الحكاية بتبدأ من حوالى سنتين....

[zoro_hf 8]

الحكاية بتبدأ من حوالى سنتين....

العفش بينزل من على عربية النقل...

 

و انا واقف فى البلكونة.. وبسأل امى (اللى كانت واقفة تنشر الغسيل): هو فى حد هيسكن هنا ولا ايــه يامـي؟

قالتلى اه يا حبيبى دى الشقة اللى قصادنا

قلتلها ويا ترى عرسان جداد ولا عيلة وبتعزل؟

قالتلى والله يابنى مانا عارفة

قلتلها طيب.. يا خبر انهارده بفلوس.. بكرة يبقى بفلوس اكتر..

 

و بعد أسبوع......

أمى واقفة بتنشر الغسيل بردو.. وانا واقف جنبها بردو.. وبتقولى: مش السكان الجداد وصلوا خلاص

قلتلها يا شيـــــخة!

قالتلى: اه.. مرات الراجل عدت عليا انهارده وسلمت عليا وعرفتنى بيهم

قلتلها: ايــه بقى عرسان جداد؟؟

قالتلى لا دول أسرة.. عندهم ولدين وبنت

قلتلها خير.. خير.. (والشر بيبظ من عينيا)

 

و أثناء الحديث الشيق ده..

طلعت مامت الولاد م البلكونه.. ولما شافت أمى هزت راسها - بتسلم على امى يعنى -.. وطبعا أمى ردتلها الهزة - بترد السلام يعنى -

و بعدين طلع ولد صغير ابتسم لنا اول ما شافنا....

أصل البلكونة فى وش البلكونة ... بس باين عليهم ناس طيبين اوى...

المهم.. الأم ندهت لبنتها...

الحقيقة انا كنت أول مرة فى حياتى أسمع الاسم اللى هى ندهت به..

أول مرة أعرف ان فى بنت اسمها كده أصلا...

 

الام بتنده: يــــــا روفيدة (على وزن بثينة , بضم الراء يعنى)

اسم جامد مووووووت... عجبنى الاسم اوى... وبدعى ربنا تكون رُفيدة حلوة زى اسمها..

و طلعت روفيدة من ورا الستارة فـى حركة Slow Motion من بتاعة الافلام..

و انا متنح تتنيحة سوده... روفيدة طلعت احلى من اسمها.. جميلة جمال لا يوصف... ناصعة البياض..

مش قادر ارفع عينى من عليها.. مينفعش ارفع عينى من عليها اصلا...

فضلت متنح لحد ما شافتنا انا وامى..

لما شافت امى ابتسمت لها..

 

و لما شافتنى زى ما تكون شافت عفريت ودخلت على جوة جرى...

 

 

و تمر الأيام..

و مشكلتى ان البلكونة بتاعتنا تدخلها من اوضتى.. عشان كده فى الرايحة والجاية ابص اشوف روفيده واقفة ولا لأ..

ساعة ما الاقيها واقفة.. اطلع البلكونة..

مرة اعمل نفسى بتكلم فى التليفون.. او بشم الهوا مثلا - مع إن الدنيا تراب وعفرة -

او بلعب عشر ضغط.. اى تلكيكة والسلام

الغريب انها كانت فى الاول لما تشوفنى تروح داخلة جرى على جوة..

لكن بعد فترة لاحظت انها مكانتش بتدخل اول ما تشوفنى.. وكانت بتفضل واقفة هى كمان...

بقيت فى عز الشمس اقف.. لحد ما اعرق واجيب جاز.... فى عز البرد واقف بتكتك م البرد

واقف بالساعات مدام روفيدة واقفة... ارمى نظرة.. ابتسامة.. أشاور

و كانت هى بتكتفى بالابتسام وعلامات الخجل...

 

و ف يوم من ذوات الايام..

بشاورلها.. شاورتلى

بقيت هطير م الفرحة.. روفيده شاورتلى يا جدعان...

قعدت اطنطط ع السقف وأغنى وحياة قلبى وأفراحه..

و هبا إيـه هبا أاه.. إن شاء الله هنظبط

امتى بقى اتكلم معاها ونهظر سوا...

 

لحد ما جه اليوم...

