أنا نازل ميدان التحرير الجمعة 29 / 7 .. حوار حقيقي بين مؤيد ومعارض للنزول في جمعة الإرادة الشعبية

[عاشق الصداقه 525]

أنا نازل ميدان التحرير الجمعة الجاية 29/7

 

(هوية - تطهير – إرادة شعبية)

 

حوار حقيقي بين مؤيد ومعارض للنزول في جمعة الإرادة الشعبية

 

 

 

معارض : أنت ليه نازل ميدان التحرير الجمعة الجاية ؟

 

مؤيد : علشان أطالب بتطهير مؤسسات الدولة من كل رموز الفساد والمطالبة بدم الشهداء وجدية التحقيقات مع الفاسدين وكمان علشان هوية مصر الإسلامية واحترام الإرادة الشعبية اللي بترفض المبادئ الحاكمة للدستور

 

معارض : طيب هو في حد اتكلم عن الهوية الإسلامية لمصر ؟

 

مؤيد : أيوه الجماعة بتوع المبادئ الحاكمة للدستور

 

معارض : طيب وانت مش عاجبك المبادئ دي في إيه ؟ ولا أنتم بقى عاوزين دولة دينية زي ما بيقولوا ؟

 

مؤيد : لا يا سيدي احنا مش عاوزين دولة علمانية ولا دولة دينية بالمفهوم الغربي احنا عاوزين دولة إسلامية والدولة الإسلامية دي دولة مؤسسات والشعب فيها بيعبر عن إرادته بحرية بشرط واحد بس وهو عدم مخالفة الشرع

 

معارض : برضو لسة ما فهمتش ليه بترفض المبادئ دي ؟

 

مؤيد : أولا / مافيش حاجة اسمها مبادئ فوق دستورية لأن الدستور هو أعلى وثيقة في الدولة .

 

ثانيا / المبادئ دي مش هتعبر عن إرادة الأمة لأنها مش هتتعرض على استفتاء شعبي وانما فئة قليلة من الناس عاوزة تفرض رأيها على الشعب كله

 

ثالثا / الناس اللي بيطالبوا بالمبادئ دي هما بتوع الدستور أولا وكمان هما بتوع المجلس الرئاسي ولما فشلت خططهم والشعب كشفهم بيحاولوا يلتفوا على الإرادة الشعبية بالمبادئ دي

 

معارض : طيب وهما بيعملوا كدا ليه ؟

 

مؤيد : علشان عاوزين مصر تكون علمانية ولأنهم عرفوا إن دا صعب دلوقتي فبيحاولوا يقلصوا دور الشريعة في الدستور الجديد

 

معارض : وإيه الدليل على كدا ؟

 

مؤيد : الأدلة كتير منها إن كل اللي بيطالب بالمبادئ دي هما نفس اللي كانوا بيطالبوا بإلغاء المادة الثانية من الدستور أو على الأقل تعديلها وكمان لسة اللي اسمها منى ذو الفقار عضو المجلس القومي لحقوق الانسان بتقول ( تم التوافق على تعديل صياغة المادة الثانية من الدستور وذلك في الوثيقة التوافقية للدستور )

 

معارض : طيب في سبب كمان مش هيخليني أنزل .

 

مؤيد : ايه هو ؟

 

معارض : إن اللي هينزلوا دول الجماعات الإسلامية وأنا مش تبع أي جماعة .

 

مؤيد : طبعا مش صحيح لأن اللي هينزلوا هما كل المسلمين الغيورين على دينهم وشريعتهم وكمان كل المصريين الشرفاء حتى من غير المسلمين لأنهم بيحترموا الإرادة الشعبية والجمعة دي هيكون شعارها

 

(هوية - تطهير - ارادة شعبية)