نودة 41 قام بنشر January 24, 2013 عدنا من جديد ونعتذر عن الإنقطاع وذلك بسبب الإمتحانات نسأل الله أن ييسرلنا ولكم .... ايه اخبار اوعى تبطّل معاكوا؟؟ اتكلمنا من قبل على :- حسن الظن بالناس حسن التعامل مع الناس حب الخير للغير وآخر حاجة كانت >> اوعى تبطّل تسامح غيرك والمرة دي حنتكلم عن موضوع جديد مش خاص بالشباب بس لأ للأخوات كمان اوعى تبطّل تكون جدع؟؟ انت جدع ولا لأ؟؟؟؟ لألألأ مش الجدعنة إنك تقف في الشارع تزعق مع حد وانت غلطان وتهزئه ولاتمسك حد ترنه علقة سخنة عشان ضايق صاحبك انت لما بتكون في طريقك لبيتك بعد يوم طويل من التعب والشغل وواقف في الاتوبيس ولقيت راجل كبير واقف وانت قاعد حتقوم ولا حتمشي بمبدأ اعمل نفسك ميت وتقعد تتفرج من الشباك وتعمل نفسك مش واخد بالك منه؟؟ طيب انت لو لقيت واحد تايه في الشارع وغريب عن البلد ممكن تاخده توصله ولا حتقوله سكتك خضرا وتطلع تجري!! طيب لو لقيت صحابك قاعدين يسخروا (يتريقوا) من زميل ليكم حتفضل قاعد معاهم ولاحتكون جدع وتقولهم اسكتوا او تقوم وتسيبهم!!! طيب لو مشيت في الشارع ولقيت قشرة موزة ممكن تزحلق أي حد ممكن تاخدها تحطها على جنب ولا حتتكسف عشان شكلك ميبقاش وحش والناس متقولش عليك بتاع قمامة!! طيب لو روحت في يوم البيت ولقيت زوجتك تعبانة طول النهار من كتر مااشتغلت حتقولها يلا اجري روحي حضريلي لقمة أكلها ولا حتقولها انا ححضر وتقولها كدا وانت مبسوط وفرحان انك بتطبق سنة النبي صلى الله عليه وسلم في خلقه الكريم مع زوجاته؟؟؟ طيب لما انتي بتروحي بيتك بعد المدرسة ولا الكلية وتلاقي المواعييييين اد كدا في المطبخ بيكون رد فعلك اييييه بتتغدي وتدخلي تنامي ولو عملتي كدا مامتك مش حتقولك تلت التلاتة كام لأنك بتدرسي وتعبانة ولا بتقوليلها والله ماحد حيغسلهم غيري وتقفي تيجي على نفسك عشان مامتك ضهرها ميوجعهاش؟؟؟ طيب لو شفت اختك في شعراية باينة من حجابها بتسيبها تنزل عادي كدا ولا بتعمل إيه ؟؟ طيب لو كنت قاعد في يوم لوحدك وبتقلب في التلفزيون ولقيت حاجة مش كويسة ممكن تتفرج عليها عادي مفيش حد شايفك ولا حتعمل ايه؟؟؟ طيب قولي صحيح جربت قبل كدا تاخد حذاء والدك أو والدتك وتلمعه نعم !! اه والله جربت بجد ولا لأ؟؟؟ دا مش نوع من أنواع البر .. ماهما ياااما اهتموا بييييك وبشكلك وهما في غاية الفرح !! طيب خلاص بلاش الأحذية جربت تُقبل رجل أمك أو أبوك؟؟ طيب جربت في عز البرد تاخد طبق من أكلك وتنزل تدور على حد جعان في الشارع وتقوله خد عشان تدفى!!! ايه مجربتش أي حاجة من دي ؟؟؟ امال انت بتعمل ايه في حياتك؟؟ أصلها مش بالعضلات وبالقوة بتاعتك وبالميداليات اللي اخدتها في الكاراتيه لالالا الجدعنة يعنيأخـــــــــــــــــــلاق يعني تشوف ناس بتعمل حاجة غلط وتقولهم مينفعش يعني نفسك تقعد تزن عليك طول الليل عشان تقوم تعمل المعصية الفلانية وتقولها والله أبدًا مايحصل إني ربي أحسن مثواي يعني تكون غيور على أهلك ومش سايب الدنيا ماشية بالطول والعرض يعني يكون ليك رأي وموقف ثابت على الحق دايمًا في وش أي حد أيًا كان الجدعنةيعني تبر أبوك وأمك ومتخليهمش يحتاجوا أي حاجة وانت معاهم يعني تصبر على أبوك وأمك لما يكبروا في السن ويقعدوا يزيدوا ويعيدوا في الكلام يعني متقولهمش ماخلاص بقا اتكلمنا 100 مرة في الموضوع دا يعني تكون رحيم بيهم لأنهم بيكونوا محتاجينك أوي الجدعنةيعني