حس التلاوه جمال بخيت

[الجندى المجهول 37]

رتيلى بيصب ف نيلي

رقة واحساس وحلاوة

وبنيت وزوقت سبيلي

على ندى احلى تلاوة

لسّانى باسمع ف الحصري

بقلبى وبروحى وبصري

تجويد على فن وتغريد

على شوق

من الحس المصري

على حنان على مية ورد

على رحمة ف عروقى بتسري

لسّانى باسمع ف الحصري

وباعيش

على صوته

نعيمي

أبدأ صلاتى وتسليمي

يصاحبنى صوت البهتيمي

يباركنى حس المنشاوي

يطربنى حس الطبلاوي

يصفالى حس الشيخ عمران

صوت عندليب .. ودعاء كروان

ساعة ما يتلو من القرآن

آيات رضا واعجاز وبيان

المئذنة لما ارتفعت

عرفنا ان الشيخ رفعت

بيشد عودها بأدانه

وهيه دايبة ف وجدانه

نور الآيات

لَمَس العمران

كل الشهور حاوطت رمضان

والحضرة بدأت بالغفران

عبد الصمد

يتلو " الرحمن "

و " النور "

وبعديها " الفرقان "

يأتينا من حلو الترتيل

وكأننا ف حضرة جبريل

احمد ندا يقرا " الانسان "

الروح تطيب من أوجاعي

ويهل صوت الشعشاعي

يسقينى من نبع " الكوثر "

و " التوبة " ف ضميرنا بتحضر

وآدى مصطفى من بيت سماعين

صب الندى ف روح السامعين

نعلا معاه من دنيا لدين

صوت العرب

يامستمعين

بيذيع تلاوة على محمود

جدى انتشي

وآخر العنقود

لما ابتدا بسورة " الاخلاص "

و " قل اعوذ برب الناس "

م البسملة بنقول : الله

ونعيدها تانى ف " صدق الله "

إسمع شعيشع واتهني

على فرع منسوب للجنة

الصيفى .. غرّد .. والبنا

لاقينا ف السورة وطنَا

ورأينا ف الروضة مكانَا

الصيفى .. غرّد .. والبنا

لا عرفت امشى ولا استني

وبلادى مفتوحة قصادي

سمعت صوت شيخنا القاضي

عبدالعظيم زاهر راضي

واحمد نعينع لو يقرا

بالقلب اسمع وانصت له

ومصطفى غلوش .. راغب

يقرا الآيات

فابتسمت له

وانا رايح اسحر

ف بلادهم

وامد قلبى بمددهم

ألاقى ناس بتقول : الله

وألاقيني

ما اعرفش عددهم

أوصل بصوتى .. لأبعدهم

أقول يامصر المحروسة

دول الولاد .. وانا اسعدهم

ولا حد يعزف أرغولك

ولا حد ف الحق .. يطولك

ولا حد بيكى هايتساوي

على ندى .. احلى .. تلاوة ..

المنشد

مبروك عليكو النهار

ياللى انتو صايمينه

مبروك عليكو الليل

ياللى انتو قايمينه

مبروك عليكو الشهر

رحمة وعبادة وشفا

وفتح بالمعرفة

من العلى العظيم

المغنــى :

إقرالى ما تيسّر .. من صفوة البيان

المصحف المُفسّر .. يملانى بالحنان

بيـــن مــــكة والمــديـــــنة .. قرآن بيـحـــس بينــــــــا

واللى تركه .. تحسّر..

إقرالى ما تيسّر ..

...

إقرالى من آياتى .. ما يسمو بالعقول

يشفى لى سنين حياتى .. بصلاتى على الرسول

والشمس وما بناها .. نور القرآن تباهي

بنصر نبينا طه .. صنم الاصنام تكسّر

اقرالـــى مــا تيـــــسّر ..

...

اهدينى بحق " اقرأ " .. احساس يشعر ويفهم

لسان .. ف الحق .. أجرأ .. وضمير بالعدل أعلم

اجعل ف العلم جاهى .. وصحح لى اتجاهي

واجعلنــــى يـــا إلهـــــى .. لكــل جميــل .. مُيــــسّر

اقرالــــى مــا تيـــــسّر..

المـــؤدى :

إنتى الخلود .. مهما تروحي

لا بتغرقى .. ولا بتنوحي

الدنيا تحتار من صمتك

وبتهمسى لى .. وتبوحي

إنتى الخلود .. وانتى حياتي

ونجاتى .. وسفينة نوحي

بسم الله اسمع ترتيلك

المولى يهدينى فتوحي

لو الزمان عنك حاشني

وصوتك الحلو وحشني

يقابلنى صوت طه الفشني

تطيب على البعد جروحي

النقشبندى .. بيمشى وحيد

يملا بلاد الله تغريد

تسابيح مدد .. وغُنا .. وتجويد

على ما تيسر من روحي