اوعى تفتح عليا

[رجل من الصحراء 36]

اوعى تفتح عليا

كلمة سادت هذه الايام وسط زحمة الموبايلات والموديلات والخطوط وكروت الشحن فتلاقي الواحد يقلك هرنلك بس اوعى تفتح عليا.

 

تخيل لو الكلمة دي اتقالتلك قبل ماتنتشر الموبيلات يعني من بتاع عشر سنين كده مثلا في مصر هتحس انه بيحذرك من ان تفتح عليه باب اوضته وهوه بيغير هدومه ولا باب الحمام لانها مش هتحمل معنى غير كده عشان هيه دي قائمة المحظورات اللي مكانش التليفون من ضمنها وانضم وبقوة اليها في الاونة لاخيرة.

 

لان لو حد ساعتها قالك اوعى تفتح عليا التليفون هتتسائل انت طبعا (( الله افتح عليه ازاي التليفون ياعم هوه حنفيه))

 

ولكن تعالى دلوقتي تبدلت الدهشة الى (عادة) واصبحت هذه الجملة مستهلكة بين الناس وخاصة الجماعة (الحبيبة)

 

فتلاقي الواحدة من دول تقلك هرنلك بس اوعى تفتح عليا تخسرني بجد, وكمان هتخسرني دقيقة وانت عارف الدقايق بالشيء الفلاني وانا مش معايا (كريديت ) وعمري ماهرنلك تاني لو الموضوع ده اتكرر بصراحة. ده انا اصلا بحوش تمن الكارت من مصروفي بالعافية وساعات مباكلش عشان اوفر تمن الشحن تقوم مخلصلي رناته اهو ده بقى اللي مش ممكن ابدا!!!! وطبعا اسطوانة كاملة من التحذيرات.

 

وطبعا صاحبنا بيطبق الموضوع بحذافيره وللتعبير عن الحب الكبيير يرسل اكثر من 50 رنة في اليوم وكلما ازداد عدد الرنات ازدادت مشاركاته في منتدى الحبيبة. ده ان مخلتهوش تبع الفريق الادراي لمتابعة الرنات الخفيفة.

 

وطبعا موضوع الرنات ده بين المخطوبين هوه في مقام كيلو الفاكهة الذي يحمله الخاطب لخطيبته اثناء زيارته الاسبوعية فهو برناته الخفيفة اللي ممكن نسميها فاكهة المحمول يثبتلها انه مش جلدة ده طبعا بعد ماربنا اعانه اصلا وقدر يخطب ولمزيد من الاخلاص واثبات الجدعنة يحوشله كم رسالة عاطفية من بتوع الكمبيوتر ويبعتهم للجو عشان تنبسط... صحيح ممكن تكون امة لا اله الا الله حافظة الرسايل دي لانها دارت على موبايلات الخلق كلها قبل كده .... ولكنها بمثابة اعادة صياغة عصرية وتكنولوجية لما كان يحدث قديما لما كان الحبيب يستعين بكتاب شعر وينقشله كلمتين منه يلخبطهم على الجواب اللي اساسا ناقله من كتاب 100 رسالة عاطفية وبعدين يبعته للبنية.

 

ولا اللي يقلك هديك رنة طويلة علشان تفتكر الموضوع بتاعنا

 

ولا اللي جايب رقم جديد ويديك رنة انا شخصيا بسميها (ميسد حرامية) علشان متلحقهوش وتفتح عليه تشوف مين.

 

ولا اللي يقلك الراجل ده نزيه جدا ياعم ........ تقله طب ليه نزيه ياعم ... يقلك لو اديته رنة تلاقيه بيتصل بيك

 

شكلها مرتاحة معاه ياعم الله يسهلنا ويسهله يابوخالو. وهكذا نماذج غريبة...

 

وبصراحة بعد الموبيل اصبح الانسان متاحا ومقتحما , فاي حد تقدر تجيبه من اي حتة

 

ياراجل ده البت اللي ابوها قافل عليها بالضبة والمفتاح ومبتشوفش الشارع بعنيها بتلاقيها تعرف شباب وتلاغيهم لو معاها موبيل.

 

يبقى ياناس حتة حديدة صغيرة تقدر تعمل ده كله فينا.

