الجندى المجهول

تنولد تانى فى عام (الألف) فيــل مشتاقين للفجر يطلع من جبينك، محتاجينك تحفر(الخندق)تشيل من قلبنا (كوم التراب) هجمة(الأحزاب) على (خندقنا) أقوى من (الحصون)، و(الكتاب) مغروس فى جنبه ألف رمح، والقبيلة فى انتظار لحظة شروقك ع الملأ تشعل الشمع الالهى فى النفق، نلتمس فيك السلام محتاجين فعلا نصلى بس تبقى انت الامام تنولد شمس الخلاص جوّة سرداب النفوس انطفى ف ايدنا الفانوس، والليل دلق حبره ف سمانا، والنهار بعدك مليّـّـل كل هبـّـة ريح بتكسر فينا ضلع، كل يوم بيموت فى حجر الأمةعيّّــل، واللى فاضل من هدومنا مش ساترنا فانتبهنا اننا سيبناك وتهـنا عز مااحنا ....محتاجينك، محتاجين لك ترمى حفنة من تراب فى عيون أعاديك اللى رجعوا يعسكرولك لمّــا سمعوا بموت على بس لمّـا يقرّبوا منّـك خطاهم هايلاقونا كلنا نايمين مكانك فى الفراش دا الكتاباللى ف ايديهم مااتقراش لو قروه هايلاقوه مكتوب بنورك، ويلاقوك نايم فى أحضان المسيح، راضع معاه من صدرمريم بس عين الجهل دايما نورها مطفى، والقلوب العميا صعب تلاقى ع الأرض السلام، صعب توهب للحياة و الناس مسرّة محتاجين لك ألف مرّة نكتب البيعة الأخيرة ونعشقك، نستنشقك، تبقى شمس قلوبنا واحنا نبقى ضلّـك داحنا فعلا محتاجيـــــــــــــــــــن لك محتاجيـــــــــــــــــــن لك محتاجيـــــــــــــــــــن لك

قمت خايف أجرى ع الشباك .. ولكن .. ما لقيتوش ، والمكان .. أضيق م القبر بــ تلت تربع حياه ، والسّما عاقر .. مفيش فوق حجرها الاسود .. هلال ، والنجوم كانت مسافرة كنت انا .. فى الكون لوحدى ، والضلام حاطط عنيّا .. جوّة عبّه ، والمكان مش لاقى فيه .. جذع نخله يهزّه قلبى .. لجل ترميله الأمان .. ولا نار .. ترجم ضلام .. كونى بــ " قبس " فجأة .. طلّت من عنيّا .. نظرة لسه فيها نبض شفت نقطة نور بتلمع .. فى المازوت واما ركـّـزت انتباهى .. شفت خرم النور بيوسع .. حبّة حبّة لحدّ ما اتحوّل .. لخاتم .. قمت راشق فيه صباعى ، وابتديت ..أفتح شبابيك الرؤى، وارمى عينى ع السكك شفت مارد لأ ماهوش مارد عشان .. ما ابقاش با بالغ شفت حاجة قريّبة . من شكلى خالص بتناولنى شمعة مطفية وتقوللى : خد عشان تعرف تشوف أو تقابل نفسك اللى بتشتهيها لجل تسحب جتّتك .. برّة النفق قلت لكن شمعتك ... قالت أحسن من مفيش مش فاضل لك .. إلا ّعود كبريت تمللى تضيّعه لو تفتـّـش .. جوّة روحك ، هاتلاقيه

