ليه لازم تضرب عصفورين بحجر واحد

[فراس فراس 0]

طبعاً كلنا سمعنا عن حضارة الاندلس العظيمة والعريقة واللى هى كانت سبب فى تقدم اوروبا الى الان

 

بس حد سأل نفسه هيا ليه الحضارة العظيمة العريقة دى وقعت ...؟؟؟

 

السبب هو الناس ساعتها

 

لــــيه....؟؟

تعالوا نشوف مع بعض

أنقسم العرب وضعفت الخلافة وظهر الفاطميين والمماليك والايوبيين ولكن كانت مشكلة الأندلس كانت اعظم

فقد انقسمت الخلافة ألى دول أخرى قد تستطيع الصمود لوحدها

 

ولكن أنقسمت الأندلس الى طوائف

يعنى ممكن تلاقى واحد مؤمر على مدينة ذى اسكندرية كدة تلاقيه يستقل بيها عن الخلافة

ماهو الخليفة مش هايبص لآخر الدنيا ويسيب اللى حواليه

 

والعرب كمان مكنوش كتير فى الاندلس أصل الناس هناك ماكنوش بتوع حرب

فماخدوش فى ايد المسلمين غلوة لما جم يفتحوا البلاد دى

 

بس للأسف لحدوث خلافات فى الخلافة و علشان ناس وقعوا بين الخليفة الأموى وبين موسى بن نصير وطارق بن زياد فما كملوش فتح اوروبا

واقتصرنا بس على حتة من أسبانيا والبرتغال

وذلك بحجة خوف الخليفة من توسع الفتحات وعدم قدرته السيطرة على البلاد

 

عكس وجهة نظر طارق بن زياد اللى كان عايز يكمل الفتحات ألى أن يكمل أوروبا كلها فتكون بجانب الخلافة بدل ماتكون بعيدة عن الخلافة

وقال أن احنا لو ماكملناش الفتح واكتفينا بقطعة قطعة

فهاتتاخد مننا قطعة قطعة

 

وفعلاً عدت الخلافة الاموية وعدت العباسية الاولى وجه عصر الخلافة العباسية التانية وبدات الانقسامات

بس هو عموماً الأندلس انفصلت عن الخلافة فى اول الخلافة العباسية

 

حيث عندما تولى السفاح الخلافة وهو أول خليفة فى الدولة العباسية

قعد يقتل فى الأمويين وكل اللى كان ليه علاقة بيهم

فالمهم هرب واحد من الأمويين وهو عبد الرحمن الداخل هو واخوه الصغير اللى عنده 13 سنة

 

ياترى لو كنت انت مكانه كنت هاتفكر فى أخوك ولا هاتقول يالا نفسى

 

الى الاندلس وتحاف مع الأندلسيين وبايعوه على الخلافة وقامت حرب بينه وبين العباسيين

ورغم صغر سنه واللى كان وقتها عنده 26 سنة عرف ينتصر على العباسيين

وعمل اللى ماقدرشى عليه الخليفة وكبار الدولة الأموية

 

أنت عندك كام سنة دلوقتى وأيه اللى عملته..؟؟

 

وده كان أول أنقسام وهو الخلافة العباسية والخلافة الاموية فى الاندلس

 

المهم فضلت الاندلس بخيرها لحد ماضعف الخلفاء الامويين وبدء كل واحد يستقل بالمحافظة بتاعته

 

وللأسف ماتدركشى الأمويين الخطا واكملوا فتح اسبانيا على الأقل

 

تخيلوا كدة انا واخد من حد حتة من ارضه ووشى فى وشه

ده حتى لو هو سابنى أو ماقدرشى عليا

ولاده مش هايسيبوا ولادى

والموضوع مش هايخلص

 

وفعلاً كان ملوك اوروبا منتظرين اللحظة المناسبة لأسترجاع مالهم

 

وطبعاً مافيش أحسن من لاحظة الأنقسام للطوائف

 

بس رغم كدة ماهجموش علطول دول كانوا باستمرار باعتين جواسيس علشان يشوفوا أيه النظام

 

وكانت أبرزهم قصة هذا الجاسوس

راح الجاسوس على أنه تاجر فالمهم لقى ولد صغير تحت شجرة عمال يعيط وبشدة

 