 

وطبعا لو مزنوق وخايف تتقفش تروح مسيلنت الجهاز(اي تجعله صامت) .

 

وتقدر طبعا تظبط وتقرا الرسايل ولا تبعتها براحتك لاي حد اي كان بدون رقابة

 

ياترى احنا وصلت بينا الدرجة للحال ده ان احنا نهتم بقشور قشور قشور قشور الاشياء

 

وكل همنا ان نجيب الموبيل الفلاني زي بتاع الواد سعدان عشان ده بيمزك احسن.

 

اصلي بصراحة زهقت من العدة اللي معايا دي بقالها كتيير قوي يارجل دي معايا ليها شهرين

 

اسكت ده انا شفتلك حتة دين عدة في ايد الواد كرااته بس ايه اووووف جامدة جدا

 

ياريت يابشمهندس تنزلي شوية نغمات على كيفك كده شوية حبشتكنات كده يعني زنجف الزناجيف يابرنس

 

ولا ابوكاميرا كمان ياعيني عليك يابوكاميرا ..... يوووووه اسكت مش فيه كامرتين دلوقتي كمان

 

اه امال ايه تصور الناس وتتصور شفت التكنولوجيا وتاني يوم تلاقي صورتك او صورة اختك عالنت

 

طب برده ده كلام

 

وغيره وغيره وغيره.....................

 

 

إيه ده ياعم................ ايييييييييييييييييييييييييييه ده بجد

 

 

انا منكرش ان الموبيل ليه فوائده الكثيرة بصراحة وانا واحد من الناس بيهمني جدا لاني بخلص بيه مصالحي

 

بس يعني مش كده مش لدرجة انه يبقى حياتنا وكمان سيطر على تفكيرنا وحركتنا وكل حاجة

 

في النهاية مقدرش اقول غير( اللهم قنا فتنة الدنيا، وفتنة الزمان, ولا تجعل الدنيا اكبر همنا)

 

تقبلوا احترامي وتقديري وشاركوني اراكم.

 

 

 

[حياتى من اجل ربى 22]

يشرفنى طبعا ان اكون اول من رد على موضوعك الراااااااااااااااااااااائع

جميل جدا وساخر جدا جدا من الواقع اللى فعلا الواحد مش عارف يقول عنه ايه غير حديث الرسول صلى الله عليه وسلم

((فوالله ‏ ‏ما الفقر ‏ ‏أخشى عليكم ولكني ‏ ‏أخشى أن تبسط الدنيا عليكم كما بسطت على من قبلكم فتنافسوها كما تنافسوها فتهلككم كما أهلكتهم

)) او كما قال حبيبى صلى الله عليه وسلم

جزاك الله خيرا اخى رجل من الصحراء ورزقك الله رجاحه العقل وتقبل منك وجعل الله كل ما تكتب فى ميزان حسناتك

وحقق لك كل ما تتمنى ورزقك من حيث لا تحتسب

تقبل مرورى المتواضع على موضوعك المميز

تم تعديل January 25, 2009 بواسطه حياتى من اجل ربى

[رجل من الصحراء 36]

شرفتيني اختي الفاضلة بردك الجميل

وبارك الله فيكي ولكي لدعائك المستمر لنا

منورة مواضيعي بردودك الراائعة

تحياتي وتقديري لكي

 

[

[ABOTASNEEM 117]

هو انا مقدرش انكر انو الموبايل مهم جدا فى حياتنا

 

وخصوصا معايا .. لانى بدونه ..فعلا بحس انى تايه

 

بس .. طبعا لابد ان يتم استخدامه بالاسلوب الصحيح

 

مش لمجرد الرن والتوافه من الامور

 

انا كل حاجة حاططها على موبايلى بجد

 

مواعيدى، اجتمعاتى، اذكار، المهمات المطلوبه منى، القران، التاريخ الهجرى

واكيد طبعا الاسماء ... وحاجات تانية كتيرة جدا بس مش متذكرها كلها

ده انا حتى سيرتى الذاتية موجودة على موبايلى

 

شكرا

 

رجل من الصحراء

[رجل من الصحراء 36]

المهم هتبيعه امتى؟؟

شكرا حبيب قلبي

منور المواضيع بردودك

تحياتي

[المتحدية 1]

جميل الموضوع والله دا يا رجل من الصحراء ... عجبتني بصراحة بالنقد

 

