[تشريد] ادارة منتديات ياللا يا شباب والحقيقه المره

[عاشق الصداقه 525]

بسم الله الرحمن الرحيم

 

احبائى بالمنتدى الحبيب ياللا يا شباب

اكيد عنوان موضوعى غريب .. ادارة منتديات ياللا يا شباب والحقيقه المره ..

متقلقوش .. هتفهموا دلوقتى .. انا فى موضوعى ده هتكلم عن ادارة المنتدى .. بعيد عن المنتدى

يعنى بعيد عن الرسميات .. هتكلم عن حياتهم الطبيعيه المرحه .. هتكلم عن احلى ايام بيقضوها سوا

ملحوظه هامه فى البدايه : الموضوع للمزح والفكاهه وملهوش اى شأن بقدر اى من الاداريين واحترامهم .. وجب التنبيه .. ونرجع لموضوعنا

هتعرفوا من خلال الموضوع ده .. الوجه الاخر لـ Abotasneem رائد التنميه البشريه سابقاً (يعنى قبل الموضوع ده) وده لأنه هيتشرد هنا دلوقتى

هتعرفوا كمان الوجه الاخر لـ عرابى (sona3 al7ayah).. محاضر التنميه البشريه .. وصاحب الرحلات المتميزه بالمنتدى ..

يكفى انه يحمل قسم بإسمه فى المنتدى .. وهذا وحده يوضح عقليته الفذه .. ايضاً هذا قبل طرح موضوعى هذا

هتعرفوا الوجه الاخر لـ أحمد سيف .. الفذ العملاق .. ذو العقل الاسطورى .. رئيس العالم كما اسماه دكاترة كلية العلوم بقنا

هتعرفوا كمان الوجه الاخر لـ عاشق الصداقه .. المبرمج .. الأدمن .. اللى فيه مواقع كامله كبيره بتهتف بإسمه (كلام كبير صح) .. دلوقتى هيصغر قوى

هتعرفوا كمان El3aref وغيره .. بالدور والترتيب .. بس اول ضحايانا هم المؤسسين اللى ذكرناهم فوق دلوقتى

مفاجأة الموضوع التى لا يعرفهااحد .. ولا حتى اطراف الموضوع مؤسسى ياللا يا شباب .. اننى سأقوم بتشريدهم هم فقط واحد تلو الاخر .. وسيسير الموضوع على نفس المنوال

اى سيأتى واحد منهم هنا لينتقم فيذكر مواقف لى ويشردنى ويشرد الباقيين ايضاً ..

ويأتى الثالث ليشرد الاول والثانى والباقيين .. وهكذا ..

انها الحرب احبائى

خلونا نبدأ .. بمواقف منفصله قد أسميها .. مواقف وطرائف من حياتنا الواقعيه .. ومرحباً بكم على ارض الواقع الاليم

====================================================

نبدأ بموقفين تشريديين للعرابى .. sona3 al7ayah

هذا مشهد للثلاثى الضائع (كرينكل وعرابى وابوتسنيم) فى احدى الايام بعد ان دخلوا مطعما ..

واغلق المطعم (له الله واصحابه) بعد ان خرجوا منه بعد معركه مع المأكولات بجميع انواعها

بدأت آثار الأكل المفرط عليهم .. بهرتله وبلاهه غريبه انتابتهم فى وسط الطريق .. ولكم المشهد مجسد ..

ابو تسنيم وكرينكل يطوقان بعضهما مثل حبيبة الليل .. وورائهما عرابى يصيح بصوت مرتفع يلفت نظر الماره وهو يلوح بسيفه الوهمى .. هل من مبارز .. ايها الجبناء .. هااا

والاثنان يضحكان بهيستريا على ما اصاب ثالثهم بعد ان كان عاقلاً .. من فرط الجرعات الاتلافيه المكثفه التى تعلمها منهم فضاع بشكل ملحوظ

====================================================

مشهد آخر للثلاثى التالف .. تحت عنوان مبدأهم المعروف .. النداله تقوى الصداقه

كرينكل وابوتسنيم يرافقون العرابى للمحطه لكى يذهب لبلدته قوص انجلوس .. وفجأه وبعد ان اقتربوا من المحطه ..

