لغز اينشتاين الذي تحدي به98% من سكان الارض

[سجده 45]

السلام عليكم ورحمة الله

 

كتب إينشتاين هذا اللغز بنفسه في القرن الماضي، وقال أن 98 % من سكان العالم لن يتمكنوا من حله:

 

 

 

 

يوجد خمس منازل لكل منها لون مختلف، يسكن كل منزل شخص من جنسية محتلفة، كل ساكن يفضل أن يشرب مشروباً معين، ويدخن سجائر من نوع معين، ويحتفظ بحيوان أليف، لا أحد من الجيران الخمسة يشرب نفس الشراب، أو يدخن نفس نوع السجائر، أو لديه نفس الحيوان الأليف.

 

 

 

المعطيات:

 

·يسكن البريطاني في المنزل الأحمر.

 

·لدى السويدي كلب.

 

·يحب الايرلندي شرب الشاي.

 

 

·البيت الأخضر على الجانب الأيسر من البيت الأبيض.

 

·مالك البيت الأخضر يشرب القهوة.

 

 

·الشخص الذي يدخن سجائر نوع "بال مال" لديه طائر.

 

 

·الرجل الذي يسكن البيت الأوسط يشرب الحليب.

 

مالك البيت الأصفر يدخن سجائر نوع "دانهيل".

 

 

·يسكن النرويجي في المنزل الأول.

 

 

·يسكن مدخن سجائر نوع "Plinds

مجاوراً لمن لديه قطة

 

 

 

·الرجل الذي لديه حصان يسكن مجاوراً لمن يدخن سجائر نوع "دانهيل".

 

 

مدخن سجائر نوع Blue master يحب شرب شراب الشعير

 

·يسكن النرويجي مجاوراً للبيت الأزرق.

 

 

·يدخن الألماني سجائر من نوع " Prince

 

 

· مدخن سجائر نوع "Plinds لديه جار يشرب الماء.

 

 

 

 

 

 

 

المطلوب حدد:

 

لون المنزل – الجنسية – المشروب – نوع السجائر – الحيوان الأليف، لكل واحد مع توضيح من منهم حيوانه الأليف هو "السمكه"؟

 

 

 

ملاحظة: لاتوجد خدعة في حل هذا اللغز، بل هو منطق صرف، من يعرف الإجابة بدون مساعده سيكون من ضمن أذكى 2 % من سكان العالم

 

 

ياللا يا شباب ورونا الهمه

 

[عاشق الصداقه 525]

من يعرف الإجابة بدون مساعده سيكون من ضمن أذكى 2 % من سكان العالم

 

مش للدرجه أختى الكريمة ،،

المشكله إن نص الفوازير مكتوب إن آينشتين اللى قالها ،، والنص التانى ان اللى حلوها فى العالم كله 5 و ........

كل دى أوامر جذب ولفت انتباه للفزوره مش أكتر

 

وعلى فكره مقصدش حضرتك ،، انا عارف ان الفزوره منقوله زى ما هى ،، انا اقصد اللى بيكتبوا الفزوره من الأول وينشروها بالشكل ده ،، كمان على ما اتذكر انها موجوده فى المنتدى هنا قبل كده !!

 

لو منطقيه بالورقه والقلم تتحل بكل سهوله .. محتاجه بس حوالى ربع ساعه ،،،

لو هى فعلاً صعب ان حد يحلها .. ومحدش حلها هنا .. هدخل أحلها بإذن الله وأكون من أذكى 2% من سكان الأرض

 

جزاكى الله خيراً لنقل كل ما هو شيق وجديد ومفيد

بارك الله فيكى اختى

[El-Saher Fantasy 21]

الفزورة دي تااااااااااااااااني؟

انا نفسي افضالها الفزورة دي

يا عاشق الداقة انا جايلك ان شاء الله نحلها مع بعض

وكده تاخد 7 دقايق ونص من كل واحد مننا

غريب اينشتاين ده

[Dr.A7MD 130]

جزاكى الله خيراً أختى على الموضوع

 

بمناسبة الموضوع ده حابب أقول حاجة

 

أولاً .... هل فى تأكيد 100% أن اللغز ده حطه اينشتاين !!!! ...... مظنش

 

ثانياً ... الشكل المبدئى بتاع اللغز ده بيقول أن فى شىء مشترك بين كل مجموعة من عناصر اللغز أو مشترك بينهم كلهم

 

والظاهر أنه لازم يكون عندك معرفة ما أو معلومة عامة عشان توصل لمفتاح حل اللغز

 

