ياحسود ارجع ورا خلى الشمعة منورة
ياجماعة عايز حد يفهمني... ايه العلاقة بين الحسد ورقم خمسة ليه كل ماتكلم واحد مصري اصيل تلاقيه يرصلك دستة خمسات من اول راتبه ابو 250 جنيه اساسي و50 اضافي,والغسالة اللي بالفين وخمسمائة جنيه. وكمان التلاجة ال15 قدم والموبيل موديل(5550).
طبعا هذا المصري الاصيل تلاقيه محصن نفسه طول الوقت من الحسد والحاسدين بترسانة من التعاويز تبدا بالكف ابو خمس صوابع على كل باب البيت(لانه لو كان باربع صوابع ماكنش ممكن يصد الحسد)
والخرزة الزرقا اللي كل ست معلقاها في رقبتها او لزقاها في الخاتم واكيد مش حننسى الافراح والليالي الملاح اللي لازم تكون يوم الخميس, وطبعا منقدرش ننسى يوم الخميس خمسة وعشرين خمسة الفين وخمسة(25\5\2005) لانه يوم مشهود وعالمي حيث تجمعت فيه اكبر عدد ممكن من الخمسات وانحجزت فيه كافة قاعات الافراح لانه يوم بركة.
المدرسة الرمزية في اتقاء العين الرضية
وتعالو نروح لسواقين التاكسي اللي يمثلون المدرسة الرمزية في اتقاء شر الحسد والحاسدين فمثلا تجد (صندل) صغير معلق اسفل اكصدام التاكسي او تجد مثلا حدوة حصان وكل دي طبعا رموز تعاويذ سرية تلعب دورا محوريا في قصف عين اي حسود يفكر انه يحسد الفوانيس المكسرة اساسا او الشكمان اللي عامي الشارع كله.
عفاريت الاسفلت
سيبك من المدرسة الرمزية في اتقاء العين الرضية.وادخل معايا على عفاريت الاسفلت وملوك الطريق الصحراوي والزراعي يعني اجدع سلام وتحية لسواقين اللوري, ودول بقى مايحبوش اللف والدوران... يعني كلامهم صريح وعلى( ميه بيضا) فمثلا تجد لوري مكتوب عليه عبارة(ياناس ياشر كفاية قر) ودا يحسسك ان الراجل ياعيني بيعاني فعلا من الحسد بجد. ولوري تاني تلاقيه مكتوب عليه( العين صابتني ورب العرش نجاني), ياعيني عليك يابواحمد... احم احم .... عفوا ..اما بقى السواق اللي مدندش او مروش اللوري بتاعه تلاقيه كاتب(ماتبصليش بعين رضيه, وشوف اللي مدفوع فيا).
الطبقة الهاي لايف المثقفة
اما شباب الجامعات بتوع الشعر( السبايكي) والباديهات (جمع بادي) والايشاربات الاورانج والتركواز, والجينز او حزام زي (قايش الجيش) , وقوم اقف وانت بتكلمني وكده يعني....
دول بقى الحسد بينهم بيكون عالمذاكرة , ومين( بيدح ويموس بكسر الواو ووضع شدة )...من اول السنة وفلانة قفلت كام مادة وفلان اللي ماشي زي الموس وبيجيب امتياز كل سنة.
وطبعا خطة دفاع المويسة او الدحيحة تعتمد على مجموعة من الكفوف والخرز الازرق وبعض التلميحات الهامة التقليدية زي
(جبت 18.5 من عشرين) وذاكرت امبارح خمس ساعات.
ياترى ليه احنا دايما عندنا شعور اننا محسودين ليل ونهار وليه لما الطالب الفاشل يسقط نقول (الواد اتحسد) ولما البنت تتفسخ خطوبتها
نقول(حسدوها العزال) . طبعا الحسد مذكور في القران وموجود
بس مش معنى كده ان نعلق فشلنا عالحسد وناخده حجة ولا نبالغ في الخمسات والخرز زي مابنشوف. وبعدين نبقى معندناش حاجة ومبنعملش حاجة ونقول محسودين طب على ايه ياحسرة.
شكرا وارجو ان تشاركوني الاراء وشكلي كده هنطرد قريب من المنتدى.