يتركهم عرابى ويجرى بعيداً ليصبح فى وسط ميدان المحطه .. وأمام مرأى الجميع يلوح بيديه كاتباً على الهواء مبدأهم الغالى (النداله تقوى الصداقه) فى مشهد مضحك لكل الماره

فيحاول بهذا (تخليص حق) بأن يثبت انه تركهم وباعهم بعد ان أوصلوه .. يقف الاثنان دهشة مما اصاب زميلهم الطيب بسببهم من عته يزداد سوءاً يوماً بعد الآخر

ثم يرحلا .. وهم يستغفرون الله ان يسامحهم على ما حل بصاحبهم بسببهم ..

ويرحلوا فجأه ايضاً وكأن من يلوح بيداه فى منتصف الشارع هذا لا يمت لهم بأى صله ..... ولا تعليق النداله تقـ ....

====================================================

جاء الدور لتشريد ابو تسنيم .. وما اجمله من تشريد لذلك الشاب المتميز فى نظر الجميع .. الا انا

سأكتفى بتشريده فى نقطه واحده .. تحت عنوان .. ابو تسنيم والفجع الأعظم فى المأكولات (الادمى منها والغير ادمى) وهى صفه مشهوره فيه

مشهد لأبو تسنيم مع كرينكل وعرابى فى مطعم شعبى من مطاعم قنا .. قبل افلاسه واغلاقه ايضاً

كان الثلاثه يتضورون جوعاً .. جاء عامل بالمطعم ليكتب طلباتهم .. فطلب كرينكل ثلاث ارغفة طعميه .. وهذا لأنه جائع

ايضاً طلب العرابى ثلاثه ارغفه من نفس الصنف .. واذا بابو تسنيم ينظر لهم بشفقه واستنكار قائلاً (ايه الناس الضعيفه دى !! )

واذا به يلتفت لعامل المطعم قائلاً طلبه (اربعة عشر رغيف يا غالى) .. فنظر العامل بدهشه بعد ان ضحك معتقداً ان ابو تسنيم يمزح معه

واذا بوجه ابو تسنيم جاداً لم يبتسم .. وكرر قائلاً اربعة عشر رغيف .. ياللا .. فأكد العامل سائلاً مره اخرى .. واكد له الجواب ابو تسنيم

فتوكل العامل على الله وذهب واحضر ما طلبنا .. وهو يتعجب لهذا الطلب الذى لا يتناسب مع عود ابو تسنيم وحجمه اطلاقاً

والمفاجأه والظريف فى الموقف ان ابو تسنيم فرغ من التهام الاربعة عشر رغيفاً فى نفس الوقت الذى فرغ فيه صاحباه من اكل الثلاث ارغفه

====================================================

مشهد آخر من نفس النوع لأبو تسنيم فى مطعم آخر يدعى (ابو السرور) بقنا ايضاً .. وكان بصحبته كرينكل وبعض الاصدقاء (4 اخرين)

جاء ايضاً عامل المطعم ليكتب طلباتهم .. فطلب كرينكل وجبته المعروفه (2 بورجر + 1 كبده) .. وجاء طلب صديق اخر لطبق كشرى كبير

ثم طلب الثالث (طاجن مكرونه باشميل) والرابع طلب (1كبده + 1كفته + 1 شاورما) .. كنت انتظر بفارغ الصبر طلب السفاح ابو تسنيم

فجاء طلبه لعامل المطعم الذى كاد ان يغشى عليه (ذى ما طلبوا كلهم + فطيره باللحمه) .. لا امزح .. وابو تسنيم موجود لو كنت كاذب فليقل ذلك

هذا يجعلنى ادعوا يومياً قائلاً : كان الله فى عون ام تسنيم.. لها الله

====================================================

ارى ان هذا يكفى لأبو تسنيم .. ونواصل حملة التشريد بعد الرد المتوقع منه

نأتى الآن لتشريد العقل الذى الجأ له شخصياً فى حل مشاكلى العويصه .. وفى القرارات المصيريه فى المنتدى وفى حياتى .. وهو الغالى على قلبى احمد سيف

يكفينى موقف واحد لتشريده .. فمن يعرفه منكم سيعرف انه مشرد جاهز دون كلام منى

هذا موقفاً من مواقف العته المتأثر بكلية العلوم للعالم القدير احمد سيف .. حكاه لى بنفسه .. ولكم المشهد

احمد سيف يمسك بيده مجموعة من النقود ليعدها ويبداً بالعد جاداً وبغير قصد منه قائلاً وهو يقلبهم ورقه تلو الأخرى :

السبت ، الاحد ، الاثنين ، الثلاثاء ، الاربعاء ، الخميس ، الجمعه ، ... وهنا فقط توقف عقله عن العد وهو يفكر .. ماذا بعد الجمعه

ثم أدرك انه يعد بأيام الاسبوع لا بالارقام

====================================================

مشهد آخر لأحمد سيف وهو يحاول الاتصال بصديق له .. وكان رصيده قد نفذ .. فتوجه الى محل اتصالات ..