لو عندك المعرفة دى تأكد أنك هتحل اللغز بكل بساطة

 

ثالثاً ... فى ألغاز واختبارات تقيس مستوى الذكاء ودى ليها منهج معين فى وضعها ومش كل لغز يقيس مستوى الذكاء

 

اتعلمنا دايماً أن التعامل مع العقل والمخ البشرى ده تعامل خاص

 

وقياس قدراته عاوز نظام محدد يشتمل على خطوات كثيرة

 

يعنى مينفعش أعمل لغز واحط فيه حاجة مبهمة كمعلومة عامة مثلا أو تخصصية أو معرفة بشىء معين وأقول ده لغز لقياس الذكاء

 

المعرفة بالشىء لا تقيس أبداً مستوى الذكاء

 

بالبلدى كدا زى مبنقول ده لغز تفصيل

 

يعنى متفصل على شريحة معينه من الناس عندها معرفة مباشرة او غير مباشرة بمفتاح حل اللغز

 

يعنى مثال أهو

 

واحد اسم امه سعاد وخالته ناهد وعمته أسماء

 

كتبلك اللغز ده مثلا

 

محمد علاء فيصل .......

 

سامى أمير ....... هدى

 

حافظ ........... عز الدين

 

وقالك حلى اللغز ده

 

مش هيحل اللغز ده الا واحد عارف اسم امه ايه وخالته ايه وعمته ايه

 

وكل واحده فيهم اسم عيالها ايه أو جوزها

 

فأنت كدا بتحصر اللى ممكن يحلوا اللغز ده فى فئة معينة

 

وتلاقى نفسك يا عينى مموت نفسك عشان تجيب علاقة بين الأسماء دى

 

زى اللغز ده مثلا كمان

 

..... 8 1983

 

11 11 ......

 

10 ......... 1947

 

....... 2 1955

 

حلى بقى لو تقدرى ... ههههههههههههههه

 

تواريخ ميلاد بعض أفراد عيلتى

 

فهمتى القصد ايه !!!!!!

 

ومش معنى كلامى أنى محدش يقدر يحل اللغز ده

 

لا طبعا فى ناس هتقدر ..... بس مين اللى هيقدر !!!!!

 

الناس اللى بتوفيق من الله عز وجل يخليها تملك معرفة مفتاح الحل

 

أو تكون قعدت أخدت كوباية شاى مع صاحب اللغز وبعتلهم المفتاح مع عم حسنين النجار [ يعرفه عاشق الصداقه كويس ]

 

آخر حاجة ومعلش طولت

 

الاختبارات السليمة اللى بتقيس قدرات العقل البشرى ومستوى الذكاء

 

اللى دايماً بنشوفها بتتكون من خطوات

 

واللى معظمها لما بنشوف أولها بنقول " ايه الغباء ده .... للدرجادى اللغز هايف من اوله "

 

الحقيقة أن المخ البشرى زى العربية بالظبط

 

عمرك شفتى عربية بتطلع على الرابع علطول !!!!!!

 

وفرضا لو طلعت ...... هل لما تحب تطلع على الأول بعد كدا هتطلع بالشكل الطبيعى للغيار الأول !!!!

 

استحااااااااااااااااااااااااالة ........... هتلاقيها نطت نط منك

 

أهو العقل البشرى كدا بالظبط

 

فى ناس لما تخبطها بلغز صعب اوى تكون مركزه اوى اوى وتحله وتفرحى بيها

 

بعدها علطول اديله سؤال هايف جداً جداً جداً ومش عاوز الا بس رؤية عين واضحة

 

هتلاقيه بلم وتنح ولا عرف يحله

 

زى ما تقوليله كدا " ابن البغل ايه ؟؟؟ يقولك حصان "

 

دى اسمها حالة الهبوط العقلى

 

العقل لما تطلع بيه اطلع واحده واحده ..... ولما تنزل بيه انزل برضه واحده واحده

 

وبكرر وبقووووووووووووووووووووول " من يملك المعرفة يملك المفتاح "

 

وربنا يوفق كل اللى مقطعين نفسهم على الحل دلوقتى

 

ده كان رأيى الشخصى فى الموضوع وفى انتظار من يحل هذا اللغز

 

شد حيلك يا عم حسنين يا نجاااااااااااااااار

 

هههههههههههههههههههه

 

تحياتى ليكى

تم تعديل February 2, 2010 بواسطه Dr.A7md

[عاشق الصداقه 525]

هههههههههههههههههههههههههههه

 

يخرب عقلك يا دكتور أحمد

 

الله يسامحك هلكتنى ضحك ،،

 

وبعدين فى ايه يا إخواننا !! أنا حاس إن أختنا سجده خلاص مش هتكتب فوازير تانى ،، الموضوع كبر وإتكتب فيه كلام كبيرررررر

 

بس بجد .. كلامك كله صح يا دكتور أحمد ،، ما عدا طبعاً موضوع عم حسنين النجار ده ..

