تعالوا ندردش - ازاى استقبلت خبر فوز د. محمد مرسى رئيساً لمصر !

[عاشق الصداقه 525]

السلام عليكم ورحمة الله وبركاته

 

بسم الله الرحمن الرحيم

 

( ونريد أن نمن على الذين استضعفوا في الأرض ونجعلهم أئمة ونجعلهم الوارثين ( 5 ) ونمكن لهم في الأرض ونري فرعون وهامان وجنودهما منهم ما كانوا يحذرون )

 

لله الفضل والمنة .. الحمد لله رب العالمين .. حمداً كثيراً طيباً مباركاً فيه

 

فاز الدكتور محمد مرسى برئاسة مصر .. ففازت الثورة وفازت الشريعه والحمد لله رب العالمين

 

 

فى الموضوع ده عاوزين ندردش مع بعض .. عاوزين كلنا نحكى كل واحد فينا استقبل الخبر ازاى وكان فين وبيعمل ايه وعمل ايه

 

منتظر تفاعلكم شباب ياللا يا شباب

[الدرة المصونة 3]

استقبلته بسجدة لله اشكره فيها على الخبر الجميل اللي كنت بتمناه والحمدلله اتحقق الحمدلله ............ قبليها كنت بصور فيديو للحظات ترقب الاسرة للنتيجة ........ بس بجد خبر فرحنا الحمدلله

[حورية الجنة 114]

أنا بقى الحمد لله كنت فى مدينة قنا وتحديدا يعنى كنت راجعة من الكورنيش لأنه كان اخر يوم ليا فى الامتحانات وكنا ناوين على فسحة وحمدت ربنا انى ماكنتش فى البيت ساعتها لأنى مش كنت هاستحمل الوقت ده كله الى كان قبل ما يقولوا النتيجة وعاملين بيحكوا قصة ابو زيد ما علينا المهم كنا ماشين قدام سوبر ماركت وكانوا طبعا بيتفرجوا عالنتيجة وسمعتها بودانى وقاموا صارخين الله اكبر وفى نفس اللحظة انطلقت الموتسيكلات فى الشوارع والكلاكسات والعربيات الله اكبر الناس كلها فرحانة وهتطير من الفرح عدينا على ميدان الساعة فى نفس اللحظة كان أعداد كبيرة اتجمعت هناك وعاملين يهتفوا الله أكبرماعدا سواق السرفيس كان زعلان يعنى وشتم شتيمة لكن سواق الميكروباص كان فرحان وقالنه انتوا تبع مين قلناله مرسى قالنا كويس المهم انا كنت مبسووووووطة جدا جدا من الفرحة الى شفتها فى عيون الناس صاحبتى قالتلى اول مرة كده الناس تفرح من قلبها قلتلها كنا بنفرح قبل كده لماتشات الكورة بس أكيد مش كانت فرحة حقيقية زى انهاردة كنا بنفرح علشان نهرب من الواقع المر الى كنا عايشين فيه .

 

 

وحتى كمان لما وصلت البلد لقيت فى مركز الشباب عندنا مشغلين سماعات وأغانى وكمان قالولى انهم قبل ما اوصل عملوا مسيرة بالأعلام والموتيسكلات والشباب كمان لفت البلد ووزعوا شيكولاتة وساقع كمان ساعتها كنت أول مرة احس انى فخورة ببلدى وحسيت ان ناسها مثقفين وبيفهموا كويس وبيعرفوا يختاروا والوجود الأقوى كان ليهم ياااااااااااااه

 

انا كنت فرحانة بشكل ولحد دلوقتى علشان كده صدقيت ما لقيت الموضوع بتاع حضرتك وحبيت افضفض شوية وللأسف أطلت كثيرا واعتذر عن تلك الإطالة .

 

وستبقى راية الإسلام عالية خفاقة فوق ربوع مصرنا الغالية وفقك الله سيادة الرئيس وسدد على الطريق خطاك .

 

 

بس كنا عاوزين كمان نعرف حضرتك استقبلت الخبر إزاى ؟؟

[عاشق الصداقه 525]

الدرة المصونة ، حورية الجنه .. بارك الله فيكم وسعيد برجوعكم للمشاركة فى المنتدى .. افتقدنا مشاركاتكم المميزة والمفيده .. وسعيد بمشاركتكم فى موضوعى المتواضع

 

وستبقى راية الإسلام عالية خفاقة فوق ربوع مصرنا الغالية وفقك الله سيادة الرئيس وسدد على الطريق خطاك .