امسك هاتفه فى يده اليسرى لينقل منه رقم صاحبه .. وفى اليد اليمنى هاتف محل الاتصالات الذى يتصل منه

شيئاً ما غريباً يحدث .. كلما حاول احمد سيف الاتصال بصديقه يجد هاتفه الشخصى يرن ..

فيفصل الاتصال بصديقه لحين الرد على هاتفه وقبل ان يرد .. يصمت الهاتف .. فيعاود الاتصال بصديقه مره اخرى .. فى نفس اللحظه .. يرن هاتفه ..

فيفصل المكالمه الى ان يرد على هاتفه وحينها يسكت هاتفه مره اخرى بمجرد محاولته الرد على المكالمه تلك

بات واضحاً لأحمد سيف ان احد اصدقائه هو الذى يفعل به هذا (يشتغله) ونظر حوله ليجد احدهم .. فلم يجد احد .. فحاول التصرف بدهاء

فى هذه المره وهو يعاود الاتصال بصديقه .. وما ان رن هاتفه كالعاده حتى فتح الخط بيده اليسرى فى موبايله دون ان يترك اتصاله بصديقه من هاتف محل الاتصالات..

وعندها بدا له الموقف واضحاً .. فمن كان يشتغل احمد سيف هو نفسه .. حيث اكتشف انه كان يطلب رقم هاتفه من هاتف المحل وليس كما يعتقد انه يطلب رقم صديقه

ارأيتم العقليه الفذه حينما (تهسك) .. هذا هو الوجه الاخر لاحمد سيف

====================================================

ارى ان هذا يكفى للجوله الاولى .. واعدكم بالمزيد بعد الرد العشوائى المنتظر من الضحايا المذكورين ..

واهدى لهم عبارتنا المفضله بعد موضوعى هذا .. احبكم .. ولكن اعذرونى ... فالنداله تقوى الصداقه ..

واحب ما الى قلبى .. تقوية صداقتى معكم

====================================================

اتمنى الا اكون قد اثقلت عليكم بموضوعى هذا .. فقد اردت الخروج بجو مزحه ولكن مزحه حقيقيه واقعه .. وهذا هو الجديد

تحيتى لكم احبائى .. وانتظروا البقيه .. فقد اندلعت الحرب .. والله وحده من يعلم عواقبها

[تقوى القلوب 12]

ههههههههههههههههههههه

 

جميل

 

اتشردتو بجد

لا اله الا الله

 

 

شايفين كرينكل بيغشكم

بيتكلم عن كل ده ومتكلمش عن عصبيته المفرطة لدرجة القاولون

وانه بياخد كل حاجة على اعصابه

 

 

سورى يا احمد تشريد بتشريد بقى

 

واحمد سيف اللى بيضحك اللى قدامه وهو بيكلمه عشان يتلخبط وينسى هو بيكلممه فى ايه فعلا رئيس العالم

 

سورى يا احمد سيف انت كمان بس بتفكرنى بالسادات الله يرحمه

ان شاء الله اخرتك مش هتبقى زيه متقلقش ولا انت ناوى تحارب اسرائيل؟

[شمووخ 0]

ههههههههههههههههههههههههه ... ههههههههههههههههههههههه

 

ضحكتنا يا عاشق الصداقه .. اذا كان ده حال ادارة المنتدى .. امال الاعضاء يعملوا ايه (دى تهديه نفوس مش اكتر)

 

ربنا يزود الحرب اللى بنكم كمان وكمان (قصدى الصداقه) ... دى النداله دى طلعت حاجه حلوة واحنا مش واخدين بالنا

 

اهى دى الحرب الوحيده اللى احنا نتمنى انها تقوم .. انا شكلى ولعتها اكتر .. ربنا يستر عليكم ..سلام بقى

[أحمد سيف 3]

الأخوة الأعزاء

جاءنا البيان التالي

 

قامت كلية العلوم بقنا بمنح السيد الطالب المواطن / احمد عبد الرازق والشهير بكرينكل شهادة التخرج بعد صراع طويل دام مع الدراسة

