موقف حدث معى اصابنى بالحيييره

[حياتى من اجل ربى 22]

موقف حدث معى

زى ما انا عدوتكم دايما ان اى حاجه بتحصل معايا وبحس انها مفييييده

بأجى على طووول احكيها لاخواتى اعضاء بيتى الثانى ومنتداى الغالى ياللاياشباب

 

 

كنت فى معرض عندما قابلتنى ((سائحه برازيليه ))

ابتسمت لى لتلمح لى انها تريد الحديث معى

فتكلمت معاها وبدت سعيييده للغايه

((وانا بصراحه مش عارفه ليه))

وبعدين قالت لى :: انا احب ما تلبسينه كثييييييرا ((النقاب)) وحاسه ان انتم مبسوطييين اوى

وانتم لابسينوا

انا استغربت جداااااااااااااااا

قولتلها انتى مسلمه

ردت ::لالالالا انا مسيحيه ((كاثوليك))

قاتلى انا معجبه بالاسلالالام جدااا ومعجبه باللبس اللى بتلبسوه جداااا

الا ان فيه حاجه انا حاسه انكم بتكرهوا بعض

 

بنكره بعض ؟؟؟؟؟؟

ازاى يعنى؟؟؟؟؟؟

 

قالتلى ::انا لما بمشى وخصوصا فى مصر بشوف اتنين متجوزين هو ماشى قدام وقرفان اوووى

وهى ماشيه بعيييد اوى عنه

ليه هما مش بيحبو بعض مع ان

احنا بنعتبر ان ميثاق الزواج ده عندنا عظييم اوى ولازم نكون فيه جنب بعض دايما

مهما كانت المشاكل

ليه انتم مش بتحبو بعض

اصل الموقف ده بشوفو تقريبا على طوول

 

 

طيب ارد اقولها ايه ؟؟؟؟

 

طبعا انا قولتلها مش عارفه بس احنا بنحب بعض وبنحترم هذا الميثاق جداااا

وانهت هى الكلام

فرصه سعيده ان قابلتك واتمنى من الاله ان يرعاكى

 

بس

 

امر قد لا يخطر لنا على بال ولكنه اثر فى تلك المراه كثييييييرا

مع انه من هديه صلى الله عليه وسلم

((رفقا بالقوارير)).....اى رفقا بالنساء

((لا يكرمهن الا كريم ولا يهن هن الا لئيييم))

 

 

 

كتبت هذا الموضوع علشان النقطه دى على طووول كنت باخد بالى منها

ان اى اتنين وهما مخطوبين ماشين مع بعض وماسكين ايد بعض

انما اول ما يتجوزاا

متعرفش بيحصل ايه

تلاقى فيه تنافر عجييييب

هو ماشى فى اخر الشارع وهى ماشيبه فى اول الشارع

والاطفال تلاقيهم بيلعبو فى شارع تانى خالص

 

 

مع انك لو لقيت اتنين اجانب ماشين مع بعض ((مش لازم شباب مهما كانو كبار ))

بتلاقيهم ماشين ماسكين ايد بعض على طوول تحس انهم فعلا حاجه وااحده

 

علشان كده عرفت ان اى شئ امر بيه حبيبنا محمد صلى الله عليه وسلم اكيد فيه فايده

عظييييييييمه لينا

بس احنا بس ننفذواا

 

منتظره تعليقاتكم على الموضوع

 

شكرا لكم

 

تم تعديل November 1, 2009 بواسطه حياتى من اجل ربى

[نودي 41]

تحياتي لاحلي حياتي

بصي ياستي مرة كنت قاعدة كده في مجلس حريمي شوية وقعدت كل واحدة تحكي عن ذكرياتها شوية عن مرحلة الخطوبة وبعدين مرحلة الجواز وبعدين مرحلة الاطفال كلهم اجمعوا اني احلي فترة فترة الخطوبة واول ايام الجواز بعدين بيحصل اللي قولتي عليه رغم انهم اكيد بيحبوا بعض برده

بس ياتري هو العيب في مين العيب في الراجل ولا الست ولا الاتنين مع بعض

ايه اللي وصلنا لكده مش عارفة

ميرسي خالص ليكي ياحياتي وتقبلي مروري المتواضع

[ديدو 3]