ماشي ف دنيا العمر الصحرا شال صبار الناس الفقرا فوق اكتاف القلب العيل رضّع كل الدم الشوك دلدل روحه حبال أحلام رابط بيها السكة ف رجله وراح مستني طابور الدور ركّب ترسه ف دنيا موتور و لف و دار ومشي مشوار خطوة بخطوة كانت كل الناس فايتاه علّم كل الناس السكة لكن تاه شاف صفحات كراسة عمره ملقيش فيها غير شخابيط عرف الآخر إنه مغفل … إنه عبيط لما استنى القطر يعدّي ….. وياخده معاه لما اتخيل إنه بيصرخ و ان الناس حواليه سامعاه وان السكة الماسكة ف رجله بالأحلام هاتروح جامعاه و انّه ف عمره هيقدر مرة يخطّّي السور لكن اكتشف الدنيا الساقية و انّه لوحده كان الــ ...... جاب م الآخر لملم كل أحلامه ف باطه غمّض عينه بسرعة و..... ناااااااااااااما شال صبار الناس الفقرا فوق اكتاف القلب العيل رضّع كل الدم الشوك دلدل روحه حبال أحلام رابط بيها السكة ف رجله وراح مستني طابور الدور ركّب ترسه ف دنيا موتور و لف و دار ومشي مشوار خطوة بخطوة كانت كل الناس فايتاه علّم كل الناس السكة لكن تاه شاف صفحات كراسة عمره ملقيش فيها غير شخابيط عرف الآخر إنه مغفل … إنه عبيط لما استنى القطر يعدّي ….. وياخده معاه لما اتخيل إنه بيصرخ و ان الناس حواليه سامعاه وان السكة الماسكة ف رجله بالأحلام هاتروح جامعاه و انّه ف عمره هيقدر مرة يخطّّي السور لكن اكتشف الدنيا الساقية و انّه لوحده كان الــ ...... جاب م الآخر لملم كل أحلامه ف باطه غمّض عينه بسرعة و..... نااااااااااااام

باحب النضافة واموت في النظــــام وعايش حياتي غــرام في غــــرام عصامي ولا كلت يـوم مـــن حـرام و دا لأني دايما باحب النظــــــــام باروح شغلي بدرى وبامضي انصراف ولا جيت ف مرة عمــــلت انحــــــراف تشوفني سكوتي مليش في الكــــــــلام باحــــــــبه باحبــــــــــه باحب النظام أهندم هـــــــــدومي و اداري الرقـــــع وباكتم همومي وباعمـــــل جــــــــــدع عشان دنيا زايلة باعيشــــــــها بسلام باحــــــــبه باحــــــــــــبه باحب النظام ولا احـــب أشـــــــــبع ولا اكو ن تخين وباكـــــــــــــــــلها طقة واجوع طقتين عشان دنيا زايلـــــــة باعيشها بسلام باحـــــــــبه باحــــــــــبه باحب النظام وبامـــــشــــي ف حــالي ماكلمش حد ودا لأني دوغـــــري ومظـــــبوط وجد ولا امشي ف مظاهرة ولا ف اعتصـام باحبه باحـــــبه باحــــــب النظـــــــــام حمار شــــــــــغل صــــابر ولا قلت آي ولو حــــــد ينده أقــــــول أيوة جــــــاى و اشــــــــــــيل اللي يركب ولي احترام باحــــــــــبه باحــــــبه باحــــب النظـام باحب اللي فــــوقي يكــــون ديكتاتور ويرضي غروري يقـــوللي يـــا تــــــور وانفـــــــذ بســـــــرعة وأدي التمــــــــام باحبه باحـــبه باحــــــــــب النظــــــــــام ماعنديش كــــلام للي فـــــــــوق غير نعم ومنطــوقشــي لأة واكـــــــــــون محترم وبــاخد حــوافــــزي تمــــــام التمــــــــــام باحـــــــبه بـــــــــاحبه باحــــــــــب النظام ولا احــــــــــب أبدا أشـــوف غـــير لتحت لا بصيت عــــلالي ولا جــــيت ورحــــــــت ما هاينوبني غـــــــير التــــــعب والمـــلام باحبه باحـــــــــبه باحـــــب النظــــــــــــام باحـــب العـــــــــــدالة مـــــــــــادام ملتزم و اطالــــــــــب بحــقي ف ضرب الجزم واطاطي لنصــــــيبي واعـــــــدّلّه كــــــــام باحبه باحــــــبه باحـــــــب النظـــــــــــــام بأدّي الفــــرايض وانـــــــــا مســــــــــتـحي ولا اعملشي ســــــــــني ولا ملتــــــــــــحي و احافظ على مبدأ الأمــــــن عـــــــــــــــام باحبه باحـــــــــــــبه باحــب النظــــــــــــام ولا اعمل شــــــــيوعي واروح لليــــــسار باكبّر دمــــاغي ولو تبــــــــقى نـــــــــــــار مليش دعـــــــــــــوة غير باحترام النـظام باحبه باحبــــــــــــــــــــــــه باحب النظام مفيش مــــرة خالـــــص دخلـــــت النيابة خروفي مسالم ف وســـــــــط الديــــابــة ولو ديب ياكلني أقـــــــــــــوله قــــــــوام باحبه باحبــــــــــــه باحب النـــــــــــظام أزق ف مراكــــــــبي يمــكن تســــــــــير ولا اقرا جرايد ولا احلـــــــــم كتـــــــــير واشــــّد ف غطايا وبدري أنـــــــــــــام باحبه باحــــــــــــــــبه باحـــــــب النظام ملــــــــيش عمري دعوة بكلام السياسة كلام المعارضــــــــــــــة دا كفر ونجاسة تقوللي كفاية أقولك حـــــــــــــــــــــــرام باحبه باحبه باحب النـــــــــــــــــــــــظام

