ياحسود ارجع ورا خلي الشمعة منورا

[رجل من الصحراء 36]

ياحسود ارجع ورا خلى الشمعة منورة

ياجماعة عايز حد يفهمني... ايه العلاقة بين الحسد ورقم خمسة ليه كل ماتكلم واحد مصري اصيل تلاقيه يرصلك دستة خمسات من اول راتبه ابو 250 جنيه اساسي و50 اضافي,والغسالة اللي بالفين وخمسمائة جنيه. وكمان التلاجة ال15 قدم والموبيل موديل(5550).

 

طبعا هذا المصري الاصيل تلاقيه محصن نفسه طول الوقت من الحسد والحاسدين بترسانة من التعاويز تبدا بالكف ابو خمس صوابع على كل باب البيت(لانه لو كان باربع صوابع ماكنش ممكن يصد الحسد)

 

والخرزة الزرقا اللي كل ست معلقاها في رقبتها او لزقاها في الخاتم واكيد مش حننسى الافراح والليالي الملاح اللي لازم تكون يوم الخميس, وطبعا منقدرش ننسى يوم الخميس خمسة وعشرين خمسة الفين وخمسة(25\5\2005) لانه يوم مشهود وعالمي حيث تجمعت فيه اكبر عدد ممكن من الخمسات وانحجزت فيه كافة قاعات الافراح لانه يوم بركة.

 

المدرسة الرمزية في اتقاء العين الرضية

وتعالو نروح لسواقين التاكسي اللي يمثلون المدرسة الرمزية في اتقاء شر الحسد والحاسدين فمثلا تجد (صندل) صغير معلق اسفل اكصدام التاكسي او تجد مثلا حدوة حصان وكل دي طبعا رموز تعاويذ سرية تلعب دورا محوريا في قصف عين اي حسود يفكر انه يحسد الفوانيس المكسرة اساسا او الشكمان اللي عامي الشارع كله.

 

عفاريت الاسفلت

سيبك من المدرسة الرمزية في اتقاء العين الرضية.وادخل معايا على عفاريت الاسفلت وملوك الطريق الصحراوي والزراعي يعني اجدع سلام وتحية لسواقين اللوري, ودول بقى مايحبوش اللف والدوران... يعني كلامهم صريح وعلى( ميه بيضا) فمثلا تجد لوري مكتوب عليه عبارة(ياناس ياشر كفاية قر) ودا يحسسك ان الراجل ياعيني بيعاني فعلا من الحسد بجد. ولوري تاني تلاقيه مكتوب عليه( العين صابتني ورب العرش نجاني), ياعيني عليك يابواحمد... احم احم .... عفوا ..اما بقى السواق اللي مدندش او مروش اللوري بتاعه تلاقيه كاتب(ماتبصليش بعين رضيه, وشوف اللي مدفوع فيا).

 

الطبقة الهاي لايف المثقفة

 

 

اما شباب الجامعات بتوع الشعر( السبايكي) والباديهات (جمع بادي) والايشاربات الاورانج والتركواز, والجينز او حزام زي (قايش الجيش) , وقوم اقف وانت بتكلمني وكده يعني....

 

دول بقى الحسد بينهم بيكون عالمذاكرة , ومين( بيدح ويموس بكسر الواو ووضع شدة )...من اول السنة وفلانة قفلت كام مادة وفلان اللي ماشي زي الموس وبيجيب امتياز كل سنة.

 

وطبعا خطة دفاع المويسة او الدحيحة تعتمد على مجموعة من الكفوف والخرز الازرق وبعض التلميحات الهامة التقليدية زي

 

(جبت 18.5 من عشرين) وذاكرت امبارح خمس ساعات.

 

ياترى ليه احنا دايما عندنا شعور اننا محسودين ليل ونهار وليه لما الطالب الفاشل يسقط نقول (الواد اتحسد) ولما البنت تتفسخ خطوبتها

 

نقول(حسدوها العزال) . طبعا الحسد مذكور في القران وموجود

 

بس مش معنى كده ان نعلق فشلنا عالحسد وناخده حجة ولا نبالغ في الخمسات والخرز زي مابنشوف. وبعدين نبقى معندناش حاجة ومبنعملش حاجة ونقول محسودين طب على ايه ياحسرة.

 

شكرا وارجو ان تشاركوني الاراء وشكلي كده هنطرد قريب من المنتدى.

[ABOTASNEEM 117]

بداية احب اكدلك انك قريب جدا هيتم طردك

 

بهزر طبعا .. والعكس صحيح

 

ثانيا

 

بالنسبة لموضوع الحسد .. اكيد طبعا فى حسد .. وده مذكور فى القرآن

 

ولكن احنا بنعلق كل حاجة عالحسد .. لانه عذر سهل وبسيط ومتاح لاى حد

 

وطبعا .. ناس كتير متعرفش اية خطيرة جدا فى القرآن .. تحل الموضوع كله

وبكل بساطة

 

والايه دى فى سورة البقرة ... وهى

 

وَمَا هُمْ بِضَارِّينَ بِهِ مِنْ أَحَدٍ إِلَّا بِإِذْنِ اللَّهِ

 

[البقرة:102]

 