 

جزاكى الله كل الخير أختى ،، وفعلاً محتاجين حاجات تشغل الدماغ ،، مش معتمده على المعلومات

 

وده مش عيب فى موضوعك ،، كتير جداً من الموضوعات هنا كده !! ،، لكن إحنا بنوضح الصح ايه

 

ولو فى رد ضايق حضرتك إحنا ممكن كلنا نوقف عضوياتنا .. مش علشان فريق عمل وإدارة مثلاً هنيجى على موضوعك

 

جزاكى الله كل الخير وبارك الله فيكى ،، وياللا يا عيال .. إطلعوا ومحدش يحل ولا يتفزلك تانى ونقطونا بسكاتكم

[Dr.A7MD 130]

جزاكى الله كل الخير وبارك الله فيكى ،، وياللا يا عيال .. إطلعوا ومحدش يحل ولا يتفزلك تانى ونقطونا بسكاتكم

 

ماشى يا ذئاب الجبل .... حسابنا مع بعض بره الجبل ..... بس انزلى أنت بس على أرض زراعية

 

والله العظيم أختى سجده أنا بكن لها كل تقدير واحترام

 

وبنحنى اعجاباً لكل موضوعاتها والله

 

وهى عضوة متميزة والله

 

وكان غرضى والله من الموضوع التوضيح فقط .... عشان فى ناس والله لما تشوف الموضوعات اللى زى دى بتقول العيب فينا وفى دماغنا

 

والله ما اقصد أى حاجة بالرد ولا بالشرح الطويل ده الا بس أوضح حاجة درسناها وواجب علينا تبليغها للناس بشكل مبسط وبخفة دم

 

ولو الرد هيزعل اختنا سجده يتعدل ..... يتعدل ايه !!! ده يتشال من أساسه

 

وبجد والله كلى شوق ورغبة فى أنى أشوف أى حد يقدر على اللغز ده

 

بعد ما فشلت ذئاب الجبل فى حله

 

ربنا يكرمك أختى سجده وتنورينا كمان وكمان

 

بس بعدى عن عم حسنين النجار انتى بس

تم تعديل February 2, 2010 بواسطه Dr.A7md

[عاشق الصداقه 525]

بعد ما فشلت ذئاب الجبل فى حله

 

وغلاوتك ذئب الجبل ما فكرت حتى إنها تحاول ولا تجرب تفكر فيه ،،

 

==========

 

ورداً على ما تمت الإساءه إلى ذئاب الجبل به ،،

 

اليكم النبأ التالى /

 

قامت ذئاب الجبل بالتعاون مع عم حسين النجار بجلب الحل الصحيح بإذن الله

 

تفضلى أختى .. ولمن يهمه الحل بالصوره ..

 

 

والملف المرفق به ملف وورد بالحل

 

______________.doc

 

ويتضح منه أن صاحب السمكه هو الألمانى

 

تحيتى

[Dr.A7MD 130]

الكبير كبيررررررررررررر برضه

 

 

بس وغلاوتك عندى ما أقولك إلا الصراحة

 

وربنا أول حاجة عينيا رشقت عليها فى الصورة هى " دوحة "

 

 

لأنى أصلا لا فكرت فى اللغز ولا تعبت نفسى فيه من الأساس

 

بس بس بجد بجد

 

ذئاب الجبل ركبوا الجبل وقالوووووووووووووووووووووا

 

" وخاصمنى يا سوهاجى ....... ولا تخلينى أشوف وشك تانى "

 

يا كسوفى يا كسوفى ......... دى سوهاج اللى بتقول مش أنا

[سجده 45]

الله ..الله..الله كل دا حصل و اتقال عليا في الكام ساعه اللي غبت فيهم عن المنتدي

انا و الله دخلت اكثر من مره لكن في كل مره كان يحدث شئ يمنعني من استكمال الرد

 

دكتور احمد و عاشق الصداقه و اضح ان اللي انا بعملوا في منتدي الشكاوي بطلعوه عليا هنا