وإليكم النبأ بالتفصيل

في عام 2004 التحق الطالب احمد كرينكل بكلية العلوم

ومنذ اللحظات الأولى له داخل اسوار الجامعة ظهرت علامات النبوغ ( العته المغولي ) على السيد كرينكل

فشهدت دراسته تقدما ملحوظا في مواد الحاسب الألي وكافتيريا الجامعة بالاضافة إلى كبائن العلوم

وتخلف مدقع في باقي المواد الدراسية

وحتى لحظات كتابة هذه السطور في عام 2008 يسعدني ان ازف اليكم ان الطالب لا يزال في الفرقة الــــ

للأسف الثانيه اي بعد خمس سنوات من الدراسة لا يزال في الفرقة الثانية

وحقا نشكر على هذا المجهود الكبير الأخ كرينكل

التخرج عام 20...... اترك لكم التخمين

 

 

وانتظروا المزيد على منتديات ياللا يا <a href="http://yallagroup.net">شباب</a>

[شمووخ 0]

لا لا دا الموضوع دخل فى الغامق خالص دا بقى تشريد بجد شكلوا هتتحسدوا فى الموضوع ده

 

انا بقول نحلها ودى ياجماعه ومفيش داعى للتشرد فى حاجه اسمها مائده مفاوضات

 

السلام احسن برده ولا ايه

[zoro_hf 8]

هههههههههههههههههههههههههههههههههههههههههههه

[EL3aref 5]

لا إله إلا الله .......

برضه كده التشريد ده كله ليه يا كرينكل كده وانت يا احمد سيف وانا اللى بقول عليك كبير

ومنتظرين ابو تسنيم لما يوصل من السفر وانا ابشركم انه هيرد شر الرد ده صاحبى وانا عارفه

متنتظروش منه انه يقول لكرينكل الله يسامحك وانا سايب الثواب بتاعى للاخره واللى عند ربنا مبيضعش ومن قدم شئ بيداه التقاه وهنيالك يا فاعل الخير ......

 

انا شخصياً بقولك يا كرينكل

 

انها الحرب فلتكن :) :) :) :)

 

.

.

.

.

.

.

.

.

 

انتظروا تشريد كلا من الاداره وبعض الاعضاء

 

وطبعااً متنتظروش منى بعد ده كله اقول فى النهايه ( مع اطيب تمنياتى بالتوفيق أو تقبولوا تحياتى ) او الحاجات الكويسه دى لانى ساعتها هبقى عبيط

 

روحوا ياللا فى ستين .....................................

[صناع الحياه 14]

احب انبهكم يا جماعه باجمل الافاظ التي يرددها صديقاي كرينكل وابوتسنيم دائما لي

 

 

عبارات من نور يجب ان تحفظوها عن ظهر قلب

 

" ياابني انت شاب نفاخه يعني طرشيقه" ابوتسنيم

" حب الوظغه" ابو تسنيم

" اي كلب" كرينكل

"تششاحححححححححح" كرينكل وابو تسنيم لتقليد برنامج البوربوينت

"كابتن ..كابتن خد اقولك خد.... كابتن ..كابتن متشوحش ورد " ابوتسنيم لما بيكون مبسوط

" ياشيخ روح استحمي الاول" ابو تسنيم لما حد يقوله اقتراح ميعجبوش

"ابويا الغالي" كرينكل لما يكون عايزني اعزمه لكن علي مين

" ابو تسنيك وعرابك وكرنكول " العارف لما بيدلعنا

"كشح كشح" ابو تسنيم لما حاجه تعجبه

 

وطبعا ماخفي كان اعظم ...بلاوي زرقه والله العظيم يندي لها الجبين

وانا طبعا بحاول علي قد ما اقدر افلترلهم الالفاظ والعبارات دي عشان ميكسيفونيش قدام حد غريب او انا بلقي محاضره قدام ناس محترمه

وهو كله بثوابه

[memo 0]

ههههههههههههههههههههههههههههه

 

انا هتفرج وانا ساكت اصل بحب اتفرج على المصارعه قوى وخصوصا مصارعه التيران

 

انا على راى شموخ نحلها ودى احسن وشعارنا يكون ياشر اشتر (ده برده نوع من تهديه النفوس)

 

دا الموقف الوحيد اللى نقول فيه دمتم على تشريد اكتر واكتر

 

