ماما هو إحنا ليه بنموت؟

[سجده 44]

نازلين الحضانة و قاعدين بنسرّح في أمان الله و مفيش حاجة شغلانا غير خناقة سندوتشات كل يوم و إذ هووووب..
-سجدة: ماما هو إحنا ليه بنموت؟!! 
=بصي يا سوجي في الدنيا في ساعات حاجات بتضايقنا مش كل حاجه في الدنيا حلوة يا سجدة.. فإحنا بنموت علشان لما ندخل بعد كدا الجنة في الجنة بقي كل حاجة حلووووة و جمييييلة.. في الجنة مفيش أي حاجة هتوجعنا.. في الجنة محدش هيموت و يفارقنا.. في الجنة محدش هيعمل حاجة تضايقنا.. في الجنة مفيش أي حاجة مزعجة.. في الجنة هنشوف النبي في الجنة كوووووول الحاجات جميلة😍
ربنا بقي أعطانا وقت نعمل حاجات حلوة صلاة و صوم و صدقات و الوقت دا اسمه العمر 
في حد عمره بيكون 6سنين في حد 60 سنة و لما العمر اللي ربنا أعطاه له بيخلص ساعتها بيموت 

-يعني كلنا كلنا هندخل الجنة؟ 

*الله أكبر دي ناقص تسألني عن شرين أبو عاقلة
=بصي يا سوجي ذي ما في ناس بتعبد ربنا و بتحبه في ناس مش بتعمل كدا فمينفعش بعد كدا يقولوا عايزين ندخل جنة ربنا.. إزاي بقي و هما مش بيعبدوه!! 
يعني ينفع ماما تقولك مثلاً يا سجدة لو سهرتي انت كدا بتضري صحتك فانت تقولي لا انت مش مامتي أصلاً أنا مامتي واحدة تانية و متسمعيش الكلام و بعد كدا تقولي انا عايزة ماما تحبني و تجيبلي حاجة حلوة؟ 

- لا يا ماما عيب

= و لله المثل الأعلى تخيلي بقي في ناس بتعند كدا
و في ناس ربنا بيقولنا على عبادات و طاعات بشكل محدد و هما بيعملوا حاجات تانية و بيقولوا كدا احنا بنعبد ربنا صح فهيدخلوا جنة ربنا إزاي!! 

-طيب هو لو فى حد نسي يقرأ قرأن و يمسح على جسمه قبل ما ينام أو مثلاً الشيخ قال في المسجد صلوا على النبي و هو مش قال عليه الصلاة والسلام كدا هيدخل الجنة؟ 

* ما شاء الله البنت نبيهة لأمها 😂خلصت عقيدة و داخلة فقة سنن و واجبات في تسريحة واحدة 😐
=طيب.. في الجنة يا سجدة في مكان جميييييل أوي أوي و في مكان جميييييل أوي أوي أوي أوي خاااااااااااالص خالص فاللي معاه حسنات كتير بيدخل المكان الجميييييل و اللي معاه حسنات اكتر بيدخل المكان الأجمل خاااااااااااالص خالص 
يعني انت دلوقتي لو اخدتي مصروف نص جنية هتجيبي بيه إيه؟ 
-هجيب لبانة واحدة بس 
=طيب لو عايزة تجيبي كيس شيبس كبييير تحتاجي كام فلوس؟ 
-كدا لازم يبقي معايا 10ج 
=تمام انت بقي لازم يبقي معاك حسنات كتتتتتر عشان ربنا بكرمه و فضله يكرمك بأجمل مكان في الجنة.. عارفة اسمه إيه؟ 
اسمه الفردوس الأعلى.. فكل واحد عنده حسنات يدخل بيها المكان اللى على أد الحسنات دي و كلها جميلة برضو 
فاحنا لازم منضيعش حاجة ممكن ناخد منها حسنات ذي ما قولتي كدا مثلاً الصلاة على النبي.. احنا كمان ممكن نقول اللهم صلِّ وسلم على نبينا محمد من غير ما الشيخ يقول صل عالنبي عشان ناخد حسنات اكتر و بيتنا فى الجنة يكون أجمل 
-فهمتي يا سوجي؟ 
=أه هنعمل حسنات أكتر عشان ندخل المكان الأجمل في الجنة هاتي المصروف بقي عشان اجيب الشيبس☺️