بس تصدق ان حوار الرنات دا شكله في مصر بس ... لاني لما احب اغلس على اصحابي هنا في السعودية برن بس

 

 

و حتى لما صاحبتي تتصل بي و اكون انا عارفة هي عايزة ايه .. يعني بتفكرني بحاجة او حتى انا قلتلها رني مثلا لما تعملي حاجة معينة

مش بارضى افتح عليها يعني باقول نوفر الرصيد في حاجة اهم بتتغاظ مني

 

 

و انا موبايلي بصراحة برضو مهم بالنسبة لي عشان المواعيد و و المهام المطلوبة مني و التواريخ المهمة بالنسبة لي اللي انا اهتم بتذكرها

و كمان الآلة الحاسبة ... و طبعا دا غير الصور اللي باحب التقطها لكل منظر يعجبني

 

يا رب ارحمنا من تحكم التكنولوجيا بنا ... و اجعلنا نحن من يتحكم بها

[رجل من الصحراء 36]

اختي الفاضلة المتحدية

نورتي الموضوع بردك الجميل

وشرفني واسعدني مرورك كثيرا

تحياتي وتقديري

[الحياه 20]

موضوع

بجد رائع

ولفت أنتباهي الي

الكلمات التي كان عيب أوي نقولها زمان والأن أصبح عادي بسبب أستخدمنا الخاطئ للتكنولوجيا

شكرا بجد أخي ربنا يكرمك

[رجل من الصحراء 36]

تشرفت كثيرا بمرورك اختي الحياة

جزاكي الله كل خير

تحياتي وتقديري

[تقوى القلوب 12]

( اللهم قنا فتنة الدنيا، وفتنة الزمان, ولا تجعل الدنيا اكبر همنا)

 

 

جزاك الله كل خير

موضوعاتك جمله جدا رجل من الصحراء

 

والله انا معاك فى الحكايه دى

 

انا عن نفسى لما ابقى عاوزه حد اتصل بيه على طول مش نفضل نرن على بعض زى الاطفال ده صداع اصلا لما التليفون يفضل يرن

[رجل من الصحراء 36]

اشكر مرورك الذي زادني شرفا اختي الفاضلة

[مصطفى بهجت 2]

صديقي الفاضل .. رجل من الصحراء

فعلا و للأسف الشديد أحوالنا بقيت غريبة وعجيبة جدا ..

موضوعك ده مهم خاااااااااااالص وياريت كل الأعضاء يقروه ..

تلقى الشاب من دول عامل شعره سبايكي ولابس جينز ساقط وقاعد ع القهوة وسيجارته في بقه و موبايله في إيده ..

و يوقلك مش لاقي وظيفة آكل منها عيش ..

تلقى الواحد فيهم كل شهر والتاني بيغير موبايل .. بسبب الغيرة من موبايل واد فلان وعلان ..

لكن لو رجعت لموضوعنا الأساسي ::

الموبايل زيه زي أي تطور تكنولوجي فيه الصح وفيه الغلط ..

و في إيديك الاختيااااااااار ..

يا شباب حرام عليكم تصوير البنات ..

حرام عليكم .. تحميل صور غير أخلاقية ..

حرام عليكم .. تحميل أغاني تغضب الله ..

النغمات و أحدث مقاطع الفيديو و الصور .. وغيره وغيره ..

جزااااااااك الله خير ..

[رجل من الصحراء 36]

شكرا اخي الفاضل مصطفى

بصراحة تشرفت كثيرا بردك الاكثر من راائع

تحياتي وتقديري الكبيير لك اخي الكريم

[رجل من الصحراء 36]

هل من اراء اخرى

[battot 19]

موضوع جميل جدا وحيوى

 

وبيعبر بجد عن احوال بعض مايفعله البعض من استخدامهم الموبايل بطريقة هزلية

 

مشكور اخى رجل من الصحران

[رجل من الصحراء 36]

شكرا ليكي اختي بطوط

شرفتي

[رجل من الصحراء 36]

تحيتي

[غريق مش لاقى قشه 1]

مش بقولك انت راجل كوبارا

ياريت اعرفك شخصيا

انت اسلوبك جمييييييييييييييل

[رجل من الصحراء 36]

ليا الشرف حبيبي