وكل ما كان هناك تشريد اكتر كل ما استمتعنا بالموضوع اكتر

 

انتوا طلعتوا اهل خبرة بصحيح

[تقوى القلوب 12]

طبعا يا جماعة احنا بنهدى النفوس

 

كلهم بيمدحو فيك يا كرينكل مرضاش ليك المدح ده كله

لازم تشكرهم شكر ممزوج ببعض التوابل ومكسبات الطعم واللون بس بلاش مكسبات روائح عشان خاطرى

[mahmoued 0]

ممكن اشور على ابو تسنيم موضوع انو يقدم فى موسوعة جينز وانا اتنباء له بالفوز واما احمد يوسف انى يقدم فى شركة مايكروسوفت وكرينكل ربنا يزيدوا وياخد خبرة كمان

كـــــــــــــــوارشى

[EL3aref 5]

السلام عليكم ورحمة الله وبركاته ..

 

وبعد ...

 

فى بداية كلامى اريد ان اعرف جميع اعضاء المنتدى الكريم طبيعة العلاقه بين الاعضاء المؤسسين لمجموعة ياللا يا شباب .. فى احد الايام وانا جالس امام جهاز الكمبيوتر وامارس اكل عيشى وهى مهنة التصميم جائنى تليفون فجأه رفعت السماعة لاجد ابو تسنيم على الخط بيقولى ( انجز واخلص علشان تنزل معايا رايحين قوص ) قلتلوا هنعمل ايه فى قوص انا معرفش حد هناك قالى ملكش دعوه البس وانجز .. قولتلوا هدومى كلها فى الغسيل قالى تعالى على كده قلتلوا خلاص هتصرف ولبست لبس عادى جداً من اللى بنخرج بيه فى اى مكان ..

 

ولما جالى قالى احنا رايحين جمعيه اهلية فى قوص هنلقى محاضره فى التنميه البشرية .. قلتلوا انا بقالى سنتين معرفش اى حاجه عن التنميه البشريه ومحاضرتش من ساعتها !!!

 

قالى اخلص وشدنى ورحت معاه قهر - بس هو وعدنى انى هبقى مستمع فقط ومش هشترك فى القاء المحاضره - وانا صدقته للاسف ... وركبنا عربيه بيسموها عندنا كبوت غريبة الشكل والمنظر وعدد ركبه مفتوح يعنى لا نهائى ( ولما تقول للسواق يسطى هيركب فين اللى طالع ده يقولك بصوت غريب ( ايه يا استاذ الارزاق بيد الله ) .

 

المهم وصلنا مدينة قوص .. ولاقيت واحد دخل علينا خد كرينكل وابو تسنيم بالحضن وبعد كده قالولى انه ده عرابى اللى هو اسمه صناع الحياه فى المنتدى .. ودى كانت اول مرة اشوفه فيها .. سلمت عليه وعملت فيها دور الشاب المحترم وهو نفس النظام يعنى الكلام بحساب والهزار بحساب .. حفاظاً على المنظر العام .

 

وبعد مرور ربع ساعة .. بقينا اكننا متربين مع بعض .. ضحك وهزار وقله احم احم .. يعنى .

ورحنا الجمعيه اللى المفروض ابو تسنيم وعرابى هيلقوا فيها المحاضره وبدأ عرابى يعرف الناس علينا لغاية لما جه الدور عليا وكان عرابى لانه لسه شايفنى من ساعة فمكنش يعرف عنى حاجه .. فتفضل السيد ابو تسنيم وقال ( قوم يا عارف اتكلم عن نفسك ) وانا طبعاً مش مجهز نفسى ومش لابس فورمال وطلعت قدام الناس وكان منظرى زباله وطبعاً ما كان من السيد ابو تسنيم الا انه يضحك من تحت لتحت ...