الموضوع اللذيذ دة انا بشوفة دايما مع ناس وكمان مع بعض أصحابى علشان مظلمهموش كلهم

الواحد يكون في فترة الخطوبة بيتمنى اليوم اللى هيخرج فية مع خطيبتة ويبقى ماشى فى الشارع مبسوط اوى وجنب بعض وفى اهتمام بيها غير عادى , دا غير الاتصالات اللى بتكون كل 3 ثوانى تقريبا وكلها فى كلام فاضى ومش مهم , ولما يكونوا ماشيين فى الشارع ويقفوا يتفرجوا على محل ملابس حريمى , قبل ماخطبتة تفكر فى حاجة عجبتها بيكون اشترها ودفع حسابها مع البقشيش للعامل , انما بعد الجواز لو ماشين مع بعض فى الشارع بيكون الشكل الطبيعى هو قدمها ب 2 متر وهى وراه , وياسلام لو صدفت وشافت نفس المحل اللى اشتروا منة فى فترة الخطوبة تقف قدام المحل وتقولة الله البتاعة دى حلوة اوى وهو ولا هنا تتكلم تانى وتقولة الله دا فى تخفغيض كمان عليها , هو يطلع الموبايل ويعمل انة بيكلم حسن صاحبة ومشغول معاه جدا وهو مفيش حد بيكلمة

والا بقى لو معندهوش عربية وخرجوا مع بعض بعد الجواز وهما مروحين تفتكر انة هيعمل زى ما كان بيعمل فى فترة الخطوبة كان لما يحبوا يخرجوا كان بيأجر سيارة مخصوص رايح جاى علشان بهدلة المواصلات , هى فاكرة كدة ياعينى انما تلاقيه هو يقولها يلا علشان نركب الاتوبيس اصلهم بيقولوا الاتوبيسات اتطورت جدا وبقت فاضية ونظيفة !!!!!

ياعنى دا بعض اللى بيحص قبل الجواز وبعد الجواز انما مش كل الشباب كدة , وبرضوا البنات بتتغير من فترة الخطوبة لفترة مابعد الجواز

وبيكون تغير فظيع ملهوش لازمة الكلام فية علشان محدش يزعل منى اصلى شوفتة بعينى مع ناس أصحابى وخلونى كرهة الجواز وسدو نفسى ...

ههههههههههههههههههه

شكرا حياتى من اجل ربى

وأسأل الله أن يصلح أحوالنا جميعا

[حياتى من اجل ربى 22]

نودى

 

ربنا يكرمنا يا حبيبتى ويسترها علينا بجد

بس عارفه بقى مامتى بترد رد ديمقراطى جداااا

بتقول ان كل مرحله وليها حلوه ووحشها

ليها الحلو اللى بيصبرنا على الوحش والوحش اللى من غيره مش هنحس بالحلو

 

 

جزاك الله خيرا حيبيتى

سعيييييييييده ان تكونى اول من رد على موضوعى

ربنا يكرمك ويحقق لك كل ما تتمنى

 

 

ديدو ((كابتن المنتدى))

 

 

طبعا سعييييييييده جدااااا انك رجعت تانى تشارك معانا

ربنا يكرمك يارب ويقق لك كل ما تتمنى

ويرزقك بزوجه صالحه مش تعمل الحاجات اللى انت بتحكى عنها دى

ولا انت كمان يعنى اكييييد

ربنا يكرمنا ونبقى احنا ((شباب ياللاياشباب)) خير مثال لخير امه قائدها خير الانام

محمد صلى الله عليه وسلم

فى طريقتنا وفى تفكيرنا وحتى فى حياتنا العاديه

علشان نعدل حتى الفكره الوحشه اللى اخدها عننا اى حد

 

 

 

احترامى وتقديرى لك كابتن

وربنا ييسرلك كل خير يااااارب

[dr_mido 53]

 

بسم الله الرحمن الرحيم والصلاة والسلام علي أشرف المرسلين سيدنا محمد وعلي آله واصحابة أجمعين .. أما بعد ..