 

هههههههههههههههه هزار يا جماعه والله

 

 

المهم

 

اولا :بجد و الله انا مش زعلانه من كلامكم خالص بل بالعكس انا اكتر انسانه تتقبل النقد بصدر رحب

 

واعتقد ان ما يدعو للزعل فعلا هو ان يكون لديكم رد او نقد و لا تخبروني به

 

ساعتها بجد هزعل جدا لان معلش يمكن اكون هبالغ شويه لو قلت اني اعتبرها مسأله امانه

 

اسعد جدا لرأي اي عضو حتي لو كان به نقد لان في الاخر اكيد انا الرابحه من هذه المناقشات

 

فأنا دائما ما اقول لنفسي هذه المقوله وخاصه عند دخولي المنتدي

 

تعلم مني و أتعلم منك و أذا اختلفنا فنحن اخوا

 

ثانيا: دكتور احمد اكيد راي حضرتك سليم ميه في الميه لان اكيد عند وضع سؤال او لغز لاختبار الذكاء

 

لابد من ان تكون له مقاييس و تهيئه خاصه تشمل جميع البشر او اضعف الايمان انها لن تقيس جانب و تهمل الاخر

 

وهذه لها المتخصصون لوضعها

اما انا فلم اضع سؤالئ إلا لتشغيل المخ ليس إلا خاصاً انها فرصه بعد الانتهاء من الامتحانات

 

المهم يعني هو ان حضرتك و بعد ما اسمعتني من كلام جعلني..... والا بلاش

 

حضرتك لم تحاول حتي مجرد التفكير في السؤال يمكن تكون معتقد انه سؤال تافه

 

بس هقولك حاجه تعال ننظر له نظره تانيه وانسي كل الكلام اللي اتقال

 

اعتبر نفسك انك في موقف و مطلوب منك انك تخرج منه

 

اعتقد كدا شكل السؤال تغير و اصبح مهم خاصه لو اننا اعتبرنا انه تدريب علي الخروج من المشاكل...واللا ايه؟

 

 

أخي عاشق الصداقه

 

كلامه فيه جانب كبير جدا من الصحه و انها فعلا ليست إلا امور جذب للقارئ

 

بل اني فعلا متاكده انها ليست من تأليف اينشتين ، لسبب بسيط جدا

 

(هو ان يعني الراجل كان فاضي قوي للالغاز والكلام دا) و ثم انه اكيد لم يكن يعلم ان اللغز سيصل لعام2010

 

وتحديداً يصل لمنتدانا لانه لو علم بدخول اللغز المنتدي كان سيعلم انه هتتحل يعني هتتحل

ههههههههه

 

اكيد كان يشير ب98% لابناء جيله مش احنا يعني

 

 

المهم شكلي طولت عليكم

 

 

نيجي بقي للحل

 

 

بعيداً عن عم حسنين النجار(اللي انا عارفاه كويس و واثقه انهم لم يلجؤا له) و فقد نجح ذئاب الجبل في حل جانب

 

كبير من اللغز

 

 

ولكن للاسف لم يتمكنوا من حل الجانب الاخر بشكل صحيح

 

 

 

و انا لن اصرح عن الصح و الخطأ لكي يعيدو التفكير مره اخري و اتمنا انها تكون الافضل

 

 

فكروا تاني و ياريت لو في فريق منافس لفريق ذئاب الجبل

 

علشان نثبت لعم اينشتين دا انه كان غلطان و ان احنا شباب جامد مش هو لوحدوا

 

 

تحيتي للجميع

 

 

 

 

تم تعديل February 3, 2010 بواسطه سجده

[dr_mido 53]

يا باشا يا باشا ... بسم الله ما شاء الله عليك (عاشق الصداقة)

 

أنا كنت بحل اللغز والله بس لقيت في حلك أن (السويدي) مش موجود في حلك خالص

 

فلما قعدت فكرت فيه ودققت في حلك لقيت إنك مكرر (النرويجي) مرتين

 

ف (السويدي) مكان (النرويجي) الأول

 

وكده يبقي حلك تمام وبسم الله ما شاء الله عليك

 

موفق حبيبي وأخي في الله وربنا يديم عليك نعمته إن شاء الله

 

أخوك في الله

dr_mido

[dr_mido 53]

يا باشا يا باشا ... بسم الله ما شاء الله عليك (عاشق الصداقة)

 

أنا كنت بحل اللغز والله بس لقيت في حلك أن (السويدي) مش موجود في حلك خالص

 

