا جاءتك فرصة عمل فى مجال تخصصك الدراسى تقبلها ليكون عملك ومن بعدها مجالك العملي

ق ـــ قدرة : هل لديك القدرات التاهيلية الشخصية لصاحب أهل التخصص الذى تريد أن يكون مجالك .

ثاني حاجة : كيف تحسب المعايير بدقة وبطريقة أفضل :

- اختار 3 تخصصات تريد أن يكون احدهم مجال حياتك أو ترى نفسك فيهم

- حدد درجة من 10 درجات لكل نقطة من الرغبة والفرصة والقدرة لكل مجال

- أجمع مجموع الدرجات الخاصة لكل مجال والمجموع الاكبر يكون مجالك ثم الاخر .

- اذا كان مجموع الدرجاتبين المجالات أقل من درجتين تدخل على مربع الندم .

كيف تستخدم مربع الندم :

- أطرح أعلى درجة فى كل مجال من الدرجات الاخرى فى الرغبة والقدرة والفرصة .

- مثال : هندسة اعلى درجاته 9 ، نطرح 9 من4 ، 9 من 9 ، 9من 7

- بذلك يزيد الفرق وتستطيع أن تحدد مجالك وتخصصك

- ملحوظة أذا وجدت أن مجالك ليس تخصصك الدراسى تستطيع أن تدرسها أو أن تستكمل دراسات عليا فى مجالك الذى حدد لك كمجال لحياتك .

( مرفق مع المقالة صورة توضح استخدام مربعات تحديد المجال )

ودلوقتى اقولكم سلاااااااااااااااااام ونكمل المرة الجاية القيم وكمان تحديد الرسالة الشخصية لكل واحد فينا ...

[عاشق الصداقه 525]

جميل جدا جدا جدا أستاذى المبدع والمميز

بجد موضوع وسلسله فوق الروعه .. ينقصها فقط التنسيق والألوان لعرض الموضوع بشكل شيق وسيكون الموضوع ممتاااااااااااااااز

تسلم إيدك ،، وبإنتظار باقى السلسله

 

خلينى بس أختلف فى أول فقره فى الموضوع ، وهى كلمة الدكتور ابراهيم الفقى :

 

 

كل ما يصنعه المرء هو نتيجة مباشرة لما يدور في فكره ، فكما أن المرء ينهض على قدميه ، وينشط بدافع من أفكاره ، كذلك يمرض ويشقى بدافع من أفكاره أيضا ....

إبراهيم الفقي

 

أنا شايف إن الكلام ده أغفل تماماً إرادة الله عز وجل ،، فمش كل حاجه فى إيد الإنسان للدرجه دى حتى مرضه !!

صحيح نوع من الأمراض .. وهى الأمراض النفسيه تحديداً بعد إرادة المولى عز وجل بيكون للإنسان فيها دور كبير .. وحتى فى اسلوب العلاج منها بيتوقف على الشخص نفسه وقناعاته وقدرته على تهيئة افكاره للإيجابيه وللشفاء من مرضه ،، وبرضه ده بإذن الله وقدرته

 

لكن تجريد الأمر كده وكأن الإنسان وأفكاره هى اللى عن طريقها يمرض ويشقى !!! ده كلام الغرب اللى بيتنقل لينا بنصه كما هو ،، واللى الدكتور ابراهيم الفقى نفسه بعد الأزمة القلبيه والعمليه اللى عملها راجع نفسه فى كلام كتير كان بيقوله وأضفى الجانب الروحانى الاسلامى فى كل محاضراته

 

معذرةً لإطالة النفس فى الجزئيه دى .. بس لأنها مهمه وكانت محتاجه توضيح

لكن المقاله كلها ما شاء الله لا قوة الا بالله

 

وعلى فكره مفهمتش الجزء الأخير - إزاى بيطرح ويجمع و .. .... رغم انى فاهم فى العموم الموضوع والطريقه عاوز يوصل لايه

[المدرب حسام الدين محمد 20]

يا حبيبى انت تعقب زى ما أنت عاوز

لانى بجد وحشنى الكلام معاك

بخصوص التنسيق والله انا بقالى كتير مكتبتش حاجة على المنتدى وكنت مشتاق بجد انزل مقالة بسرعه ان شاء الله الجاى يبقى اجمل

بس دعواتك علشان دخلت الجيش هههههههه

 

بخصوص المقولة انا معاك فيها جدا ومع كلامك مع انى واخدها من مفهومى الذاتى واللى بتدفعنى للعمل بيها ان فى تفكير سلبى وايجابى بعد التوكل على الله طبعا

واخر حاجة الجدول ده والفكرة دى بتوضح ازاى توضح مجال تخصصك

انت عارف ان بعد ما فى تطور رهيب جدا فى التكنولجيا

اصبح الشباب عندهم هوايات ومواهب كتير بس احنا نفقد التخصص فده وسيله بتساعد الشباب على انهم يحددوا المجال التخصصى بتاعهم اللى يبدعوا فيه

وبس كده

تحياتى ليك ولكل اعضاء الجروب