فقاله أنت ايه اللى بيخاليك تعيط...؟؟؟

قاله أصل انا النبلة بتاعتى ماأصبيتشى الا عصفور واحد بس ومااصابتشى التانى

 

فقاله طيب أيه المشكلة ..؟؟

 

حد فيكم شايف أن فيها مشكلة

 

المهم انك ضربت عضفور منهم

 

فقاله :أصل ابويا قالنى لو فى اتنين من الفرنجة جايين هاجمين عليك وانت مامعاكشى غير سهم واحد

فلو السهم بتاعك ماضرابشى ألا واحد بس التانى هايموتك فى الحال

 

فراح الجاسوس راجع بسرعة لبلده وقال للملك :أوعى تهجم عليهم ..هما مستعدين لينا كويس قوى

ومدربين ولدهم كمان

 

وبعد عشرين سنة يعنى بعد مرور جيل

 

راح نفس الجاسوس ولقى شاب طويل عريض وقاعد تحت نفس الشجرة وقاعد يعيض

 

فساله عن ماذا يبكيه..؟؟

 

فكر كدة معاية ايه اللى ممكن يخلى شاب عنده حاجة وعشرين سنة يعيض..؟؟؟

 

 

 

قاله : أصل حبيبتى سابتنى وكنت مديها ميعاد النهاردة وماجتشى

 

فرجع الجاسوس فرحان لملكه وقاله: هو ده الوقت المناسب

وفعلاً أرسل الملك الجيوش وبمساعدة احد الملوك الخونة الذى باع نفسه لأمرأة ووثق فيما ستعضيه ضاعت الاندلس

 

وهى دية وظيفة جاسوس قرار الحرب

وهية انه يشوف :ياترى الناس مستعدين للحرب ولا لأ

ونفسيتهم عاملة أيه..؟؟

 

أنت مستعد...؟؟؟

[سحر العيون 3]

فقاله :أصل ابويا قالنى لو فى اتنين من الفرنجة جايين هاجمين عليك وانت مامعاكشى غير سهم واحد

فلو السهم بتاعك ماضرابشى ألا واحد بس التانى هايموتك فى الحال

 

كلام مظبوووووووووط

 

موضوع جميلللللللل

 

سلمت يداااااااااااااك

[فراس فراس 0]

الله يخليكى سحر

 

بس ماقلتيش انت مستعدة ولا لأ

 

ولا الرجالة بس هما اللى لازم يكونوا مستعدين

[سحر العيون 3]

لا مستعده متقلقش

 

بس الرجاله اكيد مستعدين اكثر

 

الرجال قوامون على النساء

[فراس فراس 0]

والله عندى شك ياسحر

 

انا الصيف ده بس شفت الدموع فى عين اكتر من واحد علشان اللى بيحبها هاتتخطب ولا هاتتجوز

 

وعمرى ماأتخيلت ان فى واحد ممكن يبكى علشان واحدة

 

غير لما شفت الموضوع ده بعنيا

 

والواحد فيهم ياسلام على الحالة النفسية اللى كان فيها

 

حالة من الانهيار التام والاستسلام والياس

 

يعنى الواحد فيهم كنت ممكن تعمل فيه اللى انت عايزه سواء خير او شر,بس للأسف صحابهم الوحشين أكتر

[AMR DAWAM 7]

موضوع رائع اخى فراس

ويستحق التقدير والتميز

فله من الفكرة قدرها ومن المضمون هدفه

جزاك الله خيرا

واتمنى من الله ان يكون كل الشباب على قدر كبير من الاستعداد

تقبل تحياتى

************************

[فراس فراس 0]

وانت ياعمرو ردك وكلامك متميز

 

بس ماقلتليش انت مستعد..؟؟؟

 

ويارب نكون كلنا مستعدين انشاء الله

[سحر العيون 3]

مستعدين ياررررررررررريس

 

متقلقش

المهم انت مستعععععععد

[فراس فراس 0]

انا كنت متأكد ان أنتى اللى هاتسألينى السؤال ده

 

وكنت مستنى صراحة ان حد يسألنى

 

علشان انقل الموضوع لاتجاه تانى

 