ومعنى ذلك انه لو اننا نؤمن بالله حقا ونوكل عليه حق التوكل

 

ما استطاع احد من الجن او الانس ان يمسنا بسوء

 

لان فى هذه الحالة ربنا سيكون متولى حمايتنا

 

اسأل الله ان يرزقنا تمام الثقة فيه وحسن التوكل عليه

 

اشكرك رجل من الصحراء على اثارة مثل تلك المواضيع الهادفة

 

والتى نتمنى ان تكون سببا فى توجيه الفكر الى الاتجاهات الصحيحة

 

اسف على الاطالة

[حياتى من اجل ربى 22]

جزاك الله خيرا (( رجل من الصحراء)) على الموضوع الجميل بس مش عارفه اقول كلام رائع على موضوعك ولا على كلام ((ابو تسنيم))

انتو الاثنين تحفه ماشاء الله عليكو

اروح انا اعيط على جنب مش مشكله

اسال الله ان يزيدك من فضله وان يحقق لك كل ما تتمنى

تقبل مرورى وفائق احترامى وتقديرى

وارجوك علشان خاطرى كبر الخط حبه

تم تعديل January 23, 2009 بواسطه حياتى من اجل ربى

[رجل من الصحراء 36]

خي وصديقي العزيز ابوتسنيم لطالما اتحفتنا بردودك الجميلة والهادفة

بارك الله لنا فيك وجزاك الله خيرا على الافادة

تقديري واحترامي وشكري الكبيير لمرورك الجميل

________________________________________________

 

اختي الفاضلة حياتي من اجل ربي

اسعد كثيرا بردودك في موضوعاتي ويشرفني مرورك الجميل واشكرك كثيرا على دعائك المتواصل لنا

وان شاء الله هكبر الخط المرة الجاية وهحسن خطي كمان

لكي مني كل الاحترام والتقدير

[الرّام 173]

موضوعك حلو و جميل و في نفس الوقت مهم كثيرا

 

 

انا عندي فقط جملة او عبارة نحب نرد بيها على الموضوع

 

 

و هي مقولة شعبية عندنا ... تقول ..

 

 

"خانها ذراعها .. قالت مسحورة"

 

 

 

***

شكرا خويا الغالي على الموضوع

 

بارك الله فيك

 

و سترك المولى دنيا و اخرة

[AMR DAWAM 7]

(ياناس ياشر كفاية قر) ودا يحسسك ان الراجل ياعيني بيعاني فعلا من الحسد بجد. ولوري تاني تلاقيه مكتوب عليه( العين صابتني ورب العرش نجاني), ياعيني عليك يابواحمد... احم احم .... عفوا ..اما بقى السواق اللي مدندش او مروش اللوري بتاعه تلاقيه كاتب(ماتبصليش بعين رضيه, وشوف اللي مدفوع فيا).

 

ههههههههههه

فعلا والله حبيبى " رجل من الصحراء"

كل اللى قلته حقيقى فعلا وانا كل يوم بشوفه

 

وفعلا لازم كل واحد يعلق كل شئ على الحسد

 

انا بقى ماكنتش بعتقد ان اى ضرر يرجع للحسد

بس لانه مذكور فى القران فممكن يكون له

 

بس لو فعلا فى حد هيحسد

وهيحسد على ايه اصلا

ههههههههه

*****************

[رجل من الصحراء 36]

شكرا ليك عموور منورني والله

 

انا بقى ماكنتش بعتقد ان اى ضرر يرجع للحسد

بس لانه مذكور فى القران فممكن يكون له

 

ده اساسي وموجود

لك مني كل التحية والتقدير والاحترام

[تقوى القلوب 12]

رجل من الصحراء

 

 

والله وحشتنى مواضيعك جداَ

 

 

وفعلا ضحكت من كل قلبى

 

 

تصدق انا كمان كنت عاوزه اعرف العلاقه بين الحسد ورقم 5

 

جزاك الله كل خير

[رجل من الصحراء 36]

رجل من الصحراء

 

 

والله وحشتنى مواضيعك جداَ

 

 

وفعلا ضحكت من كل قلبى

 

 

تصدق انا كمان كنت عاوزه اعرف العلاقه بين الحسد ورقم 5

 

جزاك الله كل خير

شكرا لمرورك تقوى سعيد جدا بردك ده

وياريت متغيبيش عننا تاني ومتحرمناش من تميزك

[على المرابط 13]

السلام عليكم ورحمة الله وبركاته

اخى احييك على طرح موضوع كهدا وانت تمتلك موهبه جميله فى الطرح النقدى للمواضيع

وفعلا انا بالحظ الحاجات اللى انت دكرتها على سيارات النقل المصريه اللى هنا فى ليبيا

ودائما ما اعلق واقول انوا الشعب المصرى خفيف الظل وصاحب نكته لدرجة انه عاوز يكلمك

حتى وانت ماشى بسيارتك على الطريق ويضحكك

بس كما اوردت انت ونظرت من زاويا اخرى بعض ما نكتبه ليس صحيحا ويحتاج اعادة نظر

اشكرك لك كل الاحترام والحب تقبل مرورى

[رجل من الصحراء 36]

منور مرابط الموضوع