الجندى المجهول

تـاريــــخ واقف هناك .. ع البر عينك ف السحاب بتردد الماضي البعيد فاتح كتاب .. للعشق .. للروح .. للحياه للأغنيات المغرمه بحضن الوطن فارد جناح .. رحَّال مع الطير المسافر للشروق واخد معاك .. للشمس في حضن الجبل أول شعاع من ضي روح الشمس / روحك .. من سطور العشق بتولِّي الشراع .. يَمّ الزهور الميته ف جوف النخيل .. اللي انحنى .. للبحر يشرب م السراب جايب وراك .. شمس انتصاراتك دوا .. نسمة هوا .. مزروعه في كف السنين .. تحيي النخيل اللي انكسر .. خوف م الطريق .. خوف م السفر .. خوف من بداية تشده " للوادي الجديد " واقف هناك .. ع البر بتنادي النخيل .. وتعيده تاني لهيئته .. مفرود وعالي .. وأصله ثابت .. تندهه .. يفتح كتاب أمجاده .. يلقاك التاريخ

البحر مالح .. وطعم الموج .. أكيد مالح فما بالك .. وموج البحر رغم الملح .. متعافي لا بيسامح .. ولا يصالح وبيعاند .. وبيجافي ف مش كافي .. تشيل شْباكك الموجه وتطرحلك .. أمل صالح .. وغير صالح ومش كافي .. تدوس الشط باقدامك .. وقُدَّامك .. بساط البحر ممدودلك .. ومفرودلك شراع الفجر .. ونسمة بحر تدعيلك .. ف ليلة قدر !! ف واقف ليه ومستني .. تشيل شباكك الموجه .. وتطرح لك .. أمل صالح .. وغير صالح ومستني .. تداوي عجزك الموجه .. .. بشربة ملح ؟!

ولو انكسر .. ضلك على السور اعدله .. أو مد له .. يدك يقف .. أو شد له الشمس اللي غابت .. بين ضلوعك .. تغزله .. ينشد عوده اللي انكسر .. يحضن طريقك .. يحضنك ويضم يدّه لحضن يدّك .. يرفعك فوق السما وتخطي برّه السور ف حاول .. إنما إياك يكون الضل لحظه .. ضل حيط !!

تسلملى يا شيتوس

- 1 - مستني إيه .. ؟ الشط عاند رحلتك .. باع خطوتك .. وشْربت ملح التوهه .. من بحر الخيال ! مين اللي قال .. إن انتظارك مركبك .. هيوصلك .. للبر من جوف الحنين ؟ ويقرِّبك .. من فجر طالل من عيون البدر .. في ليل السنين ؟ إيه سَكتك .. عن غنوتك .. مين اللي بعتر سِكتك .. .. ف البحر .. مين ؟؟ - 2 - شمع انطفا .. فين الشموع ؟ العتمه بتسرسب دموع .. ف الحلم بتخبيِّ الرجوع .. كان نفسه يبدر خطوته .. بره الدواير .. يبتدي .. يرجع لقلب الشمس .. من أقصر طريق ! غاب البريق .. والشمس غابت منُّه .. من بين الوشوش .. ينده لكم .. ما بتندهوش .. يصرخ لكم .. ينْبحّْ صوته .. ينتهي .. .. ولا تسمعوش !! - 3 - العمر داخل منحنى .. واصل بداية منحدر !! أصبح قدر .. يخلص سفر .. يبدأ سفر اتغيرت فيه الصور .. واتلونت .. لون الخريف الأمنيه .. الأغنيه .. الشارع .. السكه الحديد .. الأبنيه !! الحلم تايه ف الشجر .. اتشبكت كل الفروع .. اللي انحنى .. اللي انكسر .. واللي بيستنى المطر !! العمر وبرغم الألم .. فارد على الروح العلم .. ناقش على وش السفن .. هم الوطن .. همس الوطن .. شمس الوطن .. كاتب بدمّه غنوته .. راسم ف دمعه ضحكته .. العمر غازل من شعاع الفجر .. .. توب الفرْح .. .. ومخبِّي الكفن

