صلاح جاهين رباعيات على مر التاريخ

[raghda hady 0]

رباعيات على مر التاريخ

 

صلاح جاهين

 

إيش تطلبي يا نفس فوق كل ده

 

حظك بيضحك و انتي متنكده

 

ردت قالت لي النفس : قول للبشر

 

ما يبصوليش بعيون حزينة كده

 

عجبي !!

 

 

 

إقلع غماك يا تور وارفض تلف

 

إكسر تروس الساقية و اشتم وتف

 

قال : بس خطوة كمان .. وخطوة كمان

 

يا اوصل نهاية السكة يا البير تجف

 

عجبي !!!

 

 

 

يا حزين يا قمقم تحت بحر الضياع

 

حزين أنا زيك و إيه مستطاع

 

الحزن ما بقالهوش جلال يا جدع

 

الحزن زي البرد ... زي الصداع

 

عجبي !!!!

 

 

 

في يوم صحيت شاعر براحة و صفا

 

الهم زال و الحزن راح و اختفي

 

خدني العجب و سألت روحي سؤال

 

أنا مت ؟ و لا وصلت للفلسفة

 

عجبي !!!

 

 

 

الفيلسوف قاعد يفكر سيبوه

 

لا تعملوه سلطان و لا تصلبوه

 

ما تعرفوش إن الفلاسفه يا هوه

 

اللي يقولوه بيرجعوا يكدبوه

 

عجبي !!!

 

 

 

علي بعد مليون ميل من أرضنا

 

من الفراغ الكوني بصيت أنا

 

لا شفت فرق بين جبال و بحور

 

و لا شفت فرق ما بين عذاب أو هنا

 

عجبي !!

 

 

 

إنسان أيا إنسان ما أجهلك

 

ما أتفهك في الكون و ما أضألك

 

شمس وقمر و سدوم و ملايين نجوم

 

و فاكرها يا موهوم مخلوقه لك

 

عجبي !!

 

 

 

نظرت فوق للنجوم و انا ساير

 

رجليا عترت في الحفر و الحجاير

 

بقيت أقول و انا ع التراب: يا سلام

 

مش بس عبره أخذت لكن عباير

 

عجبي !!!

 

 

[M.elho 0]

جزاك الله خير

القصيده أكيد رائعه بس ياريت المره الجايه تكبري الخط شويه