تحاول بدل ماانت قاعد فاضي تروح تشوف جمعية خيرية تطوع معاهم وتساعدهم او إنك تاخد عيالك وتقولهم يلا بينا نروح دار ايتام او تاخدي هدوم ولادك القديمة وتطلعيها لله بدل ما تدخليها المطبخ وتستخدميها في تجفيف المواعين الجدعنة يعني اقدر اوقف نفسي عند حدها يعني اعرف ربنا ايه اللي بيرضيه وأسارع في عمله يعني اعرف الرسول كان خلقه صلى الله عليه وسلم كذا واروح اعمله على طول من غير ماألف وأدور الجدعنةيعني لما اغلط في حد او حتى اغلط مع نفسي اعترف بخطئي و أروح أقول أنا آسف أنا غلطت مش أكابر وأجادل الجدعنة إني لما اشوف واحدة كبيرة ماشية في الشارع وشايلة اكياس تقيلة اقولها عنك يا حاجة انا زي ابنك برده وتششييييل.. الجدعنة انك تكون جدع مع نفسك وفي عهودك مع ربك ومع الناس وفي كل حاجة في حياتك لو كل واحد حاول يقعد مع نفسه وكل يوم بعد مايروح بيته يقعد يستغفر ولو غلط في حد يعتذرله ولو عمل أي تصرف سيئ يقرر ميعملهوش تاني صدقني حتتغير وكل يوم حتلاقي الاخطاء بتقل بتقل لحد ماتنتهي وتظهرلك عيوب تانية في نفسك تبدأ تصلحها لحد ماتلاقي نفسك بقيت إنسان تاني بس قبل ماتعمل كل اللي انا قلته دا قوول لنفسك انا حكون جدع ليه؟؟؟؟؟ عشان يقولوا عليا كذا والناس تعجب بيا و........إلخ ولا عشان يبقى رسول الله صلى الله عليه وسلم قدوتي في حسن الخلق ولا عشان ربنا حبيبي يرضى وعشان أتأسى بالصحابة؟؟؟ تعالوا دلوقتي ناخد أمثلة من حياة السلف والصحابة لما حضرتْ سعيدَ بن العاص الوفاةُ قال: يا بَنِيَّ، لا تفقدوا إخواني مني عندكم عين وجهي، أَجْرُوا عليهم ما كنتُ أُجْرِي، واصنعوا بهم ما كنت أصنع، ولا تُلْجِئُوهم للطلب؛ فإن الرجل إذا طلب الحاجة اضطربت أركانه، وارتعدت فرائصه، وَكَلَّ لسانه، وبدا الكلام في وجهه، اكفوهم مئونة الطلب بالعطية قبل المسألة؛ فإني لا أجد لوجه الرجل يأتي يتقلقل على فراشه ذاكرًا موضعًا لحاجته فعدا بها عليكم لا أرى قضى حاجته عوضًا من بذل وجهه، فبادروهم بقضاء حوائجهم قبل أن يسبقوكم إليها بالمسألة.. ابن أبي الدنيا: الإخوان ص223.. قال ميمون بن ميمون:"أول المروءة: طلاقة الوجه، والثاني: التودُّد، والثالث: قضاء الحوائج". وقال ابن سلام: "حدُّ المروءة: رعْيُ مساعي البرِّ، ودفع دواعي الضر، والطهارة من جميع الأدناس، والتخلُّص من عوارض الالتباس، حتى لا يتعلق بحاملها لوْم، ولا يلحق به ذم، وما من شيء يحمل على صلاح الدين والدنيا، ويبعث على شرف الممات والمحيا، إلاَّ وهو داخل داخل تحت المروءة. وقيل لسفيان بن عيينة: قد استنبطت من القرآن كلَّ شيء، فأين المروءة فيه؟ فقال: في قوله تعالى: (خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ)[الأعراف:199]. ففيه المروءة، وحُسن الأدب، ومكارم الأخلاق، فجمع في قوله: (خُذِ الْعَفْوَ) صلة القاطعين، والعفو عن المذنبين، والرفق بالمؤمنين، وغير ذلك من أخلاق المطيعين. أبدأ بإنك تشوف إنت فعلا جدع ولا لأ طيب انا حكون جدع ازاي؟؟؟ ((ايه الصفات اللي عايزها تبقى فيا عشان أتحلى بصفة الجدعنة أو المروءة)) طيب أنا حكون جدع ليه؟؟؟ ((خد النية بسرعة)) وبعد ماتعمل دا راجع نفسك كل يوم وشوف نفسك بتتقدم ولا بترجع للخلف >> ... نشوفكم المرة الجاية بإذن الله لاتنسونا من صالح الدعاء والسلام عليكم ورحمة الله وبركاته .. شارك هذه المشاركه رابط المشاركه شار ك علي موقع اخر