مزيكا .. بتدق ليك إنت وحدك .. وصوت " فايزه أحمد " .. من الراديو يسأل : ”ـ يا " خد وردي " .. " يا سنَّه لولي " مين اللي قال لليالي طولي ؟ ” تنام الشوارع .. وتسهر لوحدك .. ما بين باب موارب وأربع حيطان .. وألوانك اللي ابتدت تبتسم لك .. بترسم ملامح خروجك بحلمك .. من الدايره وحدك لأروع سفينه وبين بحر وردي وبين شط زينه .. وموجه تودِّيك .. وموجه تجيبك ولا حد حاسس .. ولا حد سامع .. يهيج بحر روحك .. يتوه اتجاهك .. ولا حد عارف ولا حد شايف شبح جي يهجم عليك غصب عنك .. يفتش جيوب بنطلونك ويهرب يسيبك على فرش دايب ويجري .. وتجري كلاب الشوارع وتنبح .. ورا ضل واحد حرامي بياخد ف إيده .. مفاتيح هروبك من اللي انت فيه !!

انا اسف الموضوع نزل غلط فى الحوار العام

نسخة منك " ع " المحطه .. وانت واقف .. من قصاد شباك تذاكر فجأة تلمح .. طفل نط بسرعه من وشَّك .. وحاول إنه يجري .. جنب بنت جميله تشبه " ليلى " أختك . إيدها تحضن يد تشبه يد ماما وانت ماشي جنب منهم حضن إيدك كان بيحضن يد بابا فجأة وسط الزحمه تهت وتاهوا عنك ضعت منهم .. ضاعوا منك وانت بتدوَّر عليهم فجأة تلمح .. شاب كان ساكن قلبك .. افتكرته .. وافتكرت ازاي هرب من كل حاجه .. من أثاث بيته ، عياله ، قعدته فوق القهاوي .. مظهره قدَّام صحابه ، المشاكل .. اللي بينه وبين مراته .. - غلطِتك - مش غلطتي .. ـ أنا مش بقولك . عيشه تقرف .. ـ بكرهك .. طلقني .. روحي .. إنتي طالق بالتلاته !! وامَّا راحت منه راحت كل حاجه ! فجأة قرر .. إنه يسكن برَّه منك بس عاش ساكن قصادك من ساعتها .. عمره ما فكَّر يزورك .. كان يدوبك بس أحياناً يشاورلك .. تشاور .. بابتسامه باهته منك !! فجأة تسمع شخص يشبهلك ندهلك .. ع المحطه .. وانت واقف من قصاد شباك تذاكر .. كان بيقطع تذكرة " عودة " لواحد .. نسخة منك .. شعره شايب .. ضهره محني .. حتى أسنانه اللي وقعت غصب عنه .. .. سنَّه .. سِنَّه !!

بس الينفذ يا ابو العيال

والله انت عارف انا مش بتاخر بس والله العظيم عندى ضعط شغل الايام دى ميعلم بيه الى الله

والله انت عارف انا مش بتاخر بس والله العظيم عندى ضعط شغل الايام دى ميعلم بيه الى الله

وجزاكى مثله وزياده وجعكى من من يقود الامه لصلاحها

حبيبي يا رسول الله . حبيبي يا رسول الله يا خاتم أنبياء الله . يا مُرسَل بالهدايه من إله الناسْ .. لكل الناسْ . و بالقرآن تنور ضلمة التايهين و ترجم بيه شيطان خناسْ . و في سالف عصور الجهلْ ، كنت النورْ . و ينزل بالهدى جبريلْ ، يقول : " اقرأ " .. يزيد النورْ و ييجي الأمر من ربكْ ، تهاجر يا بن عبد اللهْ تخط برجلك الطاهره طريق النورْ . و نفضل في سنا نوركْ ... على درب الهدي ماشيين ، ليوم الدين . عشان حققت للدنيا بكلْمة حق مطلبها و خليت الطريق واضحْ في شرقيها و مغربها و جند الشر بالحجة بتغلبها و تجذبها، لدين اللهْ . و لو كنت الغليظ القلب كانوا انفضّوا من حولك و لكنكْ .. مثال النُبل و الأخلاق في كل زمانْ و جيت بالحق لجل تتمم الأديان و تغرس في القلوب الطهر ، تمحي الغدر و الطغيانْ . و يتبدل سلاح الكفر و الجبروت بغصن أمانْ . و من نار الجحيم نهربْ إلى جنه من الإيمان لأنّك رحمة للإنسان . *** و بيدور الزمن بينا ... و لا نصحصح و تتبدل رجال و بلاد تروح أمجاد و ييجي ناس كتير حُسّاد قلوبهم صخره مليانه بزيف و سواد لا لاقوا حد يردعهم و لا بالحق يمنعهم فسابوا كلابهم الهايجه بعرض "المصطفى" تسرح و تكذب تفتري تنبح و تنشر سمها تجرح و في الدنمارك يا حسرهْ... لقت مطرح و قلبي للأسى و الحزن يا "طه" بقى مسرح . صور عِفْنه و كدابه جرايد كلها كتابه تعالب مكر و ديابه و مين يا ناس يصحّينا من النومه ؟ ندافع عن حبيب الله بكلمة حق أو قومه نشوف أعداءْ لنا بانوا و لا مرايه إذا قابلونا وش لوش و حكايه و لما نديّر السحنهْ ... لهم في الضهر سلاّيه . بتنهش لحمنا و تدبح *** حبيبي يا رسول الله فداك روحي فداك أهلي و أولادي راح ارفع بالندا صوتي و أقول الحق لو في الحق كان موتي بضايعهم نقاطعها و شكوانا ، لمجلس أمن نرفعها نخلي الأرض ، كل الأرض تسمعها و لولا إن دين الحق علمنا بإن الأنبيا واحد لكنا نقول على موسى على عيسى و لكن ربنا الواحد أمرنا بالإيمان بيهم و دا الفرق اللي بين الكفر و الإيمان . و دا العلم اللي علمته لنا في خاتم الأديان .