الشمس تبدأ فى الغروب لكن غروبها مش هروب ونورها لسه فى القمر ورق الخريف .. لا بد ويسيب الشجر لكن نزوله مش خلاص لأنه فيه بعديه ورق ... أخضر جميل يروح يميل ... فوق الفروع فروعه ثابتة ... ومستحيل فروع تميل رغم الرياح يومنا ليل .. وليه نهار مش معنى ليل يعنى انهيار لأن ليلنا فيه قمر سهران ينور للسهر تفضل حياتنا كالشجر تدبل تروح بس المطر يخلى غيرها يتولد

معذور مدرس فصلنا لما ضربني بالعصايا فوق ايديا اللينة لما وقف يصرخ بصوته في العيال ونا وسطهم قولوا ورايا بانتظام ... "أمي أبي" كل العيال كانت تقول " أمي أبي " .......... إلا أنا يرسم مدرس فصلنا يرسم لنا .... حبة حروف يصرخ يشاور للعيال ونا وسطهم " أمي أبي " برضه العيال كانت تقول " أمي أبي " ........ إلا أنا شافني المدرس من بعيد قوم يا ولد .... قوم يا بليد متقولش ليه زى العيال ؟ واطاطى راسي والعيال تضحك عليا كلهم والكلمة فيا تنحبس ... وعنيا تتكلم بُكا يمسك مدرس فصلنا ... يمسك عصا افتح لي إيدك يا ولد تنزل عصايته بالعنا فوق الايدين اللينة أبكي وأقول معذور مدرس فصلنا معذور ميعرفش السبب إن الحروف اللي كتبها للعيال كل العيال كان عندهم نفس الحروف إلا أنا .. معذور مدرس فصلنا معذور مدرس فصلنا

شاعر قال ف يوم لابنه أوعى يا بنى تبقى شاعر ترسم بالحروف مدينة فيها مليون ألف مينا للمودة والسلام بعد شوية تلقى حلمك كان كلام جواه كلام * * * * أوعى تطلع تبقى شاعر تنده جوه الناس مشاعر كل الناس تقول آمين بعد ساعة بعد ثانية تلقى كل الناس بتسأل المشاعر هى مين ؟ أو عى يا بنى تبقى شاعر تعشق بالكلام صبية لجلها تهوى المخاطر يبقى ليك الصعب غية تانى يوم ينساك حبيبك اللى قال يوم ليك عنيا * * * * أوعى يا بنى تبقى شاعر تحيى جوانا اللى مات خد علينا الموت خلاص لو فى يوم دقنا الحياة راح يعذبنا الممات * * * * أوعى تطلع تبقى شاعر ترمى ف عنين الغشاوة تغزل خيط الخوف أمان أو تعلى يوم جبان أو تحلى ف عين عدواة سيبنا أموات زى ما احنا أصل أحياناً بيبقى جوه طعم الموت حلاوة * * * * أوعى يا بنى تبقى شاعر تهز جوانا المشاعر هزتك تُشرخ قلوبنا تلقى كل الناس ........... حطام

يارجل فى كلام من ده دلوقتى

:) :) :) :) :) :) :) :smile: :smile: :smile: :) :smile: :) :) :) :)

