احنا جيل هايف؟؟ و لا جيل مظلوم؟؟

[zoro_hf 8]

احنا جيل هايف؟؟ و لا جيل مظلوم؟؟

 

 

 

أريد ان اعرف رأيك هــل نحن جيـــل هايـــــــف ...

 

 

طبعا العنوان مستفز بس دة الواقع

و دة اللى بيتقال على الجيل دة

اللى احنا جزء منة

و فية كتير مننا شايفين

ان الجملة دى صحيحة

و تنطبق على الكثير

و لكن اسمحولى

أخدكم معايا

زى رحلة

طويلة شوية

لننظر سويا الى الجملة

بنظرة اعمق و اشمل

بمعنى اصح

نشوف الاسباب

و الجو المحيط

بهذا الجيل

و الذى نشأ و ترعرع فيه

 

 

 

(أولا)

الحكومة العامل الأساسى

فى تنظيم المجتمع

و تلبيه احتياجاتة

و طبعا الحكومة غنية عن التعريف

اهتمت

بأن تضيق على الشعب

ماديا و فى كل شئ

فاصبحت المرتبات قليلة جدا (لو اصلا في شغل)

و الاسعار اصبحت فى علو مستمر

و امور كتيييييير انتم فى غنى عن سماعها

و معروفة

 

 

 

(ثانيا)الاسرة

عماد المجتمع

و العامل الأساسى

فى تكوين

شخصية و فكر الفرد

اصبح الزوج او الاب

مشغول بجمع المال و العمل

فى مجتمع صعب العيش فيه

حول اشخاص يشعرون

بفقد قيمتهم و كونهم بشر

الام

اصبحت مشغولة إما

بالعمل و جمع المال مع زوجها

او العمل فى البيت و ترك مجال العمل

و لكنها نست ان هناك تغير مستمر فى المجتمع

و تقدم

فاصبح هناك حاجز كبير بين تفكيرها و تفكير اولادها

و زوجها ايضا

و يسلام بقى على الامهات

اللى بتشجع

بناتها

على اللبس الجرئ

او انها اما تعجب بواحد

ممكن تحبة و تمشى معاة و تكلمة

خوفا عليها

(عارفين طبعا ليه)

و الاب مش مشكلة دورة

او الأخ

فأين الأولاد من كل ذلك؟

 

 

 

(ثالثا)المدرسة

طبعا الطالب

بيدخل المدرسة و لدية نظرة تقدير و إحترام

لمدرس

يبدأ يجد ان لا اهمية له

فكل ما يشغلة جمع المال

و ان يقرأ الجرائد او يأكل فى الحصة

فصورة المدرس

تهتز لدى الطالب

و طبعا الطالب التى نشأتة غير سليمة

او غير سوية

بيستخدم اسلوب عدم الحياء

و بالتالى بيخرج

الطالب من هذة المرحلة

ليس على درجة عاليه

من العلم

المفروض نكون عليه

و يفتقد الكثير

الجامعة

المفروض الطالب

خلال الجامعة

يكون ملم و يجد

من ينمى عندة موهبة الإبتكار

او انة ازاى يتخرج من مجاله

و هو فاهم بيعمل اية

و طبعا كلكم خريجين جامعات" او لسه ان شاء الله "

و عارفين اللى بيحصل

فى كل جامعة على حدا

 

 

 

(رابعا)مجال الحياة

يبدأ الشخص

يتخرج من الجامعة

لدية أحلام و أمال كثيرة

منها الاحلام الطموحة جدا

و منها المتوسطة

فيسعى لتحقيقها

و لكنة يصطدم بالواقع

الأليم

منها الكوسة و منها الرشوة

و منها عدم احترام أدميتة التى اصبحت منتشرة بشكل

ينرفز بجد

و غيرها

و طبعا اللى مجربش بيسمع

و بالتالى بيحدث عنة حالة من اليأس

او الخمول

او الخوف

بعد كل دة

عايزينا جيل عامل ازاى

فعذرا

نحن لسنا جيل هايف او ملهوش لزمة

نحن جيل مظلوووووووووووووووووووم

__________________

 