فلما قعدت فكرت فيه ودققت في حلك لقيت إنك مكرر (النرويجي) مرتين

 

ف (السويدي) مكان (النرويجي) الأول

 

وكده يبقي حلك تمام وبسم الله ما شاء الله عليك

 

موفق حبيبي وأخي في الله وربنا يديم عليك نعمته إن شاء الله

 

أخوك في الله

dr_mido

[Dr.A7MD 130]

منورة أختى سجده

 

الحمد لله أن ردى مزعلكيش

 

المهم يعني هو ان حضرتك و بعد ما اسمعتني من كلام جعلني..... والا بلاش

 

حضرتك لم تحاول حتي مجرد التفكير في السؤال يمكن تكون معتقد انه سؤال تافه

 

بس هقولك حاجه تعال ننظر له نظره تانيه وانسي كل الكلام اللي اتقال

 

اعتبر نفسك انك في موقف و مطلوب منك انك تخرج منه

 

اعتقد كدا شكل السؤال تغير و اصبح مهم خاصه لو اننا اعتبرنا انه تدريب علي الخروج من المشاكل...واللا ايه؟

 

والله ما رضيت أفكر فيه حالياً ولا اتعب نفسى فيه لأنه ليا يومين تعبان وواخد دور التهاب لوز جامد وصداع

 

فلو ركزت دماغى فى حاجه بجد ألاقى دماغى فصلت ونمت يومين وراها ... خصوصا لما يكون السكر منخفض عندى شوية

 

فقلت لما أفوق شوية أركز فيه .... خصوصاً أنى من هواة الحاجات اللى زى دى

 

مكنش السبب أنى فاكر أنه هايف والله

 

ولو مستعجلة على حل اللغز ... مؤقتاً يعنى ممكن أجيبلك فريق رضع من مدرسة اللغات جمبنا ينافس ذئاب الجبل

 

ولكن للاسف لم يتمكنوا من حل الجانب الاخر بشكل صحيح

 

قلتله ... عم حسنين النجار اداك بضاعة مش قد كدا ومصدقنيش [ احساس الأم بقى ] ...

 

شوفى كدا يمكن الخطأ اللى عدله دكتور ميدو يكمل الحل ويخليه صحيح ..

 

جزاكى الله خيراً أختى سجده ... شغلتى دماغنا وخلتينا نضحك مع بعض شوية

تم تعديل February 3, 2010 بواسطه Dr.A7md

[سجده 45]

السلام عليكــم ورحمـة الله وبركاتــة ،،

 

 

الف سلامه عليك دكتور احمد

 

حاول ترتاح و ان شاء الله خير

. مؤقتاً يعنى ممكن أجيبلك فريق رضع من مدرسة اللغات جمبنا ينافس ذئاب الجبل

 

 

علي فكره كدا خطر عليك لان كدا صعايده المنتدي هيعملوا هجوم عليك

يعني مش هتبقي التهاب لوز و صداع بس ..... خد بالك كلو الا زعل الصعايده

هههههههههههههه

 

دكتور ميدو تحياتي لك علي دقه ملاحظتك ..ما شاء الله

 

هو فعلا الحل صحيح لكن تكرار النرويجي قلب الدنيا

 

انا قلت اسيبهم يركزوا شويه لان الخطأ كان واضح

 

وعل راي دكتور احمد لما قال

 

الكبير كبير برضو

 

يعني لو مش الادمن هيحلها مين هيحل

 

 

تحيتي لفريق ذئاب الجبل و لدكتور ميدو بعد انضمامه لهم

 

 

تحيتي للجميع

 

والسلام عليكــم ورحمـة الله وبركاتــة ،،

تم تعديل February 3, 2010 بواسطه سجده

[ali desoky 391]

السلام عليكم يا شباب

قصدي يا ذئاب

 

ممكن ادخل بس واقولكم حاجه

رغم ان ده شغل الفريق الاداري

 

شايفكم بتقطعوا بعض

علي لغز اتحل قبل كده

 

اللغز ده تكرر واتحل في المنتدي مرتين قبل كده

 

المرة الاولي

http://forums.yallagroup.net/index.php?sho...c=975&st=20

 

 

المرة التانية

http://forums.yallagroup.net/index.php?sho...%D4%CA%C7%ED%E4

 

 

 

اسف لتدخلي

ولكن كان لابد من فك الاشتباك بين

ذئاب الجبل

 

تحيتي وتقديري

تم تعديل February 3, 2010 بواسطه alidesoky