نـــــــــــور 199 قام بنشر August 9, 2012 رسائل سريعه وجدتها أحببتها وأتمنى أن لاتفوتكنّ الفائدة ولاننسى الدعاء لكاتبها وناشرها بارك الله فيكم اللقطـه الأولى من بداية رمضان وأنا مقصر ومعملتش إللى كان نفسى أعمله فى رمضان ... أنا كل ما أعرف أصحابى وصلوا لفين فى القرآن يجى لى إحباط .. وأتهم نفسى بالتقصير... نصف رمضان خلص وأنا لسه همتى فى العباده مش عاليه ... ... كنت بدعى ربنا يبلغنى رمضان ..بس لما بلغنى رمضان قصرت جداً فى العباده .. ... (((كلنا عندنا الأفكار دى ..وبنقولها لنفسنا ليل نهار..خصوصاً مع إقتراب أنتهاء رمضان... بس على فكره ... العبره فعلاً بالنهايه ... ياما ناس بدأوا فى أول رمضان جامدين ,,بس للأسف أسبوع ووقعوا وماكملوش ... والله العظيم العبره بالخواتيم ... ... وخواتيم شهر رمضان العشر الأواخر.. إللى فيهم ليلة القدر .. ... وزى ما علمونا (ليس العبره بمن سبق..إنما العبره بمن صدق) العبره مش بللى سبقوا ..لااا دى العبره بللى صدقوا مع الله ,فوفقهم لطاعته ... .. اجمد كده ..وإبدأ من دلوقتى حالاً .. افتح المصحف ...حتى لو مكنتش قرأت ..إبدأ إقرأ ووالله ربك هايفتح عليك .. لو ماشاركتش فى إفطار صائم إبدأ من دلوقتى .. وإن شاء الله تشترى علبة تمر وتقسمه وتحط كل 3 تمرات فى كيس ووفت الفطار انزل وزع ع الناس إللى فى الشارع وياابختك بثواب إفطار الصائم ... لو مكنتش وصلت رحمك .. ارفع سماعة التليفون حاالاً على أقاربك ..ولا امسك موبايلك وابعت لهم رساله حلوة تحنن قلبهم عليك.. ... شد حيلك من دلوقتى ..عشان ربك يكافئك ويوفقك لليلة القدر ولدعاء وعمل صالح فيها .. ********************************************* اللقطــه الثّانيـه: حاسس إني ضيعت كتيــــــــــــــــر .. حاسس أن رمضــــــــان ضاع مني اللي حوالية ختم مرة واتنين وثلاثة .. وأنا لسه في الختمة الاولي واللي بيصلي ب 1000 أية واللي بيستغفر كتير واللي بيفطر الصائمين واللى بيتصدق واللى بيوزع كتيبات ومطويات دعوية ... وانا في الضياع .. مش عامل حاجة خلاص ... ورمضان قرب يخلص وانا مش عارف أعمل إيه ؟ أنا مخنووووووق قوي .. شيطان واتحبس .. يبقي هو العيب فيه .. أنا اللي وحش .. دا حال ناس كتير قوي مننا .. شايف الناس بتجري لربنا .. وهو واقف يتفرج ويتحسر علي نفسه .. واقف يبكي وزعلان ونفسه يبقي مع الناس دي .. كان نفسه قوي ربنا يشوفه من أوائل الناس اللي بتجري دي عارفين مشكلته إيه ؟ مشكلته أنه واقــــــف .. مش بيتحرك زعلان وخلاص أنت دلوقتي إيه اللي يمنعك إنك تجري مع الناس دي؟ مش عارف مش قادر وحاسس إني عمري ماهقدر .. مش عارف إيه إحساساتك الكتيرة دي .. كل شويه حاسس حاسس طب لما انت بتحس قوي كده .. واقف متنح ليه ؟ واقف ليه في مكانك ومش راضي تتحرك .. إنت مش مش قادر لأ .. إنت مش عاوز لا والله حرام عليك يا اخي إحسن الظن دا إحنا في شهر كريم إديك قولت بنفسك شهر كريم .. وربنا أكرم يا اخي .. يعني إنت ممكن تسبق الناس دي كلها لربنا ياسلااااام .. قولي إزاي ؟ ماشي ياسيدي هاقولك .. بس إدفع اللهم صلِّ وسلم علي رسول الله ماانت شاطر وبتصلي علي النبي أهو .. إحنا هنتفق مع بعض علي شوية حاجات كده .. مش إنت زعلان وندمان - أيوه طب قول ورايا .. يارب أستغفرك وأتوب إليك يارب أستغفرك وأتوب إليك يارب أستغفرك وأتوب إليك قولها بقلبك .. يارب أنا تبت .. تبت ومش هاعمل كده تاني .. ومش هاتاخر تاني .. تبت يارب من الغفلة .. تبت وندمان والله خلاص بقي .. نشوف هانفذ التوبة دي إزاي .. لسه فاضل أيام باقين تقدر تعمل فيهم كتير قوي دا إنت ممكن تختم القرآن مرتين كمان على الأقل .. غير الختمة الطويلة قوي اللي انت فيها دي ياسلام .. إزاي ياعم أنا علي قد حالي مقدرش يا بني إنت مش تبت ماحنا قولنا بلاش مش قادر .. تقدر إنت مش كنت بتذاكر وتخلص الكتاب في تلات إيام القران أسهل مليون مرة .. تنويها إن شاء الله نية لله تختم القران كل خمس إيام .. يعنى ل يوم 6 أجزاء بعد كل صوه جزء وبعد التراويح جزئين ايوه يا عم الليل طويل لحد الفجر ماشاء الله إنوى انت بس وهتقدر ان شاء الله الموضوع بسيط ده سيدنا عثمان بن عفان ختم القران في ركعة أوتر بها عند الكعبة .. وصحابة كتير ختمه القران في ليله .. الموضوع موضوع همه وحب بتحبه ولا لأ ؟ دي أول نقطة .. إتفقنا ماشي هاجاهد نفسي إن شاء الله * تاني حاجة ياسيدي .. انت ممكن كل ليلة تكتب من القانتين مين ده .. أنا ؟!!!!! أيوه انت .. بإنك تصلي ب100 آيه كتير قوي 100 آيه دول دا انا بصلي التروايح في الجامع بالعافيه أنت حافظ سورة تبارك ؟ .. ايوة الحمد لله طب كويس .. حافظ سورة النبأ ؟ أيوه الحمد لله حافظها طب كويس قوي .. دا انت قربت تختم ماشاء الله طيب حافظ سورة عبس انا الحمد حافظ جزء عم كله طب كويس قوي نعمة وفضل من الله عارف بقى سورة تبارك وعم وعبس دول أكتر من 120 آيه ياسلام .. شوفت .. عشان تعرف أنه الموضوع سهل .. اهو صلي بالسور دي تكتب كل ليلة ان شاء الله من القانتين ، وتيجي إن شاء الله في اليوم اللي هتختم فيه اللي هو بعد تلات إيام تروح تصلي بجزء عم وتبارك .. دول 1000 ايه عشان تكتب من المقنطرين ماشي خلاص لحد كده كويس * تالت حاجة ياسيدي ..عاوزك تستغفر ربنا كتير قوي حدد لنفسك ساعة في اليوم تستغفر فيها 1000 مرة وتصلي علي النبي شوية وتسبح ربنا شويه .. تعملك قد 5000 كده وطبعا في حاجات أساسية زي السنن وصلاة الضحي واذكار الصباح والمساء ومتنساش جلسة بعد الفجر لغاية الشروق .. دي بقي كنز ثمين قوي .. في رمضان وغير رمضان وخساااااااااارة يضيع منك المشكله اني ببقي نعسان قوي بعد الفجر.. يابني جاهد نفسك شويه .. روح صلي في الجامع وقولها بعد الصلاة .. لقيت نفسك نعست .. خلاص اطلع كملها في الشارع .. الموضوع مش نافع خلاص زي بعضه هاسمحلك تقعد علي النت ساعة .. بس ساعة واحدة بس نعم .. هو انا مش هاقعد علي النت غير ساعة واحدة بس ليه انت فاكر الناس اللي بتجري لربنا دي عندها وقت تتضيعه علي النت ؟!!! يابني دا سيدنا عمرو بن العاص كان لما بيمسك المصحف يبكي ويقول شغلني عنك الجهاد .. مش النت خلاص هجاهد نفسي ربنا يرزقك فيها ثواب حج وعمرة .. وكمان الارزاق توزع في الوقت ده وعجبا لمن يقسم رزقه وهو نائم .. الموضوع ممكن يبقي صعب في الاول بس بعد كده هتلاقي نفسك اتعودت . * آخر وصيه يابني اللي ممكن تخليك تجري لربنا جري هاقولك علي باب مش هتلاقيه فيه كتير وممكن يوصلك بسرعة باب الانكسار لله جل وعلا .. إكسر نفسك بين إديه .. ذل نفسك ليه إستشعر معني كلمة عبد كان في واحد إسمه بشر الحافي .. الراجل دا كان عاصي في يوم من الايام من الايام مر ببيته رجل .. فسمع صوت المعازف فطرق الباب .. خرجت له الجاريه فسألها صاحب هذا البيت عبد أم حر ؟ فقالت بل حر .. قال نعم حر فلو كان عبد لتأدب بأدب العبودية مع سيده .. ثم انصرف فسأل بشرٌ الجارية عن الطارق .. فأخبرته فأسرع ورائه حافـيــــــــــا .. قال أعد علي ما قلت .. فأعاد الرجل مقولته قال بل عبد بل عبد .. وبقي بشر الحافي العالم الجليل ذِلّ نفسَك و أظهر الافلاس لله جل وعلا قوله محتاجك قوي يارب ماتسبنيش .. سامحني يارب مليش حد يسامحني واقبلني مد إيدك وقوله إكرمني يارب .. انت الملك ومليش حد يمن عليّ غيرك اسجد سجدة طوييييييييلة وقول له : يارب أنا عصيتك كتير ، وبعدت عنك كتير ، فأمهلتني وأكرمتني ولم تأخذني بذنوبي ، يارب راجعلك متسبنيش وخد بإيدي ، سجد لك سوادي ، وآمن بك فؤادي ، هذي يدي وما جنيتُ على نفسي رباااااااااه أغلقت الابواب إلا بابك .. فأين لي بملجأ إلا أنت نفذ زادي وقلت حيلتي وجئتك بك .. يامن لا يرد تائب ناداك.. ربنا يكتبنا وإياكم من عتقائه من النار .. ويجعلنا وإياكم من المقبولين ========اللهم اجزي كاتبه خير وناشره خير وقارئه خير اللهم اميـــــن شارك هذه المشاركه رابط المشاركه شار ك علي موقع اخر