 

تفتكروا جوابات التعيين ما بتوصلش للشباب ليه؟؟

يكونوش بيبعتوها بالحمام الزاجل طيب الحمد لله كده اطمنا انها مش هتضيع فى الطريق

 

طاب تفتكروا بقى الحمام ما بيوصلش ليه؟؟

[عاشق الصداقه 525]

اولا موضوعك جميل جداً يا زورو

بالنسبه لسؤالك :

 

احنا جيل هايف؟؟ و لا جيل مظلوم؟؟

 

احترم الموضوع وتفسير وتفصيل الاسباب .. لكن معذرةً ......

 

ليس كل هذا سبباً لنكون جيل هايف ..

 

الظروف اللى حوالينا دى .. مقدرناش نغيرها .. طيب والحل ؟؟ نكون جيل هايف !!!!!!!

أكيد لأ .. كتير جدا تغلب على الظروف دى والحياه دى .. تحت نفس الظروف ونفس الحكومه ونفس الجامعه .. لكن نجحوا !! بل ونجحوا جداً

 

انا مش بنكر تأثير العوامل المذكوره فى الموضوع على الشباب .. لكن الشباب اللى عاوز يبقى كويس بيبقى كويس .. دون التقيد بالسلبيات المذكوره

 

هو اللى نجحوا وكبروا واتكلمت الدنيا كلها عنهم دول .. مكنوش معانا فى نفس البلد .. تحت نفس السلبيات .. فى نفس الدرج فى الفصل.. وفى نفس الجامعه ونفس الكليه ؟؟

 

يا سيدى .. للأسف المشكله مش فى السلبيات اللى بتخلينا كده وبس .. المشكله فى الشباب نفسه

اللى عاوز يبقى كويس بيبقى كويس .. واللى عاوز ينجح وبيعمل لنجاحه بينجح .. واللى عاوز .... بيـ ..... ، الأمر فى ايدينا احنا

لكن قليل جدا جدا من الشباب اللى بيفكر صح .. ده اللى بنحاول نعمله فى المنتدى هنا .. من اجل شباب عربى (أفضل)

 

 

للأسف .. معظم شبابنا هايف والقليل هادف .. ولا شك ان الجميع مظلوم

 

سأقتصر بردى على الجمله السابقه .. ففيها تفسير للموضوع كله

 

 

تحيتى للموضوع الرائع

[zoro_hf 8]

بصراحة يا احمد واجزات فانجزات بصراحة هو ردك اللى اهم من الموضوع

انا معاكى بس فى كتير من الشباب مش بيحول يتحاد الصعاب زاى ماكانت زمان البلد داى مليانه رجالة وفى ناس كتير فى الصعيد طعلوا وكبروا وبيقو عمالقة فى كذا مجال

وربنا يكون فى عون الشباب واحنا نكون فى عون نفسا

[NADA 34]

للأسف .. معظم شبابنا هايف والقليل هادف .. ولا شك ان الجميع مظلوم

 

 

هو ده الكلام اول مره اشوفك كاتب حاجه ليها معنى

[AMR DAWAM 7]

والله موضوع مهم جداااااااااااا

أنا فى البداية كنت معتقد ان احنا فعلا جيل مظلوم

 

وبعد ان واجهت الشارع المصرى بكل ما فيه تاكدت انه النسبة الكبيرة جيل هاااااااااااااااايف ولا باس بذلك

فالقلة الباقية مظلوم ولكن بيدنا الكثير والكثير

 

 

شكرا على الموضوع اخى زورو

*********************************

[فراس فراس 0]

أول ماقريت الموضوع

 

أفتكرت مرة واحد بيسأل ست كبيرة فى السن

 

وبيقولها....