ممكن سوال اخولل الولد دول فين شكر يا راجل

جامد كالعاده يا تعبنى

الله يسلمك يا مصطفى احنا تحت النظر بس اللى يسال شكر يا ساهر على المرور

بعد الفطار بعد الفعينى غفلت حبتين كل عام و انتم بخير رمضان كريم عينى غفلت ، م التعب طول النهار ، و المجاهده ، و المناهده ، وسين وجيم ، لحظه و التانيه ، و بعد اللحظتين ، جانى احساس إن حد دخل قعد ، و ابتدا يسبّح ، و ابص بنص عين ، نص قلبى انسرّ ، و النص ارتعد شفت بيرم .. أيوه بيرم .. أيوة هوّه .. لبده مصرى ، جلابيه مغربى ، شمَله شامى ، سبحه من أرض النبوه حد ما يعرفش بيرم و النبى ... ؟ شفت بيرم ، بالصديرى اسكندرانى ، شفه ، متلفع بشال من العراق ، و الحزام يمَنَى ، و عطر الايد سودانى ... حد ما يعرفش بيرم يا رفاق .. ؟ ضحكته المره اللى بتنقط عسل قلت : خير إنشاء الله قال : فين الديوان . فين ديوان بيرم ) ما بطلتوش كس ...؟ قلت له : معلهش قال معلهض إيه ! و نا تايه عن بلدنا يا ولد ... ؟ البعيد عن عينها ، يا حسرة عليه .. يا بلدنا ، يا حلوه ، آه منك بلد ! قلت له : راح نحتفل بك قاللى : لا ، احتفالكو وفّروه على نفسكو قلت له : ح نشيد بفضلك قاللى : ها ، فضلى فين ، إذا كنتو ناسيين درسكو ؟ قلت له : علَّمنا : بيرم قاللى : شوف ، المياتم فى الأزة ملطَّعه ، أنا مش عايز كراسى صفوف صفوف أنا .. صفّولى حروف المطبعة !!طار

بالأَسبرين ... و السكاكين و بالمسدس مقتولين على آعمدة كل الجرايد مصلوبين شبّان صغار أزهار فى فجر العمر ما شافتش النهار متكلبشين فى الزنانزين أو مغروزين فى الطين فى قصر النيل وعايزين غطاسين ع المشرحة إنسان نحيف بشنب خفيف أصفر ليف خدوده من قيمة يومين مش محلوقين صوابعه من شرب السجاير محروقين عينيه على جدار الفراغ متسمرين و عل الجبين رفرف سلام الميتين ما تسألوش كان اسمه إيه إسمه على المحضر بقى المجنى عليه إسمه بقى الجثة فقى أَوراق الدوسيه ما تسألوش عن قصته كان موته ليه المسألة صبحت فى إيد المسئولين على ذمة التحقيق سجين إنسان حزين فى قلبه إحساس الغريق ما لهش عون فى دماغه أَتر من حريق لابس قميص مربعات و بنطلون و ف رجله صندل من زمان ما لهش لون يبص على آخر الطريق يلاقيه ما بين رجليه تمام ثابت عليه الاتهام و حياته بين الناس حرام حرام عليه يركب ترام حرام عليه الأتوبيس حرام عليه الأرصفة و الفوانيس و المدرسة و السينمات مكتوب عليه يعيش ما بين الحابيس فى الومانات ما تسألوش ده يبقى مين شفتوه و بتشوفوه كتير فى الجرانين بلاش سؤال على كل حال المسأًلة صبحت فى إيد المسئولين على ناصية الشارع أًمين واقف مع حسين و اسماعين و بنيامين متسرحين و مشمرين و شوية ويوصل مصطفى و عبد السلام و يبتدى يحمَى الكلام و يغمزوا بعينهم و يمكن يشتموا و يقولوا لفظ بذئ و هما بيضحكوا ما تفرحوش لما تشوفوهم من بعيد نازلين هزار و قزقزه و ما تقولوش ياريت زمان التلمذه يعود علينا من جديد بيشتموا و ف كل قلب صراخ يحاول يكتمه بيضحكوا و ف كل صدر عويل و نار راح تهلكه و تفرتكه ما تفرحوش و فكروا إزارى نحوش اللى حايشرب له قزازة أسبرين و اللى حايطعن أًمه أَربع سكاكين من قبل ما الميت يموت من قبل ما الأَيام تفوت المسأَلة تصبح فى إيد المسئولين