موضوعك بسم الله ما شاء الله جميل جدا جدا

أولا أحب أن أعلق علي نقطة وهي أن الأجانب المتزوجين بيكون ماشين مع بعض ويمسكو أيد بعض فهذا المفروض أن يكون من تطبيقات الأسلام وبصراحة معظم الغرب يقومون بتطبيق الإسلام وهم لا يعرفون إنه من ضمن الأسلام ومنا من يعرف تطبيقات الأسلام الصحيحة ولكن لا يطبقها في بعض الأوقات

وهذا لمقولة الأمام محمد عبده "وجدت هناك اسلاما بلا مسلمين، وأجد هنا مسلمين بلا اسلام"

فهم عندهم يقدرون الميثاق أي الزواج كما نقدرة نحن لكن هم يحافظون علي هذا التقدير والحب والأحترام المتبادل بين الزوجين

وهنا في دولنا العربية عامة نقدر الميثاق والزواج لكن لا ندوم المحافظة عليه إلا من رحم ربي من المسلمين

 

أما ثانيا إن أحنا لو قمنا بتطبيق الإسلام كما يجب أن يكون فسوف نصبح أرقي وأعظم شعوب في الأرض وهنتغلب علي كل شئ

وتبقي مقولة الرسول صلي الله عليه وسلم "تركت فيكم ما إن تمسكتم به لن تضلوا بعدي أبدا كتاب الله وسنتي"

 

ومن ثم مقولة مايكل هارت التي أعجبتني جدا وهي"لو كان محمدا موجودا الأن لحل مشاكل العالم وهو يرتشف قهوة الصباح"

 

فهذا يدل علي أن الأسلام دين الحق ودين القيم والأخلاق الكريمة ودين السلام

 

 

وأخيرا أود أن أقول لكي جزاكي الله كل خير أختي في الله (حياتي من أجل ربي) علي موضوعك الذي أتاح لنا الفرصة علي التحدث في بعض الأشياء عن أمور الإسلام

وفقنا الله وإياكي إلي ما يحبه ويرضاة إن شاء الله

 

أخوكي في الله

 

dr_mido

 

[ali desoky 391]

اختي (حياتي من اجل ربي)

 

دائما ما تاتي لنا بكل جديد وايضا مفيد

 

مواضيعك دائما ما تفتح مجالا واسعا للمناقشه

 

 

 

نعم هناك اختلاف كبير لدينا بين مرحلة الخطوبه ومرحلة الزواج

 

واؤيد بشده راي والدتك الكريمه من حيث ان لكل مرحله ولها طبيعتها المميزه

 

 

خلونا نتكلم بصراااحه ......

 

ليه التغير الكبير في لغه التخاطب بين البنت والولد

 

قبل الجواز حاجه وبعد الجواز حاجه ؟

 

ليه بنلبس أقنعه وبنخلعها بعد الجواز؟

 

ليه بنوعد وبنحلم وبعد الجواز بنخلف ونموت ؟

 

ليه كل حاجه بتموت بعد الجواز ؟

 

ليه الراجل لما بيمتلك حبيبته بيفقدها اجمل ما تحلم به وهو إحساسه بإهتمامه وحبه وعطفه ؟

 

 

تعالوا نشوف ادم بية وعمايلة قبل الجواز وبعدها

 

 

قبل الجواز تلاقى الراجل من دول منتهى الرومانسية كلام كلة قصائد شعر

 

 

يا حبيبتى يا عمرى يا حياتى والكلام اللى عرفينة دا وكل شوية اتصال انا حبيبتى مش بشبع من صوتك

 

 

امتى هنبقى مع بعض طول العمر وياسلام لو خارجين مع بعض تلاقية ماسك ايديها كانها هتتخطف منة جوز كناريا ياخواتى

 

والابتسامة طبعا مش بتفارق وشة بتاتاااااااااااااااااا

 

وكل شوية هدية سواء فى مناسبة ولا لاء وتقولة هتفضل تحبنى يقولها لاخر يوم فى عمرى يا حياتى

 

والبنت تقول انا اسعد انسانة انى عرفتك وحبيتك متعرفش اللى فيها المسكينة

 

 

 

 

 

 

000000نشوف بقى بعد الجواز 00000000

 

 