 

ليه زمان لما كنت تشوف الواحد وهو لسة ماحصالشى 20 سنة تلاقيه راجل ويشيل مسئولية

 

ودلوقتى بيكون عدى التلاتين وتقول عاليه لسة عيل...؟؟؟

 

ردت عليه وقالت:

 

لأن الشاب لو حط فى دماغه اللى بيحصل حواليه (يعنى مش مكبر دماغه ) ممكن يحصله حاجة او ينتحر

ربنا يكون فى عونهم

 

ومرة كنت قاعد مع ناس صحابى ولقيت وكان منهم واحد عنده حاجة وخمسين سنة وكان موجود أبن واحد صاحبه

لسة 14 سنة

 

وكان دايماً الراجل ده يقول الحياة صعبة

 

واللى لسة عنده 14 سنة بيقول ده احنا هنشوف أيام سودة

 

بصراحة اتضايقت قوى من اللى أتنين

 

المهم

 

أنا بحكى الكلام ده ليه...؟؟؟

 

الهدف من كلامى هو انى جبت نموذج من الشعب وبواريكم بيفكر ازاى...؟؟؟

 

الأول الست العجوزة ..وهى من جيلين قبلنا

 

الثانى الراجل اللى فى الخمسين وده من جيل قبلنا

 

الثالث اللى عنده 14 سنة نقدر نقول عليه الجيل اللى بين الحاضر والمستقبل

 

كلهم وبلا أستثناء مستسلمين للأمر الواقع

 

الكل بيبص على الحاجة الوحشة والظروف الصعبة

 

وماحدش بيحاول يعمل حاجة

 

الكل بيتكلم وخلاص عن الظروف والحياة

 

وماحدش بيحاول أنه يخليها فى صفه

 

ولون أساساً كان فى ظروف أصعب من كدة عدت على أجيال قبلنا

 

ولا احنا نسينا...؟؟؟

 

الزلزال فى اوائل التسعينات

 

ولا الجفاف اللى فى منتصف الثمانينات

 

ولا لما أغلقت الدول العربية التعامل مع مصر ومنعت العمالة المصرية بعد أتفاقية كامب ديفيد

 

ولا النكسة وأيام الصابونة الدبة اللى 3 جنيه

 

والسمنة اللىب 11 جنيه

 

وكان متوسط المرتب ساعتها 18 جنيه

 

يعنى ظروف صعبة كتير طلعت رجالة

 

((الشدة تخلق الرجال))

 

بس هى المشكلة فين بالظبط....؟؟؟

 

هو الموضوع ليه تحليل كبير علمياً بس...

 

هو ربنا بيقول أيه....؟؟

 

(ومن اعرض عن ذكري فان له معيشة ضنكا )

 

طبعاً للأسف كتير منا بيقعد يشتم ويسب فى الحكومة وفى الظروف

 

ناسى ان فيه ربنا

 

طيب هل ياترى أعرضت عن ذكر الله...؟؟؟؟

 

ده انا بصلى وبصوم وساعات لما يكون معاية فلوس بأدى اللى ربنا يقدرنى عليه

 

ياترى حد سأل تفسه ليه احنا كنا خير امة أخرجت للناس....؟؟؟

 

لأننا نأمر بالمعروف وننهى عن المنكر

 

وشوف بقى ساعت الماتش

 

تلاقى كتير بيسيبوا الصلاة ويستنوا الماتش

 

ولما تلاقى البنات ماشية ببنطلونات ضيقة وتقولك عادى

 

ولما تكون حاطة ريحة وتعدى قدامك باتنين متر وتشمها وتقولك عادى

 

واهلها يسيبوها كدة ويقولولك عادى

 

نسيت الحديث الشريف اللى بيقول (‏حدثنا ‏ ‏محمد بن بشار ‏ ‏حدثنا ‏ ‏يحيى بن سعيد القطان ‏ ‏عن ‏ ‏ثابت بن عمارة الحنفي ‏ ‏عن ‏ ‏غنيم بن قيس ‏ ‏عن ‏ ‏أبي موسى ‏