 

وبعد مخلصت المحاضره .. رحنا عند عبدالله عرابى البيت .. وبعد شويه كرم اهل الصعيد ظهر ولاقيت كمية اكل غريبه دخلت .. وفى هذه اللحظه .. وكأننا اتربينا فى هذا البيت من الصغر وكانى انا بالذات اعرف عرابى من 50 سنه ... انهال كلاً من ( كرينكل وابو تسنيم والعارف ) على الاكل بلا رحمة وطبعاً فى مثل هذه الحالات كل واحد يخلى باله من صوابعة . وبعد الاكل واثناء الشرب وكان ابو تسنيم يرفع كوب الماء على فمه .. تذكرت موقف وهو :

 

ان كرينكل كان فى صغره يحب الحيوانات الاليفه وكان فى احد المناسبات يتواجد فى مسقط رأسه وهى فى احد مدن الصعيد وجد معزه تمر من امام منزل العائله ولحبه الشديد للحيوانات امسكها وبالدين ليأكلها والمعزه الصغيره فزعت من كرينكل بالطبع ولكنه لم يلاحظ ذلك .. ولكن عندما ايقنت المعزه الصغيره انه لا مفر من ايدى هذا الطفل المتغطرس

بدأت بالاكل من يده ولكن لان المعيز يفتقدوا للتركيز بعد ان خلصت الورقه التى كان كرينكل يحاول اطعامها اياها . اكملت بعد الورقه على احد اصابع المسكين المدعو كرينكل وبات صباع كرينكل فى فم المعزه الصغيره .. واخذ كرينكل يصرخ وعلا صراخه حتى جاء اهل البلده جميعاً لتخليص يد كرينكل الصغير من فم المعزه

 

وكأن المعزه تخلص تارها البايت من المدعو كرينكل فهو ارعبها فى اول الامر وها هى ترد له الصاع صاعين ...

 

وما ان ذكرت هذا الموقف على مؤسسى ياللا يا شباب .. وكان المؤسس ابو تسنيم ما يزال يشرب وكوب الماء على وجهه

- ملحوظه مؤسسين ياللا يا شباب بيشربوا بوشهم كله -

 

وما ان ذكرت الموقف السابق ذكره وكاد ابو تسنيم ان يموت لانه ضحك ضحكاً هستيرياً اثناء شربه واخذ يضربنى لانى ذكرت الموقف اثناء شربه وكان السبب ليس انه كان سيموت من الاختناق ولكن لان فى شوية ميه وقعت فى الارض كان هو اولى بيهم من الارض

 

وفى اخر اليوم رجعنا الى محافظة قنا

 

منتظر مواقف تشريد اخرى وانا متأكد ان دور ابو تسنيم هو القادم

 

ولنا لقاء اخر مع حلقات التشريد

 

سلام

[Shetos 2]

لا الله ينور أنا فى أنتظار رد ابو تسنيم اللى هيكون لا يبقى ولا يرحم الله معاكم....العارف ...كرينكل...عرابى..أحمد سيف.... الحمد لله انى بعييييييييييييييد ربنا معاكم

 

 

الطيب احسن

تم تعديل February 23, 2008 بواسطه Shetos

[EL3aref 5]

لاء مش احسن

[حنان القلب 1]

طب تشريد بتشريد يا جماعه اني عايزه ابلغ عن اربعه في المنتدى دا اعرفهم كويس جدا

 

*الاول احمد سيف

اللي بيكره الطماطم وكل انواع السلطات والجبن ونفسي اعرف بيحب ايه وعرفت انه بيكره الطماطم لانه هو وصغير كان بيحبها جدا ودعك هدومه بيها وبعدين الست الوالده ادتله علقه تمام من ساعتها كره الطماطم سم وسموه في علوم قنا حنضل لانه مثل مسرحيه وكان عامل دور واحد اسمه حنضل بس هو كلامه زي ال.........عسل طبعا

 

 

*والتاني ابو تسنيم عمر

ودا لانه مفجووووع جدا بس اكبر عقاب ليه انه خطيبته مبتعرفش تطبخ اوي ومش فاضيه تتعلم وبصراحه يستاهل وربنا يكرمهم سوا لاني بحبها جدا بس للاسف البت من ساعة ما عرفته اهم حاجه عندها الاكل ومبداها عض قلبي ولا تعض رغيفي ومشهور فعلا بالنداله التي تقوي الصداقه ودايما كل ما ارد عليه في حاجه يقولي

ولدنااا جامد ومن اظرف الشخصيات اللي عرفتها ودايما باحرجه قدام مامته لما نشوفها في اي مناسبه اقولها ازيك يا حاجه ام سيد رغم انها اموره جدا ولذيذه خالص خساره فيه يقولي ايه دا انتي فاكراها فاتحه كشك سجاير جنب بيتكم قال يا ام سيد ودايما مسيحاله الدنيا

 

 

* اما كرينكل

دا ربنا يعينه مش ناوي يخرج من الكليه عموما هو بقي علم من اعلامها ويعيني العيال بتوع كل دفعه يروحوا يسالوه يجيبلهم احباط واكتئاب نفسي ولما يشفوه تاني مره يستخبوا منه بس والله انسان كويس جدا وطيب خالص وربنا يكرمه بس هو كل ما اكلمه احسه بيخاف مني كده وبيحترس مني ويفضل يضحك على كل حاجه اقولها وممعهوش غير كلمة واحده الله يخرب بيت سنينك خطيره والله يمكن لاني مدب شويه في الكلام بس الموقف بيبقى طالب كده واحب ارمي الكلمه دوغري من غير نحنحه .