وهو أزاى يكون الواحد فينا يكون مستعد وازاى يعرف أن كان مستعد ولا لأ

 

الأستعداد مش مجرد كلمة

 

مش مجرد انى اقول ان انا مستعد يبقى انا مستعد

 

هو أول حاجة الأستعداد النفسى وده أهم حاجة

 

وهو ده اللى شفنا عليه الطفل

 

أنه مستعد نفسياً وعامل حسابه ان الفرنجة ممكن يهجموا عليه فى أى وقت

وبكدة الفرنجة هايفقدوا عنصر المفاجأة

 

وهنا بنقف وقفة علشان نشوف أهمية الأستعداد النفسى

فمثلاُ

فى واحد صاحبك قوى حبيبك ماتتوقعشى منه شر لما يعمل معك حركة مش ولا بد هاتزعل قوى منه لانك مش متوقع كدة منه

 

أنما لو كانت جد من واحد ماتعرفوش أو معروف عنه أنه مش ولابد

يمكن ماتزعالشى اساساً لانك متوقع منه كدة

 

والحل أنك تتوقع اى حاجة من أى حد لأن كل واحد فينا فيه الخير والشر

وتكون مستعد نفسياً دائماً لأسؤ الظروف ولاى حاجة واحشة

علشان لما تحصل ماتأثرشى عليك واقع المفاجأة

 

وهو ده اول استعداد ليا هو انى متوقع أى حاجة ممكن تحصل ومتوقع اننا هاييجى علينا الدور فى يوم من الايام

الله أعلم امتى

 

تانى حاجة الأستعداد الروحى

وطبعاً ده شئ أساسى

لازم يكون كل واحد فينا مؤمن بربنا ومؤمن بان النصر من عند الله

وأن اللى ربنا عايزه بيكون مهما كان عددهم ومهما كان الى يملكونه من اسلحة وعداد

ويفتكر دائماً غزوات الرسول عليه الصلاة والسلام والمسلمين وخصوصاً غزوة بدر

 

فبالنسبة للاستعدادالتانى فربنا أعلم منى باللى فى نفسى

وأتمنى منه انه يثبت قلبى وايمانى بيه

 

اما بالنسبة للأستعداد التالت

فهو ايه اللى عملناه ...؟؟؟

جسمك ايه اخباره يستحمل الظروف الصعبة ولا لأ...؟؟

ودى الحمد لله اتدربت عليها

 

جسمك جامد مليان عضلات تخوف بيها الأعداء لما يشوفوك..؟؟

ودى للأسف كل ماقرر ان اروح جيم او العب كمال أجسام يحصل حاجة تمنعنى

يعنى مقصر فى الموضوع ده شوية

 

ودولت من أهم الشروط اللى لازم تتوفر فى الجندى الصح

وده على اساس ان الواحد فينا لو هايشارك فى الحرب هايشارك كجندى يعنى مالوش دعوة بالتخطيط والكلام الخاص بالقيادة العليا للجيش

 

وهنا فى سؤال تانى بيطرح نفسه...

وهو ان لو حصل حرب وانت شغال وعندك شغلك ومالك وبيتك

ياترى ....

هاتقدر........

تسيب حالك ومالك

وتروح تحارب

 

عندك الاستعداد انك تضحى بكل اللى عندك علشان تروح تدافع عن البلد..؟؟

 

ولا هاتنشغل فى مالك وفى بيتك

 

وانتى هاتعملى ايه....؟؟؟

هاتسيبى جوزك او اخوكى اوأبوكى او ابنك يروح يحارب وتشجعيه

 

ولا هاتقوليله ..هاتسيبنى لمين ..؟؟سيب بتوع الحرب للحرب..هاتسيب ولادك لمين ..هانعيش منين لو مت وسبتنا

 

بالمناسبة الكلام ده هايقولنا زيه الشيطان علشان نرجع عن الحرب

 

أنا أعتقد ان كل واحد فينا هايقول :أيوة اروح هاحارب ومش هايهمنى حاجة

 

بس الكلام سهل....وسهل قوى

 

وهنا هل تتوفر فيك الشجاعة والتضحية...؟؟؟

 

الواحد فينا يمكن يكون فاكر نفسه شجاع

 