‏عن النبي ‏ ‏صلى الله عليه وسلم ‏ ‏قال ‏ ‏كل عين زانية والمرأة إذا استعطرت فمرت بالمجلس فهي كذا وكذا ‏ ‏يعني زانية ‏‏وفي ‏ ‏الباب ‏ ‏عن ‏ ‏أبي هريرة ‏ ‏قال ‏ ‏أبو عيسى ‏ ‏هذا ‏ ‏حديث حسن صحيح

 

وحاجات كتير وكتير من الولاد والبنات

 

الأنسيالات والحظاظات والحشيش والبيسة والزنى والرشوى

 

وبليل لما يكون الواحد أو الواحدة لوحدها

 

كل حاجة بقت عادى

 

ياترى أنت ما أعرضتش عن ذكر الله...؟؟؟

 

ربنا أمر الملائكة بأن يخسفوا بأرض

 

فقالوا : أنها فيها عبدك الصالح

 

فقال الله : أبدأوا به ..

 

ليه ...؟؟؟ لأنه لم يتمعر وجهه لى

 

يعنى شاف المعاصى قدامه ومغضبشى أو وشه ماتغيرشى لربنا

 

عرفت بقى ليه اللى بيحصلنا ده

 

أحنا لا هايفين ولا مظلومين

 

كل واحد بيختار انه يبقى هايف أو مظلوم أو ناجح وليه هدف

 

فأختر الطريق الأنسب لك

[zoro_hf 8]

بصراحة اخوى فراس ردك بصراحة مقنع جداااااااااااااااااااااااااا

ومفيش فى ايدى غير انى اسيب لوحة المفاتيح واقف واعمل حاجة واحدة بس :blow: :2: :angry:

وربنا يكرمك خير على المعلومات القيمة داى وشكرا على تفاعل الاخوة والردود الكثيرة الجملية اللى هى دليل على احنا جيل مثقف مش جيل هايف وان شاء الله ربنا هيقف معانا فى كل شئ بس المهم نرجع نذكر الله فى كل وقت لانى فى كتير حاليا اليومين فى قنا عايشين معانا الفترة داى وهى فترة (اسبوع شباب الجامعات ) انا بقول عليه (اسبوع النفاق والكذاب والفضائح وعدم غض البصر) انا اذكر انى يوم الاثيين نزلت بنات سوريا والاردن فى وسط البلد قيمة المسخرة والله كانت فى الشارع وانا والله ما شفتش بس اتحكه لية وربنا يكرم ان شاء الله ويهدى شباب وبنات المسلمين بصراحة يا اخوانى ويمكن فى كتير من ناس قنا يقولوا معاية نفس الراى (قنا باظات من يوم ما فتحت فيه الجامعة) لانى السباب بيفسد بعض والبنت بتسفدها بنت وسورى انى دخلت فى الموضوع التانى لانى بجد اليومين دول مخنوق من اللى بيحصل فى قنا كل البلد اتغيرت راحت الرجالة اللى كانت زمان صحيح انا سنى مش كبير قوى بس انا عشت فى قنا فى ايام ما كانت ظلام واسف جدا على ردى اللى فيه كتير هيزعل منى فى قنا بس انا بحب البلد اللى عشت واتربيت فيه وكل منا بيحب بلده ده حتى سيدنا رسول الله قال يوم ما خرج من مكه (لولا اهلك ما اخرجونى ما خرجت فا انتى يا مكة احب ارض الى قلبى ) فاده من حبى لبلدى لانى اللى بشوفه او بسمعه فى البلد يخلى الواحد يبكى على البلد داى والله يا اخوانى صعب جدا على واحد عاش فى قنا قبل وبعد انا ايام ما كنت فى المعهد يمكن لو الواحد كلام واحدة يبقا السلام فقط انما دلوقتى الشاب بيدخل الجامعة علشان يعمل حاجة واحدة انى هو يضبط بنات ويعيش حياتة يبقا جاى من الجاموسة وابوه او اخوه ربنا كرمه وطلع السعودية وبعت شوية فلوس للبيه وموبيل مش عارف رقمه كام وشوية جل فى شعره ويدخل على البنت انا كذا وكذا وابوية كذا ويجى اخر السنة متعرفوشه تلاقى الشعر ده بقاله 3 سنين ما اضرب فيه مشط ويرجع بقا على حقيقتة فى البلد ولية الواحد ما يعيش عايشة اهله انا مش بقول كل الشباب كده لا نوعيه او فئه معينه هى الى بتعمل ومش كل البنات وحشة ماشاء الله فى بنات كتير من بيوت محترمة لو اترمت فى وسط 100 رجال ما تخاف عليه واسف انى طولت فى الموضوع وخرجب بره الموضوع وشكرا للاخوة اللى ردو على الموضوع