 

 

*والرابع سبرتو

دا انسان غريب متنقل بشكل غريب ودايما بيجري ومستعجل ومشغول ومش فاضي وراه ايه مش فاهمه وعشان هو على طول طاير سموه سبرتو وبصراحه انسان مرح جدا وغلبان خالص

ودا اللي اكتشفته فيه هو وكرينكل من خلال معسكر اسيوط اللي هم عمرهم ما ينسوه لاننا كنا مجموعه فضحنا ام الجامعه بتاعتنا هناك وخصوصا في موضوع الاكل كنا رقاق جدا ومؤدبين خالص مش كده برضه؟؟

وسبرتو دا امه ولدته في فرح بسم الله ما شاء الله مفيش حاجه مش حافظها ومتهدش خالص بس كان عامل روح حلوه خالص

 

 

واخيرا اللي انا باختم بيه كلامي عالناس دوول انهم اكتر ناس محترمين شفتهم في حياتي وخصوصا في فئة الشباب ويستاهلوا ثقة كل اعضاء

المنتدى وطيبين جدا وولاد ناس محترمين جدا انا اعرف اخواتهم اللي هم احسن منهم كمان

ولو كان كلامي ناشف شويه معاهم فدا لاني انا طريقتي كدا وهم يعزروني وزي ما ابو تسنيم بيقولي دايما دي احسن حاجه فيكي بس ليهم معزه غاليه في قلوب كل اللي يعرفهم لانهم مثال للاخوه المحترمه والاخلاقيات العاليه ودا كلام بجد مش جمايل انتوا عارفين انا مبتجملش مع حدههههههههههههههههه صح ؟؟

يارب اكون قدرت اوضحلكم جزء من الصوره اللي انا شايفاهم بيها واسفه عالاطاله بس هم يستاهلوا اكتر من كده بصراحه.

[EL3aref 5]

على إيدى .. تمام وانا شاهد معاكى يا حنان ..

[Shetos 2]

أعتقد انى فى ناس مش هنشوف وشها فى المنتدى تانى خالص

 

هههههههههههههههههههههههههههههه

تم تعديل March 6, 2008 بواسطه Shetos

[ABOTASNEEM 116]

اولا ... وقبل كل شىء ...

 

وحشتونى جداً جداً جداً ... ووحشنى المنتدى بجد

 

لانى يمكن ليا بتاع شهر او اكتر مكنتش بقدر ادخل المنتدى

وده لظروف شغلى الجديد واللى كان مسيطر عليا تماما وواخد معظم وقتى ..

 

بس كنت دايما متابع المنتدى من بعيد وعارف ايه اللى بيحصل فيه وكنت بفرح جداً لما بعرف انه منتدانا شغال يكبر ويكبر وينتشر، وفرحت اوى لما دخلت وشفت بنفسى التطور المذهل اللى حصل فى المنتدى .. واتمنى الا ابعد مرة اخرى عن المنتدى

 

ــــــــــــــــــــــــــــــــــــــ

 

ثانيا بقى ... ايه ده كله .. هو مفيش غيرى فى المنتدى ده ولا ايه ؟

كل اللى داخل وعايز يشرد .. يشردنى انا ..

انا مكنتش اعرف انى شخصية مشهورة اوى كده .. احم احم احم

وانو كل الناس بتحب تجيب فى سيرتى ..

ولذلك .. وبناءاً على طلب الجماهير والاعضاء .. قررت ان ارشح نفسى فى مجلس ال........ بالنسبة لمنتديات ياللاياشباب وامرى لله

ولو انى مكنتش عايزها والله .. بس اعمل ايه بقى .. كله علشان خاطر الاعضاء، والله الواحد مش عارف يعمل ايه فى حب الناس

 

ـــــــــــــــــــــــــــــــــــــ

 

ثالثا وده المهم ...