يابهية الليالى السودة جايّة اقفلى بابك عليكِ واحبسى دمعة عنيكِ واسكتى ما تقولى مين ! كلهم شافوا اللى قاتل شافوا حقده وهو نازل من على ضهر "الأباتشى" لجل يكسر كرسى كان قاعد عليه .. الشيخ ياسين !! يا بهية اسكتى ما تخبّرينا فينها هيبة المسلمين ؟! كان بطل حتى الشهادة عجزه كان مليان إرادة دينه كان بركان ف قلبه ثورته تحدف حِمم من ضَعْف صوته تشعل الثورة ف شباب يجروا يموتوا لجل فوزهم بالشهادة كان بطل صنعت بطولته دمعته ف دور العبادة يابهية قولى للدنيا بحالها إنْ موتُه كان سبب مليون ولادة هتعمل إيه يا شيخ مستور ؟ يا راضي بنص لقمة عيش وعايش في النكد مسرور !! أهم سرقوا خلاص خطاويك هتعمل إيه بقه برجليك ؟! هتمشي لْهم على كيفهم ؟ وتحسب إن طول صمتك مكتفهم هتمشي ولاّ راح تقعد ؟ ولو طال القُعَاد برضه أهم ماشين بدال منك لأنك باختصار رافض يكون لك دور وحابس في الضلوع خوفك وقاتل في العيون شوفك وميت صرخة تموت في الزور ودايرة الساقية يا صاحبي وحابب إنك إنت الطور تموت بالصبر ميت مرة ويتغير مِتين دستور ويتحسّر كتير قلبك فتتغمى بهموم غلبك وأهي الدايرة عليك بتضيق كما الساقية عليك بتدور

تسلم تسلم لك تقديري وشوقي وحبي بس حقيقي المشكلة مش فينا ياصاحبي المشكلة في ولي الأمر اللي بيحب يعيش عبد المأمور خايف يجي عليه الدور علشان كده بيغمي عينيه ويشيل أرواحنا على إيديه !! أيوه هدية او قربان قلت لمين؟؟ للمأمور وإن سألوه راح يشهد زور ويقول للشعب المقهور كلمة طويلة يبكي ف آخر جملة عشان يسبك تدليسه ويرضى مأموره وإبليس يا شعبي الغلبان أولادك راحوا فطيس !! نفسي ضميرنا يفوق يا صديقي علشان شعرنا يبقي شعورنا يبقى ضميرنا مش بس كلام حلو وحالم لازم نبقى حاجة مهمة تسكن جو ضمير العالم

روح ربنا يسامحك

حقول ايه شكرا يا رجل

رائع ومتميز

طبعا مش محتاج اتكلم رائع

بحثت عني في الزحام بحثت عني تحت الركام بحثت عني عبر السنين رباه.. أين أجدني؟ ___________ فقدتني ذات خصام.. هجرتني ورحلت عني.. ربما لأني ظننت بأني سأستمع بوحدتي وربما لأني مللتني!!! تمر أيامي فيشدني الحنين إليّ.. تومض ذكرياتي فيقتلني شوقي إليّ وفي لحظة.. فكرت ثم قررت.. قررت أن أصالحني أن أعيدعلاقة حب كانت معي تأنقت وذهبت إليّ .. وهبتني مساحة هدوء لأحادثني وأصارحني .. وعرفت سبب خلافي معي .. وعلمت متأخرة بأني عشت خارجي .. بعيدة عني.. تعايشت مع من حولي .. ونسيتني.. أبعثر الحب والمشاعر النقية هنا وهناك.. وأبخل بها على نفسي .. كم كنت قاسية علي .. حين كنت أفكر في غيري وأنساني!!! أصنع قرارات لغيري وأخنع حين تـُنسف قراراتي و أخيراً.. وعدتني بأن ((أحبني)) وسأسعى لرضائي وأن تكون (أنا) أهم روح لذاتي وأبداً سأدللني .. ترى هل سأرضى عني؟