ولو حد رفع عليه بندقية او مسدس او طيرة او سيف او ماطوة أو شومة حتى

هايقطعه ويعمل فيها بطل سينما هاياخد المسدس ولا الماطوة ويديله عالقة جامدة

لو قابلت موقف ذى ده فعلاً وعرفت تعمل اللى انت فاكر نفسك تقدر تعمله

يبقى انت فعلاً ساعتها ممكن تروح تحارب

 

الولد الصغير كان استعداده فى انه بيتدرب انه يضرب عاصفورين بحجر واحد

 

وأبوه وامه كان استعدادهم انهم كانوا بيشجعوه وانهم يخلوه مستعد

 

ماقولتوليش أنت مستعد ولا لسة...؟؟؟

[سحر العيون 3]

من الناحيه النفسيه فا انا عن نفسيتى متحطمه طبيعى والحمد لله

 

من الناحيه الروحيه فالحمد لله ايمانى بالله كبير

 

الاستعداد الثالت والعضلات وكدا هههههه

 

فا انا زى العصفوره بيتهيقلى لو حد نفخ فيا هطير

 

شكلى كده مش مستعده بالمرررررررررره

 

وجينا لاصعب جزء فى الموضووووووووع

 

وانتى هاتعملى ايه....؟؟؟

هاتسيبى جوزك او اخوكى اوأبوكى او ابنك يروح يحارب وتشجعيه

 

سؤالك صعب جدا

مش عارفه اقلك ايه موضوع الحرب صعب جدااااااا

 

وانا عارفه ومتاكده ان اللى يروح الحرب ممكن يرجع وممكن ميرجعش

 

ثانيا الحكومه اللى احنا عايشين فى ظلها حرام الواحد يتفاعل

 

معاها ويحارب يعنى احنى شايفين ايه حلو منها ماهى مطلعه عنينا

 

وكمان الدستور الجديد اللى نزلوه سلبو المواطن كتير من حقه

 

وادوله حقوق ملهاش اى لازمه يقلولك ممكن يدخلو بيت اى مواطن

 

لو شكو فيه مجرد شك وديله حق الانتخاب واختيار الريس ههههههههه

 

مش عارفه بيضحكو علينا ولا بيستهبلونا

 

بس لو حسبتها من ناحيه ان ربنا وصانا على بلدنا وطبعا مصر

 

مذكوره فى القرآن لازم اخلى اخويا او ابويا او جوزى اوابنى

 

يحارب علشانها

 

ثانيا ان ربنا قال فى كتابه العزيز

 

بسم الله الرحمن الرحيم

ولا تحسبن الذين قتلو فى سبيل الله امواتا بل احياء عند

ربهم يرزقون

صدق الله العظيم

 

بعد كلام ربنا انا اكيد مليش كلام

 

وبعدين الواحد يموت شهيد ارحم من الدنيا واللى فيها

 

يعنى فيها ايه الدنيا حلو علشان نتمسك بيه

 

على الاقل هيموت شهيد يبقى فى الطبقه الاولى من الجنه

 

من الانبياء والصديقين

 

وشكرا على ردك

وياريت ردى يكون وصلك فكرتى

[فراس فراس 0]

بحييكى ياسحر على ردك

وخصوصاً

يعنى فيها ايه الدنيا حلو علشان نتمسك بيه

 

تانى حاجة نرجع للموضوع

الحكومة و...................الناس

 

الحكومة من الناس

 

وعلى اد مااحنا كويسيين على اد مالحكومة كويسة

 

وعلى أد مااحنا وحشين على اد الحكومة وحشة

 

وده اللى بيقولهونا الموقف ده

 

بيسألوا على بن ابى طالب رضى الله عنه

 

وبيقولوله ساعة ماكان ماسك الخلافة

 

انت ليه حكمك صعب ومليان مشاكل...؟؟والكلام ده ماكنشى موجود فى عهد عمر وابوبكر..؟؟

 

واخدين بالكم معاية بيقولوا لعلى بن ابى طالب اللى من العشرة المبشرين بالجنة, اللى هو أبن عم الرسول اللى هو رابع الخلفاء الراشدين,والناس بتشتكى من حكمه

 

تخيلوا.......

