حكاياتي مع ولادي

[سجده 45]

في يوم چني بنتي رجعت من المدرسه معاها الظلط دا و بتقولي صحبتي قالتلي "إتمنّي بيهم"

- يعني إيه يا چني

يعني نحطه في إدينا كدا و نقول نفسنا في إيه هيتحقق

- أيوا يا چوچو بس أحنا متعلمناش كدا أحنا إتعلمنا أن ربنا هو اللي بيعطي و هو اللي بيمنع و شرحنا يعني إيه الرزاق
و لما بيكون نفسنا في حاجه بنعمل إيه؟

- بندعي ربنا كتير و بنصلي و نسجد و نعمل الحاجات الصح اللي توصلنا للحاجه دي و لو هي حاجه حلوه ربنا هيكرمنا بيها

صح،، فاكره نور لما كان عايز لعبه عملنا إيه؟

-أه نور طلب اللعبه منكم و كان بيصلي و يدعي ربنا كتييير أن تجيبي اللعبه و ربنا استجاب لانها حاجه حلوه و خالو أحمد جابله اللعبه

تمام يبقي أحنا لازم ندعي و نطلب من ربنا مش من الظلط ياچني،، الظلطه دي متقدرش تعمل أي حاجة مينفعش نتمني و نستعين بالظلط
نستعين بمين يا چني؟؟
- بربنا

صح،، عشان كده بنقول في الصلاه "إياك نعبد و إياك نستعين"

-خلاص يا ماما تمام

لسه في حاجه كمان،، لازم تفهمي صحبتك و تعلميها ان...

-لا قوليلها إنتي

ليه
-كدا انا هتكسف

بصي أنا معرفهاش و هي ممكن تتكسف مني أو تخاف
أنتو أصحاب و لازم تعلمي صاحبتك الصح ذي ما اتعلمتي،، اتفقنا
-خلاص ماشي هقولها "مينفعش نطلب و نتمنى من الظلطه هي مش هتعرف تعملنا حاجه لازم ندعي و نطلب من ربنا و....
شطوره يا چني 

---------
خدو بالكم من أولادكم و من الأفكار المتداوله بين الاصحاب
أنا حقيقي إتصدمت الكلام دا ألف باء عقيده لازم تترسخ في الاطفال من الصغر
الامر مش هين،، اللي بتطلب من الظلط دلوقتى يحقق طلب أو أمنيه بكره تطلب من الحسين و السيده الزوج و الولد
علموا اولادكم ان تنه و رنه مش مسؤله عن نزول المطر و ان الجنيات مش بتلون ورق الشجر
علموهم ان الله هو الخالق الرزاق،، علموهم عقيدة صح

علموهم ان قوة التنين و سبايدرمان مش من صنعهم انما هي منه من الله، علموهم ان فتايات القوة ليست من صنع السكر و البهار و ان الله هو الخالق
علموا اولادكم ان رابونزل مينفعش تثق في يوچين و تتخذه صديق مهما كانت ظروفها و حتي لو كانت تبحث عن الحقيقة
بنتك طبيعي تتمرد و تشعر برغبه في المغامرة او تشعر إنك أم شديدة حازمة بقدر زائد

فمتزعليش لما تشوف نفسها رابونزل ام شعر ذهبي و هتلاقي ١٠٠ يوچين عالباب
علموهم ان ربنا قال "ولا متخذات اخدان"

علموهم قبل فوات الاوان

#علموهم_عقيدة_صح
 

تم تعديل July 2, 2020 بواسطه سجده

[عاشق الصداقه 525]

ربنا يحفظك ويجزيكي خير يا أم جنى ويخليلك الأمورة جنى يارب ويجعلها من الصالحات.

من زمان كان بيختلف معايا بعض الأصدقاء لما كنت بقول إن أفلام الكارتون فيها شركيات كتيييييير (مقصوده) ومقصود بيها عقول أبناءنا من الصغر، سواء الجنيات أو سبايدر مان أو البلوة الكبيرة إللي اسمها هورتون وإللي قصة الفيلم كله إن البطل فيها بيطرح نظرية ويؤمن بيها ويثبتها والكل يؤمن بيها بعده إن فيه عالم كبييييير بيعيش على كل ذرة صغيرة وإحنا لو معانا عدسة ضخمه هنشوفهم فوإنتي ماسكة ورده صغيره فإنتي إللي بتتحكمي في العالم ده تغطي الورده بإيدك فيبقوا ف ضلة، ترفعي إيدك فيبقوا ف صيف، تنفخي ف الورده تقوم عندهم عواصف وهكذا ..، وبيأكد ويذكر بوضوح إن إحنا كمان فوقينا عالم كبييييير مليان ناس وإن إحنا عايشين على ذرة بيتحكم فيها أي حد بقى تيجي ف إيده وغيرنا عوالم تانيه عايشين على ذرات كتييير بيتحكم فينا وفيهم ناس عادية لكن أكبر حجماً زي مثال عالمنا والذرة إللي ع الورده ..

وأمور لا حول ولا قوة إلا بالله ... الكلام ده لو سمعوا حد كبير هيبقى فاهم وعارف وممكن مياخدش باله أو ياخد باله ويقول أستغفر الله العظيم، إنما الطفل الصغير إللي لسه عقله بيتشكل، معرفوش يلعبوله على إن مفيش خالص بيتحكم، وإن لازم يكون فيه سببية لوجودنا والتحكم في أحوالنا، فيلعبوله من الصغر بقى ف إن فيه سبب لكنه مش إله، ناس عاديه ممكن توقع انت ف أي حد منهم وووو، بل ممكن تبقى انت بتتحكم في مصير عالم كامل ف ذرة على إيدك، كإنك إله.

إللي أنا عملته مع أختي الصغيرة (لأني عارف إن مش الحل انها متسمعش أفلام كارتون لأنها كده كده هتسمع) ، أنا نفسي بسمع أفلام كارتون كتييييير جداً يمكن كلها، فإللي عملته إني فهمت أختي الصغيرة كويس جدا جدا جدا وكل فترة بعيد وأكرر، فخليت فيه (فلتر) ف دماغها مش أي أفكار تطرح عليه يقبلها، بل على العكس بقت بتاخد بالها وهي تسمع أي فيلم كارتون فين الجزئية إللي حاطينها علشان يلعبوا ف دماغنا، فوهي بتشوف فيلم كارتون تلاقيها بتوقف عند حته وتقولي دي مخالفة للدين حاطينها اليهود والملحدين دول صح! أقولها بالظبط.
فجزاكي الله خيراً لتوضيحك الموضوع ده وربنا يحفظ أبناءنا وبناتنا.