 

 

ان شاء الله راية الإسلام هتفضل مرفوعه طول ما فيه أبطال واقفين على نصرة دين الله والتمكين لشرعه ،، بس بلاش (سيادة) دى .. مش عاوزين نربى دكتاكور بفرحتنا .. والراجل ما شاء الله طلب ان صورته متتعلقش أصلاً فى المصالح الحكومية ولا فى أى حته ومراعى النقطة دى ،، ربنا يوفقه ويحفظه ويعينه على انه يعوض الناس الغلابه دى اللى اتحرمت من كل شىء ،، ويوفقه لتحكيم شرع الله كما يحب الله ورسوله .

 

 

بس كنا عاوزين كمان نعرف حضرتك استقبلت الخبر إزاى ؟؟

 

 

أنا كنت فى مدينة قنا وكان باقيلى يوم واحد على امتحاناتى ،، وطبعاً لو كان لا قدر الله أعلنوا فوز شفيق مكنتش ناوى ادخل المادة الأخيره (اللى ان شاء الله بعدها التخرج خلاص بعد معاناة 9 سنوات فى الجامعة)

 

طبعاً وزى ما انا متعود أعيش فى أماكن بعيده .. كان السكن اللى قاعد فيه فترة الامتحانات بعيييييييييييييد بعد الجامعه ، ومكانش فيه مكان اتابع فيه النتيجة الا قهوة تحت العمارة اللى ساكن فيها .. فنزلت القهوة أنا والطلبة اللى فى العمارة وفضلنا نسمع الـ 55 دقيقة اللى حرقوا دمنا فيهم ، وأول ما أعلنت النتيجة خرجت بسرعة من القهوة وسجدت فى الشارع سجدة شكر لله تعالى ، وأتمنى متكونش السجدة فاتت حد ،، ودخلت تانى القهوة ونزلت ساقع لكل الموجودين على حسابى

 

كنت سعيييييييييييد جدا جدا جدا ،، ومعدتش دقايق وانهالت الاتصالات عليا .. جالى حوالى 20 اتصال تهنئه بفوز الدكتور مرسى من أصدقاء ليا فى المنتدى هنا وبره المنتدى ومن اخويا الشيخ مدحت ومن والدتى ومن كتييييييييييير .. الكل اتصل يهنى لأنهم عارفين قد ايه كنت مستنى النتيجة وقد ايه يفرق معايا (شرع الله) بغض النظر عمن سيقيمه ، وقد ايه اتطحنت انا واخوه وناس كتيييييييير فى الانتخابات دى واللى قبلها واللى قبلها ،، ولأول مره من يوم الثورة أحس ان تعبى ده جه بنتيجة والحلم اتحقق والحمد لله ،، رحت امتحنت وكل ما حد يشوفنى فى الطريق يقول (الف مبروك يا شيييييخ) والناس كلها كانت مبسوطه بجد .. شفت الفرحة فى عيون الناس بشكل غير عادى ،، ورجعت البيت تانى يوم وكل اسرتى اخدونى بالحضن يهنونى وكان الكل مبسووووووووط جدا والحمد لله وكذلك أول دخول للمسجد بعد ما رجعت البيت أول حد جالى جرى فى المسجد صديق ليا (إخوانى جداً) جه جرى وأخدنى بالحضن وطولنا جدا وغالبا دمعنا احنا الاتنين واحنا عمالين نقول لبعض الحمد لله والله أكبر ولله الحمد وصديق تانى يقولى مبروك يا سلفى ونضحك كلنا ،، وكل الأخوه فى المسجد بقينا نسلم على بعض بالحضن ونهنى بعض وده كان تانى يوم ،، وعرفت ان اليوم الأول فى المسجد الكل بقى يقول تكبيرات العيد وحاسس بجد ان الدنيا كلها زهزهت حوليا والناس كلها سعيدة جدا والحمد لله ،، وياااااااااااااااارب ربنا يوفق الدكتور محمد مرسى ويحفظه ويعينه على كل ما يرضيه ،، ويحفظ مصر ويئذن انها ترتقى بشعبها كله للمستوى اللى ينبغى ليها واللى تستحقه وسط دول العالم ،، ويا رب الناس الفقراء واللى اتظلموا ربنا يعوضهم عن سنوات الظلام اللى عاشوها ،، والله المستعان

 

 

ياللا مستنيين باقى شباب المنتدى واعضاؤه يقولولنا استقبلوا الخبر ازاى

 

وشكراً لتفاعلكم

[عاشقة الفردوس 161]

السلام عليكم ورحمة الله وبركاته

 

 

 

انا بقا في تونس اكيد ما كنتش عايشة الوضع في مصر زيكم ماديا بس بروحي وعقلي وقلبي كنت معاكم ليل نهار

 

من فجر يوما الإعلان عن النتيجة ،بعد ما صليت فتحت التليفزين على قناة الجزيزة مافيش خبر بس بيعرضو

