الكوسه

[الجندى المجهول]

للكوسه فى بلادى شئون

 

بتخلي المسنود فرعون

 

يتفرعن فين مهما يكون

 

وتخلي الجاهل أستاذ

 

والأعرج لاعب جمباز

 

وتخلي الأحول هداف

 

والكوره الآوت ف الجون

 

للكوسه ف بلادي شئون

 

لو تعرف واحد ف الشرطه

 

راح تخرج من أجدع ورطه

 

والراجل اللي انت ظلمته

 

تلاقيه متلقح مسجون

 

أو تعرف شخصيه كبيره

 

شغاله ف البنك مديره

 

راح تاخد من غير ضمانات

 

كام قرض بمليون مليون

 

وهروبك طبعا مضمون

 

ويا عيني لو تعرف نايب

 

ف المجلس مش نايب خايب

 

راح تبني أبراج وهميه

 

أوراقها مظبوطه أكيد

 

وفلوس الناس المهريه

 

حتجيلك م الجيب للإيد

 

بعديها تروح المستشفى

 

وتقيد نفسك مجنون

 

أحكامك تسقط ف ساعتها

 

بعديها ترجع موزون

 

ويا عيني لو تعرف شيخ

 

فجنابك طاهر علطول

 

وصيامك طبعا مقبول

 

وإذا فرضا حبيت تتجوز

 

تتجوز من غير مأذون

 

وإذا ساكن ف عماره جديده

 

وحبيبك راجل مسئول

 

فسيادتك من غير ما تقول

 

يركب لك فورا تليفون

 

ولو انت عندك عربيه

 

ونمرها سوده بنسرين

 

حتعدي أجدعها كمين

 

وحتكسر أوضحها إشاره

 

ماهو نمرك سوده جباره

 

ولا تعرف أيتها قانون

 

ولو انت بتعرف فرّان

 

أو واحد بياع جرنان

 

راح تاخد طلبك وحتمشي

 

من غير ولا دوشه ولا دور

 

والناس الغلبانه حتاخد

 

طلباتها بعدك وتغور

 

ماهو كله غيرك بيهون

 

ولو انت زميل الحلاق

 

راح تحلق اولها زبون

 

وإذا كنت بتعرف دكتور

 

حتعيش متطمن مسرور

 

وحتسلك ف لجان الشفوي

 

ومجال تعيينك موفور

 

وحتطلع فالتليفزيون

 

بالبدله وفيها الببيون

 

تتكلم وبكل بساطه

 

عن شرف المهنه المدفون

 

لكن لو شاعر غلبان

 

قلت اللي ف نفسك على طول

 

حيقولو مين قال لك قول

 

ويهاجمك مليون إنسان

 

 

 

 

منـــــــــــــــــــــــــــــــــــــــــقول

[sindrella 26]

برافووووووووووووووووووووووووووووووووووووووووووو عليك بس شكلك كده من حزب إيمان بكرى وحتودينا فى دهية

[عاشق الصداقه]

رائع كالعاده

وكلمات رائعه موزونه ومعاها حق فى كل اللى قالته

انا معترض بس على جزئيه صغيره مش معاها فيها خااااااااالص

 

ويا عيني لو تعرف شيخ

فجنابك طاهر علطول

وصيامك طبعا مقبول

وإذا فرضا حبيت تتجوز

تتجوز من غير مأذون

 

صيامك مقبول وطاهر على طول دول كأن الشيخ بقى واسطه لربنا .. وحاشا لله طبعاً

 

وعلى العكس .. لو تعرف شيخ تبقى مشبوه فى زمانا ده ، واحتمال تكون ارهابى

 

شكراً لموضوعك الجميل والأشعار اللى بتتحفنا بيها كل يوم حبيبى الجندى

[eng_alaa]

أخي الجندي المجهول ..

لا نستطيع إلا أن نقول لك شكراً علي ماتقدمه يومياً لنا من وجبات شهية لعقولنا فشكراً لك

[«۞۩ أبو سليمان ۩۞»]

ههههههههههههههههههههه

 

رائع يا جندي

 

قولي موش ممكن تجبلي كام كيلو كوسه

تم تعديل January 14, 2009 بواسطه Dr Abcarino

[بنت مصرية]

جميل الموضوع ده ويستحق الاقتباس كله ولكن...

وانا كنت فعلا راح اقتبس نفس الجزئية اللي اقتبسها عاشق الصداقة لانها لفتت نظري

ويا عيني لو تعرف شيخ

فجنابك طاهر علطول

وصيامك طبعا مقبول

وإذا فرضا حبيت تتجوز

تتجوز من غير مأذون

وانا فعلا سمعت الموضوع ده بس مش بالظبط بالطريقة دي

هو انا سمعتها في التلفزيون في برنامج خواطر او علي قناة العفاسي او الناس لااتذكر بالظبط

ولكن اللي سمعته ان فيه شخص ممكن يروح لشيخ يقوله والله انا عملت كذا او كذا ايه رايك ده ماينفش ثلا يبقي مكروه او كدا

وكان الناس فاركة ان الدين هو اللي بيتفصل عليهم

وفعلا حسبي الله ونعم الوكيل

الكوسة مووضع كبير ليه مميزات بس عيوبه اكتر بكتييييييييير

شكرا ياجندي يامجهول

تقبل مروري

[الجندى المجهول]

بنت مصريه الباشمهندس دكتور عبقرينو وكمان سندريلا

واضح انى الموضوع جامد فعلا

جزاكم الله خير ا

ربنا يسعدكم والجنه يوعدكم

[حياتى من اجل ربى]

لكن لو شاعر غلبان

 

قلت اللي ف نفسك على طول

 

حيقولو مين قال لك قول

 

ويهاجمك مليون إنسان

 

 

هههههههههههههههههه

 

للاسف حقيقه

 

جزاك الله خيرا اخى

موضوع مميز وجميل

كل احترامى وتقديرى لك

ربنا يكرمك ويسعدك يااااااااااارب

[الجندى المجهول]

جزاكى الله خيرا اختى

تاجره السعاده

ربنا يكرمك

ربنا يجعلك مستجابه الدعوه

مرروك اضف للموضوع نكه التميز