يا قلب شاعر فى مسيرة الجامعة يا خدك حماس الشعر تهتف كأنك حى كل البلاد تسمعك ومصر مش سامعه مخنوقه بين ضلمتين وانت بتنزف ضى نص الوطن عسكر ونصه عبيد بتخبى روحك ليه تروح لبعيد دمك هدر يا محمد السقا هتفت للقدس ماحلمتش تجيب شقه عشان كده بتموت عشانها شهيد بتموت يا واد من غير ما تسأل حد بتموت ومتهيألك انك واخدها بجد مجاش فى بالك يا واد اسكندرية و رام الله تحت نفس الحصار؟ جيش الدفاع هوه فرق الأمن مافيش خجل ولا احساس قوى بالعار دم الشهيد لو للكرامه حن تتفك عقدتنا بأغنيه!!

اه يا شطوط التوت نفسى ادوق من تانى طعم الحواديت واشم ريحة البيوت نفسى انام ع الفرن زى زمان فى حضن العجين..الأمان العجين.. الحنان. يادى الحنين الجنان يادى الحنين اللى خدنى من سنين داست على وش السنين من بعد اللى فات فى القلب جفف خلايا الروح انا دلوقتى مين؟ يجوز أكون مدبوح ومش دريان؟ طب سندونى ع الوجع يمكن أكون عيان ... أيوه أكيد عيان ومش ميت ما دمت لسه باحس بالماضى وبحن للى جى وببص حواليا ومش راضى فاالحزن ده يشهد بإنى حى الحزن ده يشهد بإنى حى

كل واشرب واتنيل على عينك .. عيش محنى ومنتوف الريش اضحك وانت ماليك الخوف وامشى ع الحبل كأنك من أبطال السيرك القومى والبس ألف قناع وقناع علشان ما تبانشى قدام الناس مهزوم وماتحلمش لأن الحلم حياخد منك رزق عيالك والناس حيقولوا عليك مجنون أحسنلك لما الهفة تجيلك تتفرج على أى مسلسل فى التلفزيون وتنام بدرى عشان تصحى تروح الشغل وتمضى ف الدفتر زى عوايدك إيه؟ مش عاجبك؟ ناوى تقاوح تانى؟ - راح تاكل بالجزمة م الإمبريالية الصغرى( مراتك) وان جبت اخواتك حتجيبلك امريكا وحتفتن وتقول إنك ضد الحكم الوطنى وضد التطبيع وانك حاقد على كل اللى بيشترى ويبيع وساعتها ماحدش هيصدقك إنك مت ف67 وعبرت ف 6اكتوبر واتبرعت بنص مرتب علشان مصر ماتبقاش مديونة اتنيل بقى يا بن المجنونة وعيش زى بقيت الدراويش وارحمنى عشان الورقه حتخلص وماعادشى كلام ف دماغى المخرومة.

