الجندى المجهول 37 قام بنشر August 24, 2009 ((ليلة الرؤية)) يوم تسعة وعشرين شعبان نتطلع لهلال رمضــــــــــان لجهاد النفس الأمـــــــــارة وعطايا البر الحنــــــــــــان نتطلع....... لستاير الرحمة المرخيـــــة لليالي الغفران الجـــــــــاية لنسايم جنة رضـــــــــــوان واتذكر......... واتذكر ف اليوم دا حاجات لو اقولها أحتاج لساعـــات بالـذات وانا طفل صغيـر ف شارعنا تعاليق ورايات وتهاني ولا يوم العيـــــــــد الكل سعيــــــد والخلق قلوبها بتتعــــــانق الناس م الفرحة بتتســـابق وبتتمنى......... واهو مر العام وبتســــــــتنى الغايب برجع ويعــــــــاود يا مراود....... يا مراود بالكحل اتوصـــــى يا عيون للسما طلى وبصى دا عزيز ومفارق من مــــدة والليلة ح يظهر ويبـــــــــان يوم تسعة وعشرين شعبـان واتذكروانا طفل صغير كان ليه اصحـــــــــاب من سني أو يمكن أكبر أو أصغر منى بشوية ف العصرية نتغدى ونخرج للشارع عند الجامع ونقابل عم الشيخ رمضان نسأله ح تسحر م الليلة ويقول جايز بالطبلة أنا جاهز ما اتأخر والفايز منا يقول اسمه لما يسحر روحوا دلوقتى يــــــــا أولادي وان هل ح جلكم ف ميعادي دنا أكتر منكم متشوق والطبلة كمان يوم تسعة وعشرين شعبان نرجع قوام قبل الغروب .... قبل المسا .... والشمس ماشية مروحة ومفرحة قلب الولاد ساعة ما ييجى الأب ومعاه الفانوس ع الأيد نبوس شكر وأدب حب وتعود م الصغر والأم تاخد عن إيديه كيس الياميش ينسى التعب لما يطل ف وشها يلقى العينين بحرين حنان ترفع إيديها لربها تدعى بسعة الرزق وبطول الأجل واحكلكوا إيه اللي حصل لما المذيع ف الراديو قال هل الهلال شلال وفاض ع المسلمين مين ف الأهلة يشبهك..ما تقولي مين؟ شهر التجلي والمنح والعبرة مش مسك السبح العبرة تقوى ف القلوب يا عاصي توب وابدأ من الليلة الجهاد رب العباد باسط إيديه بالمغفرة ف كل وقت وكل حين ما توحدوه يا مسلمين ما توحدوه يا مسلمين ما توحدوه يا مسلمين شارك هذه المشاركه رابط المشاركه شار ك علي موقع اخر