تم تعديل March 20, 2008 بواسطه zoro_hf

[EL3aref 5]

احنا جيل هايف؟؟ و لا جيل مظلوم؟؟

 

اولاً : احنا متفقين ان الظلم واقع .. وظلم مدقع كمان ..

بس .. الشاب لو ساب نفسه لأحسا الظلم وان هو المظلوم عمره مهيعمل حاجه

والشاب اللى عايز يشتغل مثلاً هيشتغل لانه لو سعى هيتعب اكيد .. وبالتالى ربنا مش هيضيع تعبه

وده شئ متفقين عليه طبعاً . لانى عاصرت حالات كتير وكلها عرفت تشق طريقها بس ده متوقف على

ثقافة الفرد .. ولازم الانسان يتعب علشان يحصد .. ولا إيه ؟؟

 

وانا قلت فى الاول إن فى ظلم واقع على الشعب المصرى كله .. وإحنا متفقين على كده ..

 

وكنت عايز اسأل كرينكل هو مخنوق ليه ؟؟

 

يعنى مش كفاية حاطط اللوجو اللى انا مصممه وانا مش حاطه !!

وانت كمان اللى مخنوق .. راجع نفسك يا كرينكل وابقى كلمنى !!

[حنان القلب 1]

بصراحه السؤال دا دايما في دماغي هل احنا اللي ظالمين الزمن ولا الزمن هو اللي ظالمنا بس الاجابه دايما انه احنا السبب

الشباب فعلا بقي هايف وتافه

مش فالح يفكر في اي حاجه غير في الحب يا الجنس يا الفلوووس وميعرفش يتكلم غير في الفن والكوره لكن تبص عشان تلاقي ميوول دينيه او علميه للنفر جنب الفن والكوره واللعب والجد

الاجابه طبعا لا

حتى اللي بيفكر في الدين ياما يزودها يا ما يعدمها خالص كله بيفكر يعرف كل شيء عن شيء واحد بس

انما المفرووض انه يعرف حتى ولو شيء واحد بس عن كل شيء

ولو الشباب عمل كده حيقدر يدوس على اي عقبه ممكن تواجهه في مستقبله يعني الناس كلها عندها ظروف وبتختلف من شخص لاخر محدش مرتاح على طوول خلاص نقعد نندب حظنا ونسيب اللي ورانا واللي قدامنا

مش مشكله انه الواحد يقع بس يقوم ويبدا من جديد بدل ما يداس عليه بالرجلين ولوهو لسه واقع ومقمش وعمره كده ماهيقوم

الحكايه انه بسبب المآسي اللي مر بيها الشعب المصري وصل لمرحلة انه شايف كل حاجه اسوء مفيش امل مفيش تفاءل

 

الناس بقيت وحوش وكله بيحكمه القرش الماده دخلت في كل العلاقات حتى بين الاب وابنه والبنت وامها والاخ واخوه والصاحب وصاحبه كل حاجه بيحكمها القرش والدنيا بقت غابه