عيّل مستنى العشا بالبيجامه عيش وجبنه بيضا وفجل بعد أربعين سنه جاله العشا ... بيتزا مارجريتا على الموتوسيكل أنا كنت هذا الطفل و عشت هذا الزمان عشته بحذافيره .. وبحناطيره .. وعربياته الكارو .. وبعواجيزه اللى بيجتروا حكايات بتتكرر فى كلامهم وكلام بعضيهم أنا دلوقتى عجوز زييهم .. و كلامى بيتكرر أنا قد أبويا لما أصيب بالدوخه وقد جدتى وهىّ شايلانى فى المغربلين .. حاطّه على دماغى الطرحه .. من قسوة الشمس .. و شرّ الحاسِدين و قد عبد الناصر فى سبعه وستين و قد سيد درويش بعد ما مات بتمنتاشر سنه .. وهوّ فى السمٰاوات - حسب كلام أحمد حدّاد – مستمر فى الدندنه و انا مستمر فى طفولتى و كهولتى .. و عدم الاجتهاد أنا مستمر فى حياه ماشيه بمجدافين .. مجداف من الماضى ومجداف من المستقبل وخيالى بيحوم حوالىَّ و باحوم حواليه رقص باليه ... و لكنى - على رأى صلاح جاهين - عجوز متصابى و ممكن تقول عنى كمان .. إنى مرابى باسلّف مشاعرى وأحزانى على شكل قصايد .. وبترجع لى قصاصات فى جرايد .. وتعليقات على الإنترنت .. وابتسامات ودموع .. و دواوين شعريه بتنام على السرير جنبى .. وطول الليل تفكرنى بذنبى أنا كنت هذا الطفل بس اتكرمش قلبى من فضلكم ... مش عايز شفقه ومفيش مانع من دفقة حزن قبل الحضن اللى انا مستنيه منكم. عارفين أنا نفسى فى ايه أنا عايز أتوه .. ويلقونى ناس ما اعرفهمش .. والقى ناس ما يعرفونيش .. وأعيش بينهم .. أعيش .. واحكى لهم حكاية المعزة الهندية .. والبنوته المصريه اللى عايزه تعيش فى حريه .. وفؤاد حداد يعملها سحلية.. وستى هند تحولها لنخله مجنونه تتمايل بعصبيه طيب ... لاحظتوا الأسامى اللى انا جبتها فى كلامى .. دول ناس كلهم اتحطوا قدامى غصبٍ عنى .. برضايا .. عاشوا جوايا .. وبقوا حته منى أيوه .. هوّ ده اللى عايز أقوله من الأول إنى لمّا شفت الطيارين بتوع الهوم ديليفيرى مستنيين على موتوسيكلاتهم .. وافتكرت حزمة الجرجير .. وشفت مصر من شباك القطر صعيديه وبحريه وأبديه وغيطانها مبسوطه بنيلها ونخيلها وخضارها الأسمر روحى عرقت بالدموع و خفت عليها و رحت حضرت الأمسيه جنب الساقيه وفى الجنينه وعلى الضفه الغربيه وكنت عاوز أتوه بين جمهور بيسقف .. وجمهور بيعيط .. وجمهور ما حضرش .. راح يفرش منديله على النجيله ويغمّس اللقمه .. ويروّح بيتهم ويطفى النور وينام فى سلام. علشان كده أنا فارش قدامكم فضفضتى. اتفضلوا يللا ... مدّوا ايديكم ... بسمللا

ساعات كده بعيد يجيلي كرشة نفس وألم ف المعدة ودربكة ومغص وساعات أحس إني شوية أمراض محطوطة ف قفص بس ماشي الحال وساعات من غير سبب أجري ع الحمام ويجيلي برد وزكام وساعات أسهر وساعات م العصر أنام وساعات ألاقي صعوبة ف الكلام وده تقريباً طول السنة وساعات أحس إني مش أنا بس زي الجن فاكر اسمي واسم مراتي وأسامي العيال وعلي طول بقي جسمي مكسر ومهدود صحيح باكل وأشرب واضحك والعب بس مش موجود ومعرفش ليه عيني بترف عمال علي بطال هو أنا عندي ايه يا دكتور

حكومة رقيقة أوي وشيك.. بتقفل كل البيبان والشبابيك.. عشان بتخاف علينا م البرد.. لأ إحساس مرهف بجد.. الأسمنت والحديد يغلي.. تقوم تبيع الأرض.. هو ده الفكر الجديد.. اللي بيبني المجد... وشوف الحنان والطيبة والإنسانية.. سعر تصدير الغاز.. أقل من سعر الفول والطعمية.. ده علي اعتبار إن الناس لبعضيها.. والدنيا منفاتة.. وإحنا والحمد لله.. مش محتاجين أنابيب.. والمشتري مش غريب.. جربت الشاي بالحليب ساعة الصبحية.. قراقيش بقي وسقي يا معلم وانسي القضية.. ده تقريباً ماحدش شايف حد