انا راجع م الكلية.. وعلى اول الشارع شفت أمى واقفة مع مامت روفيده..

و المفاجاة: روفيده واقفة معاهم

لقيت نفسى بجرى زى شخصيات الكرتون.. نصى التحتانى بيجرى قبل نصى الفوقانى تشووووووووو...

لحد ما بقيت عندهم.. عرقان طبعا وبنهج وحالتى حالة...

نزلت عليهم زى الباراشوط..

ازيك ياماما.. ازيك يا طنط عاملين ايه...

و بصيت لرٌفيدة.. كانت بصالى وبتضحك..

كانت زى القمر اليوم ده.. ولابسة تى شيرت حمالات - اصل الجو كان حر اوى اليوم ده -

قلتلها: ازيك يا روفيده؟!

و كان رد فعلها غير متوقع بالمررررة... كان صدمة حقيقية بالنسبة لى..

لقيتها بتمد ايديها وبتسلم عليا...

و بتقولى: الحمد لله.. ازيك انت؟؟!

رحت مسلم عليها....

و قلتلها: الله يسلم قلبك يا روح قلبى..

و رحت بايس ايديها....

و رحت شايلها...........

و قلتلها: انتى عندك كام سنة بقى؟؟

 

 

قالتلى عندى 3 سنين

 

 

رحت بايسها تانى وانا هطير م الفرحة وفضلنا نلعب ونضحك ونهزر... لحد ما مامتها شالتها وطلعوا البيت

و من يومها وانا وروفيده اصحاب... كل ما تطلع البلكونه نلعب ونهزر مع بعض

 

 

ههههههههههههههههه

[بنت مصرية 66]

ههههههههههههههههههههههههههه

ايه ده ياعم اخدتنا في دوكة وضحكت علينا :llll:

وفهمتنا انك ..........

بجد خطيرة يازورو

ايه المنتدي الي كلو ادباء ده

:) :) :)

[أحمد سيف 3]

حلوة الاشتغاله دي

 

لا انا بدأت اصدق

 

 

طب ما تطلب ايد روفيده ولا اقولك خد روفيده كلها على انها ايد

 

 

 

ربنا يهديك

[EL3aref 5]

 

بصراحة لحقت نفسك يا زورو ..

طريقة سرد اكثر من رائعة ..

جمــــــــــــــــــــــــــــيل يا زورو ..

[حنان القلب 1]

فنان والله تصدق انا عشت الدور معاك اوي

بس انا متغاظه منك اوي اوي اوي اوي اوي

وعموما كان نفسي افرح فيك بس شكلك انت اللي فرحت فينا كلنا

وضحكت علينا عموما نعيش وناخد غيرها بس من حد تاني غيرك

عشان انت جبت آخرك معانا وحسابك تقل اوي اوي اوي اوي برضه

[Shetos 2]

جميل جداً يا زورو

 

والله جميل

 

أسلوبك فى السرد أكثر من رائع

[semsem111 0]

افهم من كده ان موضوعى قصة حبي الاولى والاخيرة

هى التى اثارت اشجان زورو

 

لكن قصة انما ايه (اسات الظن بيك فى نص القصة وكنت ناوى اديلك كلمتين )

 

 

لكن 000

معقول000

مش ممكن

 

 

معقول ان روفيدة بعد ما سابت البيت جنبنا

وبعد قصة الحب الكبيرة

 

تشاغل غيرى وبمنتهى البساطة

 

 

الخاينة

[mahmoued 0]

ياباشا متشكرين على الاشتغالة ده انا صدقة وكنت منسجم وخالص وانسجمت بس بجد اشتغالة حلوة .

[zoro_hf 8]

شكرا على مروركم اخوانى الكرام

ويارب القصة تكون عجبتكم

[NADA 34]

قالتلى عندى 3 سنين

 

 

ما كويس اوى كده يا زورو

ده انسب سن على ما تربيها وتكبر

 

يكون انت يا دوب معاك تمن الشبكه

 

علشان تليق بالعروسه **روفيدة** بضم الواو

واو ايه بس لا اقصد ضم الراء

اصل الضمه بتفرق ف المهر الايام دى

 

هههههههههههههههههههه