بس لسه في جانب حلو لسه فيه شباب ربنا يكرمهم فاهمين وواعيين عارفين ايه اللبيحصل وايه اللي ممكن يحصل لو كل واحد قال وانا مالي ياعني انا اللي هغيرهم

 

الشباب دول هنا وسطنا ومعانا ومنهم شباب منتدانا لو الناس قربت من بعض واتحدت مع بعضيها و قربوا من ربنا عشان يكون معاهم مش حيهمنا ولا حكومه ولا ماده ولا غيره الامور كلها حتتظبط وربنا معانا كلنا.

 

وبالنسبه للملتقى في قنا يا زورو انت فعلا معاك حق وان شاء الله غمه وتنزاح كلها كم يوم دا فيه ناس تتمنى انه يكون طول السنه ودول بقى ناس تافهيين رسمي بدون اي حيره

بس انا عايزه اقولك انه ممكن البنات اللي في الشارع دول ميكونوش سوريين ولا اي حاجه دول ممكن يكونوا مصريات ومن قلب قنا كمان

لاني نزلته ليله شفت فيه المنظره والمسخره والمسهره وحاجه اصلا ملهاش لزمه انا عن نفسي مستفدتش اي حاجه لما نزلته على قد ما ندمت اني عرضت عيني لرؤية مناظر هي في غنا عنها

 

بس برضه لسه والله الصعيد فيه ريحة الصعيد برضه ولسه مصر هي مصر وهي ام الدنيا والله انا سافرت اكتر من بلد عربي بس والله احن من الارض دي ما لقيت واطيب من ناسها مفيش بس هو لسانهم اللي جايبهم ورا.

[zoro_hf 8]

شكراااااااااااااااااااااااااااا يا حنان على ردك الهايل والمفيد ده

وانا شاء الله احنا كلنا فى منتدانا الغالى نقول لا ونتحدى الظروف الصعبة ان شاء الله

شكرا على رددكم الرائعة او الاكثر من رائعة وشكرا للمرور الجميع

[فراس فراس 0]

شـــكرًا زورو على كلامك الحلو والجميل

 

وربنا يكرمك ويكرم المسلمين أجمعين انشاء الله

 

وانا معجب قوى بحبك لبلدك وغيرتك عليها

 

بس انا مش عارف أنت من أسبوع واحد وطهقت

 

طيب أنا اعمل أيه اللى عايش فى أسكندرية

 

كل ماجى أطلع على البحر أشم شوية هواء

 

ألاقى مناظر مايعلم بيها إلا ربنا

 

سواء صبح أو ليل

 

سواء شتاء أوصيف

 

لازم الاقى اتنين بيظبطوا بعض

 

وساعات بقى بليل وراء الصخر بيظبطوا آخر تظبيط

 

ولاياسلام فى شوية صحاب ليا

 

معاهم عربيات

 

وليهم شقق فى المعمورة

 

بيظبطوا فيها آخر تظبيط

 

ياريت جت على الولاد بس

 

ده فيه شوية مناطق بيقولوا عليها راقية

 

تلاقى البنت بالعربة الجيب بتاعتها

 

معادية على الواحد وتقوله يركب ويمكن ميكونشى يعرفها أساساً

 

والبنت تلاقيها فلقة قمر ((جميلة جداً))

 

المهم تجيبلك خرطوشتين سجاير مارلبورو وتحشش معاها

 

وتظبط طبعاً

 

وتعطيك كمان ثلاثمائة خمسمائة جنيه

 

ولا البنات اللى لسة فى المدرسة وعاملة شبكة دعارة مع صحباتها

 

ولا فى شوية مناطق عندنا فى أسكندرية

 

تكون ماشى فى آمان الله

 

وتلاقى الليقولك عايز حاجة

 

يقصد عايز حشيش ولا بانجو ولاالحاجات دى

 

ولا الحرمية

 