كونى مصر بلاد الشمس وضحاها، غيطان النور، قيامة الروح العظيمة، انتفاض العشق، اكتمال الوحى والثورة "مراسى الحلم" العِلم والدين الصحيح، العامل اللى مش غلبان ولا خايف، الفلاح الفصيح، جنة الناس البسيطة ميزان العدل والحكمة، القاهرة القائدة الواعدة الموعودة الساجدة الشاكرة الحامدة المحمودة العارفة الكاشفة العابدة المعبودة العالمة الدارسة الشاهدة المشهودة سيمفونية الجرس والأدان كنانة الرحمن أرض الدفا والحنان معشوقة الأنبيا والشُعرا والرسامين صديقة الثوار قلب العروبه النابض الناهض الجبار عجينة الأرض اللى ما تخلطشى العذب بالمالح ولا الوليف الوفى بالقاسى والجارح ولا الحليف الأليف بالغادر الفاضح ولا فَرح بكره الجميل بليل وحزن امبارح ولا صعيب المستحيل بالممكن الواضح كونى مصر دليل الإنسانية ومهدها كما كنتى ديماً من قديم العصر

إيه غير صراخ اليتامى يشدّنا للفرات؟ -محناش صحاب مصلحه ولا احنا كنا اخوات -مالناش ولاد لسه ف سن الجيش -ولا احنا غاويين انتحار -الحرب إيه غير ساحة موات ودمار كثبان رمال وجماجم -إحنا مجرد حلم بالخُضره مضروب علينا حصار الفقر والسخرة ومندورين للهلاك بأمر رب الجنود. يجرى الفرات والنيل ف عكس الإتجاه يجرى ما كانش ليه ف العراق ضفتين ولا نخلتين طارحين وبيت من طين النيل ماكانش هناك بإراده كل الحكاية أُجره أكبر شويه والبحر مهما يفيض يحب الزياده لكن اللى ميت غريب مالوش ديه ولو سألت ابنك يرد عليك:- -لو كان وطن واحد ما كنتش اغيب وكنت أسيب دمى يحّنى الشط على شرط نبقى زى بعض بالظبط ما يكونش واحد غنى وفقرا كُتار. _أموت معاك ازاى وعمرى عايش ميت وعمرى عايش يدوب برقع توب قديم من توب؟ يجرى الفرات للجنوب ويجرى دجله معاه والنيل ف قلب الصحرا عاكس الاتجاه وكأننا مش ولاد بلاد واحده لا حاربنا ف فلسطين ولا غنينا للوحده كأننا جايين من كل حدب وصوب يجرى الفرات للجنوب والطيارات فوقه خايفه يمد إديه يمّتى فيهزنى شوقه ياخدنى هناك أنا المحسوب ف جيش تانى العسكرى المجنون قسمنى على نفسى وغمّانى لا بقيت مع ولا ضد ولا اكتفيت م الضحك ساعة الجد أنا اللى كنت زمان بنيت السد ورفعت راية العروبه حاسس كإنى عبارة عن طوبة ولو انى ديماً بافتح الراديو على نشرة الأخبار

انا مصرى عجيب شّيلت المعزه ولاد الديب عجبتنى القافيه هرشت قفايا فتّحت عنيّه برغم عمايا وعمايا ف رزق اليوم مطلوب ما انا باكل واشرب بالمقلوب من يوم ماتولى الأمر الموت وحكمنى الحاكم بالنبوت ولقيت الفقر بيجرى ورايا رتبت الحال على عكس هوايا أنا مصرى عجيب وعجيب استعجب منى وقال مذلول وبيرقص للزلزال مسكين ومحمل حمله عيال فانقطع الصوت/ واتهد الحيل واتهز الأريال مال ع السور المعزه بتنطح قرن الطور والطور بيميل ويشد الحبل ويرخى الديل والديل دلدول ما هو مش معقول معلول متشال شايل محمول افهمنى ياخال راديو التوظيف قطع الإرسال والشركه سرّحت العمال شطّبت فلوس مستعجب ليه! قرص الطعميه بربع جنيه