 

بقى الكل يعنى شغال يشرد فيا .. ماشى،، ماشى،، ماشى

انا هوريكم كلكم ...

 

الضحية الاولى

"الكرينكل" ــــ <ادمنا المحترم

 

مكالمة تليفونية

• الو ..

• ايوة .. مين معايا

• مع حضرتك الاستاذ سيد الكاشف من امن الدولة

• إهه إهه إهه .. ايوة يافندم .. خير ان شاء الله

• ممكن اكلم الاستاذ احمد عبدالرازق احمد

• إهه ... ايوة يافندم انا احمد

• ايوة ياأحمد .. انت فى كلية العلوم .. وفى سنة اولى .. مش صح كده ولا ايه ؟

• ايوة يافندم صح مظبوط

• تعرف واحد اسمه عمر عبدالرحيم سيد ؟

• ايوة اعرفه .. ليه ماله ؟

• انت بتمشى معاه كتير اليومين دول .. وامبارح كنتوا قاعدين مع بعض فى نادى المعلمين فترة كبيرة جداً .. وماسكين ورق وشغالين تكتبوا حاجات .. مش كده ؟

• ايوة يافندم صح .. بس هو فيه ايه بالظبط يعنى ؟ ده احنا ....

• ايه بتعملو ايه الوقت ده كله .. وبتتكلموا فى ايه ؟

• عادى يافندم .. ده احنا اصحاب والله ... ومفيش اى حاجة والله ... وبعدين ... إهه إهه إهه

• خلاص .. خلاص بلاش كلام كتير .. المهم خلى بالك على نفسك كويس علشان متندمش على اى خطوة تعملها فى حياتك .. واعرف كويس انو اللى بيكلمك ده هو عمر عبدالرحيم اللى انت كنت قاعد معاه امبارح فى نادى المعلمين

ياذكى افندى

 

هههههههههههه ههههههههههه هههههههههههه ههههههههههه

 

البقية تأتى ...

to be continued ..

 

 

 

[bassant 2]

اه الحلاوة ده اه الى انا سمعاه ده

انا من رأى محدش يسيب طاره خلصوه من بعض ياله اه حاجه الواحد يتسله فيها وخلاص

بس بجد انتم مجموعه تجنن والله تجنن

[Shetos 2]

هههههههههههههههههههههههه

 

خطير يا عمر

بس أساساً كرينكل بشتغل نفسه مش ناقص اللى يشتغله

[AMR DAWAM 7]

ههههههههههههههه

فكرة الموضوع رائعة يا كرينكل

 

وطبعا كل المشاركات لا اجمل ولا اروع منها

وانا اعرف كرينكل وابوتسنيم وسبرتوا وكمان احمد سيف

وبصراحة هما مش محتاجين تشريد

***********************************

[عاشق الصداقه 525]

هههههههههههههههههههههه

 

ردود جميله وتشريد جميل

 

لكنكم ضعفاء .. كنت انتظر اكثر من ذلك خصوصاً من المدعو ابو تسنيم

 

انتظروا تشريد العارف وابو تسنيم (مش ورايا غيره) .. والجديد فى الموضوع (دايماً أأتى بالجديد) اننى سأشرد نفسى

[EL3aref 5]

بلاش انت يا كرينكل .. لحسن ودينى انزل فيديوهاتك على المنتدى .. وعلى فكرة ده قريباً جداً لاعضاء منتديات ياللا يا شباب .. :wink_smile:

[صناع الحياه 14]

اليكم باقي المصطلحات والعبارات الدارجه التي يستخدمها مشرفين منتدانا الوقورين

 

ظرفته رد في المنتدي ادبه"شيتوس"

 

انضغلك سنانك" العارف"

 

"ياد يارفعت"ابوتسنيم لما بينادي علي العارف

 

" والله اعبى وشك قلامه" كرينكل لما حد بيستفزه

 

"دقنك دي ...........دقنك دي" ابوتسنيم لما بيحب يهزر مع كرينكل

 

 

 

بطل جرم" كرينكل لما بستفزه

 

مبحبش الكلام المجعلص" ابوتسنيم لما حد يقول مصطلح كبير

 

 

وانتظرو الحلقه القادمه

مع خالص تحياتي

[EL3aref 5]

الله يفضحك زى مفضحتنا .. وجارى غلق الموضوع ...

 

:angry: :blow: :)