تلاقى اللى مطلعلك ماطوة ولاسنجة وعايز يثبتك هو والشلة بتاعته

 

وطبعاً الأستاذ لازم يكون مبرشم او شارب خمرا علشان يجمد قلبه

 

وهو داخل عليك

 

وميهمهوش حاجة

 

يوه حاجات كتير كتير

 

بس الحمد لله

 

أنا كنت من يومين عند ناس قريبى بحضر فرح فى بنها

 

وحاودت أسلم على ناس قريبى فى المنوفية

 

المهم

 

قبلت واحد وكنا بنتكلم على الأسكندرية

 

وقالنى فى أسكندرية

 

يااما تلاقى الكويس قوى ياأما تلاقى الوحش قوى

 

وبيقولنى وهى البلد الوحيدة اللى تدخل فى أى جامع فيها تلاقيه مليان وفى أى صلاة

 

الحمد لله

 

انت عارف أنا بقولك الكلام ده ليه..؟؟

 

لأنى شايف أن الكلام اللى بيحصلنا دلوقتى

 

حصل فى فترة من فترات الخلافة العباسية الثانية

 

فلما زاد المجون والفسق بدأ ظهور العلماء وذاد الزهاد وانقلب الحال

 

وكمان بقول للى شايفها ظالمة

 

لو دور مويس حواليه وبص فى أكتر من اتجاه

 

هايلاقى شعاع نور

 

وبأيده هو يقدر يخلى الشعاع ده اكبر وأكبر

 

 

 

أما بقى حنان

 

كلامك جميل جداً

 

بس مش كل الشباب اللى بيظهروا على الشات هما كل الشباب

 

ولا كل الشباب اللى معاكى فى الجامعة هما كل الشباب

 

يعنى مثلاً نيجى لبتوع الشات

 

غرفة الشات بيكون فيها فى المتوسط مابين 27:30 واحد دايماً

 

المهم

 

بتلاقى بالظبط منهم فى المتوسط 3:5 أفراد

 

يااما اللى بيدور على جنس أو اللى داخل يشتم ويقل أدبه

 

يعنى من الآخر

 

لو حسبناها هنلاقى الناس دولت بيمثلوا حوالى 13%

 

أما الباقى فى عشرة منهم بيدور على عالم لا يعرفه وهو البنت

 

عالم عايز يدخل جواه ويعرف أسراره

 

ودولت بيمثلوا حوالى 30%

 

اما الباقى فنصهم داخل لأغراض تجارية (يسوق منتج أو يسوق موقع وهكذا)والنص التانى داخل علشان ياأما يقوى نفسه فى الأنجليزى والكتابة على الكومبيوتر واللى زهقان وعايز يتعرف على ناس جديدة وأهداف تانية

 

ده غير أساساً اللى مش فاضى يدخل على الشات أساساً

 

يعنى لو حسبناها على الشباب اللى فى الشات بس

 

هانلاقى ان نسبة الشباب اللى نواياهم سيئة جدا ً بتكون 13%

 

واللى دماغه نص فاضية بيمثل 33%

 

أما اللى ليه هدف ده بيمثل 64%

يعنى نسبة كويسة مش وحشة

 

وأعتقد أنت طبيعى كبنت فى اللى بيدور عاليكى فى الشات ودائماً بتصطادمى بيه هما 46% الأوليين

فعلشان كدة كدة بيتهايئلك أن الشباب معظمه هايف

 

وتقريباً نفس الموضوع بالنسبة لشباب الجامعة

 

اما حكاية الكورة والفلوس فأنا اعتقد أن كل الشعب رجاله ونسائه كبيره وصغيره معظمه مش لاقى حاجة يتكلم فيها غير فى الحاجتين دول

 

يعنى كنت أقصد بكلامى ده ان اللى ليه هدف من الشباب ودماغه مش فاضية نسبته مش قليلة

 

والحمد لله ربنا بيذيد ويبارك