 

المهم قالهم أيـــــه.....؟؟؟

هم(يقصد عمر وابو بكر رضى الله عنهما)كانوا يحكمون امثالى

وانا احكم امثالكم

 

يعنى مهما كان الحاكم كويس ده بارده مش كفاية لازم احنا نتغير

 

وكمان لما ييجى حد يحاربنا

 

هايحاربنا احنا مش هايحارب الحكومة

 

واحنا لو ماحربناش هانروح فى الرجلين

 

يعنى احنا لما نيجى نحارب هانحارب لنفسنا مش هانحارب للحكومة

 

اما دور المراة فاهم دور ليها هو تأسيس الأسرة والاولاد

 

اما العضلات والكلام ده للرجالة

 

فكما قال احمد شوقى :

الام مدرسة أذا اععدتها اعددت شعباً طيب الاعراق

 

يعنو أنتم المدرسة اللى أحنا بنتعلم منهاوبتدفعونا للكويس أو الوحش

 

وشكراً مرة تانية سحر

[NADA 34]

ما شاء الله عليك يا فراس بجد

موضوع جميل جدا جدا بكل ما فيه

وكويس بجد ان ف ناس بتفكر لسه ف الكلام ده

لان انا ملاحظه ان لو الفرنجه جت بلدنا هتدخلها

علشان دلوقتى الشباب فعلا مش فاضين غير

علشان الخروجات والبنات والموضه والمنظرة

يعنى من الاخر كل واحد عايش حياته بالطول والعرض

وناسى البلد واللى فيها ولو فكرت تكلم حد

يقولك وانا مالى هى البلد كانت عملت لينا ايه علشان احنا نعملها

وحاجات كده غريبه وكتيرة ويقولو يارب امريكا تيجى علشان تخلصنا من اللى احنا فيه

كأن امريكا دى الصدر الحنون والملاك البرئ اللى هينقذنا من الحكومه بالظبط زى ما حصل ف العراق

طبعا الموضوع ده كبير مش سهل

 

 

لكن بجد انا بتمنى ان مصر تكون احسن من كده

عندى معيد سافر وقبل ما يسافر

سالته مش ناوى ترجع مصر تانى خلاص على كده؟!

قالى هقعد هنا اعمل ايه!!

انا لو هجى فعلشان اشوف اهلى وبس

يعنى كمان خمس سنين كده

وانا واثق ان مصر هتفضل زى ما هى كده

والا هتكون اوحش بكتير كمان انا سايبهالهم وماشى

طبعا كل الشباب بتعمل كده تقريبا مش هو بس

 

كان ردى وقتها ونفسى يحصل بجد

*اتمنى ان مصر بعد خمس سنين تكون اتغيرت وبقت احلى من كده بكتير*

 

انا هقولك انا مستعده ولا لا...

اولا اهم حاجه انك تكون بتحب بلدك حتى لو مش اديتك اى حاجه

انا الحمد لله بحب مصر جدا وبعترف انها اديتنى كتير

ممكن تكون مش ادتنى كل حاجه زى ما الدول الاجنبيه مثلا بتعمل

لكن يكفى انها البلد اللى ضمتنى العمر ده كله

وان كان الحكومه مش حلوة فصدقونى احنا السبب الاول

للاننا فعلا مش حلوين ومش بندى بلدنا حقها وسايبنها للى ناهبنها

وكل واحد بيقول يعنى انا هعمل ايه!! اهو ده بقى اللى موصلنا لكده وهيوصلنا لاسفل من كده كمان

 

بيتهيالى انى طولت عليكم لكن انا عندى حاجات كتير ه اوى ف الموضوع ده

 

بس ان شاء الله ربنا يقدرنا

فانا الحمد لله على استعداد انى ادافع عن بلدى واساس ده

ايمانى بالله وواجبى لبلدى

وحبى الشديد لوطنى الاول

وارادتى والطاقه اللى جوايا اللى ف لحظه هتكون قوة حقيقيه

وبعدين اى حاجه هتكون سهله بإن الله ما دام ده المحرك اللى جوايا

[سحر العيون 3]

شكرا يافراس على ردك

 

وبحيكى ياندى على ردك