طبعا لسة الاستاذ عايش دور الرومانسى يوم اتنين اسبوع شهر والمستخبى يبان تظهر المواهب

 

 

كلمة حبيبتى مش نسمعها غير فين وفين دا لو افتكر يقولها اصلا

 

الاستاذ داخل مكشر خارج مكشر وياسلام لو قالت عايزة اشترى حاجة يا نهار يطلع فيها كانها ارتكبت جريمة

 

كل شوية حاجة انتى مش بتزهقى

 

يرجع من الشغل وهو لسة على الباب الغداء يا هانم وبعدين يدخل ينام يصحى يقعد قدام التلفزيون

 

ويا اما قدام التليفزيون يا نايم ده حاله فى البيت

 

 

وياسلام لو فية ماتش تلاقى البيت اتقلب استاد ولو شافها قدامة ممكن يحدفها باي حاجة قدامة

 

ولو اتكلمت معاة يقولها اسكتى شوية انتى مش بتزهقى وكان زمان يتمنى منها كلمة واحدة بس

 

نجى بقى لو خرجو مع بعض تلاقية سابقها بعشرين متروالكلام يا عينى هو يوم باين من اولة

 

امشى يا هانم وابقى اعمليها بعد كده اول واخر مرة نخرج فيها

 

 

تقعد المسكينة وتندب حظها وتقول كان يوم اسود يوم ما شفتك ياريتنى كنت اتعميت قبل ما اشوفك

 

 

وكمان الزوجه عليها مسئوليه فيما يحدث

فالزوجه تنسي اي شيء يتعلق بزوجها بل انها تنسي اصلا انها متزوجه

وتتفرغ بكامل طاقتها لكل ما يشغل تفكيرها بعيدا عن زوجها

بداية من المطبخ والنظافه والاكل وزياره الاهل و و و و

اذن فالمسئوليه مشتركه ولابد من ايجاد حل من قبل الزوجين لوضع ميثاق للتفاهم الزوجي

 

 

عذرا علي اطالتي

جزاك الله خيرا اختي حياتي من اجل ربي

[بنت مصرية 66]

الموقف اللي حصل معاكي ده ياحياتي غريب وجميل

مش ملاحظة دايما ان بتحصلك مواقف غريبة

بس بجدجميل ورائع

والنقطة اللي بتتكلمي عليها مهمة جدال جدا

وجبيت اقرا ردود الأعضاء بعناية علشان اشوف الآراء

وتقريبا الناس متفقة علي ان فترة الخطوبة حلو وبعد الجواز بيتقلب الحال 360درجة

عاجبني رأي ابشروا جداجدا

لان عندها حق

ليها الحلو اللى بيصبرنا على الوحش والوحش اللى من غيره مش هنحس بالحلو

وهي بكدا لخصت الحوار كله

بس انا هضيف حاجة كدا

الموضوع كله يكمن في تفهم الوضع

والتمسك بالشريعة الإسلامية

والله بجد ربنا يبارك في دهجدا جدا

انا مرة سمعت محاضرة جميلة جدا اعتقد ان المحاضر كاندكتور حازم شومان

وبيتكلم عن فترة الخطوبة

عايزة اقلكم ان من كتر اللي قالوا في المحاضرة واهمية فترة الخطوبة

انا حصلي نغير جامد في تفكيري

فترة الخطوبة المكالمات اللي ملهاش لازمة والخروجات اللي ملاهاش لازمة ونظرة فابتسامة فموعد

