الـدُّنـيا سِـكـِّة سَـفـَر ...!!

[ابن النيل86 14]

 

الـدُّنـيا سِـكـِّة سَـفـَر ...!!

*****

من تأليف

***

الطبيب الشاعر / د. محمد رزق...

*

*

*

 

الـدُّنـيا ضاقِـت قـَوى

والنـَّاس حَ تِعـمِـل إيـه ؟!

والقـَلب لـَو يـِكتِـوى

بالظـُّلم يـِوجَـع فيه !!

ودراعِـى لـَو يـِتـلِـوى

حَ ادعِـى عَـلـَى اللى لاويـه

يـِمكِـن فِ يوم رَبـِّنا

يـِنصُـرنِـى أو يهديه ..!

***

الـدُّنـيا سِـكـِّة سَـفـَر

لِـلغـُربَـة والتـِّرحال ،

فيها اللى ضـَلِّ وكـَفـَر

واللى ارتـَضـَى بـِالحال

واللى بَـنـَى أو حَـفـَر

واللى انشـَغـَل بـِالمال

مَكتوبلـِنا كـُلـِّنا

يوم القِـيامَـة سـؤال ..!

***

قولولِـى مِـين رَبـِّكـُم ؟

جاوبـوا بـِكـُل وضـوح ..!

واللى سَـتـَر سِـرِّكـُم ؟

وف إيـدُه عِـلم الـرُّوح ؟

مِـيـن اللى أرسَـل لِـكـُم

( موسَـى ) و ( عيسَـى ) و ( نوح ) ؟

و ( المُـصطـَفـَى ) ، مـش أنا ..؟!

مـش بابـى كان مَـفـتوح ؟!

***

لِـ اللى سَـأل أو طـَلب ؛

واللى ظـَلـَم لـَو تــاب ؟!

واللى فِ يوم اتـغـَلـَب ؛

واللى اشـتـَكـَى بـِعـتاب ؟!

واللى فـَجَـر واتقـَلـَب ؛

 

واللى سـَـرَق واغـتاب ؟!

واللى افـتـَقـَر واغـتـَنـَى ؛

واللى انـشـَغـَل وارتاب ؟!

***

كـُلِّ اللى كان مِـنـِّكـُم

بـِيسَـجـِّلوه مَـلـَكـين ،

حَتـَّى اسألـوا قـَلبـكـُم

والكـَفِّ والقـَدَمـين ،

راح يـِنطـَقوا عَـنـِّكـُم

ويكـونوا م الشـَّاهديـن ،

والأمر يـِرجَـع لِـنا ؛

نِـقـبَـل شـَفاعِـة مين ..!!

***

يـاخـَلق مِن رَحمِـتـى

حَ اقبَـلها م العَـدنان ،

هوَّ اللى صان نِعـمِـتى ؛

أفضـَل بَـنِـى الإنسان ،

يفـضـَل يقول أُمِّـتِى

يارَب يـارَحـمَـــــن ،

واللى سَـلـَك دربـِنا

تـَقـِّل لـُه فى الميزان ..

***

حَ يكون ساعِـتها النـَّعيم

فى الجَـنـَّة لِـلأبرار

واللى مِشِـى مُـستـَقيم

واللى صَـبَـر واخـتار

سُـنـِّة نـَبـيـنا الكَـريم

المُـصطـَفـَى المُـخـتار

واللى ابـتـَعَـد عَـنـِّـنا

حَ يكون مَـصـيرُه النـَّـار ...

***

**

*

[دعوه للجنه 457]

اللهم صل وسلم وزد وبارك على سيدنا محمد وعلى آله وصحبه وسلم تسليما كثيرا..

 

 

كلمات جميلة حقًا ، تم تميزها ونشرها ،، جزاكم الله خيرا ......

[mahaa 3]

اللهم صلى وسلم وزد وبارك على سيدنا محمد وعلى الة وصحبة اجمعين

اللهم اجعلنا ممن يشفع فيهم المصطفى

بارك الله فيك كلمات جميلة وفيها عظة لكل انسان

جزاك الله كل خير

[عبد الرحمن عبد المتعال 3]

بجد كلمات روعه وجميله ,, وبإذن الله احاول انشدها بإذن الله

بجد موضوع ممتاز