اى جمعيه انت عرفهم كتير

موضوع متميز ومجهود يستحق التقدير اخى على المرابط

موضوع رائع وجزاك الله عنا خيرا

أنا جيت لكم مدفوع ومن يومها .. ونا .. تايه ، وببحث عن طريق .. يرجّعني لبداياتي .. وارجع حتّة الطين اللي فيّا .. لـ تاجرة التماثيل ، ويخرج طيفي من سردابكم الضيق .. يفلفص .. للبراح من يوم ما جيت .. والسكة ناصبة لخطوتي مليون شرك ، والخطوة شايلة لسكتي لفّة بارود وتهمتي الأزلية إني غريب .. و ضيف نازل علي أغراب .. لا قابلينيّ علي سريرهم .. ولا سريري بيسلم من خطاياهم دبح الضباب بيننا الرؤي فـ غسلت ننّ عنيّا بشوية تراب ، وعرفت إن مكاني مش بين الرماد .. ولا في الحارات الضّيقة ، وفـ هدأة النفس اللي طهّرها الندي .. طلّقت روحي من حريم الأمكنة .. ( تلت نوبات ) ، وخايف اعصي ربنا .. واعيش معاهم في الحرام ونفسي اسلّم نفسي خالي من الشروخ .. ومن الصدا ، واديني بابحث ( جوّة روحي ) .. عن طريقة للرجوع ما تفكروش اخترتكم دنا جيت لكم مدفوع

محرّكات تفكيرى عطلت … لمّا حتّة لحمة من جسمه " القعيد " .. نطـّت … في عيني ، وامّا " مخّه " …هدّ سور الجمجمة ، و ما عادش فاضل منه غير … لحية ، و عين ، و حتّة من قورته و علامة … للصــــلا ذهنى ابتدا … يرجع لبيته ، و انحنيت .. عالصورة ابوس … دمه اللى بقّع … فوق ملايــة … إحساساتى يا ترى .. مكتوب لى اشوف … موتة " عمر " … لكن فى جسم أحمد ياسين ؟ خارج من الجامع … و لسه ملايكته حواليه ، و لسه الفجر بيعكّز على .. كتف الآدان واما الضمير … زحفت على حيطانه الديدان.. اتحالفت " الشياطين "على … دبح " الملاك " ، دبح " الكسيح " اللى رفض … يمشى على … رجلين عدوّه ما انت يا احمد … كان لابد انك تموت.. عشان تأكّد للوطن … إنك من " الخلفة الحلال " ، و تشيل خطايا اللي احتموا في الخوف ، و تثبت للتاريخ أن الوطن .. ياما ها يقعد في ( الصوان ) .. ياخد في أحبابه ( العزا ) ، و ألف ( رنتيسي ) و ( ياسين ) .. هيسلّموا لبعض الكفن طول ما التتار واقفين على ابواب المدن .. و عروشنا رهن الاحتلال .. و الدم شلال الوطن بس الجميل انك تشوف .. الدم بيخصّب تراب الأرض و بيطرح عيال عيال بطعم الشهد و الموت اللذيذ ، عيال بتصعد للسما بزفة و مواكب و اللى هيراقب سمانا .. يشوف غمامة كبيرة زاحفة على الوطن و عشان كده .. لابد نبحث عن ( مظلة ) لا السحابة .. لسه فيها سنين شتا

مشغولين بالمونديال ونسينا غزة آه ياغزة كل غارة فوق سماكى كل طلقة تسيل دماكى فجرت فى عروقنا دمك كبرت فى قلوبنا همّك كترت ليكى المعزة آه ياغزة إنتى زهرة ف وش ريح قلبك الطيب جريح انتى أمة مستفزة آه ياغزة دباباتهم فوق سريرك لطخوا الدم ف حريرك دبحوا ولادك بلذة آه ياغزة ياللى وقت (الكورة) مابتحقن قلوبنا بدم بارد ابنك المدهش بيكشف صدره قدام البنادق ويداريكى ف ضهره ويقول للدخيل مانتاش معدّى بين شوارعى بين بيوتى مانتاش معدى مهما هاتهدد بموتى مانتش معدى غير على قلبى اللى شايل لك سلاح على جتتى الديناميت على لسانى اللى بيغنى تراتيل الوطن وهامنعك تدبح بلابل فرحتى وتوقف الغربان على نخلى وشوية الدم اللى حيلتى هاغرّ قك فيهم وارفع فى وشـّـك من ضلوعى رماح مانتاش معدى غير على دراعى اللى شايل لك سلاح إلا أرضى، إلا عرضى ، إلا دارى ، إلا شمعة بينخلق من ضلعها فجرى ونهارى لو تقرب من حدودى ، ولاّ هاتهدد وجودى يبقى شيىء واحد فاضللى يا الشهادة يا انتصارى بسم التاريخ بسم العروبة بسم التحدى مانتاش معدى