والحركات ددي

كلها امور لاترضي الله عز وجل

واكيد ربنا مش هيبارك لحد عصي امره

يعني مايبقوش فاتحينها علي البحري في فترة الخطوبة وبعد الجواز يقولوا ايه اللي حصل

اللي حصل ان انتم ربنا رفع البركة والرضا من قلوبكم

والله العظيم الكلام اللي بقوله ده حقيقي جدا

وممكن تسألوا ناس كتير في الموضوع ده بس يكونوا تابوا لربنا ورجعولوا

اسالوهم ايه التحول اللي حصل في حياتهم

بالنسبة للأجانب مش كلهم سعداء كدا زي ماحن افاكرين

والاي سعيد منهم ده لان ربنا يمتعهم قليلا في الدنيا ولايدورن ماينظرهعم في الىخرة

لكن لان احنا ربنا بيحبنا واحنا امة محمد الامة التي وحدت بالله ولم تشرك به احدا

بيحبنا لدرجة انه مش بسيبنا نعيش في الدنيا مرتاحين

علشان مانبعدش عن ربنا وننسي يوم البعث

الحل في الشريعة الإسلامية ثم يأتي ككل شيء تباعا

حبيبتي حياتي من اجل ربي

موضوعك جميل جدا ومؤثر كمان

ورائع ومفيد وانا متاكدة مكن ده

ربنا يبارك فيك ويكرمك بكل خير ويعطيك ماتتمنين وبينور طريقك ويفرحك

ويرزقك خير رزق في الدنيا والآخرة

اسال الله الذي جمعنا في دنيا فانية ان يجمعنا في جنة خالدة

اللهم آمين

احبك في الله

واسفة علي اطالتي

[حياتى من اجل ربى 22]

دكتور ميدو

 

جزاك الله خرا دكتور

رد فى منتهى الروووووووعه

لو كان محمدا موجودا الأن لحل مشاكل العالم وهو يرتشف قهوة الصباح"

 

عجبتنى الكلمه دى اووووووووى

فعلا ماشاء الله عليك

ربنا يزيدك

ويهدي بك

ويكرمك الى ما يحب

ويحقق لك كل ما تتمنى

 

 

اخى على دسوقى

صاحب قضايا الشعب التعبان

 

ليه بنلبس أقنعه وبنخلعها بعد الجواز؟

 

ربنا يهدينا جمييييييييعا يارب

ومش نعمل احنا كمان كده

ونكون خير امه يارب كما اوصانا حبيبنا صلى الله عليه وسلم

جزاك الله خيرا اخى

احترامى وتقديرى لرايك

وفرحانه خااالص دى اول مره ترد عليا رد طويل تقول فيه رايك بالاستفاضه :47_47:

اسال الله ان يجعل كل ما تكتب فى ميزان حسناتك

 

 

بنوته حبيبتى

 

داااااااااااااائما ردودك رائعه وجميله وعاااااقله وكلها حكم والله

عايزه اقولك يا بنتوته

((انتى خساره فى البلد دى))

 

بس بجد ممتااااااااااااز

جزاك الله خيرا

يعني مايبقوش فاتحينها علي البحري في فترة الخطوبة وبعد الجواز يقولوا ايه اللي حصل

 

جاااااامده دى

 

ياااااااااااااااااااااارب يا بنوته

اسمع عنك كل خير قريب

ويحقق لك كل ما تتمنى

وربنا عاااااالم باللى فى قلبى

[«۞۩ أبو سليمان ۩۞» 179]

السلام عليكم و رحمة الله و بركاته

 

جزاكي الله خيرا ,,, اختي حياتي من اجل ربي

 

بجد موضوعاتك ,, بسم الله ما شاء الله .. جميلة جدا و تمس قضايا مهمة جدا في حياتنا

 

و قضية الحب بين الازواج بعد الزواج .. دي قضية مهمة جدا جدا بجد

 

مننكرش ان هناك نماذج موجودة حتى الان بسم الله ما شاء الله جميلة جدا .. يوجد فيها الحب بين الازواج بصورة رائعة و نتمنى لهم استمرار الحب ده ديما

 

رأيي ان سبب ان الحب ده بدأ يتلاشى و ينقرض بين الازواج عشان سببين

 

الاول :

 

سوء الاختيار الصحيح من الاول بين الزوجين ..

 

يعني لو الشاب ينفّذ هدي الرسول صلى الله عليه و سلم في اختيار الزوجة الصالحة و يتبع احاديث الرسول صلى الله عليه و سلم و هي كثيرة جدا مثل

قال النبي صلى الله عليه وسلم " تنكح المرأة لأربع : لمالها ، ولحسبها ، ولجمالها ، ولدينها ، فاظفر بذات الدين تربت يداك "

فالظفر بذات الدين هو تمام المنى

 

عن ابن عباس عن النبي صلى الله عليه وسلم قال: (نساؤكم من أهل الجنة الودود الولود العئود على زوجها، التي إذا غضب جاءت حتى تضع يدها في يد زوجها وتقول: لا أذوق غمضاً حتى ترضى!) أخرجه النسائي وغيره

