إزاى تنظمى بيتك وتخلصى شغله بدرى بدرى

[دعوه للجنه 457]

إزاى تنظمى بيتك وتخلصى شغله بدرى بدرى

 

أولاً :- المطبخ

لو جوزك جابلك فراخ او لحمة متحطهاش فى الفريزر علطول لا نظفيها وتبليها وشيليها جاهزة
الخضار بردوا جهزيه واحفظيه فى أكياس فى الفريزر
أما تعصرى مثلا طماطم او مبشور بصل او فرم توم او سلق بقول زودى الكمية وشيلى الباقى .
حتى المحشى اسلقى الكرنبة واحفظيها والخلطة برده جهزيها من غير الرز طبعا وشيليها فى الفريزر ولو كان عندك خضرة وخايفة عليها تدبل افرميها واحفظيها
حتى العجاين ممكن تعملى عجينة بيتزا كتير أستخدمى جزء والباقى حطيه فى الفريزر عشان تستخدميه فى وقت تانى

عاوزة أقولكم مفيش حاجة طعمها بيغير وبجد بوفر وقت كبير جدا فى الطبخ

لو عندك شوربة زايده احفظيها فى اكياس وضعيها فى الفريزر

اول متصحى من نومك لو فى لحمة ولافراخ ركبى عليها وحضرى فطارك وافطرى

الحلل بقى والأطباق والملعقة اللى بتتوسخ تتغسل علطول

بالنسبة بقى لشغل البيت
قومى سريعا يوميا بتلميع الموبيليا على السريع .........وامسحى السيراميك المكشوف علطول أول بأول بممسحه....السجاد متيسبهوش فترة من غير ما تكونى منظفاه بفرشة وبالمكنسة صدقونى الشغل ده مش بياخد اكتر من ساعة والبيت بيكون فلة
لو عندك بيبى قفلى ابواب البيت وحطيه فى مكان وحطيله لعبه يلعب بيها
والسجادة اللى بيلعب عليها حطى عليها ملاية قديمة او اى حاجة علشان متتبهدلش

لو عندك بنوتات صغيرين علميهم يرتبوا سرايرهم ويلموا لعبهم

فى بقى حاجات عاوزة أقولكو عليها
يا ريت نحاول نعمل اكتر من حاجة فى نفس الوقت يعنى مثلا لو واقفين جنب الأكل لحد ما يغلى نكون غسلنا كام كوباية على طبق كدة يعنى
نحط الاكل وعلى مايستوى نكون رتبنا البيت وزبطناه

قاعدين نلعب مع النونو بتاعنا يبقى نطبق الغسيل
نحاول أول بأول نشيل الكراكيب اللى فى البيت اللى ملهاش لزمة يعنى لو فاضيين شوية أفرزى الجزم فى يوم.... يوم تانى أفرزى الأدوية يعنى علشان ما يكونش ف كراكيب كتير فى الشقة ومنتعبش فى ترتيبها

الدولاب بقى لازم اول باول تخرجى كل الملابس اللى انتى مبتلبسهاش ومتقوليش ده ينفع لبنتى احنا مش عارفين بكرة فى ايه وكمان فى ناس كتير محتاجة
الطريقة دى هتخفف الكركبة فى الدولاب
التسريحة بقى متروحيش ترصى عليها كل مكياجاتك وبرفاناتك لا حطى بس اللى بتستخدميه يوميا زى المشط والمرطب والبرفان الخاص بيكى و الروج وقلم الكحل ...علشان يبقى سهل عليكى تلميعها وترتبيها
الغسيل لو عندك غسالة اتوماتيك اغسلى علطول ومتجمعيش غسيل عليكى
الشرابات والملابس الداخليه اغسليها اول باول

بالنسبة بقى للبوتجاز غطى الطاسة وأنتى بتقلى علشان الزيت ميبهدلش الدنيا...وأول بأول لو وقعت عليه بقعة نظفيها وغطى كمان الجزء المكشوف من البوتجاز بفوطة مبلله ومعصورة وأنتى بتقلى علشان البوتجاز ما يتبهدلش

عاوزة أقولكو أن أى طبق بتحطه فى التلاجة يتمسح من تحت علشان لو فيه أى أكل ميسوخش التلاجة
الحمام بقى بعد ما أى حد بيستحمى علطول نشفيه ..

أما تيجى تنفضى ممكن تنفضى الغرفة على أكتر من يوم يوم تلمعى الموبيليا وأترتبى الأدراج والدولاب ..... يوم تانى أغسلى الشبابيك ..........يوم تالت نفضى البراقع ....وأخر يوم شيلى السجادة نفضهيا وأمسحى الاأرض
وحاولى تستفيدى وانتى شغالة فى البيت مثلا شغلى التليفزيون على البرامج الدعوية الهادفة او شغلى خطبة تستفيدى بيها
ياريت لو حد عنده افكار تانية يشاركنا برايه

 

 

 

 

منقول

[Basma Gaber 0]

تم حذف التعليق لإحتواؤه إعلان ترويجي وتم إيقاف العضوية لمخالفة قوانين المنتدى

[قلوب 0]

شكرا كتير على الموضوع دا 

انا فعلا داخله على جواز ومحتاجه اعرف ازاى انظم

واخلص كل حاجه بدرى 

الله يعطيكم العافيه 

[دعوه للجنه 457]

شكرا كتير على الموضوع دا 

انا فعلا داخله على جواز ومحتاجه اعرف ازاى انظم

واخلص كل حاجه بدرى 

الله يعطيكم العافيه 

 

 

 

ربنا يتمملك ع خير ،، شدى حيلك واححا تحت امرك أى مساعدة أون لاين يعنى

 

 

 

نورتينى