 

نقل مباشر من ميدان التحرير.وانا بتابع لغايت ما اعلنو ان لسا فيه خمس ساعات او اكتر بشوية على اعلان النتيجة

 

قلت خلاص اروح اعمل اللي ورايه وبعدين ارجع اتابع

 

قبل الإعلان بنص ساعة كده كنت خلص اموري رحت فاتحا التليفزيون واللاب توب في نفس الوقت

 

بصيت على الفيس بوك لقيتو نايم يلا قلت اركزفي الخطاب اللي كان بيلقيه اللي مش فاكره اسمه معذرة المهم الراجل ده بصراحة

 

نرفيزني ،طولها قوي يعني وانا عمال اقول يا ابني انطق ما بلاش تفاصيل فقست مرارتي وانا عمال استنى لغايت ماخلص قرايت المجلد اللي

 

في اديه لغاية بقا ما طلع من بقه الحلو الكلمتين الحلوين اللي كنت عايزاه يقولهم والحمد لله ..

 

وانا بتفرج كنت بتخيل كل اولادي وبناتي بالمنتدى

 

بتخيل شكلهم وهما بيتابعوا البث المباشر ده سبحان الله حسيت بتوحد رهيب وكأنهم قاعدين معايا في الصاله

 

لأ ده مش بس كده كان عدد كبيييييييير من الشعب

 

التونسي متابع المهم بقا مطولش عليكم اول ما اعلن فوز الدكتور مرسي ماعرفتش اعمل ايه الأول

 

انزل تبريكاتي على الفيس او على المنتدى او اتصل بالتيليفون

 

المهم من غير تفكير دخلت المنتدى كتب موضوع ابارك فيه لمصر ثم على الفيس كتبت ابارك

 

وبقول قوموا اسجدوا لله حمد وشكر مسكت التليفون ابعث رسايل

 

لولادي اللي كنت متابعه معاهم اول باول مرحلة حملات الأتخابات والتعب والعناء اللي شافوه

 

طول الفتره اللي فاتت اياها كنت اتمنى لو كانو قدامي واشوف

 

شكلهم وهما فرحانين ، كنت بردو شايفا الفرحة في عنين زوجي و الفرحة في عنين بناتي الصغيرين حسيت انهم سعداء عشاني كان يوم مميز جدا

 

اسأل الله ان يكون قدوم الدكتور مرسي وتوليه حكم مصر مفتاح لأبواب خير كثيرة اغلقت في ا لعهد البائد

 

وان تتوحد كل الدول العربية وتصبح امة واحدة

 

وفق الله الرئيس المصري واجرى الحق على لسانه وعمله .

[DenT SoNa 3]

انا كنت ف المنيا واخر يوم ف الامتحانات بردو وبعد ما خلصت خرجت اتغدى مع صاحبى وانا راجع وقفت ف قهوة وطبعا المستشار اللى كان بيقول النتيجة كان ممل جدا وفضلت واقف لانه مكنش فيه كراسى ف القهوة

وبمجرد ما أعلن النتيجة الناس كلها بدأت تهيص وتضرب نار وكلاكسات العربيات اشتغلت وانا طبعا احتفلت ع طريقة الخاصه بإنى روحت البيت ونمت نوم عميق

[ali desoky 391]

الله اكبر ولله الحمد.

 

يوم اعلان نتيجة الانتخابات كنت في البيت فضلت مستني المستشار فاروق سلطان وهو يتقمص دور المفتي في اخر شعبان ويعيد ويزيد ليخبرنا ان غدا اول ايام رمضان او ان غدا عيد الفطر

المهم ( عصرت علي نفسي لمونه ) وفضلت مستني النتيجه............

 

واخيرا نطق بالحق وقال الكلمه الشهيره بفوز الدكتور محمد مرسي رئيسا لجمهورية مصر العربيه

لم اتمالك نفسي الا والدموع تنهمر من عيناي وأخر ساجدا علي الارض اردد الحمد لله الحمد لله

 

ثم اتصلت بزوجتي ( دعوه للجنه ) لانها تؤدي امتحانات الدراسات العليا في سوهاج وتبادلنا التهاني ونحن نتذكر بعد المقولات التي قيلت لي قبل اعلان النتيجه وببعض الاشخاص الذين نصحوني بان احلق ذقني لان شفيق سيفعل كذا وكذا في كل الملتحين....

 

وبعد ذلك خرجت انا وصديق لي بالموتسيكل لنشارك بمسيرة تجوب شوارع مدينتي الحبيبه نجع حمادي التي تثبت دائما انها مقبرة الفلول

 

 

الحمد لله .... الحمد لله ... الحمد لله