 

فعلى الشاب ان يختار في زوجته صفة الود و الحب و ان تكون مثال للطاعة في رضى الله

 

و لكن للأسف الايام دي كتير من الشباب ينبهر بالمال و الحسب و الجمال على حساب الدين و ده هو قمة الخطأ

 

طبعا الافضل ان تضم المرأة اكثر من صفة من الصفات دي و لكن يجب يكون الدين اولها و بعد كده يأتي الباقي

 

كما ان اهل العروسة او البنت بقوا ينظروا الى العربية الدفع سباعي ( اذاي معرفش)و الشقة اللي عشر اوض و موش عارف شاليه على المريخ و كلام غريب كده ..

 

و نسيوا ان يهتدوا بهدي الرسول صلى الله عليه و سلم

قال صلى الله عليه وسلم: " إذا جاءكم من ترضون دينه وخلقه فزوجوه إلا تفعلوه تكن فتنة في الأرض وفساد كبير " رواه الترمذي وغيره.

اللي يقرأ الحديث بس لازم يركز على (إلا تفعلوه تكن فتنة في الأرض وفساد كبير) و هو ده اللي بيحصل دلوقتي للأسف

 

السبب التاني

 

سوء المعاملة بين الزوجين في البيت

 

نجد كتير من الزوجات لا يطيعو ازواجهم .. بسب و من غير سبب .. على الرغم ان طاعة الزوج أمر إلهي .. فعمل المرأة لا يقبل الا بطاعتها لزوجها ... تخيلوا .. (كم زوجة تعرف المعلومة دي)

 

قال رسول الله صلى الله عليه وسلم: (اثنان لا تجاوز صلاتهما رءوسهما: عبد أبق من مواليه حتى يرجع، وامرأة عصت زوجها حتى ترجع) رواه الطبراني بإسناد جيد

 

رضى الزوج سبب في دخول الجنة

 

قال رسول الله صلى الله عليه وسلم: (أيما امرأة ماتت وزوجها عنها راض، دخلت الجنة!) أخرجه ابن ماجة والترمذي

 

طاعة الزوج تعادل الجهاد

 

امرأةً جاءت إلى الرسول صلى الله عليه وسلم فقالت: (أنا وافدة النساء إليك، هذا الجهاد كتبه الله تعالى على الرجال فإن أصيبوا أثيبوا -أي: أجروا- وإن قتلوا كانوا أحياء عند ربهم يرزقون، ونحن معشر النساء نقوم عليهم، فما لنا من ذلك الأجر؟ فقال صلى الله عليه وسلم: أبلغي من لقيت من النساء أن طاعة الزوج والاعتراف بحقه يعدل ذلك)

 

و كمان الرجل .. يبقى عامل فيها سي السيد و يشخط و يزعق و موش عارف ايه .. فاكر ان دي الرجولة .. و ده ابعد ما يكون عنها

و لم يقتدي بهدي النبي صلى الله عليه و سلم

 

قال عليه الصلاة والسلام: {رويدك بالقوارير }

 

و قال [ استوصوا بالنساء خيرًا ، فإن المرأة خُلقت من ضِلعٍ ، وإن أعوج ما في الضلع أعلاه : فإن ذهبت تقيمه كسرته ، وإن تركته لم يزل أعوج فاستوصوا بالنساء ] فيرحم ضعفها ، ويكرمها فإن في إكرامها إكرام لنفسه ، ويصبر على أذاها [وإن كره منها خُلقًا رضي منها آخر] " رواه مسلم

 

ويقول صلى الله عليه وسلم [ "خيركم خيركم لأهله وأنا خيركم لأهلي"]

 

 

فلنهتدي بنبينا و نطبق الدين على انفسنا .. نعش امد الدهر في سعادة و هناء ان شاء الله

 

بجد الموضوع محتاج كتب يتكتب فيها موش مجرد رد .. جزاكي الله خيرا اختي حياتي من اجل ربي

 

رزقكي الله سعادة الدارين

ربنا يرضى عنكي و رسوله

بارك الله فيكي و اعزكي اختي و رزقكي الهدى و التقى و العفاف و الغنى

 

