لو كان كده أنا ممكن أغني, هوا أبو الليف أحسن مني

[دعوه للجنه 457]

لو كان كده أنا ممكن أغني, هوا أبو الليف أحسن مني

 

كنت انا راكب جوا التاكسي

والسواق كان شخص لطيف

شغلّنا أغنية وقالّي

دي في الحر ولا التكييف

لكن فجأة بدون تقديم

التسجيل لقناه بيخرف

قلت اتصرف

قالي استني هتعمل إيه ؟

قلتلوه سامع

الصوت بايظ قوي كده ليه ؟

ما تخافشي ...

انا فاهم فيه

لحظة ويرجع تاني سليم

لو خايف ع القرش ياسيدي

مش عايز منك مليم

اصلا مش محتاج مصاريف

قالي اسكت وبلاش تخريف

عامل نفسك قال مش عارفه

وبتسطعبطني يا أليف

دا معلم في الوسط الفني

قولتله : إيه ؟؟؟

هوا دا بيغني ؟؟

عقلي يا عالم هيروح مني

طب لو كده

انا ممكن أغني

انت اكيد بتهرج طبعا

بطل بقي يا دم خفيف

قالي مكانك

انت بتتريق يا ظريف

دا أبو الليف

فنان مش محتاج تعريف

صوت مسمع كل الدنيا

في مدينة أو حتي في ريف

نجم الصيف دا وأيها صيف

اسمع كده كلمات أغانيه

شغل مخك ركز فيه

بيغني وبيقول بلغتنا

راجل من توبنا وحتتنا

أحسن مللي تغني إيطالي

ولا النايتي بتاع : تعلالي

بص ياغالي

أحلفلك بالله وعيالي

ان انا عارفه ولسة أصحاب

كان سواق علي تكتك جنبي

عمره في شدة ما مشّى وسابني

طول عمره اصيل قوي ونضيف

جابلي هدية في شبكة أختي

بلطة ومطوة وسنجة وسيف

دا أبو الليف

ليه مستغرب انه يغني

دا معلم في الوسط الفني

قلتلوه صادق والله ياسطي

اصل الفن خلاص بقي واسطة

يا زمان ماشي بالمقلوب

والغلبان علي طول مغلوب

هوا أبو الليف أحسن مني

علشان يبقي صوته مسمع

ومعلم في الوسط الفني

ولا أكمني

لما بألف شعر وأغني

كل كلامي يكون موزون

شعري يكون ليه قيمة ومعني

ولا خلاص راح زمن المغني

واصبح أي كلام يتقال

بموسيقي وقابلية موال ب

يبقي الفنان صوته مسمع

ومعلم في الوسط الفني

طب لو كده أنا عايز أغني

هوا أبو الليف أحسن مني ؟

هوا أبو الليف أحسن مني ؟