قصيدة مصر ياما يا بهيـة للشاعر أحمد فؤاد نجم

[الجندى المجهول]

مصر يا امّة يا بهية

 

 

 

قصيده بهيه للشاعر احمد فواد نجم

يسبق كلامنا سلامنا يطوف ع السامعين معنا

عصفور محندق يزقزق كلام موزون و له معنى

عن الارض سمرا و قمرا

و ضفه و نهر و مراكب

و رفاق مسيرة عسيرة

و صورة حشد

و مواكب

ف عيون صبية بهية

عليها الكلمة و المعنى

***

مصر يا امّة يا بهية

يام طرحة و جلابية

الزمن شاب و انتي شابة

هو رايح و انتي جاية

جايه فوق الصعب ماشية

فات عليكي ليل و مية

و احتمالك هو هو

و ابتسامتك هي هي

تضحكي للصبح يصبح

بعد ليلة و مغربية

تطلع الشمس تلاقيكي

معجبانية و صبية

يا بهية

***

الليل جزاير جزاير

يمد البحر يفنيها

و الفجر شعلة ح تعلا و عمر الموج ما يطويها

و الشط باين مداين

عليها الشمس طوافة

ايدك في ايدنا

ساعدنا

دي مهما الموجة تتعافى

بالعزم ساعة جماعة

و بالأنصاف نخطيها

***

مصر يا امّة يا سفينة

مهما كان البحر عاتي

فلاحينيك ملاحينيك

يزعقوا للريح يواتي

اللي ع الدفة صنايعي

و اللي ع المجداف زناتي

و اللي فوق الصاري كاتب

كل ماضي و كل آتي

عقدتين و التالته تابتة

تركبي الموجة العفية

توصلي بر السلامة

معجبانية و صبية.. يا بهية

***

و يعود كلامنا في سلامنا يطوف ع الصحبة حلواني

عصفور محني يغني

على الأفراح ومن تاني

يرمي الغناوي تقاوي

تبوس الأرض

تتحنى

تفرح

و تطرح

و تسرح

و ترجع تاني تتغنى

احمد فواد نجم _ بهيه _ شعر احمد فواد نجم _ بهيه لاحمد فواد نجم _ قصائد احمد فواد نجم _

قصيده بهيه للشاعر احمد فواد نجم _

قصيده عصفور محندق يزقزق كلام موزون و له معنى

[eng_alaa]

مصر يا امّة يا بهية

يام طرحة و جلابية

الزمن شاب و انتي شابة

هو رايح و انتي جاية

 

شاعرنا الكبير يا محلي كلامك المحفور في قلوب عشاق الوطن .. شكراً لك أخي الجندي المجهول علي نقل الشعر الجميل للشاعر الجميل أحمد فؤاد نجم

[تقوى القلوب]

الفجر شعلة ح تعلا و عمر الموج ما يطويها

 

الله

تسلم على الجملة الجميلة جداَ دى

[الجندى المجهول]

الله يسلمك تقوى

[El-Saher Fantasy]

أردت أن اقتبس جزء من القصيدة

فلم اعرف اي جزء اختار

بحـــــ مصــــــر ــــــــب

 

تسلم ايدم جندينا المعروف

تذكرنا بأشياء لم نستطع أن ننساها

[الجندى المجهول]

حبيبى ورح قلبى

مصر حيبه الكل

تسلملى يارب من كل شر

[محب الحبيب]

كلام جميل وشاعر اجمل وعضو في غايه الروعه انك بتدينا فرصه نطلع علي هذه

 

اللوحات من الشعر المصري

 

جميل اوي يا ايها الجندي ولكنك لست مجهول بل مواضيعك تعرفنا عليك بأحلي واطيب الكلام

[الجندى المجهول]

والله كتير على الكلام ده

الله يكرمك والجنه يوعد وسعاده ا لنظر الى الله يفرحك

[ali desoky]

الزمن شاب و انتي شابة

هو رايح و انتي جاية

جايه فوق الصعب ماشية

فات عليكي ليل و مية

و احتمالك هو هو

و ابتسامتك هي هي

 

 

شكرا لك ياخي العزيز

 

لنقل هذه القصيده الجميله

للشاعر الجريء احمد فؤاد نجم

[الجندى المجهول]

الشكر لله اخى

ربنا يكرمك حبيبى