 

آسف جدا جدا على الاطالة

[عاشق الصداقه 525]

أختى (حياتى من أجل ربى) صاحبة أثمن موضوعات بالمنتدى ،،

 

جزاكى الله عنا كل الخير ،،

 

أما عن الموضوع الذى تناقشينه - فإخوانى كفوا وأوفوا ،، ولن أكتب أفضل مما كتب - فماشاء الله .. إجتمع بالموضوع وناقشه مجموعه من خيرة شباب المنتدى الذين يعلموننى من ردودهم وموضوعاتهم الكثير

 

فقط سألفت النظر لنقطه لم يلتفت اليها أحد ،، ربما تكون بعيده نوعاً ما عن إطار الموضوع ،، ولكنها أكثر ما لفت إنتباهى به ..

 

(النقاب) - أختى الكريمه العفيفه (حياتى من أجل ربى) - واحده من جواهر زماننا _بنقابها_ وأنا أعتز جداً بوجود منتقبات محترمات يطبقن الشريعة الإسلامية فى كل شىء فى دنياهم ،،

 

النقاب .. والزى الإسلامى هو ما لفت نظر هذه الأجنبيه لك وجعلها تكلمك وتقول أنها تحب هذا الزى جداً !!

 

النقاب .. هو الذى يجعل للفتاة العزة بين الفتيات ،، حتى الغير مسلمات منهم .. يقدرونها ويحبونها ..

 

النقاب - يا من ظلمتكم النقاب .. حسبى الله ونعم الوكيل فى كل من أساء للنقاب وشوه صورته ،،

 

أختى الكريمة - جزاكى الله كل الخير وأكثر من أمثالك وهدانا وإياكى الى ما يحب ويرضى ، وجعل حياتك كلها من اجله وإبتغاء مرضاته - انه ولى ذلك والقادر عليه

 

زيك الشرعى هو أكثر ما لفت إنتباهى فى الموضوع كله بأنه لفت نظر المرأه الاجنبيه وأبدت إعجابها به وبمن يلبسه

فكملك الله به وبتطبيقك للإسلام ، وهدانا وهدى نساء المسلمين الى ما فيه الخير والصواب

 

تفضلوا فى النهايه هذا الإهداء الذى جلبته من اجل هذا الموضوع وبعد قراءة الردود كاملة :

 

فيديو - حق الزوجه - حق المرأة - الشيخ محمد حسان

[تاجى حجابى 0]

فقط سألفت النظر لنقطه لم يلتفت اليها أحد

انا كمان لاحظت حاجه

ان حياتى بتعرف تتكلم انجليزى

الكورسات جابت نتيجه يا قمر

[حياتى من اجل ربى 22]

دكتور المنتدى

 

 

كالعاده تعجز الكلمات عن شكرك لهذا الرد الثرى

جزاك الله خيرا

ربنا يجعله فى ميزان حسناتك

وينفع بك يارب

ويهديك الى ما يحب

ردك شامل لجزانب الموضوع

 

احترامى وتقديرى لك اخى

 

 

عاشق الصدقه

صااحب الردود المييزه

فعلا رد مميز

جزاك الله خيرا

اسال الله ان يتقبل منا وييسر لنا ما يحب

ويعفو عنا تقصييرنا

يظن الناس بى خيرا وانى لشر الناس ان لم تعفو عنى

 

احترامى والشديد لك اخى

اسال الله ان يرزقك من حيث لاتحتسب

وان يحقق لك كل ما تتمنى

 

 

تاجى حجابى

 

 

جيبتى التايهه بجد يا تاجى

انتى تغيبى تغيبى وبتطلعى مره واحده بحاجات غريبه والله

جزاك الله خيرا

مااشى يا جميل

ربنا يسعدك يارب

[ضفضدع مضيع نضارته 0]

اولا : ماشاء الله ربنا يزيدك على نقابك

ثانيا : المشكله دى عند الناس اللى مش عارفين دينهم بجد

ثالثا : شكرا على الموضوع

[حياتى من اجل ربى 22]

جزاك الله خيرا اخى

اسال الله ان يجعل كل ما تكتب فى ميزان حسناتك